Ia Savavali Pea i le Faatuatua

1. Aiseā na lagona ai e le aposetolo o Paulo le faamalieina pe a toe tomānatu i le taimi ua teʻa?

E UI na iloa e le aposetolo o Paulo o le a fasiotia o ia, ae na ia lagona le faamalieina pe a mafaufau i le auala na ia ola ai. Pe a ia toe tomānatu i le taimi ua teʻa, na mafai ona ia faapea mai: “Ua ou faaiʻuina le tamoʻega, ua ou tausia le faatuatua.” (2 Timo. 4:​6-8) Na faia e Paulo se filifiliga atamai e auauna iā Ieova, ma na ia mautinoa ua ia faafiafiaina Ieova. E tatou te mananaʻo foʻi e faia ni filifiliga lelei ma maua ai le finagalo malie o le Atua. E faapefea ona tatou faia faapea?

2. O le ā le uiga o le savavali e tusa ai o le faatuatua?

² Na faapea mai Paulo e faatatau iā te ia lava ma isi Kerisiano faamaoni: “Ua tatou savavali ona o le faatuatua, ae e lē o mea e vaaia.” (2 Kori. 5:7) O le ā na uiga i ai Paulo? I le Tusi Paia, e iai taimi e faasino atu ai le upu “savavali,” i le auala e filifili se tasi e ola ai. Pe a savali se tasi e tusa ma mea e na te vaaia, o lona uiga e na te faia filifiliga e fua i mea e vaai, faalogo, ma paʻi i ai. Ae i le isi itu, pe a savali se tasi e tusa ai o le faatuatua, e na te faia filifiliga e fua i lona maufaatuatuaina o Ieova le Atua. E faaalia i ana gaoioiga lona mautinoa o le a tauia o ia e Ieova, ma o le a ia maua aogā i lona mulimuli i ana fautuaga o loo i lana Afioga.—Sala. 119:66; Epe. 11:6.

3. O ā aogā o le savavali e tusa ai o le faatuatua? (2 Korinito 4:18)

³ O le mea moni, o i tatou uma lava e iai taimi e fua ai nisi o a tatou filifiliga i mea e vaai, faalogo pe paʻi i ai. Peitaʻi, e ono tulaʻi mai ni faafitauli pe afai e na o le pau na o mea e fua i ai a tatou filifiliga i mataupu tāua. Aiseā? Talu ai o nisi taimi e mafai ona faasesēina i tatou i mea e tatou te vaai, faalogo pe paʻi i ai. E tusa lava foʻi pe e lē faasesēina ai i tatou, ae pe a tatou savavali e tusa ma mea e tatou te vaaia, o le a oo ai ina tatou lē amanaʻia le finagalo o Ieova po o ana taʻiala. (Fai. 11:9; Mata. 24:​37-39) Ae pe a tatou savavali e tusa ai o le faatuatua, o le a tatou faia la filifiliga “e fiafia i ai le Alii.” (Efe. 5:10) O lo tatou mulimuli i fautuaga a le Atua, o le a tatou maua ai le filemu moni ma le matuā olioli. (Sala. 16:​8, 9; Isa. 48:​17, 18) Pe a faaauau ona tatou savavali i le faatuatua, o le a tatou maua ai le ola e faavavau i le lumanaʻi.—Faitau le 2 Korinito 4:18.

4. E faapefea ona iloa e se tasi po o savali i le faatuatua po o mea o loo vaaia?

⁴ E faapefea ona tatou iloa po o tatou savavali i le faatuatua, po o mea o loo vaaia? O le auala sili e iloa ai, o le iloiloina o fesili nei: O ā vala e fua i ai aʻu filifiliga? Pe faamata o loo fua aʻu filifiliga i mea o loo oʻu vaaia, po o fua i loʻu maufaatuatuaina o fautuaga mai iā Ieova? Seʻi o tatou iloiloina pe e faapefea ona tatou savavali pea i le faatuatua i vala tāua nei e tolu: pe a filifili se galuega totogi, pe a filifili se paaga faaipoipo, ma pe a maua ni taʻiala mai i le faalapotopotoga. I nei vala taʻitasi, o le a tatou talanoaina ai mea e manaʻomia ona tatou iloiloina, ina ia faia ai ni filifiliga lelei.

PE A FILIFILI SE GALUEGA TOTOGI

5. O ā mea e ao ona tatou iloiloina pe a filifili se galuega?

⁵ E tatou te mananaʻo uma lava e tausia o tatou manaʻoga, ma manaʻoga o o tatou aiga. (Fai. 7:12; 1 Timo. 5:8) O nisi galuega, e lelei le totogi ma e ono mafai e se tagata faigaluega ona tausia ai ona manaʻoga i aso faisoo, ma tuu ese sina tupe e faaagaga mo le lumanaʻi. Ae atonu o isi galuega, e itiiti le totogi ma e na o mea e manaʻomia e le aiga e lava ai. Pe a filifili pe talia se galuega, e tele lava ina tatou fia iloa muamua pe fia le totogi. Peitaʻi, pe afai e na o le pau lenā o le vala e iloiloina e se tasi, atonu la o loo ia savali e tau lava o mea e vaai i ai.

6. E faapefea ona tatou savavali e tusa ai o le faatuatua pe a filifili se galuega? (Eperu 13:5)

⁶ Pe a tatou savavali e tusa ai o le faatuatua, o le a tatou iloiloina foʻi pe e iai se aafiaga o lenā galuega i la tatou faiā ma Ieova. E mafai ona fesili ifo: ʻPo o aofia ai i lenei galuega, loʻu faia o ni gaoioiga e inosia e Ieova?’ (Faata. 6:​16-19) ʻPo o le a faalavelavea ai laʻu faasologa faaleagaga, ma atonu o le a ou alu ese ai mai i loʻu aiga mo se taimi umi?’ (Fili. 1:10) Pe afai o le tali o na fesili o le ioe, e atamai la lou lē taliaina o le galuega, e tusa lava pe e faigatā ona maua ni galuega. O lo tatou savavali e tusa ai o le faatuatua, e tatou te faia ai filifiliga e faaalia ai lo tatou mautinoa, o le a iai lava le auala e tausia ai e Ieova o tatou manaʻoga.—Mata. 6:33; faitau le Eperu 13:5.

7-8. Na faapefea ona savali Javier e tusa ai o le faatuatua? (Tagaʻi foʻi i le ata.)

⁷ Seʻi mātau le faaaʻoaʻoga a Javier,a o se uso mai i Amerika i Saute, o lē na iloa le tāua o le savali e tusa ai o le faatuatua. Na ia faapea mai: “Na ou talosaga i se galuega e maualuga le tulaga, lea e faaluaina ai loʻu totogi mai i le mea na iai, ma maua ai le tele o mea na ou manaʻo i ai.” Peitaʻi, na matuā naunau Javier e avea ma paeonia. Na ia faapea atili mai: “Na ou maua le avanoa mo se faatalanoaga ma le pule o le galuega, e iloa ai po ou te maua le galuega. A o leʻi faia le faatalanoaga, na ou tatalo iā Ieova mo le fesoasoani ma na ou mautinoa e na te silafia le mea e sili mo aʻu. E ui na ou manaʻo ia lelei laʻu galuega, ae i le taimi e tasi, ou te leʻi manaʻo foʻi e avea ma māfuaaga e lē ausia ai oʻu sini faaleagaga.”

⁸ Na taʻua e Javier: “Na faapea mai le pule o le galuega i le taimi o le faatalanoaga, e tele taimi e manaʻomia ai ona ou galue ovataimi. Na ou faamatala atu i ai i se auala faaaloalo, e lē mafai ona ou faia faapea ona o laʻu galuega talaʻi.” Na teena e Javier le galuega, ma i le lua vaiaso mulimuli ane, na amata ai ona paeonia. I lenā lava tausaga, na ia maua ai se galuega faavaitaimi. Na ia faapea mai: “Na tali e Ieova aʻu tatalo, ma ou maua ai se galuega e talafeagai ma laʻu faasologa o se paeonia. Ua ou matuā fiafia lava ona ua maua se galuega e mafai ona tele ai le taimi ou te auauna ai iā Ieova ma oʻu uso.”

9. O le ā e te aʻoaʻoina mai i le mea na tupu iā Trésor?

⁹ Ae faapefea pe afai e te iloa ane, o lau galuega o loo iai i le taimi lenei e atagia mai ai e te lē o savali e tusa ai o le faatuatua? Seʻi mātau le mea na tupu iā Trésor mai i Congo. Na ia faapea mai: “O laʻu galuega fou, o se galuega ua leva ona ou moomoo i ai. E faatoluina loʻu totogi mai i le mea sa iai, ma e faaaloalogia ai aʻu.” Peitaʻi, na fai ma masani a Trésor le misia o sauniga ona o le galue ovataimi. O nisi taimi e faaosoosoina ai foʻi o ia e tagata faigaluega e ufiufi ni faiga lē faamaoni. Na manaʻo Trésor e faamavae mai i lana galuega, ae na ia popole foʻi ina neʻi lē toe maua sana galuega. O le ā na fesoasoani iā te ia? Na ia faapea mai: “Na fesoasoani le Sapakuka 3:​17-19 ou te malamalama ai, e tusa pe e lē toe iai saʻu galuega, ae o le a tausia lava aʻu e Ieova. O lea na ou faamavae ai loa.” Na ia toe faapea atili mai: “E manatu le toʻatele o pule o galuega e faapea, o tagata faigaluega e lelei totogi, e latou te faataulaga so o se mea, e aofia ai le taimi ma o latou aiga ma taimi mo mea faaleagaga. Ua ou fiafia ona na ou faamuamua laʻu faiā ma Ieova. I le tausaga mulimuli ane ai, na fesoasoani mai Ieova ina ia ou maua se galuega e talafeagai, ina ia tausia ai oʻu manaʻoga ma tele ai le taimi mo sauniga ma talaʻiga. Pe a tatou faamuamua Ieova, atonu o le a iai taimi e utiuti ai le faasoa, ae o le a tausia i tatou e Ieova.” Pe a tatou maufaatuatuaina fautuaga ma folafolaga a Ieova, o le a faaauau pea ona tatou savavali e tusa ai o le faatuatua, ma o le a ia faamanuia i tatou.

PE A FILIFILI SE PAAGA FAAIPOIPO

10. O ā vala e ono taaʻina ai se tasi e savali e tusa ma mea e vaaia pe a filifili se paaga faaipoipo?

¹⁰ O le faaipoipo o se meaalofa mai iā Ieova, ma o se faalogona masani le manaʻo e faaipoipo. Pe a filifili e se tuafafine se paaga faaipoipo, atonu e na te mātauina uiga o se uso, o ona foliga vaaia, lona talaaga, tulaga tautupe, o tiute tauave faaleaiga, faapea le auala e feutagaʻi ai ma ia.b E tāua nei vala uma. Peitaʻi, pe afai e na o le pau na o vala e na te iloiloina, o lona uiga la o loo ia savali e tusa ai ma mea e vaaia.

11. E faapefea ona tatou savavali e tusa ai o le faatuatua pe a filifili se paaga faaipoipo? (1 Korinito 7:39)

¹¹ E mautinoa le matuā faafiafiaina o Ieova, pe a mulimuli se uso po o se tuafafine i ana fautuaga i le auala e filifili ai se paaga faaipoipo! O se faaaʻoaʻoga, e latou te utagiaina le fautuaga e faatali seʻia teʻa le malaulau o le talavou, a o leʻi amata se faigāuō. (1 Kori. 7:36) E latou te filifili se paaga faaipoipo, e fua i uiga ua fetalai Ieova e ao ona iai i se tane po o se avā lelei. (Faata. 31:​10-13, 26-28; Efe. 5:33; 1 Timo. 5:8) Pe a manaʻo se tasi e lē o se Molimau e amata se faigāuō ma i latou, e latou te maufaatuatuaina le fautuaga o loo i le 1 Korinito 7:39 (Faitau) ina ia faaipoipo e “tau lava o lē ua i le Alii.” E faaauau pea ona latou savavali e tusa ai o le faatuatua, ma e latou te mautinoa e sili atu le auala e tausia ai i latou e Ieova i le itu tau faalogona, nai lo o so o se isi lava.—Sala. 55:22.

12. O le ā e tatou te aʻoaʻoina mai i le faaaʻoaʻoga a Rosa?

¹² Seʻi mātau se mea na tupu iā Rosa, o se paeonia i Kolomepia. O lana galuega, na masani ai ona feiloaʻi ma se tamāloa e lē o se Molimau na fia uō iā te ia. Na fiafia foʻi Rosa i le tamāloa, ma na ia faapea mai: “E foliga mai o ia o se tagata lelei, e lotofesoasoani, e lelei ona uiga, ma e agalelei iā te aʻu. O uiga uma ia ou te manaʻo e iai i saʻu tane, ae e pau le faafitauli e lē o ia o se Molimau a Ieova.” Na toe faapea atili mai Rosa: “Na matuā faigatā ona ou fai atu iā te ia e lē mafai ona ma uō, ona na ou naunau ia maua saʻu uō. I lenā taimi, na ou lagona le tuua toʻatasi ma na ou manaʻo ou te faaipoipo, ae e leʻi maua se uso e ma te uō.” Peitaʻi, e leʻi uaʻi Rosa e tau o mea e vaaia. Na ia manatunatu i aafiaga o lana filifiliga i le la faiā ma Ieova. O lea, na ia motusia ai fesootaʻiga uma ma le tamāloa ma pisi pea i lana auaunaga. E leʻi umi ae valaaulia o ia e auai i le Aʻoga mo Tagata Talaʻi o le Malo, ma o loo auauna nei o se paeonia faapito. Ua faapea mai Rosa: “E tele faamanuiaga ua foaʻi mai e Ieova ma ua ou matuā fiafia lava.” E ui e lē faigofie i nisi taimi ona savavali e tusa ai o le faatuatua, aemaise lava i mataupu e aafia ai o tatou faalogona, ae pe a taʻitaʻia i tatou i manatu o Ieova, e mautinoa o le a tatou maua aogā.

PE A MAUA NI TAʻIALA MAI I LE FAALAPOTOPOTOGA

13. O le ā le auala e tatou te ono savavali ai e tusa o mea e vaaia, pe a maua ni taʻiala mai i le faalapotopotoga?

¹³ E masani ona tatou maua taʻiala e faatatau i la tatou tapuaʻiga, e ala mai i toeaina o le faapotopotoga, o ovasia matagaluega, o ofisa o lālā ma le Vaega Pule. Ae e faapefea pe afai e tatou te lē malamalama i māfuaaga ua aumaia ai se taʻiala? Atonu e pau le mea e tatou te uaʻi i ai, o itu e ono lē lelei ai lenā taʻiala mo i tatou. E ono amata ai foʻi ona tatou taulaʻi i tulaga lē lelei atoatoa o uso o loo aumaia le taʻiala.

14. O le ā e fesoasoani iā i tatou e savavali i le faatuatua pe a maua se taʻiala mai i le faalapotopotoga? (Eperu 13:17)

¹⁴ Pe a tatou savavali e tusa ai o le faatuatua, e tatou te maufaatuatuaina o loo taʻitaʻia e Ieova lana faalapotopotoga, ma e na te silafia o tatou tulaga. O le iʻuga, o le a vave ona tatou usiusitaʻi ma o le a tatou faia faapea ma le olioli. (Faitau le Eperu 13:17.) E tatou te iloa o lo tatou usiusitaʻi, e saosaolaumea i le autasi o le faapotopotoga. (Efe. 4:​2, 3) E tatou te mautinoa, e ui lava i tulaga lē lelei atoatoa o uso o loo taʻimua, ae e faamanuia i tatou e Ieova pe a tatou usiusitaʻi. (1 Samu. 15:22) E tatou te maufaatuatuaina foʻi, pe a manaʻomia ona sui se taʻiala po o se faatulagaga, e faamautinoa e Ieova e na te faia faapea.—Mika 7:7.

15-16. O le ā na fesoasoani i se uso e savali ai i le faatuatua e ui na ia lē mautonu i se taʻiala mai i le faalapotopotoga? (Tagaʻi foʻi i le ata.)

¹⁵ Seʻi mātau se mea na tupu, e faamatilatila mai ai aogā o le savavali e tusa ai o le faatuatua. E ui o le gagana Sipaniolo e tele ina faaaogā i Peru, ae o le toʻatele o tagatānuu e tautatala i a latou lava gagana. O se tasi o na gagana o le gagana Quechua, ma e tele tausaga o tau saʻilia e uso ma tuafāfine Quechua nisi i le oganuu e tautatala i la latou gagana. Ae ina ia mulimuli i tulafono a le malo, na faia ai fetuunaʻiga i le auala e faaoo atu ai le feʻau i tagata. (Roma 13:1) Na taumānatu nisi po o le a taulau lenā suiga. Peitaʻi, ona o le mulimuli o uso i lenā fetuunaʻiga, na faamanuia ai e Ieova a latou taumafaiga ina ia maua le toʻatele o tagata e tautatala i le gagana Quechua.

¹⁶ O se tasi na popole i lenā suiga, o Kevin, o se toeaina i se faapotopotoga i le gagana Quechua. Na taumānatu o ia: “Po o le a faapefea ona matou maua tagata e tautatala i le gagana Quechua?” O le ā na faia e Kevin? Na ia faapea mai: “Na tau loʻu mafaufau i le Faataoto 3:​5, faapea le mea na tupu iā Mose. Na avatu e Ieova iā Mose se faatonuga e foliga mai e lē talafeagai. Na ia faatonuina o ia e taʻitaʻi ese tagata Isaraelu mai i Aikupito e agaʻi atu i le Sami Ulaula, lea e foliga mai e leai se mea e latou e sosola i ai, a o tuliloaina atu i latou e tagata Aikupito. E ui i lea, na usiusitaʻi Mose ma na faamanuia o ia e Ieova e ala i le faia o se vavega ofoofogia.” (Eso. 14:​1, 2, 9-11, 21, 22) Na lotomalie Kevin e faia fetuunaʻiga i le auala e talaʻi ai. O le ā le iʻuga? Na ia faapea mai: “Na ou maofa i le auala na faamanuia ai i matou e Ieova. I le taimi muamua, e umi le taimi e matou te savavali ai i le galuega talaʻi, ae pe na o le toʻatasi pe toʻalua ni tagata Quechua e maua. A o lenei ua matou uaʻi i oganuu o loo nonofo ai le toʻatele o tagata e tautatala i le gagana Quechua. I le taimi lenei, ua toʻatele tagata e matou te talanoa i ai, o toe asiga, ma suʻesuʻega faale-Tusi Paia. E toʻatele foʻi tagata ua auai i a matou sauniga.” Ioe, pe a tatou savavali i le faatuatua, e mautinoa o le a faamanuia i tatou e Ieova.

17. O le ā ua tatou aʻoaʻoina mai i lenei suʻesuʻega?

¹⁷ Na tatou talanoaina auala e faaauau ai pea ona tatou savavali i le faatuatua, i nisi o vala tāua e tolu. Ae e ao pea ona tatou savavali i le faatuatua i vala uma o o tatou olaga, e aofia ai le filifilia o faafiafiaga, o le faia o filifiliga i aʻoga ma le tausia o fanau. Po o ā lava filifiliga e tatou te faia, e ao ona taʻitaʻia i tatou, e lē gata o mea e tatou te vaai i ai, ae o la tatou faiā ma Ieova, o ana fautuaga, ma lana folafolaga e na te tausia i tatou. O le faia faapea, o le a mafai ai ona tatou savavali “i le suafa o Ieova lo tatou Atua e faavavau, faavavau lava.”—Mika 4:5.