Mauaina o le Filemu e Ui i Taua ma Fevaevaeaʻiga
Ua faapea mai Gary o lē sa auai i se vaegaʻau: “Ae ou te leʻi suʻesuʻeina le Tusi Paia, ou te leʻi iloa le māfuaaga o le tele o faiga sauā, faiga lē tonu, ma faafitauli i le lalolagi. Peitaʻi o lea ua ou maua le filemu o le mafaufau ona ua ou mautinoa, o le a suia e Ieova le lalolagi e avea ma nofoaga saogalemu.”
Ia mātau le auala na fesoasoani ai le Tusi Paia i isi e tutusa o latou faalogona ma Gary.
LE MANATU O LE TUSI PAIA: “Ieova e, o oe e lelei ma ua e nofosauni e faamagalo.”—Salamo 86:5.
LE AOGĀ: “Ua faamautinoa mai i lenei mau e alofa mutimutivale Ieova. Ua ou iloa ai e naunau o ia e faamagalo aʻu gaoioiga uma sa faia a o oʻu auai i taua.”—Wilmar mai i Kolomepia.
LE MANATU O LE TUSI PAIA: “O loo oʻu faia le lagi fou ma le lalolagi fou; e lē toe manatua mea sa iai muamua, e lē toe alu aʻe foʻi i le loto.”—Isaia 65:17.
LE AOGĀ: “Ou te aafia i le popole ma le lotomafatia pe a ou toe manatua mea na tutupu i taimi o taua. Ae ua faamanatu mai e lenei mau, ua toeitiiti ona aveesea lea e Ieova na faalogona ma o le a ou lē toe manatuaina mea leaga na tutupu. O se faalogona manaia tele!”—Zafirah mai i le Iunaite Setete.
LE MANATU O LE TUSI PAIA: “O lana nofoaiga, e tupu olaola ai lē e amiotonu, e tele foʻi le filemu seʻia leai se masina.”—Salamo 72:7.
LE AOGĀ: “O le tele o taimi, ou te mafaufau ai i le mau lea. Ua toeitiiti ona tatou lē toe faalogo lea i ni taua, ma o le a tatou lē toe popole i le saogalemu o ē e pele iā i tatou.”—Oleksandra mai i Ukraine.
LE MANATU O LE TUSI PAIA: “O le a toe feola mai ou tagata ua feoti. . . . Inā ala mai ia ma alalaga fiafia, o outou o ē o loo nonofo i le efuefu!”—Isaia 26:19.
LE AOGĀ: “E toetoe o tagata uma o le matou aiga na maliliu, ina ua taumafai le ituaiga o Hutu e fasiotia tagata uma o le ituaiga o Tutsi. Peitaʻi o lenei mau ua faamautinoa mai ai iā te aʻu, o le a ou toe vaai iā i latou i le lumanaʻi. Ou te tulimataʻia le taimi e toe faalogo ai i o latou leo pe a toetutū mai.”—Marie mai i Rwanda.
LE MANATU O LE TUSI PAIA: “Ua toeitiiti lava ona lē toe iai lea o le tagata amioleaga . . . A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—Salamo 37:10, 11.
LE AOGĀ: “E ui lava ua uma le taua, ae o loo iai pea faiga lē tonu ma tagata amioleaga. E matuā faalaeiauina aʻu i lenei mau, i le iloaina o loo silafia e Ieova mea uma ma e malamalama lelei o ia i loʻu tulaga. Ua ia folafola mai ua toeitiiti ona ia aveesea lea o mafatiaga uma ma e lē toe tau i ai le mafaufau.”—Daler mai i Tajikistan.
O tagata o loo taʻua a latou faamatalaga i lenei lomiga, e mai i le faitau miliona o Molimau a Ieova ua maua le filemu ona o le fesoasoani a le Tusi Paia. Ua latou iloa le auala e ʻalofia ai le feitagaʻi i le vā o atunuu, ituaiga, ma lanu. (Efeso 4:31, 32) O Molimau a Ieova, e leai sa latou vaega e faia i mataupu faapolotiki ma faigātaua.—Ioane 18:36.
E pei Molimau a Ieova o se aiga autasi i le lalolagi aoao. (Ioane 13:35) Seʻi mafaufau i le mea na tupu i le tuafafine o Oleksandra ma lona uso lea na sulufaʻi atu i se isi atunuu ona o le taua. Na ia faapea mai: “E ma te oo atu i le tuaoi ua leva ona faatali mai o tatou uso e faafeiloaʻi i maʻua. E ui o i maʻua o ni tagata sulufaʻi, ae na fesoasoani le ʻauuso ina ia ma masani i le olaga i inā.”
E matou te fiafia e valaaulia oe ina ia tatou auai faatasi i a matou sauniga, lea e aʻoaʻoina ai le filemu moni mai i le Tusi Paia ma le auala e faatatau ai. Tagaʻi i le jw.org ina ia maua ai se nofoaga mo sauniga e lata ane pe talosaga ai mo se suʻesuʻega faale-Tusi Paia e faia e aunoa ma se totogi, e faaaogā ai le lomiga Se Olaga Fiafia e Faavavau!