LE AUALA E TAOFIA AI LE FEITAGAʻI
3 | Ia Liaʻiese le Ita Mai i Ou Mafaufauga
Aʻoaʻoga a le Tusi Paia:
“Ia liliu e ala i le suia o o outou mafaufau, ina ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.”—ROMA 12:2.
Le Uiga:
E tāua i le Atua le auala e tatou te mafaufau ai. (Ieremia 17:10) E iai nisi mea e sili atu e manaʻomia ona tatou faia nai lo o le tau ina ʻalofia o le fai atu po o ni gaoioiga e faapogaia ai le ita. O le ita e amata mai i o tatou mafaufau ma loto. O lea, e tatau ona liaʻiese so o se mea e faapogaia ai le ita mai i o tatou mafaufau. O le faia faapea, o le a taofia ai le ita.
Mea e Mafai Ona E Faia:
Ia mafaufau loloto i le auala e te manatu ai ma ou faalogona e faatatau i isi, aemaise i latou e ese lanu po o atunuu. Ia fesili ifo: ʻO le ā laʻu vaaiga iā i latou? Pe e faavae oʻu manatu i mea ua ou iloa e faatatau iā i latou? Pe e faavae i le faailoga tagata?’ Ia ʻalofia ata po o faafiafiaga e faaauiluma ai le ita ma faiga sauā.
E mafai ona fesoasoani le Afioga a le Atua iā i tatou e manumalo i le ita o loo i o tatou mafaufau ma loto
E lē faigofie i taimi uma le iloiloina ma le saʻo o tatou lava mafaufauga ma faalogona. Ae e mafai e le Afioga a le Atua ona fesoasoani iā i tatou, e “faamasino i manatu ma faanaunauga o le loto.” (Eperu 4:12) O lea, ia suʻesuʻe pea le Tusi Paia. Ia faatusatusa aʻoaʻoga o loo iai ma ou mafaufauga, ona fai lea o le mea e mafai e faaōgatusa ou mafaufauga ma aʻoaʻoga a le Tusi Paia. E mafai ona fesoasoani le Afioga a le Atua iā i tatou e manumalo i le ita, lea “ua matuā mautū” i o tatou mafaufau ma loto.”—2 Korinito 10:4, 5.