Feutagaiga o se Tau Talafeagai o le Tamaitai Faaipoipo

I ASO nei, e pei o taimi o le Tusi Paia, o nisi o aganuu e manaomia ai le totogia o le tau o le tamaitai faaipoipo a o lei faaipoipo atu se alii i se tamaitai. Sa faapea atu Iakopo ia Lapana le tamā o lana avā lea o le a fai i le lumanai, “Ou te auauna ia te oe i tausaga e fitu ona o Rasela lou afafine aupito itiiti.” (Kenese 29:18) Ona o le alofa o Iakopo ia Rasela, sa ia ofoina atu ai se tau telē—e tutusa ma le totogi o tausaga e fitu e faigaluega ai! Sa talia e Lapana le ofo peitai sa fai lana togafiti ia Iakopo ina ia faaipoipo muamua atu ai i lona afafine matua, o Lea. Sa faaauau ai lava faapea ona faapiopio Lapana i ana feutagaiga ma Iakopo. (Kenese 31:41) O le faamamafaga na tuu atu e Lapana i le mauaina o meafaitino na māfua ai ona lē faaaloalogia o ia e ona afafine. Sa la fesili faapea: “E le ua avea ea i maua ma tagata ese ia te ia? auā ua faatauina i maua e ia, ua matuā faaumatia foi e ia a maua ario.”—Kenese 31:15.

E faanoanoa ai ona o le lalolagi matapeapea i aso nei, o le toatele o mātua ua pei o Lapana. Ma o nisi ua sili atu ona leaga. E tusa ai ma se faamatalaga a se nusipepa a Aferika, o nisi o faaipoipoga ua feutagai “tau lava ia mauaina ai e tamā matapeapea ni o latou lelei.” O se isi vala, o faafitauli tau tupe ia ua maileia ai nisi o mātua e vaai i a latou fanau teine o se auala e faamāmā ai faigata tau tupe.a

O nisi o mātua e latou te taofiofia le faaipoipo atu o a latou fanau teine ona e latou te faatalitali mo se ofo aupito i sili ona maualuga. E mafai e lenei mea ona tutupu ai faafitauli matuia. Sa tusia e se tagata e lipotia tala fou a se nusipepa e mau i Aferika i sasaʻe e faapea: “Ua filifili tagata talavou e avavaga ina ia alofia ai le tele naua o oa e talosagaina mai e aiga o i latou o le a faaipoipo atu i ai.” O amioga lē mamā faaleituaiga o se tasi o faafitauli ua māfua ona o le tagisā mo se tau e matuā maualuga o le tamaitai faaipoipo. E lē gata i lea, o nisi o tama talavou ua gafatia ona faatau se avā ae ua tuua ai ma se aitalafu e matuā telē lava. Na uunaia e se tagata faigaluega i le vafealoai i Aferika i Saute e faapea: “E tatau i mātua ona fetuutuunai. E lē tatau ona soona tagisā i ni tau e matuā tetelē. E manaomia e le ulugalii fou faatoʻā faaipoipo ona ati ae lo la olaga . . . O lea la aisea e faamativaina ai lenei tane talavou?”

E mafai faapefea e mātua Kerisiano ona faataatia se faataitaiga o le fetuutuunai pe a oo ina feutagai mo le totogi po o mea e mauaina mai i se tau o le tamaitai faaipoipo? O se mataupu lenei e tatau ona manatu mamafa i ai, auā ua faatonuina i le Tusi Paia: “Ia iloa lo outou agamalu [“fetuutuunai,” NW] e tagata uma lava.”—Filipi 4:5.

O Mataupu Silisili Talafeagai Faale-Tusi Paia

Pe e mananao mātua e feutagai mo le tau o le tamaitai faaipoipo pe leai o se mataupu e faia i ai se filifiliga totino. Afai la e latou te manatu e faia faapea, e tatau la i na feutagaiga ona faia ia ogatusa ma mataupu silisili faale-Tusi Paia. “Ia aunoa a outou amio ma le matapeapea,” o le faamatalaga lena a le Afioga a le Atua. (Eperu 13:5) Afai e lē o aliali mai lenei mataupu silisili i feutagaiga o le faaipoipoga, ua faailoaina mai la e se matua Kerisiano o ia e lē o se faataitaiga lelei. O tane e i tulaga aloaia i le faapotopotoga Kerisiano e ao ona “fetuutuunai,” ia lē “matapeapea i tupe” po o se “tuinanau ia maua mea i se auala lē faamaoni.” (1 Timoteo 3:3, 8, NW) O se Kerisiano e tuinanau ma lē salamō ae uunaia pea se tau maualuga tele mo le tamaitai faaipoipo e ono oo ina faateaina mai i le faapotopotoga.—1 Korinito 5:11, 13; 6:9, 10.

Ona o faafitauli ua māfua mai i le tuinanau, ua faia ai e nisi malo ni tulafono ia e faatulagaina ai tapulaa i le tau o le tamaitai faaipoipo. Mo se faataitaiga, o se tulafono i le atunuu o Togo i Aferika i Sisifo ua taʻua ai faapea o le tau o le tamaitai faaipoipo e “mafai ona totogiina i ni mea faitino po o ni tupe po o mea uma na e lua.” Ua faaopoopo mai le tulafono: “E lē tatau ona sili atu le aofaiga o le tau ma le 10,000 F CFA (20.00 tālā Amerika).” Ua faatonuina pea lava pea e le Tusi Paia Kerisiano ia avea ma tagatanuu e tausi tulafono. (Tito 3:1) E tusa lava pe lē faamalosia e le malo ia sea tulafono, e manao pea le Kerisiano moni e usitaia ia tulafono. O le a ia faatumauina ai se loto fuatiaifo lelei i luma o le Atua ma o le a lē avea ai o ia ma mafuaaga e tautevateva ai isi.—Roma 13:1, 5; 1 Korinito 10:32, 33.

O Ai e Paʻū i ai le Matafaioi o le Faia o Feutagaiga?

I nisi o aganuu, o le auala e feutagai ai i le tau o le tamaitai faaipoipo e mafai ona lē fetaui ma se isi mataupu silisili tāua. E tusa ai ma le Tusi Paia, o le tamā e gafa ma mea e tutupu i lona auaiga. (1 Korinito 11:3; Kolose 3:18, 20) O lea la, o i latou o loo i tulaga aloaia i le faapotopotoga o ni tane e “pule lelei i la latou fanau ma o latou lava aiga.”—1 Timoteo 3:12.

Peitai, atonu o se faiga masani i le nuu le tuu atu i tauaiga o le ulu o le aiga e faia feutagaiga tāua mo le faaipoipoga. Ma o nei tauaiga latou te manaomia mai se vaega o le tau o le tamaitai faaipoipo. O lenei mea o le a tuuina atu ai se tofotofoga i tauaiga Kerisiano. Ona o le aganuu, o nisi o ulu o aiga ua latou faataga tauaiga lē talitonu e faatulaga se tau telē lava. Ua avea lea ma mea ua oo ina faaipoipo atu ai se teine Kerisiano i se tagata lē talitonu i nisi taimi. O lena mea ua lē ogatusa ma le faalaeiauga faapea e tatau i Kerisiano ona faaipoipo atu “tau lava i le ua i le Alii.” (1 Korinito 7:39) O se ulu o se aiga e na te faatagaina tauaiga lē talitonu e faia filifiliga ia e faamaonia le faaleagaina ai o le lelei faaleagaga o lana fanau e lē mafai ona vaai i ai “o lē pule lelei i lona lava aiga.”—1 Timoteo 3:4.

Ae tusa ai ma le tulaga o le tamā matua amioatua o Aperaamo, e faapefea pe afai e lē feutagai tuusaʻo se tamā Kerisiano i le feutagaiga tau i le faaipoipoga a se tasi o lana fanau? (Kenese 24:2-4) Afai ua tuu atu i se tasi e faia lenei mea, e tatau i le tamā Kerisiano ona faamautinoa o loo mulimuli atu le tagata lea i faatonuga ia e ogatusa ma mataupu silisili talafeagai a le Tusi Paia. E lē gata i lea, a o lei amata ona gaoioi e feutagai i le tau o le tamaitai faaipoipo, e tatau i mātua Kerisiano ona mafaufau ma le faaeteete lelei ina ia aua neʻi faatagaina i laʻua e soona aafia e ala i aganuu lē mafaufau po o le soona tagisa.—Faataoto 22:3.

Alofia Uiga e Lē Faa-Kerisiano

E tausalaina e le Tusi Paia le mitamitavale ma le “faalialia o lenei olaga.” (1 Ioane 2:16; Faataoto 21:4) Peitai, o nisi tagata o loo faatasitasi ma le faapotopotoga Kerisiano ua latou faia ia uiga i a latou feutagaiga tau i le faaipoipoga. O nisi ua latou pei o le lalolagi i le faalialia o le tau po o mea e tele ua maua i le tau o le tamaitai faaipoipo. I le isi itu, na lipotia mai e se tasi o ofisa o lālā o le Sosaiete o le Olo Matamata i Aferika e faapea: “O nisi o tane ua latou lē faaalia se faaaloalo ina ua taumafai le aiga o le tamaitai faaipoipo e faia i se tulaga talafeagai lo latou manaoga, ma vaai ai i a latou avā ‘e maulalo ona ua faatauina i latou i se tau maulalo.’”

O le matapeapea mo se tau telē ua maileia ai nisi o Kerisiano ma ua taitaiina atu ai i ni iuga pagatia. Mo se faataitaiga, seʻi mafaufau i le lipoti lenei mai i le isi ofisa o le lālā o le Sosaiete o le Olo Matamata: “O le tulaga masani e faigata tele mo uso nofofua ona faaipoipo, po o tuafafine ona mauaina ni paaga. O le iuga ua faatoateleina le aofaiga ua faateaina ona o amioga lē mamā faaleituaiga. O nisi o uso ua latou o atu i nofoaga e eli ai le palapala e sailia ai le auro po o taimane ina ia mafai ai ona latou faatauina atu ina ia lava ai se oa e faaipoipo ai. Atonu e faaalu ai le tasi po o le lua tausaga po o le sili atu foi, ma e masani lava ona oo atu ai ina vaivai faaleagaga a o latou o ese atu mai le aufaatasiga ma uso ma le faapotopotoga.”

Ina ia alofia na iuga faanoanoa, e ao i mātua Kerisiano ona mulimuli atu i faataitaiga a i latou e taʻumatuaina i le faapotopotoga. E ui lava o le aposetolo o Paulo e lē o se matua, ae sa fetuutuunai lelei ana feutagaiga ma tagata talitonu. Sa ia faaeteete e alofia le soona tuuina atu o avega mamafa i so o se tasi. (Galuega 20:33) E mautinoa, e tatau i mātua Kerisiano ona manatunatu lelei i ana faataitaiga lē manatu faapito i feutagaiga i le tau o le tamaitai faaipoipo. O le mea moni, sa faagaeeina tauatua le aposetolo o Paulo e tusi: “Le au uso e, ia outou faaaʻoaʻo faatasi mai ia te au, ia outou vaavaai foi i e o savavali faapea, faapei ona fai o i matou ma faaaʻoaʻo ia te outou.”—Filipi 3:17.

Faataitaiga o le Fetuutuunai

E tusa ai ma feutagaiga tau i le faaipoipoga, o le toatele o mātua Kerisiano ua latou faataatia se faataitaiga lelei o le fetuutuunai. Seʻi mafaufau ia Iosefa ma lana avā, o Mae, o ē auauna faataimi atoa o ni faievagelia.b E nonofo i laʻua i se tasi Motu o Solomona lea e avea ai feutagaiga o le tau o le tamaitai faaipoipo o se faafitauli i nisi o taimi. Ina ia alofia na faafitauli, sa faatulaga ai e Iosefa ma Mae la la tama teine o Elena e faaipoipo i se motu tuaoi e latalata ane. Sa la faia foi faapea i le isi a la tama teine o Eseta. Sa malie foi Iosefa e totogi e Peteru le tane a lona afafine se tau matuā maulalo lava na i lo se tau fetaui e masani ona faatalitalia o le tamaitai faaipoipo. Sa fesiligia pe aisea na ia faia ai faapea, na faamatalaina e Iosefa faapea: “Sa ou lē manao e tuuina atu se avega mamafa i le tane a loʻu afafine o se paeonia.”

O le toatele o Molimau a Ieova i Aferika ua latou faataatia se faataitaiga lelei o le fetuutuunai. O nisi o vaipanoa, e masani ona faatalitalia e tagata o le aiga lautele e totogi atu muamua ia i latou se tupe telē e faatatau i le feutagaiga o le tau saʻo o le tamaitai faaipoipo. Ma ina ia faamautinoa o le a la nonofo ma le teine, e ono faatalitalia le tama faaipoipo e folafola atu e faapea o le a ia totogia le tau o le teine o le a fia faaipoipo i ai le tuagane laitiiti o le teine lea o le a ia faaipoipo atu i ai.

I se faaeseesega, seʻi manatu i le faataitaiga a Kose ma lana avā, o Mara. Sa faaipoipo talu ai nei la la tama teine, o Beboko, i se ovasia femalagaai o Molimau a Ieova. A o lei faia le faaipoipoga, sa matuā uunaia e tauaiga i laʻua ia latou mauaina se tau telē o le tamaitai faaipoipo. Peitai, sa mausalī mātua ma sa la lei lolo atu i na uunaiga. Na i lo lena, sa la feutagai tuusaʻo ma lē o le a avea ma tane a le la tama teine, ma talosagaina se tau itiiti lava mo la la tama teine ma sa toe faafoi atu le ʻafa o le tau ia i laʻua e faaaogā e sauniunia ai mea mo le aso o le la faaipoipoga.

O se isi faataitaiga i le atunuu lava lena e aofia ai se Molimau talavou e igoa ia Itongo. Muamua lava, sa talosagaina e lona aiga se tau talafeagai o le tamaitai faaipoipo. Peitai na faamalosia e tauaiga ina ia toe tuu i luga le tau. Na oo ina matuā faifai tetele, ma na foliga mai o le a fai lava le manaoga o nei tauaiga. E ui ina matamuli i lona olaga masani, ae sa tulai atu ma le faaaloalo Itongo ma faapea atu, ua ia maumauai e faaipoipo atu i se Kerisiano maelega e igoa ia Sanze, e tusa ai ma le mea ua uma ona fuafuaina. Ona ia faapea atu lea ma le matuā lototele, “Mbi ke” (o lona uiga, “Ua iu ai iina le mataupu”) ma ia nofo loa i lalo. Sa lagolagoina o ia e lona tinā Kerisiano, o Sambeko. Na leai se isi toe talanoaga na faia, ma sa faaipoipoina i laʻua e pei ona uluai fuafuaina.

O loo iai mea o loo popole i ai mātua alolofa Kerisiano e sili atu na i lo mea totino e maua mai i le tau o le tamaitai faaipoipo. Sa faamatalaina e se tane i Cameroon e faapea: “E faaaogā e le tinā o laʻu avā so o se avanoa e taʻu mai ai ia te au faapea so o se mea lava na ou fia tuuina atu ia te ia o se tau o le tamaitai faaipoipo, e tatau ona ou faaaogaina e tausia ai mea e manaomia mo lana tama teine.” O mātua alolofa e manatu mamafa foi i le lelei faaleagaga o a latou fanau. Mo se faataitaiga, seʻi manatu ia Farai ma Rudo, o loo nonofo i Zimbabwe ma faaalu se taimi tele i le galuega o le talaʻia o le tala lelei o le Malo o le Atua. E ui o i laʻua e lē o ni tagata e faigaluega totogi, ae sa la tuuina atu o la alo teine e toalua e faaipoipo mo se tau matuā maulalo na i lo le tau e masani ona talosagaina. O le ā le la mafuaaga? Sa la mananao ia maua e a la fanau teine aogā mai ia la faaipoipoga i tane ia e alolofa moni ia Ieova. Sa la faamatalaina faapea: “O le mea e ma te manatu i ai e sili atu ona tāua o le itu faaleagaga o la ma fanau teine ma o la taitoalua.” Maeu le faagaeetia ai! E matuā faamālō atu i mātua o loo faaalia le manatu mamafa mo le lelei faaleagaga ma le faaletino o a latou fanau ua faaipoipo.

O Aogā o le Fetuutuunai

O Iosefa ma Mae mai le atunuu o Solomona sa faamanuiaina mo le auala agalelei ma le faaeteete na taulimaina ai faaipoipoga a le la fanau teine. O lea, sa lei tuuina atu ai ni aitalafu i tane a la fanau teine. O lea la, o nei ulugalii e toalua sa mafai ona faaaluina le tele o tausaga i le auaunaga faataimi atoa i le talaʻia o le Malo. I le toe tepa i tua, ua faamatala e Iosefa faapea: “O faaiuga ia sa ou faia ma loʻu aiga ua maua mai ai faamanuiaga e sili ona lelei. E moni, o nisi o taimi sa iai ni omiga se tele mai ia i latou sa lē malamalama, peitai o loo lelei loʻu loto fuatiaifo ma olioli i le vaai atu i laʻu fanau o loo pisi ma malolosi i le auaunaga ia Ieova. O loo fiafia foi i latou, ma o aʻu faapea foi ma laʻu avā ua sili atu lo ma fiafia.”

O se isi aogā, o le iai o se faiā lelei i le va o aiga e lua. Mo se faataitaiga, o Zondai ma Sibusiso e galulue tauofo ma a la avā, o se auso, i le lālā i Zimbabwe a le Sosaiete o le Olo Matamata. O le tamā o a la avā, o Dakarai, o se tagata talaʻi faataimi atoa ae lē faigaluega totogi. I le taimi o feutagaiga o le tau o tamaitai faaipoipo, sa ia faapea atu, e na te taliaina so o se mea lava la te mafaia. “E ma te alolofa tele i le tamā o a ma avā,” o faamatalaga na a Zondai ma Sibusiso, “ma e ma te faia mea uma e fesoasoani ai ia te ia pe a iai se mea e na te manaomia.”

Ioe, o le fetuutuunai i feutagaiga i le tau o le tamaitai faaipoipo e saosaolaumea i le fiafiaga o le aiga. Mo se faataitaiga, o le a lē nofo aitalafu ai ē ua faatoʻā faaipoipo, ma faafaigofie ai mo i latou ona faamasani i le olaga faaipoipo. Ua faapea ona mafaia ai e le tele o ulugalii talavou ona sailia faamanuiaga faaleagaga, pei o le auaunaga faataimi atoa i le galuega faanatinati o le talaʻiga ma le faia o soo. O le iuga, e faamamaluina ai Lē e agaalofa na Amataina mai faaipoipoga, o Ieova le Atua.—Mataio 24:14; 28:19, 20.

[Faaopoopoga i lalo]

[Pusa i le itulau 27]

SA LATOU TOE FAAFOI LE TAU O LE TAMAITAI FAAIPOIPO

I nisi o vaipanoa, e vaai maulalo ai i se tamaitai faaipoipo ma ona mātua pe afai e maulalo le tau o le tamaitai faaipoipo. O lea la, o le faamaualuga ma se faanaunauga e faalialia le tulaga o le aiga e uunaia ai i nisi taimi feutagaiga i se tau telē lava. O se aiga i Lagos, i Nigeria, ua aumaia ai se eseesega e faafouina ai. Ua faamatalaina faapenei e Dele o le tane a la la tama teine:

“Na tuusaoloto aʻu e le aiga o laʻu avā mai i le tele o tupe faaalu i le faia o le aganuu o le tuuina atu o le tau o le tamaitai faaipoipo, e pei o le faatauina o ofu taugata e sui ai. E oo foi ina ua tuuina atu e lo matou aiga le tau o le tamaitai faaipoipo ia i latou, sa fesili mai la latou failauga: ‘Tou te mananao e aveina lenei teine e avea o se avā po o se afafine?’ Sa tali faatasi atu lo matou aiga: ‘E matou te mananao e avea o ia o se afafine.’ Ina ua uma lena, ona toe faafoi mai lea ia i matou o le tau o le tamaitai faaipoipo i le teutusi lava lea e tasi.

“E oo mai i le asō, ou te talisapaia aiga o laʻu avā i le auala na taulimaina ai la ma faaipoipoga. Ua avea lea ma mea ua ou matuā faaaloalo ai ia i latou. O la latou vaaiga sili faaleagaga i mea, na ou vaai ai ia i latou o ni oʻu aiga vavalalata. Sa iai foi sona aafiaga tele i le auala ou te vaai ai i laʻu avā. Ua ou atiina ae ai se talisapaia loloto mo ia ona o le auala na taulimaina ai aʻu e lona aiga. Pe a iai ni o ma feeseeseaiga, ou te lē faatagaina ia mea e avea ma se faafitauli. O le taimi lava ou te manatua ai le aiga lea e sau ai laʻu avā, e faaitiitia ai foi feeseeseaiga.

“O loʻu aiga ma lona aiga ua oo ina matuā mausalī sootaga o le faauooga. E oo mai lava i le taimi nei, ua lua tausaga talu ona ma faaipoipo, e auina atu pea e loʻu tamā meaalofa ma meaʻai i le aiga o laʻu avā.”