“Inā Outou Filifili ia . . . po o Ai e Tou te Auauna i Ai”

1. O le ā e tatau ona tatou faia ina ia maua ai le fiafia moni, ma aiseā? (Isaia 48:​17, 18)

E ALOFA tele lo tatou Tamā i le lagi iā i tatou, ma e finagalo ia tatou maua se olaga fiafia i le taimi lenei ma i le lumanaʻi. (Fai. 3:​12, 13) E ui na ia foafoaina i tatou ma ni tomai mataʻina, ae e na te leʻi tuuina iā i tatou le tomai e pulea ai i tatou lava, pe filifili ai foʻi po o le ā le mea e saʻo ma le mea e sesē. (Fai. 8:9; Iere. 10:23) E silafia e Ieova, ina ia tatou maua le fiafia moni, e tatau ona tatou auauna iā te ia ma ola e tusa ai ma ana tapulaa.—Faitau le Isaia 48:​17, 18.

2. O le ā e manaʻo Satani e talitonu i ai tagata, ma na faapefea ona tali atu Ieova i na tuuaʻiga sesē?

² E manaʻo Satani ina ia talitonu tagata, e mafai ona latou maua le fiafia e aunoa ma Ieova ma pulea i latou lava. (Kene. 3:​4, 5) Na tali atu Ieova i na tuuaʻiga sesē e ala i le faataga o tagata fouvale e pulea i latou lava mo sina taimi. Ua tatou vaaia le lē taulau o pulega faaletagata. Peitaʻi, o loo i le Tusi Paia le tele o faaaʻoaʻoga o tane ma fafine na maua ni olaga fiafia ona o le auauna iā Ieova. O le faaaʻoaʻoga sili o i latou na, o Iesu Keriso. Muamua, seʻi o tatou iloiloina māfuaaga na ia filifili ai e auauna iā Ieova. Lua, o le a tatou iloiloina māfuaaga ua alagatatau ai ona avatu i lo tatou Tamā i le lagi le tapuaʻiga. Tolu, o le a tatou autaluina nisi o māfuaaga e tatou te filifili ai e auauna iā Ieova.

MĀFUAAGA NA FILIFILI AI IESU E AUAUNA IĀ IEOVA

3. O le ā na ofo atu e Satani iā Iesu, ma o le ā le filifiliga na ia faia?

³ A o iai Iesu i le lalolagi, na feagai o ia ma se filifiliga po o ai o le a ia auauna i ai. O se faaaʻoaʻoga, e leʻi leva talu ona papatisoina Iesu, ae ofo atu e Satani iā te ia malo uma o le lalolagi, pe afai e tau lava ina faapaʻū ma tapuaʻi atu iā te ia. Ae na tali atu Iesu: “Inā alu ese ia oe Satani, auā ua tusia: ʻE tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.’” (Mata. 4:​8-10) Aiseā na faia ai e Iesu lenā filifiliga? Seʻi mātau nisi o māfuaaga.

4-5. O ā nisi o māfuaaga na filifili ai Iesu e auauna iā Ieova?

⁴ O le māfuaaga autū na filifili ai Iesu e auauna iā Ieova, ona o lona alofa tele ma lona alofa faapelepele i lona Tamā. (Ioa. 14:31) E lē gata i lea, na auauna Iesu iā Ieova ona o le mea saʻo lea e tatau ona fai. (Ioa. 8:​28, 29; Faaa. 4:11) Na ia iloa o Ieova o le Puna o le ola, e maufaatuatuaina ma e aaofoaʻi. (Sala. 33:4; 36:9; Iako. 1:17) Na faamaoni fetalaiga uma a Ieova iā Iesu, ma o mea uma na maua e Iesu e mai iā Ieova. (Ioa. 1:14) Ae i se faaeseesega, o Satani ua māfua ai ona feoti tagata. O ia o sē e pepelo, manaʻo tele, ma manatu faapito. (Ioa. 8:44) O le iloaina o nei mea moni, e leʻi mafaufau ai lava Iesu e faaaʻoaʻo iā Satani e ala i le fouvale iā Ieova.—Fili. 2:​5-8.

⁵ O se isi māfuaaga na filifili ai Iesu e auauna iā Ieova, ona na ia tulimataʻia mea o le a faataunuuina ona o lana auaunaga faamaoni. (Epe. 12:2) Na ia iloa pe afai e tumau faamaoni, o le a ia faapaiaina ai le suafa o lona Tamā, ma mafai ai foʻi ona tafiesea le agasala ma le oti lea na faapogaia e le Tiapolo.

MĀFUAAGA E TATAU AI ONA TAPUAʻI IĀ IEOVA

6-7. Aiseā e lē o auauna ai le toʻatele i aso nei iā Ieova, ma aiseā e alagatatau ai ona avatu iā te ia la tatou tapuaʻiga?

⁶ I aso nei, e toʻatele tagata e lē o auauna iā Ieova ona e lē o iloa ona uiga matagofie, faapea le tele o mea lelei ua ia faia mo i latou. E faapena le mea na tupu i tagata na talaʻi atu i ai le aposetolo o Paulo i Atenai.—Galu. 17:​19, 20, 30, 34.

⁷ Na faamatala atu e Paulo i tagata Atenai, o le Atua moni na “foaʻi maia i tagata uma le ola, ma le mānava, ma mea uma lava.” Na ia faapea atili atu: “Auā o ia ua tatou ola ai, gaoioi ai, ma ua tatou iai foʻi ona o ia.” O le Atua o Lē na foafoaina mea, ʻna ia faia nuu uma mai i le tagata e toʻatasi,’ ma ua alagatatau ai ona avatu iā te ia la tatou tapuaʻiga.—Galu. 17:​25, 26, 28.

8. O le ā e lē taitai faia e Ieova? Ia faamatala.

⁸ Talu ai o Ieova o Lē na foafoaina mea ma o le Pule Silisili Ese i le aoao o mea, na ono mafai la ona ia faamalosia tagata e auauna iā te ia. Peitaʻi, e lē taitai ona ia faia faapea. Nai lo o lea, ua ia saunia mai faamaoniga e iloa ai o loo soifua moni o ia ma e alofa faapelepele iā i tatou taʻitoʻatasi. E finagalo o ia ina ia avea le toʻatele e mafai ai, o ni ana uō e faavavau. (1 Timo. 2:​3, 4) O le mea lea ua ia toleniina ai i tatou ina ia aʻoaʻo isi e faatatau i lona finagalo, ma taʻu atu iā i latou mea lelei o le a ia faia mo tagata. (Mata. 10:​11-13; 28:​19, 20) Ua ia faamaopoopoina i tatou i faapotopotoga, ma tofia ovasia alolofa e leoleoina i tatou.—Galu. 20:28.

9. E faapefea ona iloa le alofa o Ieova mo tagata uma?

⁹ E faamaonia le alofa lē manatu faapito o Ieova, i le auala e feutagaʻi ai o ia ma i latou e lē fia talitonu o loo soifua o ia. Seʻi mātau mea moni nei: A o faagasolo tausaga, e faitau piliona tagata ua filifili e ola e tusa ma a latou lava tapulaa o le mea e saʻo ma le mea e sesē. E ui i lea, o le alofa o Ieova ua ia saunia ai pea mea e latou te manaʻomia e faatumauina ai lo latou ola ma maua ai le fiafia. (Mata. 5:​44, 45; Galu. 14:​16, 17) O Ieova foʻi ua mafai ai ona latou maua ni uō ma aiga e alolofa iā i latou, o fanau, ma taui o a latou galuega mamafa. (Sala. 127:3; Fai. 2:24) O nei faamaoniga e iloa ai, e alofa lo tatou Tamā i le lagi i tagata uma. (Eso. 34:6) O lea, seʻi o tatou iloiloina nisi o māfuaaga na tatou filifili ai e auauna iā Ieova, ma le auala e na te tauia ai i tatou.

MĀFUAAGA E TATOU TE FILIFILI AI E AUAUNA IĀ IEOVA

10. (a) O le ā le māfuaaga autū e tatou te auauna ai iā Ieova? (Mataio 22:37) (e) E faapefea ona e maua aogā mai i le onosaʻi o Ieova? (Salamo 103:​13, 14)

¹⁰ I le pei o Iesu, o le māfuaaga autū e tatou te auauna ai iā Ieova, ona o le tele o lo tatou alofa ma le alofa faapelepele iā te Ia. (Faitau le Mataio 22:37.) E tatou te tosina iā Ieova pe a tatou iloa e faatatau i ona uiga. O se faaaʻoaʻoga, seʻi mātau le onosaʻi o Ieova iā i tatou. Ina ua lē usiusitaʻi tagata Isaraelu iā te ia, na ia ʻaiʻoi mai e faapea: “Faamolemole, inā outou liliuese mai i o outou ala leaga.” (Iere. 18:11) E manatua e Ieova o i tatou o ni tagata e lē lelei atoatoa, ma ua na o se efuefu. (Faitau le Salamo 103:​13, 14.) O lea, pe a e manatunatu i le onosaʻi o Ieova ma isi ona uiga matagofie, pe e lē uunaʻia ai oe e auauna iā te ia e faavavau?

11. O ā nisi o māfuaaga e tatou te filifili ai e auauna i lo tatou Tamā i le lagi?

¹¹ E uunaʻia foʻi i tatou e auauna iā Ieova, ona o le mea saʻo lenā e tatau ona fai. (Mata. 4:10) E lē gata i lea, e tatou te iloa foʻi mea e mafai ona faataunuuina ona o la tatou auaunaga faamaoni iā te ia. O la tatou auaunaga faamaoni, e faapaiaina ai le suafa o Ieova, faamaonia ai le pepelo o le Tiapolo, ma faafiafiaina ai le finagalo o lo tatou Tamā. Pe a tatou filifili e auauna iā Ieova i le taimi lenei, o le a tatou maua foʻi la le faamoemoe e auauna ai iā te ia e oo i le faavavau!—Ioa. 17:3.

12-13. O le ā e tatou te aʻoaʻoina mai i le mea na tupu iā Jane ma Pam?

¹² E tusa lava pe e tatou te lāiti, ae e mafai ona tatou atiaʻe le alofa loloto mo Ieova, lea e mafai ona faalolotoina atili a o faasolo ina tatou matutua. Seʻi mātau le faaaʻoaʻoga a le ʻauso teine o Jane ma Pam.a E 11 tausaga o Jane ae 10 tausaga o Pam ina ua amata ona la suʻesuʻeina le Tusi Paia. E ui e leʻi fia suʻesuʻe o la mātua, ae na la faatagaina Jane ma Pam e faatasitasi ma Molimau a Ieova, seʻi vaganā ai faaiʻuga o vaiaso e latou te ō ai i le lotu. Na faapea mai Jane: “O mea na aʻoaʻoina ai aʻu e Molimau a Ieova mai i le Tusi Paia, na fesoasoani iā te aʻu e teena ai omiga mai i aumea e faaaogā fualaau faasāina, ma faia amioga lē mamā.”

¹³ Ina ua mavae ni nai tausaga, na avea ai Jane ma Pam o ni tagata talaʻi. Mulimuli ane, na avea i laʻua o ni paeonia a o la tausia o la mātua ua matutua. Pe a toe tepa i tua, ua faapea mai Jane: “Ua ou tofo i le tausiga faamaoni a Ieova i ana uō, ma e pei ona taʻua i le 2 Timoteo 2:​19, ʻUa silafia e Ieova ona lava tagata.’” E lē taumatea, e tausia foʻi e Ieova i latou e filifili e alolofa ma auauna iā te ia!

14. E faapefea ona tatou puipuia le talaaga o Ieova? (Tagaʻi foʻi i ata.)

¹⁴ E tatou te mananaʻo e faamaonia le sesē o tuuaʻiga o loo taʻuleagaina ai le suafa o Ieova. Mātau le faataʻitaʻiga lenei: Seʻi faapea e iai sau uō vavalalata e agalelei, limafoaʻi ma lotofaamagalo. Ae i se tasi aso, na e faalogo atu ai o loo tuuaʻia lau uō e faapea o se tagata e sauā ma e lē faamaoni. O le ā le auala e te tali atu ai? E mautinoa e te puipuia o ia. I se tulaga talitutusa, pe a taumafai Satani ma i latou o loo ia taaʻina, e taʻuleagaina le talaaga o Ieova e ala i le faasalalau o pepelo e uiga iā te Ia, e tatou te tali atu e ala i le taʻu atu i isi o upu moni e uiga iā Ieova, ma maumauaʻi e puipuia Lona suafa. (Sala. 34:1; Isa. 43:10) E ala i a tatou upu ma gaoioiga, e faailoa atu ai e tatou te mananaʻo e auauna iā Ieova ma o tatou lotoatoa.

15. O ā aogā na tofo i ai le aposetolo o Paulo ona o le fetuunaʻi o ona sini i le olaga? (Filipi 3:​7, 8)

¹⁵ E tatou te lotomalilie e fetuunaʻi o tatou sini i le olaga, ina ia tatou auauna atoatoa ai iā Ieova ma i le auala e na te faafinagaloina. O se faaaʻoaʻoga, na filifili le aposetolo o Paulo e tuua se tulaga taualoa ina ia mulimuli ai i le Keriso ma auauna iā Ieova. (Kala. 1:14) O le iʻuga, na ia maua se olaga faamalieina ma le avanoa e pule faatasi ai ma Keriso i le lagi. E leʻi salamō lava o ia i lana filifiliga e auauna iā Ieova, ma e faapena foʻi i tatou.—Faitau le Filipi 3:​7, 8.

16. O le ā e tatou te aʻoaʻoina mai i le mea na tupu iā Julia? (Tagaʻi foʻi i ata.)

¹⁶ Pe a tatou faamuamua le auaunaga iā Ieova i o tatou olaga, o le a tatou maua ai se olaga faamalieina i le taimi lenei ma i le lumanaʻi. Seʻi mātau se mea na tupu i se tuafafine e igoa iā Julia. A o leʻi aʻoaʻoina le upu moni, na pese Julia i le ʻaufaipese a le latou ʻaulotu mai lava a o laʻitiiti. O le lelei o lana pese, na mātauina ai o ia e se tagata e pese faapolofesa i le opera, ma na ia toleniina ai Julia. E leʻi umi ae lauiloa Julia, ma na pese o ia i nisi o fale koneseti taʻutaʻua. A o aʻoga o ia i se aʻoga musika taʻutaʻua, na talanoa atu ai se tasi na la aʻoʻoga faatasi e faatatau i le Atua, ma faamatala atu o le suafa o le Atua o Ieova. E leʻi umi ae amata ona suʻesuʻeina e Julia le Tusi Paia e faalua i le vaiaso. Na iʻu ina ia filifili e faamuamua le auaunaga iā Ieova, nai lo o le avea o ia o se tagata pese lauiloa. E leʻi faigofie lenā filifiliga. Na faapea mai Julia: “E toʻatele tagata na fai mai ua maʻimau laʻu taleni. Ae na ou manaʻo e faaaogā atoatoa loʻu ola e auauna ai iā Ieova.” O ā ni ona faalogona i le taimi lenei e faatatau i le filifiliga na ia faia, i le silia ma le 30 tausaga ua teʻa? Na ia taʻua: “Ua ou maua nei le filemu o le mafaufau, ma ou te mautinoa o le a faamalie e Ieova oʻu manaʻoga uma i le lumanaʻi.”—Sala. 145:16.

IA AUAUNA PEA IĀ IEOVA

17. Talu ai ua tatou ola i le taufaaiʻuiʻuga o lenei faiga o mea, o le ā se aafiaga mo i latou ua filifili e auauna i le Atua ma i latou e leʻi faia faapea?

¹⁷ Ua tatou ola i le taufaaiʻuiʻuga o lenei faiga o mea. Na tusi le aposetolo o Paulo: “Ua ʻtoeitiiti lava’ ona ʻtaunuu mai lea o lē o loo maliu mai, ma e lē faatuai mai lava.’” (Epe. 10:37) O le ā lona uiga? O lona uiga, ua itiiti le taimi o loo totoe mo ē e lē o auauna iā Ieova ina ia filifili ai pe e auauna iā te ia. O lea, e ao ona latou vave gaoioi pe a filifili e faia faapea. (1 Kori. 7:29) E tusa lava foʻi po ua uma ona tatou filifili e auauna i le Atua, ae ua tatou iloa ua “toeitiiti lava” ona lē toe iai lea o faigatā o loo tatou fesagaʻia.

18. O le ā e finagalo Ieova ma Iesu e tatou te faia?

¹⁸ E leʻi tau ina faalaeiau e Iesu ona soo e mulimuli atu iā te ia, ae ina ia mulimuli atu pea iā te ia. (Mata. 16:24) O lea, e tusa po ua leva ona tatou auauna iā Ieova, ae ia tatou maumauaʻi e aua lava neʻi faavaivai. E ao ona tatou galulue mamafa ina ia tausisi pea i la tatou filifiliga e auauna iā Ieova. E ui lava e lē faigofie, ae maʻeu le tele o faamanuiaga ma le faamalieina e tatou te tofo i ai, e oo lava i le taimi lenei!—Sala. 35:27.

19. O le ā e tatou te aʻoaʻoina mai i le mea na tupu iā Gene?

¹⁹ E manatu nisi e tele naʻuā faataulaga e manaʻomia ona fai ina ia auauna ai iā Ieova. Pe afai o oe o se talavou, pe e te manatu e iai se mea o loo e misia ona o le auauna iā Ieova? Ua faapea mai se uso talavou e igoa iā Gene: “Na ou manatu ua faasāsā naʻuā olaga o Molimau a Ieova. O le toʻatele o tamaiti na matou feola faatasi na ō i patī, fai a latou uō teine, ma taaalo i taaloga vitiō sauā, a o aʻu e pau mea ou te alu ai o sauniga ma talaʻiga.” O ā aafiaga o na mafaufauga iā Gene? Na faapea mai o ia: “Na amata ona ou ola i se olaga uigalua, ma na ou fiafia mo sina taimi. Peitaʻi, e leʻi tumau ai loʻu fiafia. Na toe tau loʻu mafaufau i upu moni o le Tusi Paia na ou lē amanaʻia, ma ou filifili ai loa e auauna iā Ieova ma le lotoatoa. Talu mai lenā taimi, e foliga mai o loo tali e Ieova aʻu tatalo uma.”

20. O le ā e ao ona tatou maumauaʻi e fai?

²⁰ Na pese se faisalamo iā Ieova: “E fiafia lē ua e filifilia ma faalatalataina atu ina ia nofo i ou lotoā.” (Sala. 65:4) Seʻi o tatou maumauaʻi ia pei o Iosua, o lē na faapea mai: “A o aʻu ma loʻu aiga, e matou te auauna iā Ieova.”—Iosua 24:15.