Ia Taulaʻi Atu iā Ieova mo Faamāfanafanaga

1. Ia faamatala le tulaga o mea na iai mo tagata Iutaia na ave faapagota.

SEʻI mafaufau i faalogona o tagata Iutaia na ave faapagota i Papelonia. Na latou vaaitino i le faatafunaina o lo latou nuu. O a latou agasala ma agasala a o latou augātamā, na aveesea ai i latou mai i lo latou laueleele ma ave faapagota i se atunuu ese. (2 No. 36:​15, 16, 20, 21) O le mea moni, na latou maua sina saʻolotoga e fai ai mea masani o le olaga. (Iere. 29:​4-7) Peitaʻi, e leʻi faigofie le tulaga o mea na iai, ma e mautinoa e lē o le ituaiga olaga lenā na mananaʻo e ola ai. O ā ni o latou faalogona e faatatau i na tulaga? Seʻi mātau faamatalaga a se tagata faamaoni na ave faapagota: “Na matou nonofo i auvai o vaitafe o Papelonia. Na matou fetagisi ina ua manatua Siona.” (Sala. 137:1) Na latou manaʻomia faamāfanafanaga, ae o fea o le a latou maua ai na faamāfanafanaga?

2-3. (a) O le ā na faia e Ieova mo tagata Iutaia na ave faapagota? (e) O ā manatu o le a talanoaina i lenei mataupu?

² O Ieova o “le Atua o faamāfanafanaga uma.” (2 Kori. 1:3) Talu ai o Ieova o se Atua alofa, e finagalo malie o ia e saunia faamāfanafanaga mo i latou uma e mafuta vavalalata atu iā te ia. Na silafia e Ieova, e iai i latou o le a ave faapagota e taliaina ana aʻoaʻiga ma toe foʻi atu iā te ia. (Isa. 59:20) O lea, i le silia ma le 100 tausaga a o leʻi ave faapagota tagata Iutaia, na faagaeeina e Ieova le perofeta o Isaia e tusia le tusi ua faaigoa i lona igoa. O le ā le fuafuaga? Ua faapea mai Isaia: “ʻInā outou faamāfanafana atu ia, inā faamāfanafana atu ia i loʻu nuu,’ ua fetalai mai ai lo outou Atua.” (Isa. 40:1) O lea e ala i le tusi o Isaia, na saunia mai ai e Ieova faamāfanafanaga o le a manaʻomia e tagata Iutaia na ave faapagota.

³ E pei o na tagata Iutaia, e iai foʻi taimi e tatou te manaʻomia ai faamāfanafanaga. O le a tatou talanoaina i lenei mataupu, auala e tolu na faamāfanafanaina ai e Ieova i latou na ave faapagota: (1) Na ia folafola atu o le a ia faamagaloina i latou e faaalia le salamō, (2) na ia saunia se faamoemoe mo ona tagata, ma le (3) na ia fesoasoani iā i latou ina ia aua neʻi atuatuvale. A o tatou iloiloina na manatu faamāfanafanaloto, mātau aogā e tatou te maua mai ai.

E FAAMAGALO MA LE ALOFA MUTIMUTIVALE E IEOVA I TATOU

4. Na faapefea ona faaalia e Ieova o ia o se Atua e alofa mutimutivale? (Isaia 55:7)

⁴ O Ieova o “le Tamā o le alofa mutimutivale.” (2 Kori. 1:3) Na ia faaalia lenā uiga ina ua ia folafola atu, e na te faamagaloina tagata o le a ave faapagota e faaalia le salamō. (Faitau le Isaia 55:7.) Na fetalai o ia: “O le a ou alofa mutimutivale iā te oe, i le alofa faamaoni e faavavau.” (Isa. 54:8) O le a faapefea ona faaalia e Ieova le alofa mutimutivale? E ui lava o le a mafatia tagata Iutaia i āuga o a latou gaoioiga, ae na folafola atu e Ieova e lē faaauau pea ona latou nonofo i Papelonia. O le a faaaunuua i latou i inā mo se vaitaimi. (Isa. 40:2) Na avea na upu o se faamāfanafanaga ma o se faamautinoaga, mo tagata Iutaia na faaalia le salamō ina ua ave faapagota i Papelonia.

5. Aiseā ua sili atu ai ona tatou mautinoa i le faamagaloga a Ieova nai lo o tagata Iutaia na ave faapagota?

⁵ O le ā ua tatou aʻoaʻoina? E finagalo Ieova ina ia matuā faamagaloina ana auauna. I aso nei, ua sili atu ona tatou mautinoa i le faamagaloga a Ieova, nai lo o tagata Iutaia na ave faapagota. I le ā le itu? Ua tatou malamalama i le māfuaaga e faamagalo ai e Ieova agasala. Ina ua mavae le faitau selau o tausaga talu le valoaga a Isaia, na auina mai e Ieova lona Alo pele i le lalolagi e saunia le togiola mo tagata agasala uma ua salamō. Ua avea le taulaga togiola ma faavae e “soloiesea,” pe aveesea ai agasala. (Galu. 3:19; Isa. 1:18; Efe. 1:7) Maʻeu le alofa mutimutivale o le Atua o loo tatou auauna i ai!

6. O ā aogā e tatou te maua pe a manatunatu i le alofa mutimutivale o Ieova? (Tagaʻi foʻi i le ata.)

⁶ O upu faagaeeina a Ieova o loo i le Isaia 55:​7, e mafai ona faamāfanafanaina ai i tatou pe afai e lofitūina i faalogona nofosala. E tusa lava pe na tatou salamō ona o se mea sesē na tatou faia i le taimi ua teʻa, ae atonu e faaauau pea ona tatou aafia i faalogona nofosala. O le tulaga lenā e ono tupu, pe afai o loo tatou aafia pea i āuga o a tatou mea sesē. Peitaʻi, pe afai e taʻutino a tatou agasala ma maumauaʻi e lē toe faia le mea sesē, ia tatou mautinoa ua faamagaloina i tatou e Ieova. Pe a faamagalo e Ieova i tatou, ua ia filifili e lē toe manatuaina a tatou agasala. (Faatusatusa i le Ieremia 31:34.) O lea, pe afai e lē teulotoina e Ieova a tatou agasala na faia i le taimi ua teʻa, e lē tatau foʻi la ona tatou teulotoina. O le mea e sili ona tāua iā Ieova, o galuega lelei o loo tatou faia i le taimi lenei, ae e lē o mea sesē na tatou faia i le taimi ua teʻa. (Eseki. 33:​14-16) E lē o toe umi ona aveesea atoatoa lea e lo tatou Tamā alofa mutimutivale o āuga o a tatou mea sesē.

7. O le ā e uunaʻia ai i tatou e saʻili le fesoasoani pe afai e tatou te natia se agasala?

⁷ O le ā e ao ona tatou faia pe a ōia o tatou lotofuatiaifo ona o le natia o se agasala matuiā? Ua faalaeiauina i tatou e le Tusi Paia ina ia talosaga atu i toeaina mo se fesoasoani. (Iako. 5:​14, 15) Peitaʻi, atonu e lē faigofie ona taʻutino atu le mea sesē na tatou faia. Ae o le a faigofie ona tatou talanoa atu i na tane faamaoni ua tofia e Ieova e fesoasoani iā i tatou, pe afai e tatou te faaalia le salamō ma manatua, o le a faaalia e Ieova ma na tane le alofa mutimutivale iā i tatou. Seʻi mātau le auala na avea ai le alofa mutimutivale o Ieova ma faamāfanafanaga i se uso e igoa iā Arthur,a o lē na matuā ōia lona lotofuatiaifo. Na ia faapea mai: “E pe ā ma le tausaga o oʻu matamata i ata matagā taufeusuaʻiga, ae ina uma se lauga e faatatau i le lotofuatiaifo na ou taʻutino laʻu agasala i laʻu avā ma le ʻautoeaina. Ina ua uma ona ou faia lenā mea, na pei na matuu ese atu se avega mamafa, ae na aafia pea oʻu faalogona ona o le mea sesē na ou faia. Na faamanatu mai e toeaina, e lē o tuulafoaʻia aʻu e Ieova. O lona alofa e na te aʻoaʻia ai i tatou. O a latou faalaeiauga na pāʻia ai loʻu loto ma fesoasoani iā te aʻu ia maua le vaaiga saʻo.” I le taimi lenei, o loo auauna Arthur o se paeonia ma o se auauna o le faiva. E faamāfanafanaina i tatou i le iloa, e faaalia mai e Ieova le alofa mutimutivale pe afai e tatou te salamō.

UA SAUNIA E IEOVA SE FAAMOEMOE

8. (a) O le ā le faamoemoe na saunia e Ieova mo tagata na ave faapagota? (e) E tusa ai ma le Isaia 40:​29-31, o le ā le aafiaga o lenā faamoemoe i tagata Iutaia na faaalia le salamō?

⁸ I le vaaiga faaletagata, na pei ua leai se faamoemoe mo tagata Iutaia na ave faapagota. I lenā taimi, na avea Papelonia ma malo malosi o le lalolagi, ma na lauiloa i lo latou lē faasaʻolotoina o tagata na latou ave faapagota. (Isa. 14:17) Peitaʻi, na saunia e Ieova se faamoemoe mo ona tagata. Na ia folafola atu o le a ia faasaʻolotoina ona tagata, ma e leai se mea e mafai ona taofia o ia mai i le faataunuuina o lona finagalo. (Isa. 44:26; 55:12) I le silafaga a Ieova, na pei Papelonia o se pefu. (Isa. 40:15) Pe a e tago e feula le pefu, e faigofie lava ona alu ese. E faapena foʻi ona faigofie iā Ieova ona faasaʻoloto ona tagata mai i Papelonia. O le ā le aafiaga o lenā faamoemoe i tagata na ave faapagota? E lē gata o le a faamāfanafanaina ai i latou, ae o le a latou tofo ai foʻi i le moni o upu a Isaia e faapea: “A o ē e faamoemoe iā Ieova o le a toe malolosi i latou.” (Faitau le Isaia 40:​29-31.) Ioe, o lenā faamoemoe o le a faamalosia ai i latou, ma o le a latou “ō aʻe e pei ua iā i latou ni apaʻau o aeto.”

9. O ā māfuaaga na mafai ai e tagata Iutaia na ave faapagota ona maufaatuatuaina folafolaga a Ieova?

⁹ Na faailoa atu foʻi e Ieova māfuaaga na mafai ai e tagata Iutaia na ave faapagota ona maufaatuatuaina ana folafolaga. O ā na māfuaaga? Seʻi mafaufau i valoaga ua uma ona faataunuuina. Na latou iloa ua faatoʻilaloina e Asuria ituaiga e sefulu o le malo i mātū o Isaraelu, ma ave faapagota ona tagata. (Isa. 8:4) Na latou vaaia le faatamaʻia e ʻautau a Papelonia o Ierusalema ma ave faapagota i latou. (Isa. 39:​5-7) Na latou iloa foʻi le taimi na faatauasoina ai le tupu o Setekaia ma ave faapagota i Papelonia. (Iere. 39:7; Eseki. 12:​12, 13) Na taunuu moni lava mea uma na folafola mai e Ieova. (Isa. 42:9; 46:10) E lē taumatea le matuā faamalosia o lo latou faatuatua, o le a faataunuu le folafolaga a Ieova e faasaʻoloto i latou.

10. E faapefea ona faamalosia pea lo tatou faamoemoe i nei aso e gata ai?

¹⁰ O le ā ua tatou aʻoaʻoina? Pe a tatou lagona le lotovaivai, e mafai e lo tatou faamoemoe ona faamāfanafanaina ma faamalosia i tatou. O loo tatou ola i taimi e sili ona faigatā ma o loo tatou fesagaʻia ni fili malolosi. Peitaʻi, e lē tatau ona tatou faavaivai ai. Ua saunia mai e Ieova mo i tatou se faamoemoe matagofie, o le ola e faavavau i se lalolagi e maua ai le filemu ma le saogalemu moni. E tatau ona tāmau i o tatou mafaufau ma loto lenā faamoemoe. Pe a lē faia faapea, e ono avea lo tatou faamoemoe o se vaaiga i se laufanua matagofie e lē o iloa lelei atu, ona o le palapalā o le faamalama. E faapefea la ona “faamamā le faamalama” pe tāmau pea i o tatou loto ma mafaufau lenā faamoemoe? Ia fai ma a tatou masani le faaata o se olaga fiafia i le lalolagi fou. E mafai ona tatou faitau i mataupu, matamata i vitiō, ma faalogologo i pese e faatatau i lo tatou faamoemoe. E mafai foʻi ona tatou tatalo atu iā Ieova e faatatau i le folafolaga o loo tatou faatalitali ma le naunau e faataunuuina.

11. E faapefea i se tuafafine o loo maua i se gasegase tugā ona maua le malosi e onosaia ai lenā tulaga faigatā?

¹¹ Seʻi mātau pe na faapefea i le faamoemoe ona faamāfanafanaina ma faamalosia ai se tuafafine e igoa iā Joy, o lē o loo feagai ma se gasegase tugā. Ua ia faapea mai: “Pe a ou lagona le lotovaivai, ou te sasaa atu oʻu faalogona iā Ieova ma mautinoa, e malamalama lelei o ia i loʻu tulaga. E tali mai Ieova e ala i le foaʻi mai o ʻle mana lea e sili atu i le malosi o tagata.’” (2 Kori. 4:7) E faaata foʻi e Joy lona iai i le lalolagi fou, lea e lē toe fai mai ai se tasi e nofo ai: “Ou te maʻi.” (Isa. 33:24) Pe a sasaa atu foʻi o tatou faalogona iā Ieova ma taulaʻi atu i lo tatou faamoemoe, o le a tatou maua le malosi e onosaia ai faigatā.

12. O ā māfuaaga e tatou te maufaatuatuaina ai folafolaga a Ieova? (Tagaʻi foʻi i le ata.)

¹² E pei ona faia e Ieova i tagata Iutaia na ave faapagota, ua ia faailoa mai foʻi iā i tatou le tele o māfuaaga e tatou te maufaatuatuaina ai ana folafolaga. Seʻi mafaufau i valoaga ua faataunuuina. O se faaaʻoaʻoga, ua tatou vaaia se malo malosi o le lalolagi, e ʻiai le vaega e malosi ma e iai foʻi le vaega e vaivai.’ (Tani. 2:​42, 43) Ua tatou faalogo foʻi i tala o “mafuiʻe i lea mea ma lea mea,” ma o loo tatou talaʻia le tala lelei “i atunuu uma.” (Mata. 24:​7, 14) O nei valoaga ma le tele o isi valoaga, ua faamalosia ai lo tatou faatuatua i folafolaga faamāfanafanaloto a Ieova lea ua toeitiiti faataunuuina.

E FESOASOANI IEOVA IĀ I TATOU INA IA AUA NEʻI ATUATUVALE

13. (a) O ā tulaga faigatā o le a fesagaʻia e tagata Iutaia i le taimi e faasaʻoloto ai i latou? (e) E tusa ai ma le Isaia 41:​10-13, na faapefea ona faamāfanafanaina e Ieova tagata Iutaia na ave faapagota?

¹³ E ui lava na faamāfanafanaina e Ieova tagata na ave faapagota e ala i se faamoemoe matagofie, ae na ia silafia o le a latou feagai ma tulaga faigatā i le taimi e faasaʻoloto ai i latou. Na valoia e Ieova pe a latalata i le taimi e faaiʻuina ai le faaaunuua o tagata Iutaia, o le a faatamaʻia e se tupu malosi nuu na siʻomia ai Papelonia, ma faasolo atu ai i Papelonia lana osofaʻiga. (Isa. 41:​2-5) Pe sa tatau la ona fefefe ai tagata Iutaia? A o leʻi taitai osofaʻia Papelonia, na faamāfanafana ai e Ieova ona tagata e ala i le fetalai atu: “Aua e te fefe, auā ou te faatasi ma oe. Aua e te atuatuvale, auā o aʻu o lou Atua.” (Faitau le Isaia 41:​10-13.) O le ā le uiga o lana fetalaiga: “O aʻu o lou Atua”? Na ia faamanatu atu, o loo ʻau pea o ia ma i latou. (Sala. 118:6) Ae e leʻi uiga atu e tatau i tagata Iutaia ona tapuaʻi atu iā te ia, auā o le mea lenā o loo latou faia.

14. O le ā se isi auala na fesoasoani ai Ieova i tagata na ave faapagota ina ia aua neʻi atuatuvale?

¹⁴ Na fesoasoani atu foʻi Ieova i tagata Iutaia na ave faapagota ina ia aua neʻi atuatuvale, e ala i le faamanatu atu iā i latou e lē gata mai lona mana ma lona atamai. Na ia faalaeiauina i latou ina ia vaavaai atu i fetu o le lagi. Na ia faailoa atu iā i latou, e lē gata na ia foafoaina fetu, ae e na te silafia foʻi igoa uma o fetu. (Isa. 40:​25-28) Pe afai la e silafia e Ieova igoa o fetu taʻitasi, e mautinoa foʻi la e na te silafia igoa o ana auauna taʻitoʻatasi. Pe afai foʻi la e iai iā Ieova le mana e foafoaina ai fetu, e mautinoa foʻi la e iai iā te ia le mana e fesoasoani ai i ona tagata. O lea, e leʻi iai la se māfuaaga na atuatuvale pe fefefe ai tagata Iutaia na ave faapagota.

15. Na faapefea ona sauniunia e Ieova tagata Iutaia na ave faapagota mo mea o le a tutupu?

¹⁵ Na sauniunia foʻi e Ieova ona tagata mo mea o le a tutupu. I le Isaia 26:​20, na faatonuina ai e Ieova lona nuu: “Ia ulu atu i o outou potu i totonu, ma tapuni o outou faitotoʻa. Ia outou lalafi mo se taimi puupuu seʻia mavae atu le toʻasā.” Atonu o le uluaʻi faataunuuga o lenā mau na tupu ina ua faatoʻilaloina Papelonia e le tupu o Kuresa. Na taʻua e se tusitala na suʻesuʻeina le talafaasolopito o Eleni, ina ua osofaʻia e Kuresa Papelonia, “na ia faatonuina ana fitafita e fasiotia so o se tasi lava e maua atu o loo i fafo o faitotoʻa.” E mautinoa na matuā fefefe tagata o Papelonia. Ae atonu na faasaoina tagata Iutaia na ave faapagota, ona na latou usiusitaʻi i faatonuga a Ieova.

16. Aiseā e lē tatau ai ona tatou soona popole i mea o le a tutupu i le lumanaʻi? (Tagaʻi foʻi i le ata.)

¹⁶ O le ā ua tatou aʻoaʻoina? Ua toeitiiti nei ona amata lea o le puapuaga e sili ona mataʻutia i le talafaasolopito o tagata. Pe a tupu lenā mea, o le a fememeaʻi ma fefefe tagata o le lalolagi, ae e lē faapena tagata o Ieova. E tatou te mautinoa o Ieova o lo tatou Atua. O le a tatou lototetele i le iloaina “ua latalata ona laveaʻiina [i tatou.]” (Luka 21:28) E tusa lava pe osofaʻia i tatou e le tuufaatasiga o malo, ae o le a tatou tutū mausalī pea. O le a saunia mai e Ieova le puipuiga e ala mai i ana agelu ma faatonuga faasaoola. O le ā le auala o le a faailoa mai ai na faatonuga? E tatou te lē o mautinoa. Peitaʻi, atonu o le a tatou maua na faatonuga e ala mai i faapotopotoga. E ono avea faapotopotoga ma “potu i totonu” lea e tatou te maua ai le saogalemu. E faapefea ona tatou sauniuni mo mea o le a tutupu? E tatau ona tatou mafuta vavalalata ma o tatou uso ma tuafāfine, ia lotomalilie e usiusitaʻi i taʻiala mai i le faalapotopotoga, ma ia mautinoa o Ieova o loo taʻitaʻia le faalapotopotoga.—Epe. 10:​24, 25; 13:17.

17. E faapefea ona tatou taulaʻi atu iā Ieova mo faamāfanafanaga?

¹⁷ E ui lava na feagai tagata Iutaia na ave faapagota ma tulaga faigatā, ae na saunia e Ieova faamāfanafanaga na latou manaʻomia. O le mea foʻi lenā o le a ia faia mo i tatou. O lea, po o le ā lava le mea e tupu a taeao, ia faaauau pea ona taulaʻi atu iā Ieova mo faamāfanafanaga. Ia maufaatuatuaina le tele o lona alofa mutimutivale. Ia faamalosia pea lou faamoemoe. Ia manatua, pe a ʻau Ieova ma i tatou e leai se mea e tatou te fefefe ai.