Na Ou Faatagaina Ieova e Taʻitaʻia Loʻu Ala

MAI I EGELANI I AFERIKA

Na ou fanau i Darlaston i le 1935 o se vaega o le vaipanoa o Egelani, e taʻua o le Black Country. Na faaigoa lenā vaipanoa o le Black Country, ona o le uliuli o le asu mai i falegaosimea. Na amata ona suʻesuʻeina e oʻu mātua le Tusi Paia ma Molimau a Ieova, i le fā o oʻu tausaga. Pe ā ma le 15 o oʻu tausaga na ou mautinoa ai ua ou maua le upu moni, ma na ou papatiso ai loa i le 1952 ina ua 16 oʻu tausaga.

I le taimi lenā, na amata ai ona toleni aʻu o se failautusi i se falegaosimea telē, e faia ai meafaigaluega ma vaega o taavale. O se galuega na ou matuā fiafia lava i ai.

Na ou feagai ma se filifiliga tāua ina ua talosagaina aʻu e lo matou ovasia femalagaaʻi, e faia le Suʻesuʻega Tautusi a le Faapotopotoga i la matou faapotopotoga i Willenhall, i le vaipanoa ou te nofo ai. O le taimi lenā o loo oʻu auai i ni faapotopotoga se lua. I le ogatotonu o le vaiaso, ou te auai ai i le faapotopotoga i Bromsgrove lea e latalata i le mea ou te faigaluega ai, pe ā ma le 32 kilomita (20 maila) le mamao mai i loʻu aiga. A o faaiʻuga o vaiaso, ou te auai i le faapotopotoga i Willenhall lea e ō i ai oʻu mātua.

Na ou naunau e lagolagoina le faalapotopotoga a Ieova, ma na ou talia ai le talosaga a le ovasia femalagaaʻi. O lea, na ou tuua ai le galuega e sili ona ou fiafia i ai. O le faatagaina o Ieova e taʻitaʻia laʻu filifiliga i le ala ou te ui ai, na ou maua ai se olaga fiafia ma ou te leʻi salamō ai.

A o oʻu iai i le faapotopotoga a Bromsgrove, na ma fetaui ai ma Anne o se tuafafine aulelei ma o se tagata faaleagaga. Na ma faaipoipo i le 1957, ma na ma olioli faatasi i faaeaga e pei o le paeonia sauatoa, paeonia faapito, galuega femalagaaʻi ma le auaunaga i le Peteli. Na avea Anne o se faamanuiaga i loʻu olaga.

I le 1966, na ma fiafia tele ina ua ma auai i le vasega lona 42 o le aʻoga o Kiliata. Na tofia i maʻua e galulue i Malawi o se atunuu e lauiloa i le agalelei ma le talimālō o ona tagata. E ma te leʻi faatalitalia o le a puupuu se taimi e ma te nonofo ai i inā.

AUAUNA I MALAWI I TAIMI FAIGATĀ

Na ma taunuu i Malawi iā Fepuari 1 i le 1967. Na ma faaaluina le tele o le taimi i le masina muamua e aʻoaʻo ai le gagana, ona amata ai lea o le ma galuega asiasi o se ovasia itumalo. Na ma feoaʻi i le sipi o le ituaiga o le Kaiser. Na manatu nisi e mafai e lenā taavale ona alu i so o se mea e oo lava i le sopoʻia o se vaitafe. Peitaʻi, e na o vaitafe papaʻu e mafai ona alu ai. E iai taimi na ma nonofo ai i fale e fai i palapala, lea e manaʻomia se tapoleni e ato ai pe a timu. E ui e lē o se amataga lelei lea mo le ma galuega faamisionare, ae na ma fiafia i ai!

Iā Aperila, na ou iloa ai o le a matou fesagaʻia faafitauli mai le malo. Na ou faalogo i se lauga a Dr. Hastings Banda o le peresitene o Malawi, i luga o le leitiō. Na ia tuuaʻia ai Molimau a Ieova e latou te lē totogia lafoga ma e faalavelave i faiga faapolotiki. Ae o le mea moni, e sesē na tuuaʻiga. Na matou iloa o le faafitauli moni, o lo matou solitū, aemaise lava lo matou lē faatauina o pepa faalauiloa e lagolagoina ai vaega faapolotiki.

Iā Setema, na matou faitau ai i se nusipepa i le tuuaʻia e le peresitene o o tatou uso, i le faatupu faalavelave i le atunuu atoa. Na ia faasilasila ai i se fonotaga faapolotiki, o le a vave gaoioi lana faigāmalo e faasā Molimau a Ieova. Na amata lenā sā iā Oketopa 20, 1967. E leʻi umi ae taunuu atu leoleo ma sui o le ofisa o femalagaaʻiga e tapuni le ofisa o le lālā, ma toe faafoʻi misionare i o latou atunuu.

Ina ua mavae aso e tolu talu ona faafalepuipui i matou, na ave ai i matou i Mauritius o se atunuu na pulea e Peretania. Peitaʻi, e leʻi faatagaina e le malo o Mauritius i matou e nonofo ai i inā o ni misionare. O lea na ave ai i matou i Rhodesia po o Zimbabwe i aso nei. Ina ua matou taunuu i inā, na matou feiloaʻi ai ma se tagata e ʻinaʻinā e faigaluega i le ofisa o femalagaaʻiga. Na fai mai: “Ua faasā ona outou nonofo i Malawi. E leʻi faatagaina foʻi outou ona nonofo i Mauritius a o lea ua outou ō mai i inei ona e faigofie.” Na tagi Anne, ma e foliga mai e leai se atunuu e talia i matou! I lenā taimi, na ou manaʻo ai ou te toe foʻi i lo matou aiga i Egelani. Mulimuli ane, na faataga i matou e le ofisa o femalagaaʻiga e matou te nonofo i lenā pō i le ofisa o le lālā, ma le tuutuuga e tatau ona ō i le ofisa autū o femalagaaʻiga i le aso e sosoo ai. Na matou lē lavavā ae na matou faalagolago pea iā Ieova. I le aoauli o le aso na sosoo ai, na faataga ai i matou e nonofo i Zimbabwe i pemita o tagata asiasi, o se mea e matou te leʻi faatalitalia. E lē mafai ona galo iā te aʻu oʻu faalogona i lenā aso, ona na ou mautinoa na taʻitaʻia e Ieova lo matou ala.

SE TOFIGA FOU, O LE AUAUNA I MALAWI MAI ZIMBABWE

Na tofia aʻu e le ofisa o le lālā i Zimbabwe, e galue i le Matagaluega o le Auaunaga e vaavaaia le galuega i Malawi ma Mozambique. Na matuā sauāina uso i Malawi. O se tasi o vaega o laʻu galuega, o le faaliliu i le faa-Peretania o lipoti e lafo mai e ovasia o matagaluega i Malawi. I se tasi afiafi a o oʻu galue e faauma le faaliliuina o se lipoti, na ou tagi ai i le leaga o sauāga na oo i oʻu uso ma tuafāfine i Malawi.a Ae na matuā pāʻia foʻi loʻu loto i lo latou faamaoni, faatuatua ma le tumau.—2 Kori. 6:4, 5.

Na matou faia mea uma e mafai ina ia saunia ai meaʻai faaleagaga mo uso na totoe i Malawi, ma i latou na sosola i Mozambique ona o faiga sauā. Na siitia le ʻaufaaliliu i le gagana Chichewa lea e toʻatele tagata Malawi e tautatala ai, i le faatoʻaga telē a se uso i Zimbabwe. Na faaalia e lenā uso le agalelei e ala i le fausia o fale ma se ofisa mo i latou. O i inā na faaauau ai la latou galuega tāua, o le faaliliuina o lomiga faale-Tusi Paia.

Na matou faatulagaina le auai o ovasia matagaluega mai i Malawi i tauaofiaga itumalo e faia i tausaga uma i Zimbabwe, i le gagana Chichewa. Na maua e nei ovasia auivi o lauga mo le tauaofiaga a o latou iai i Zimbabwe. Na latou faia mea uma e faasoa atu ai manatu o le tauaofiaga, ina ua latou toe foʻi i Malawi. I se tasi tausaga a o latou asiasi mai i Zimbabwe, na matou faatulagaina ai se Aʻoga o le Faiva o le Malo e faamalosia ai nei ovasia matagaluega lototetele.

Iā Fepuari 1975, na ou asia ai uso ma tuafāfine mai i Malawi na sosola ma sulufaʻi i Mozambique. Na faaauau pea ona mulimuli uso i faatulagaga a le faalapotopotoga a Ieova, e aofia ai le usiusitaʻi i le taʻitaʻiga a toeaina. Na faatulaga e toeaina fou le tele o galuega faaleagaga, e aofia ai lauga i le lautele, o le iloiloina o le mau o le aso, Le Olomatamata ma fonotaga. Na latou faatulagaina nofoaga na nonofo ai e pei o le faatulagaina o se tauaofiaga. E iai matagaluega faamamā, o le tufatufaina o meaʻai ma le saogalemu. Na faataunuuina e na uso faamaoni le tele o galuega ona o le faamanuia a Ieova, ma na matuā faalaeiauina ai aʻu.

I le pe ā o le 1979, na amata ai ona vaavaaia e le ofisa o lālā i Zambia uso ma tuafāfine i Malawi. Peitaʻi, e leʻi galo iā te aʻu le tulaga o uso ma tuafāfine i Malawi. Na ou tatalo pea mo i latou, ma na faia foʻi faapea e le toʻatele. Na avea aʻu ma se sui o le Komiti o le Lālā i Zimbabwe, ma e tele taimi na matou feiloaʻi ai ma sui o le ofisa ulu, faatasi ai ma uso taʻimua mai i Malawi, Aferika i Saute ma Zambia. O taimi uma e matou te talanoa ai, e tasi a le fesili matou te fesili uma ai, “O ā nisi mea e mafai ona tatou faia mo uso i Malawi?”

A o faagasolo taimi, na faaitiitia ai sauāga. Na toe foʻi i Malawi uso na sosola ese, ae na maua e i latou na nonofo ai pea le mapusaga mai i sauāga ogaoga. I lenā taimi, na faatagaina faaletulafono ai e atunuu tuaoi o Malawi, le toe faatasitasi o tagata o Ieova. Na faia foʻi faapea i Mozambique i le 1991. Ae na matou tomānatu, ʻPo o afea o le a saʻoloto ai Molimau a Ieova i Malawi?’

TOE FOʻI I MALAWI

Na suia le tulaga o faiga faapolotiki i Malawi ma faatagaina aloaʻia ai loa e le faigāmalo Molimau a Ieova i le 1993. Mulimuli ane, ae ma talanoa ma se misionare na fesili mai, “E te toe foʻi la i Malawi?” O le taimi lenā ua 59 oʻu tausaga, o lea na ou fai i ai, “E leai, ua ou matua tele!” A o le aso lava lenā na ma maua ai se feʻau mai i le Vaega Pule, na talosagaina ai i maʻua e toe foʻi i Malawi.

Na ma fiafia i lo ma faaeaga i Zimbabwe, o lea e leʻi faigofie ai ona fai le ma faaiʻuga e toe foʻi i Malawi. Na tele a ma uō lelei na maua i inā ma na māfana le matou mafutaga. Na agalelei mai le Vaega Pule i le lē faamalosia o i maʻua e sui le ma tofiga, seʻi vaganā ua ma mananaʻo ai. O lea na ono faigofie ona ma filifili e ma te nonofo pea i Zimbabwe. Peitaʻi, na ou mafaufau i le faaaʻoaʻoga a Aperaamo ma Sara. Na la tuua lo la fale matagofie ina ua matutua, ona na usiusitaʻi i le taʻitaʻiga a Ieova.—Kene. 12:1-5.

Na ma filifili e mulimuli i le taʻitaʻiga a le faalapotopotoga a Ieova. Na ma toe foʻi loa i Malawi iā Fepuari 1 i le 1995, lea e atoa i ai le 28 tausaga talu mai le taimi muamua na ma taunuu ai i inā. E toʻatolu iā te aʻu uso na faia aʻe ai le Komiti o le Lālā, ma na vave lava ona matou gaoioi e toe faamaopoopo galuega a Molimau a Ieova i inā.

O IEOVA NA FAATUPUINA

Maʻeu se faamanuiaga o le vaaia o le faatupulaʻia e Ieova o le galuega! Na faateleina le numera o le ʻautalaʻi i le pe ā o le 30,000 mai i le 1993 i le silia ma le 42,000 i le 1998.b Na talia e le Vaega Pule le fausia o se lālā fou, e vaavaaia manaʻoga o le galuega talaʻi ua faatupulaʻia. Na faatau e le faalapotopotoga se fanua e 30 eka le telē, i Lilongwe ma tofia ai aʻu e galue i le komiti o le ʻaufaufale.

Na faia e le uso o Guy Pierce o se sui o le Vaega Pule, le lauga o le faapaiaga o le lālā fou iā Me i le 2001. E silia ma le lua afe Molimau na auai, ma o le toʻatele o i latou na papatiso i le silia ma le 40 tausaga. Na onosaia e nei uso ma tuafāfine faamaoni faasāsāaga ma sauāga ogaoga, i le tele o tausaga. E matitiva faaletino, ae e mauʻoa faaleagaga. Ae o lea ua latou fiafia e maimoa i lo latou Peteli fou. O so o se vaega o le Peteli e ō i ai i lenā aso, e latou te usuina pese o le Malo i leo logomālie i le auala ua masani ai, ma na matuā pāʻia ai loʻu loto. O se faamaoniga vaaia lenā o le faamanuia a Ieova iā i latou e tumau faamaoni i sauāga.

Ina ua māeʻa le fausiaina o le lālā, na ou olioli ai i se isi faaeaga o le faapaiaina o Maota mo Sauniga. Na aogā i faapotopotoga i Malawi le polokalame o le vave fausiaina o Maota mo Sauniga, i atunuu e lē tagolima. I le taimi muamua, na faia sauniga i fale e faia i laau ae ato i vao, ma na fai nofoa i vao ma palapala. Ae i le taimi nei, ua tao e uso piliki i ogaumu na latou faia, ma faaaogā e fausia ai maota fou matagofie mo sauniga. E sili atu ona fiafia uso i nofoa uumi ona e mafai ona ofi ai tagata e toʻatele.

Na matuā faafiafiaina foʻi aʻu i le vaaia o le fesoasoani a Ieova i tagata ina ia tuputupu aʻe faaleagaga. Na ou matuā maofa foʻi i le lotomalilie o uso talavou i Aferika e tauofo i le auaunaga. Na vave ona latou maua tomai e ala i aʻoaʻoga mai i le faalapotopotoga ma toleniga aogā. O le iʻuga, na mafai ai ona latou faia le tele o tiute tauave tāua i le Peteli ma faapotopotoga. Na faamalosia atili faapotopotoga ina ua tofia ovasia matagaluega fou mai i lenā lava atunuu, ma o le toʻatele o i latou ua faaipoipo. Na filifili nei ulugalii e auauna atoatoa iā Ieova e ala i le lē faia o ni fanau, e ui i omiga ona o aganuu ma i nisi taimi e mai i aiga.

NA MATUĀ FAAMALIEINA AʻU I LAʻU FILIFILIGA

Ina ua mavae le 52 tausaga talu ona ou galue i Aferika, na ou maua ai i se maʻi. Na faamaonia e le Vaega Pule le fautuaga a le Komiti o le Lālā, e toe tofia i maʻua e galulue i Peretania. Na ma faanoanoa e tuua le faaeaga na ma fiafia ai, ae o loo tausia lelei i maʻua e le aiga Peteli i Peretania e oo lava i lenei taimi ua ma matutua.

Ua ou matuā mautinoa o le faatagaina o Ieova e taʻitaʻia le ala ou te uia, o se filifiliga sili lea ua ou faia i loʻu olaga. Pe ana ou faalagolago i loʻu malamalama, e lē iloa po o fea o oʻu iai i lenei taimi. Na silafia e Ieova i nei taimi uma le mea ou te manaʻomia ina ia ʻfaasaʻoina ai oʻu ala.’ (Faata. 3:5, 6) A o oʻu talavou, na ou matuā fiafia lava e aʻoaʻo mea e faatatau i galuega totogi i se kamupani telē. Peitaʻi, ua saunia e le faalapotopotoga a Ieova i le lalolagi aoao se galuega faaleagaga ua matuā faamalieina ai aʻu. O le auauna iā Ieova, ua faaauau ai pea ona ou maua le faamalieina moni i le olaga!