E Faapefea Ona Avatu ni Fautuaga Lelei?

1. O ai e manaʻomia ona avatuina fautuaga? Ia faamatala.

O I TATOU uma lava, e iai taimi e manaʻomia ai ona tatou avatu ni fautuaga. Peitaʻi, e lē o tagata uma e faigofie ona latou faia faapea. O nisi e faatalatū pe matamumuli e avatu ni fautuaga. Ae aiseā e tāua ai ona tatou avatu ni fautuaga i isi, mai i lea taimi i lea taimi? Na fetalai Iesu e iloa ona soo moni i le alofa o le tasi i le isi. (Ioa. 13:35) O se tasi la o auala e iloa ai lo tatou alolofa i o tatou uso ma tuafāfine, o le avatu i ai o ni fautuaga pe a manaʻomia. Ua taʻua foʻi i le Tusi Paia, e maua faauōga māfana, pe a avatu ni “fautuaga faamaoni.”—Faata. 27:9.

2. O le ā e tatau ona faia e toeaina, ma aiseā? (Tagaʻi foʻi i le pusa “Fautuaga i Taimi o le Sauniga Amata o le Vaiaso.”)

² Ua tofia e Ieova ma Iesu ni tane po o toeaina e leoleoina le faapotopotoga. (1 Pete. 5:​2, 3) O le mea lea e tāua tele ai ona iloa e toeaina le auala e avatu ai ni fautuaga aogā. E faapefea ona latou faia faapea? E ala lea i le faavae o a latou fautuaga mai i le Tusi Paia pe a faia a latou lauga. E tāua foʻi ona latou avatu ni fautuaga i tagata taʻitoʻatasi o le faapotopotoga, e aofia ai ē ua tuua Ieova. E lē gata la i toeaina, ae e tāua foʻi iā i tatou uma ona iloa le auala e avatu ai ni fautuaga aogā.

3. (a) E faapefea ona tatou iloa le auala e avatu ai ni fautuaga aogā? (Isaia 9:6; tagaʻi foʻi i le pusa “Faaaʻoaʻo iā Iesu pe a Avatu Fautuaga.”) (e) O le ā o le a tatou talanoaina i lenei mataupu?

³ E faapefea la ona tatou iloa le auala e avatu ai ni fautuaga aogā? E ala i le iloiloina o faaaʻoaʻoga a nisi o tagata o le Tusi Paia, aemaise le faaaʻoaʻoga a Iesu, o lē ua taʻua o le “Faufautua Sili.” (Faitau le Isaia 9:6.) I lenei mataupu, o le a tatou talanoaina ai le mea e fai pe a talosaga mai se isi mo se fautuaga, ma pe a manaʻomia ona tatou avatu se fautuaga e tusa pe e leʻi talosaga mai se tasi mo se fautuaga. O le a tatou talanoaina foʻi le taimi talafeagai ma le auala saʻo e avatu ai se fautuaga.

PE A TALOSAGA MAI SE ISI MO SE FAUTUAGA

4-5. Pe a talosagaina e se tasi sa tatou fautuaga, o le ā e tatau ona fesili ifo ai? Aumai se faataʻitaʻiga.

⁴ Pe a talosaga mai se tasi mo se fautuaga, o se mea masani lava lo tatou fiafia ma mananaʻo e avatu loa se fesoasoani. Peitaʻi, o se mea lelei le fesili ifo: ʻPe faamata o aʻu le tagata e sili ona talafeagai e avatuina le fautuaga?’ O nisi taimi, o le mea sili e mafai ona tatou faia, o le faasino lea o le tagata i se tasi e sili ona talafeagai pe agavaa, e aumaia se fautuaga i le mataupu o loo ia manaʻomia ai se fesoasoani.

⁵ O se faataʻitaʻiga, seʻi faapea e iai sau uō ua maʻi tigāina. Ua ia faia ni ana saʻiliʻiliga i togafitiga eseese mo lona maʻi. Ina ua uma, ona fesili mai lea iā te oe i sou manatu i se togafitiga e sili ona lelei. E ui lava e iai se togafitiga patino e te fiafia i ai, ae ona e te iloa e leai ni ou agavaa po o ni tomai faafomaʻi, e sili la ona e fesoasoani i lau uō e saʻili se tasi e sili ona talafeagai e fesoasoani iā te ia.

6. Aiseā o se mea lelei ai le lē vave avatu o se fautuaga?

⁶ Ae e faapefea pe a tatou manatu e talafeagai ona tatou avatu se fautuaga e faatatau i se mataupu patino? Atonu o se mea lelei le aua le vave tali atu, ae faatali mo sina taimi. Aiseā? Ua taʻua i le Faataoto 15:28 “o lē e amiotonu e mafaufau loloto a o leʻi tali atu.” Ae e faapefea pe a tatou manatu o loo tatou iloa le tali po o le fautuaga e avatu? O se mea lelei le faatali pea ma fai ni saʻiliʻiliga, tatalo ma manatunatu loloto i le mataupu. O le faia faapea, o le a tatou mautinoa ai o loo ōgatusa a tatou fautuaga ma le finagalo o Ieova. Seʻi mātau le faaaʻoaʻoga a le perofeta o Natano.

7. O le ā ua tatou aʻoaʻoina mai i le faaaʻoaʻoga a le perofeta o Natano?

⁷ Ina ua faailoa atu e le tupu o Tavita i le perofeta o Natano e manaʻo e fausia se malumalu mo Ieova, na vave ona fautuaina o ia e Natano e faia faapea. Peitaʻi, sa tatau ona faatali Natano mo sina taimi ma saʻili po o le ā le finagalo o Ieova. Pe ana ia faia faapea, semanū e na te iloa ai e leʻi finagalo Ieova e fausia e Tavita le malumalu. (1 No. 17:​1-4) O lenei faaaʻoaʻoga ua tatou iloa ai le tāua o le “aua le vave ona tautala,” pe a talosaga mai nisi mo se fautuaga.—Iako. 1:19.

8. O le ā se isi māfuaaga e tatau ai ona tatou matuā faaeteete i le avatuina o se fautuaga i se isi?

⁸ O le ā se isi māfuaaga e tatau ai ona tatou matuā faaeteete i le avatuina o se fautuaga i se isi? Talu ai e ono tuuaʻia foʻi i tatou, pe a faia e se tasi se filifiliga e uma ane aafia ai i ni āuga lē lelei. O lea, e tāua tele ona tatou mafaufau lelei a o leʻi avatuina se fautuaga.

PE AFAI E LEʻI TALOSAGA MAI SE TASI MO SE FAUTUAGA

9. O le ā e ao i toeaina ona faamautinoa muamua a o leʻi avatuina se fautuaga? (Kalatia 6:1)

⁹ E mai i lea taimi i lea taimi, e tāua i toeaina ona taulamua e avatu se fautuaga i se uso po o se tuafafine ua uia “se laasaga sesē.” (Faitau le Kalatia 6:1.) O lona uiga, o se tasi o loo faia ni filifiliga lē atamai lea e ono iʻu atu ai i lona faia o se agasala matuiā. O le sini o toeaina, ia fesoasoani i se tasi ina ia aua neʻi sē ese mai i le ala e tau atu i le ola e faavavau. (Iako. 5:​19, 20) Peitaʻi, e ao i toeaina ona faamautinoa muamua ua uia moni e se tagata se laasaga sesē a o leʻi avatu se fautuaga. Ia manatua, e lē faapea a ese le filifiliga e faia e se tasi e fua i lona lotofuatiaifo, ona faapea ai lea ua ia faia se mea sesē. (Roma 14:​1-4) Ae e faapefea pe afai ua uia moni e se tasi se laasaga sesē, ma ua filifili toeaina e fautuaina o ia?

10-12. O le ā e ao ona faia e toeaina, pe a latou avatu se fautuaga i se tasi e leʻi talosagaina mai? Ia faataʻitaʻi. (Tagaʻi foʻi i ata.)

¹⁰ E lē faigofie i toeaina le avatuina o se fautuaga, aemaise pe afai e leʻi talosagaina mai e se tasi. Aiseā? Na taʻua e Paulo, e mafai ona uia e se tasi se laasaga sesē ae e na te leʻi iloaina. O lea, a o leʻi avatu e toeaina se fautuaga, e iai gaoioiga e manaʻomia ona latou faia muamua ina ia faafaigofie ai ona talia e se tagata a latou fautuaga.

¹¹ O le avatu o se fautuaga i se tasi e leʻi talosagaina mai, e tai pei o le totōina o se fatu laau i se palapala malō. E tatau i se faifaatoʻaga ona sua muamua le palapala ina ia faamalū, ona faatoʻā totō ai lea o le fatu. Pe a uma, ona ia faasūsūina lea ina ia fesoasoani e ola lelei ai. I se tulaga talitutusa, a o leʻi avatu e se toeaina se fautuaga i se tasi e leʻi talosagaina mai, e iai mea e manaʻomia ona ia faia muamua ina ia faigofie ai ona talia e le tagata sana fautuaga. O se faataʻitaʻiga, e mafai e le toeaina ona sema se taimi talafeagai e faailoa atu ai i le tagata lona manatu mamafa iā te ia, ma e iai se mea o loo fia talanoa atu ai. Pe afai foʻi o lē o loo avatuina le fautuaga o se tagata e iloa i ona uiga alofa ma agalelei, o le a faigofie la i isi ona talia sana fautuaga.

¹² A o talanoa atu le toeaina i se tasi, e mafai e le toeaina ona faamalū le palapala e ala i le faamatala i le tagata, e tatou te faia uma lava mea sesē ma e manaʻomia ai ni fautuaga mai i lea taimi i lea taimi. (Roma 3:23) E ao i le toeaina ona talanoa atu i se leo mālū ma faaaloalo, ma ia faasino atu mai i le Tusi Paia le māfuaaga e faapea atu ai ua uia e le tagata se laasaga sesē. Pe a talia e le tagata le fautuaga, e mafai e le toeaina ona totō le fatu e ala i le faamatala atu iā te ia i se auala faigofie, o mea e manaʻomia ona ia faia ina ia faasaʻo ai ona ala. Pe a uma, ia faasūsū le fatu e ala i le avatu o se faamālō, ma tatalo faatasi ma le tagata.—Iako. 5:15.

13. E faapefea ona faamautinoa e toeaina o loo malamalama lelei se tagata i sa latou fautuaga?

¹³ O nisi taimi e lē malamalama atoatoa ai se tasi pe sesē foʻi lona manatu i le fautuaga na avatu iā te ia. O le ā e tatau ona faia e toeaina ina ia faamautinoa ai o loo malamalama lelei se tagata i sa latou fautuaga? (Fai. 12:11) E mafai ona latou fai atu ni fesili faautauta, ma o le auala e tali mai ai le tagata e iloa ai po o ia malamalama atoatoa i le fautuaga.

AVATU FAUTUAGA I LE TAIMI MA LE AUALA TALAFEAGAI

14. Aiseā e lē tatau ai ona tatou avatu se fautuaga pe a tatou feita?

¹⁴ Talu ai e tatou te lē lelei atoatoa uma, e tatou te ono faia la se gaoioiga po o se tala e faatigā ai i isi. (Kolo. 3:13) Ua taʻua i le Tusi Paia, e iai taimi e ono faia ai e isi se mea e tatou te lē fiafia ai. (Efe. 4:26) Ae e lē tatau ona tatou avatu se fautuaga, a o tatou feita. Aiseā? Talu ai “o le ita o le tagata e lē tupu mai ai le amiotonu mai le Atua.” (Iako. 1:20) Pe a avatu se fautuaga a o tatou feita, o le a atili faateteleina ai le faafitauli nai lo o le foʻiaina. Po o lona uiga e lē mafai ona tatou faailoa atu i se tasi na faatigā mai, se mea e tatou te lē o fiafia ai? E mafai, ae e ao ona tatou faatali seʻia teʻa lo tatou ita ona faia lea faapea. Seʻi mātau le faaaʻoaʻoga a Eliu, o lē na fautuaina Iopu.

15. O le ā se lesona e tatou te aʻoaʻoina mai iā Eliu? (Tagaʻi foʻi i le ata.)

¹⁵ Na umi se taimi o faalogologo Eliu, a o taʻuamiotonuina e Iopu o ia lava mai i tuuaʻiga sesē a ana uō faamāfanafana pepelo. E ui na lagona e Eliu le tigā alofa iā Iopu, ae i le taimi e tasi na matuā lē fiafia o ia iā Iopu ona o le uaʻi iā te ia lava, ma le faia o faamatalaga soonafai e faatatau iā Ieova. Peitaʻi, nai lo o le avatu o le fautuaga i le taimi lava lenā, na faatali Eliu mo le taimi talafeagai e tautala atu ai. E lē gata i lea, na ia fautua atu iā Iopu i se auala agamalu ma matuā faaaloalo. (Iopu 32:2; 33:​1-7) O le ā se lesona tāua e tatou te aʻoaʻoina mai iā Eliu? Ia avatu le fautuaga i le taimi talafeagai, ma i se auala talafeagai e faaaloalo ma alofa.—Fai. 3:​1, 7.

FAAAUAU ONA AVATU MA TALIA FAUTUAGA LELEI

16. O le ā e te aʻoaʻoina mai i le Salamo 32:8?

¹⁶ O loo taʻua i le mau autū o lenei suʻesuʻega, e ʻfautua atu Ieova a o vaai atu iā te oe.’ (Faitau le Salamo 32:8.) O lona uiga, e lē gata e aumaia e Ieova fautuaga, ae e vaavaai mai foʻi o ia e ala i le saunia mai pea o le fesoasoani ina ia tatou faatatauina ai na fautuaga. O se faaaʻoaʻoga lelei lea ua faataatia e Ieova mo i tatou! Pe a avatu fautuaga i isi, ia vaavaai atu pea iā i latou, e ala i le faaauau ona faalaeiau ma fesoasoani i ai ia latou faia ni filifiliga atamai.

17. O ā o tatou faalogona, pe a aumai e toeaina ni fautuaga patino e faavae mai i le Tusi Paia? (Isaia 32:​1, 2)

¹⁷ O le avatuina ma le mauaina o ni fautuaga lelei, o se mea ua tatou matuā manaʻomia i le taimi lenei. (2 Timo. 3:1) Pe a aumai e toeaina ni fautuaga patino e faavae mai i le Tusi Paia, o le a pei na fautuaga o se “vaitafe i atunuu e leai ni vai.” (Faitau le Isaia 32:​1, 2.) E tatou te talisapaia foʻi uō e aumaia ni fautuaga e tatou te manaʻomia moni, e ui e tatou te ono lē fia faalogo i ai. O a latou fautuaga e pei o ni “apu auro i totonu o mea siliva ua togitogiina.” (Faata. 25:11) O lea, tau ina ia faaauau ona tatou aʻoaʻoina le auala e avatu pe talia ai fautuaga lelei.