Aiseā e Tāua ai le Saʻili mo Fautuaga?

1. E faapefea ona taulau manuia a tatou fuafuaga ma faia ni filifiliga atamai? (Faataoto 13:10; 15:22)

O TATOU uma lava e tatou te mananaʻo e faia ni filifiliga atamai, ma ia taulau manuia a tatou fuafuaga. O loo faailoa mai i le Afioga a le Atua auala e tatou te faia ai faapea.—Faitau le Faataoto 13:10; 15:22.

2. O le ā ua folafola mai e Ieova e na te faia mo i tatou?

² O lo tatou Tamā o Ieova, o ia o Lē e sili e aumaia fautuaga atamai. Ua ia folafola mai e faapea: “Ou te fautua atu foʻi a o oʻu vaai atu iā te oe.” (Sala. 32:8) Ua faailoa mai i lenei mau, e lē gata e aumaia e Ieova fautuaga, ae e naunau e fesoasoani mai ina ia tatou faatatauina.

3. O le ā o le a tatou talanoaina i lenei suʻesuʻega?

³ I lenei suʻesuʻega, o le a tatou faaaogā ai le Afioga a le Atua ina ia tali ai fesili nei e fā: (1) O ā uiga e tatau ona iā te aʻu, ina ia ou maua ai aogā mai i fautuaga atamai? (2) O fea ou te maua ai fautuaga atamai? (3) E faapefea ona ou faaalia le fetuutuunaʻi pe a ou maua se fautuaga? (4) Aiseā e tatau ai ona ʻalofia le fesili atu i isi e faia se filifiliga mo aʻu?

O Ā UIGA E TATAU ONA IĀ TE AʻU?

4. O ā uiga e tatau ona iā i tatou ina ia maua ai aogā mai i fautuaga atamai?

⁴ E tatau ona tatou lotomaulalo ma faamaulalo ina ia maua ai aogā mai i fautuaga atamai. E ao ona tatou lotomaulalo e talia e tatou te lē iloa mea uma, ma e tatou te manaʻomia le fesoasoani a isi ina ia faia ai filifiliga atamai. Pe a tatou lē lotomaulalo ma faamaulalo, e lē mafai la ona fesoasoani mai Ieova, ma o le a pei so o se fautuaga e tatou te maua mai i lana Afioga, o le timu e see i le tua o le pato. (Mika 6:8; 1 Pete. 5:5) Peitaʻi, pe a tatou lotomaulalo ma faamaulalo, o le a vave ona tatou talia se fautuaga e faavae mai i le Tusi Paia ma maua ai aogā.

5. O ā ni mea na faataunuuina e Tavita na ono faamaualuga ai o ia?

⁵ Seʻi mātau ni lesona e tatou te aʻoaʻoina mai i le faaaʻoaʻoga a le tupu o Tavita. Na ono faamaualuga Tavita ona o mea na mafai ona ia faataunuuina. A o leʻi taitai avea o ia ma tupu, na lauiloa o ia o se fai musika. Na oo lava ina aami atu o ia e tā le kitara i luma o le tupu. (1 Samu. 16:​18, 19) Ina ua faauuina Tavita e avea ma tupu, na foaʻi atu e Ieova iā te ia le agaga paia ma ia maua ai le malosi. (1 Samu. 16:​11-13) Na viiviia foʻi o ia e tagata ina ua ia fasiotia o latou fili, e aofia ai le Filisitia o Koliata. (1 Samu. 17:​37, 50; 18:7) Pe a faataunuuina e se tasi na mea mataʻina, e ono faamaualuga ai o ia ma manatu e na te lē manaʻomia se fautuaga mai i se isi. Ae e leʻi faapena Tavita.

6. E faapefea ona tatou iloa na lotomalie Tavita e faalogo i fautuaga? (Tagaʻi foʻi i le ata.)

⁶ Ina ua avea Tavita ma tupu, na faaauau ona ia faauō atu iā i latou na avatuina fautuaga iā te ia. (1 No. 27:​32-34) O le mea lenā na ia faia, mai lava i le taimi a o leʻi avea o ia ma tupu. E lē gata na ia faalogo i fautuaga mai i tane ae e faapea foʻi fafine. O se faataʻitaʻiga, na lotomaulalo o ia e faalogo iā Apikaila, o le avā a se tagata faamaualuga ma e lē fautuaina e igoa iā Napalu. O le lotomaulalo o Tavita e faalogo i le fautuaga lelei a Apikaila, na fesoasoani iā te ia e lē faia ai se agasala matuiā.—1 Samu. 25:​2, 3, 21-25, 32-34.

7. O ā ni lesona e tatou te aʻoaʻoina mai i le faaaʻoaʻoga a Tavita? (Failauga 4:13) (Tagaʻi foʻi i ata.)

⁷ O ā ni lesona e aʻoaʻoina mai i le faaaʻoaʻoga a Tavita? E tusa pe e iai ni o tatou tomai faapitoa pe iai foʻi i se tulaga pule, e lē tatau ona mafaufau ai ua tatou iloa mea uma ma e lē manaʻomia ni fautuaga mai i isi. E tatau foʻi ona tatou lotomalilie e faalogo i fautuaga lelei mai i isi, e tusa lava po o ā o latou tulaga. (Faitau le Failauga 4:13.) O le faia faapea, e mafai ona tatou ʻalofia ai le faia o se gaoioiga e mulimuli ane o tatou salamō ai, pe faatigā ai foʻi i isi.

O AI OU TE MAUA AI FAUTUAGA LELEI?

8. Aiseā na talafeagai ai ona fesili atu Tavita iā Ionatana mo se fautuaga?

⁸ O le ā se isi lesona e tatou te aʻoaʻoina mai i le faaaʻoaʻoga a Tavita? Ina ua ia saʻili mo se fautuaga, na ia saʻili atu i se tasi na iai se faiā lelei ma Ieova, ma na malamalama lelei foʻi i le faafitauli. O se faaaʻoaʻoga, ina ua manaʻomia e Tavita se fautuaga pe e mafai ona toe faaleleia le la faiā ma Saulo, na ia saʻili atu mo se fautuaga mai iā Ionatana. Aiseā? Talu ai na iai se faiā lelei a Ionatana ma Ieova ma na ia iloa lelei foʻi lona tamā o Saulo. (1 Samu. 20:​9-13) E faapefea la ona tatou faaaʻoaʻo iā Tavita?

9. O ai e tatau ona tatou fesili atu i ai mo ni fautuaga? Ia faamatala. (Faataoto 13:20)

⁹ O le ā e tatau ona tatou faia pe a manaʻomia se fautuaga? E tatau ona tatou saʻili atu i se tasi e iai se la faiā lelei ma Ieova, ma malamalama lelei i le tulaga o loo tatou manaʻomia ai se fesoasoani.a (Faitau le Faataoto 13:20.) O se faataʻitaʻiga, pe afai o loo saʻilia e se uso se paaga faaipoipo, o ai e sili ona talafeagai ona ia fesili i ai mo se fautuaga? Atonu e mafai ona ia maua ni fautuaga lelei faale-Tusi Paia mai i sana uō nofofua. Peitaʻi, e na te maua ni fautuaga e sili ona lelei ma aogā, pe afai e fesili atu i se ulugalii taʻumatuaina e iloa lelei o ia, ua fai sina umi talu ona faaipoipo, ma o loo taulau manuia le la faaipoipoga.

10. O le ā o le a tatou talanoaina?

¹⁰ Ua uma ona tatou talanoaina uiga e lua e tatau ona iā i tatou, ma i latou e tatau ona fesili atu i ai mo ni fautuaga lelei. Seʻi o tatou talanoa la pe e faapefea ona tatou faaalia le fetuutuunaʻi pe a tatou maua ni fautuaga, ma pe e tatau foʻi ona tatou fesili atu i isi e faia ni filifiliga mo i tatou.

E FAAPEFEA ONA ILOA OU TE MANAʻOMIA MONI NI FAUTUAGA?

11-12. (a) O le ā le mea e tatou te ono faia i nisi taimi? (e) O le ā na faia e Reopoamo ina ua feagai ma se filifiliga tāua?

¹¹ O nisi taimi e foliga mai ai o loo saʻilia e se tasi se fautuaga mai i se isi, ae o le mea moni o loo ia fia iloa pe e ioe isi i le mea ua tonu lona mafaufau e fai. Pe afai o le tulaga lenā, e iloa ai e na te lē o manaʻomia moni se fautuaga. Seʻi mātau le faaaʻoaʻoga lapataʻi a le tupu o Reopoamo.

¹² Ina ua maliu le tupu o Solomona, ona soloaʻi aʻe lea o Reopoamo e avea ma tupu o Isaraelu. E ui sa olioli le nuu i le tele o mea lelei, ae na latou mafaufau ua faamamafa e Solomona la latou avega. O lea na latou talosaga atu ai iā Reopoamo ina ia faamāmā la latou avega. Na faapea atu Reopoamo e tuu atu se taimi e mafaufau ai. I le taimi muamua, na faaalia e Reopoamo le atamai e ala i le fesili atu i toeaina o le nuu mo se fautuaga. (1 Tu. 12:​2-7) Peitaʻi, na ia teena mulimuli ane la latou fautuaga. Aiseā? Atonu ona ua uma ona fai lana faaiʻuga i le mea e manaʻo e fai. Pe afai o le tulaga lea, na fiafia la o ia ina ua faalogo i le fautuaga a ana uō talavou. (1 Tu. 12:​8-14) Peitaʻi, o lenā gaoioiga na iʻu ai i le vaeluaina o le nuu ma oo ai Reopoamo i le tele o faafitauli.—1 Tu. 12:​16-19.

13. E faapefea ona iloa o loo tatou manaʻomia moni se fautuaga mai i isi?

¹³ O le ā e tatou te aʻoaʻoina mai i le mea na tupu iā Reopoamo? Pe a tatou saʻili mo ni fautuaga, e ao ona tatou lotomalie e talia fautuaga. O lea, e tāua le fesili ifo: ʻPo ou te fesili atu i isi mo se fautuaga, ae mulimuli ane oʻu toe vave teena la latou fautuaga ona ou te lē ioe i o latou manatu?’

14. O le ā e tatau ona tatou manatua pe a maua ni fautuaga? Ia faataʻitaʻi. (Tagaʻi foʻi i le ata.)

¹⁴ Seʻi faapea e iai se uso ua mauaina se avanoa faigaluega e lelei le totogi. A o leʻi taliaina le galuega, na ia saʻili atu i se toeaina mo se fautuaga. Na ia faamatala atu i le toeaina, o lenei galuega e manaʻomia ai ona ia alu ese mai i lona aiga mo se taimi umi. Na faamanatu atu e le toeaina i le uso, o lana tiute tauave autū le tausia o lona aiga i le itu faaleagaga. (Efe. 6:4; 1 Timo. 5:8) Peitaʻi, e leʻi fiafia le uso i le fautuaga, ma toe alu ai i isi uso ina ia maua mai ai se fautuaga e fiafia i ai. O lea, pe na manaʻomia moni e le uso se fautuaga, po o le mea ua uma ona fai lana faaiʻuga ma o loo ia saʻilia se isi e ioe i lona manatu? E tatau foʻi ona tatou manatua, o le loto e faaʻoleʻole. (Iere. 17:9) O nisi taimi, o fautuaga e tatou te lē fiafia i ai, o fautuaga na e sili ona tatou manaʻomia.

PE E TATAU ONA OU FESILI I ISI E FAIA FILIFILIGA MO AʻU?

15. O le ā e lē tatau ona tatou faia, ma aiseā?

¹⁵ E faatalitalia i tatou e Ieova e faia a tatou lava filifiliga. (Kala. 6:​4, 5) E faapefea la ona tatou faia ni filifiliga lelei? E pei ona tatou talanoaina, o le tagata e atamai, e saʻili atu mo fautuaga mai i le Tusi Paia faapea ma Kerisiano taʻumatuaina, a o ia leʻi faia se filifiliga. Peitaʻi, e lē tatau ona tatou fesili atu i isi ina ia faia ni filifiliga mo i tatou. O isi ua latou fesili saʻo atu i tagata e latou te maufaatuatuaina e faapea, ʻO le ā sou manatu, o le ā laʻu mea e tatau ona fai?’ A o isi e mulimuli i filifiliga o loo faia e isi tagata, e aunoa ma le faaalu o se taimi e mafaufau muamua ai i le mea e tatau ona fai.

16. O le ā se mea na tupu i Korinito e tusa ai o aano o manu na ofoina atu i tupua, ma o ai e faia le filifiliga pe e tatau ona aai i aano o na manu? (1 Korinito 8:7; 10:​25, 26)

¹⁶ Seʻi mātau le mea na tupu i le faapotopotoga i Korinito i le uluaʻi senituri. Na eseese o latou manatu pe faamata e mafai ona aai i aano o manu atonu na ofoina atu mo tupua, ma mulimuli ane faatau atu i le maketi. Na tusi atu Paulo iā i latou na: “Ua tatou iloa o le tupua o se meanoa i le lalolagi, ma e na o le toʻatasi lava le Atua.” (1 Kori. 8:4) O lea, na iai nisi Kerisiano na filifili e mafai lava ona aai i aano o manu atonu na ofoina atu i tupua, ma mulimuli ane faatau atu i le maketi. Ae o isi na filifili e lē aai i na aano o manu ona e lē faatagaina e o latou lotofuatiaifo. (Faitau le 1 Korinito 8:7; 10:​25, 26.) O lenā filifiliga e patino i le tagata lava ia. E leʻi fautuaina e Paulo Kerisiano ina ia latou faia filifiliga mo isi, pe mulimuli foʻi i filifiliga o loo faia e isi, ona e tatau i tagata taʻitoʻatasi ona “tala atu lana amio i le Atua.”—Roma 14:​10-12.

17. O le ā e tupu pe a tatou faataʻitaʻi i filifiliga e faia e isi? Ia aumai se faataʻitaʻiga. (Tagaʻi foʻi i ata.)

¹⁷ E mafai foʻi ona tupu se tulaga faapena i aso nei. O se faataʻitaʻiga, o le faaaogāina o vaega ninii o le toto. E ono eseese lotofuatiaifo o Kerisiano i le talia po o le teena o le faaaogāina o vaega ninii o le toto.b E ui e lē faigofie ona malamalama i lenei mataupu, ae e tatau ona tauave e le tagata lava ia lana avega e ala i le faia o lana filifiliga e fua i lona lotofuatiaifo. (Roma 14:4) Pe afai e leai, e ono iʻu ai ina faataʻitaʻi o ia i filifiliga e faia e isi Kerisiano ma lē gaoioi ai lona lotofuatiaifo. E faapefea la ona faamalosia o tatou lotofuatiaifo? E ala i le toleni o o tatou lotofuatiaifo e faia a tatou lava filifiliga e faavae i le Tusi Paia. (Epe. 5:14) O le ā la le taimi e manaʻomia ai ona tatou saʻili atu mo se fautuaga mai i se Kerisiano taʻumatuaina? Pe afai ua uma ona faia a tatou lava saʻiliʻiliga, ae o loo tatou manaʻomia pea se fesoasoani i le auala e faatatau ai se mataupu silisili o le Tusi Paia i se tulaga o loo tatou fesagaʻia.

IA SAʻILI PEA MO FAUTUAGA

18. O le ā ua saunia mai e Ieova mo i tatou?

¹⁸ Ua maufaatuatuaina i tatou e Ieova e faia a tatou lava filifiliga. Ua ia saunia mai foʻi le fesoasoani ina ia tatou faia ai faapea. Ua ia saunia mai le Tusi Paia ma uō e fesoasoani iā i tatou, ina ia iloa le auala e faatatau ai mataupu silisili o le Tusi Paia. O lona faia faapea ua faaalia ai o ia o se Tamā alofa. (Faata. 3:​21-23) E faapefea ona faaalia atu iā te ia lo tatou lototalisapaia?

19. E faapefea ona tatou faafiafiaina Ieova?

¹⁹ Seʻi faaata le fiafia o se matua i le vaavaai atu o loo tuputupu aʻe lana tama e avea o se tagata e mafaufau lelei, ma o se auauna atamai a Ieova e lotofesoasoani i isi. I se tulaga talitutusa, e fiafia foʻi lo tatou Tamā o Ieova pe a silasila mai o loo tatou tuputupu aʻe e avea o ni Kerisiano taʻumatuaina, e saʻili atu i isi mo ni fautuaga atamai ma faia filifiliga e faafiafiaina ai o ia.