E te Silafia?

Aiseā na tatau ai i tagata Isaraelu anamua, ona totogiina le tau o se tamaʻitaʻi faaipoipo?

I TAIMI o le Tusi Paia, e avatu le tau o le tamaʻitaʻi faaipoipo i lona aiga i le taimi e sauniuni ai le faaipoipoga. Atonu e aofia i lenā tau mea tautele, manu po o tupe. O nisi taimi e totogi e ala i le galue mo se tagata, e pei ona tupu iā Iakopo. Na ioe o ia e faigaluega mo le tamā o Rasela, ina ia mafai ona faaipoipo iā Rasela. (Kene. 29:17, 18, 20) O le ā le fuafuaga o le totogiina o le tau o se tamaʻitaʻi faaipoipo?

Ua taʻua Carol Meyers o se faitofā o le Tusi Paia: “O le tau o le tamaʻitaʻi faaipoipo na avatu i lona aiga, atonu na totogi ai galuega na tatau ona ia faia i le faatoʻaga a lo latou aiga.” Atonu foʻi na fesoasoani le tau o le tamaʻitaʻi faaipoipo, e faamalosia ai le faiā i le va o le aiga o le tama ma le aiga o le teine faaipoipo. E fesoasoani na faiā faaleaiga pe a feagai ma taimi faigatā. E lē gata i lea, o le tau o le tamaʻitaʻi faaipoipo e faamaonia atu ai ua faamau le tamaʻitaʻi, ma o le a tausia ma puipuia o ia e lana tane nai lo lona tamā.

O le totogiina o le tau o le tamaʻitaʻi faaipoipo, e lē faapea ai e mafai ona faatau mai pe faatau atu lenā teine. Ua taʻua e le tusi Ancient Israel​—Its Life and Institutions: “O le totogiina atu o se tupe po o nisi mea tāua i le aiga o le teine faaipoipo, e foliga mai ai ua faatau lenā teine faaipoipo. Ae o le tau e totogi atu e lē mo le tamaʻitaʻi faaipoipo, ae mo lona aiga.”

I aso nei, o loo faia pea e nisi atunuu le totogiina o le tau o le tamaʻitaʻi faaipoipo. Pe a talosagaina e mātua Kerisiano se tau o se tamaʻitaʻi faaipoipo, e la te faailoa atu i ʻtagata uma lo la magafagafa’ e ala i le talosaga atu mo se tau talafeagai. (Fili. 4:5; 1 Kori. 10:32, 33) O le faia faapea, e faailoa atu ai e lē o i laʻua o ni “ē e mananaʻo tele i tupe” pe matapeʻapeʻa. (2 Timo. 3:2) Pe a lē talosaga atu foʻi mātua Kerisiano i se tau e matuā taugatā, o le a lē tolopō ai e le tama faaipoipo le faaipoipoga seʻia oo ina lava tupe e totogi ai le tau o le tamaʻitaʻi faaipoipo. O le a lē faamalosia ai le tama faaipoipo e tuu lana paeonia ae faigaluega faataimi atoa, ina ia maua se tupe telē e totogi ai le tau o le tamaʻitaʻi faaipoipo.

I nisi vaega o le lalolagi e faatulafonoina le tau o le tamaʻitaʻi faaipoipo. Aiseā e usitaʻia ai e mātua Kerisiano na tulafono? Talu ai ona o loo faatonuina e le Afioga a le Atua Kerisiano ina ʻia gauaʻi i faipule silisili,’ ma ia usiusitaʻi i tulafono e lē feteenaʻi ma tulafono a le Atua.​—Roma 13:1; Galu. 5:29.