Ia Aʻoaʻo Nisi Lesona Mai i Aʻoaʻoga Faavae

1. O ā aafiaga lelei o aʻoaʻoga faavae o le Tusi Paia ina ua tatou faatoʻā aʻoaʻoina le upu moni?

O AʻOAʻOGA faavae o le Tusi Paia e iai ni aafiaga lelei i o tatou olaga. O se faataʻitaʻiga, ina ua tatou iloa o Ieova o le suafa lea o le Atua, na uunaʻia ai i tatou e vavalalata atu iā te ia. (Isa. 42:8) Ina ua tatou iloa foʻi le tulaga moni o le tagata ua maliu, na tatou mautinoa ai e lē o faapuapuagatia ē e pele iā i tatou ua maliliu. (Fai. 9:10) E lē gata i lea, ina ua tatou aʻoaʻoina le folafolaga a le Atua i le lalolagi Parataiso, ua tatou lē toe lagona ai le popole auā ua tatou mautinoa e mafai ona tatou ola e faavavau, ae e lē mo na o ni nai tausaga.—Sala. 37:29; 90:10.

2. E faapefea ona iloa mai i le 2 Peteru 1:​12, 13, e oo lava i Kerisiano taʻumatuaina e mafai ona maua aogā mai i aʻoaʻoga faavae o le Tusi Paia?

² E lē tatau ona tatou manatu māmā i aʻoaʻoga faavae o le Tusi Paia. I le uluaʻi senituri, na feagai ai nisi o Kerisiano ma lamatiaga faaleagaga, ona o aʻoaʻo pepelo ma tagata amioleaga na iai i le faapotopotoga. (2 Pete. 2:​1-3) E ui na latou “tutū mausalī i le upu moni,” ae na tusi atu i ai le aposetolo o Peteru i lana tusi lona lua, ina ia faamalosia i latou e aua neʻi lolo atu i na faamataʻuga. (Faitau le 2 Peteru 1:​12, 13.) Na ia faia faapea e ala i le faamanatu atu i ai o nisi o aʻoaʻoga na latou iloa lelei. O na aʻoaʻoga, na fesoasoani e faatumauina ai lo latou faamaoni seʻia oo i le iʻuga.

3. Aiseā e tāua ai i Kerisiano uma ona manatunatu loloto pea i aʻoaʻoga faavae o le Tusi Paia? Ia faataʻitaʻi.

³ E tusa lava po ua avea se tasi ma Kerisiano taʻumatuaina, ae e mafai lava ona ia aʻoaʻoina nisi lesona fou mai i aʻoaʻoga faavae o le Tusi Paia. O se faataʻitaʻiga o se tagata kuka tomai ma se tagata faatoʻā aʻo lana kuka. E mafai ona tutusa mea faimeaʻai e la te faaaogāina e fai ai se kuka. Ae a o faagasolo taimi, atonu e aʻoaʻoina ai e le tagata kuka tomai nisi auala e faaaogā ai na lava mea faimeaʻai, e fai ai nisi kuka fou. E tai faapena foʻi aʻoaʻoga faavae o le Tusi Paia. E tele nisi lesona fou atonu e aʻoaʻoina e se Kerisiano taʻumatuaina mai i aʻoaʻoga faavae, nai lo o se tasi ua faatoʻā aʻoaʻoina le upu moni. Aiseā? Atonu ua suia lona tulaga po o faaeaga i le auaunaga talu ona papatiso. O lea, pe a ia faatatauina aʻoaʻoga faavae i lona tulaga ua iai i le taimi lenei, atonu e na te aʻoaʻoina mai ai nisi lesona fou. Seʻi o tatou iloiloina ni lesona e aʻoaʻoina e Kerisiano taʻumatuaina, mai i ni aʻoaʻoga faavae se tolu o le Tusi Paia.

O IEOVA O LĒ NA FOAFOAINA MEA UMA

4. O le ā se aafiaga iā i tatou o le iloaina, o Ieova na foafoaina mea uma?

⁴ Ua tatou iloa na faia lo tatou lalolagi paneta ma meafaiola uma o loo iai, e Sē e tele lona atamai ma lona mana. Ua taʻua i le Eperu 3:​4, “O lē na faia mea uma o le Atua lea.” E lē gata i lea, talu ai o Ieova na faia i tatou, e na te silafia lelei la i tatou, le mea e sili mo i tatou, ma e manatu mamafa mai foʻi. O le ā se aafiaga iā i tatou o le iloaina, o Ieova na foafoaina mea uma? Ua mafai ona suia ai o tatou olaga i ni auala mataʻina ma maua ai se faamoemoe.

5. O le ā le aʻoaʻoga e fesoasoani iā i tatou e atiaʻe ai le lotomaulalo? (Isaia 45:​9-12)

⁵ O le iloaina o Ieova o Lē na foafoaina mea uma, e tatou te aʻoaʻoina mai ai le tāua o le lotomaulalo. O se faataʻitaʻiga, na uaʻi tele atu Iopu i le taʻuamiotonuina o ia lava. O lea, na faamanatu atu i ai e Ieova, o ia o Lē e ona le malosi uma lava na foafoaina mea uma. (Iopu 38:​1-4) Na fesoasoani lenā iā Iopu e iloa ai, e sili mamao atu ala o le Atua nai lo o manatu o tagata. E tai faapena foʻi le manatu na taʻua mulimuli ane e le perofeta o Isaia: “Pe e tatau ea ona fai atu le omea i le Fai Ipu Omea: ʻO le ā le mea o loo e faia?’”—Faitau le Isaia 45:​9-12.

6. O ā taimi e matuā tāua ai ona tatou manatunatu loloto i le tele o le atamai ma le mana o Lē na foafoaina mea? (Tagaʻi foʻi i ata.)

⁶ Pe a tele le poto masani o se Kerisiano, e ono maileia ai o ia e faalagolago i ona lava manatu nai lo o le saʻili atu i le taʻitaʻiga a Ieova ma lana Afioga. (Iopu 37:​23, 24) Peitaʻi, o le ā le aogā o le faaalu o le taimi e manatunatu loloto ai i le atamai lē mafaatusalia, ma le mana o Lē na foafoaina mea uma? (Isa. 40:22; 55:​8, 9) O le a fesoasoani iā te ia e lotomaulalo ai pea ma lē maumauaʻi ai i ona manatu.

7. O le ā na fesoasoani iā Rahela ina ia talia ai se suiga mai i le faalapotopotoga?

⁷ Seʻi mafaufau i le faaaʻoaʻoga a le tuafafine o Rahela mai i Slovenia. O lona manatunatu i Lē na foafoaina mea uma, na fesoasoani iā te ia e talia ai se suiga mai i le faalapotopotoga. Na ia taʻutino mai: “E lē o taimi uma na faigofie ai ona ou talia suiga mai i uso taʻimua. O se faataʻitaʻiga, na ou matamata i le Lipoti Mai i le Vaega Pule 2023 #8, e faatatau i le suiga ua mafai ona fai ʻava a uso. Peitaʻi, e leʻi faigofie ona ou talia lenā suiga, aemaise ina ua faatoʻā ou vaai i se uso e fai sana ʻava o loo fai sana lauga. O lea, na ou tatalo ai iā Ieova e fesoasoani mai ina ia ou talia lenā suiga.” Na taʻua e Rahela, talu ai na foafoaina e Ieova mea uma, e na te silafia lelei la le auala sili e taʻitaʻia ai lana faalapotopotoga. Pe a faafaigatā ona talia ni suiga fou po o se fetuunaʻiga i lo tatou malamalamaga, e mafai ona tatou faaalia le lotomaulalo e ala i le manatunatu loloto i le tele o le atamai ma le mana o Lē na foafoaina mea.—Roma 11:​33-36.

MĀFUAAGA E LĒ O TAOFIA AI E LE ATUA MAFATIAGA

8. O ā aogā o lo tatou iloaina e lē o le Atua e māfua ai mafatiaga?

⁸ Aiseā ua lē taofia ai e le Atua o tatou mafatiaga? O le lē mautonu o isi i le tali o lenā fesili, ua latou feita ai i le Atua ma mafaufau ai e leai se Atua. (Faata. 19:3) Peitaʻi, ua tatou aʻoaʻoina ua māfua ona iai mafatiaga ona o le agasala tuufaasolo ma le tulaga lē lelei atoatoa, ae e lē o le finagalo lea o Ieova. Ua tatou aʻoaʻoina foʻi o le onosaʻi o Ieova ua ia lē faamutaina ai mafatiaga, ma ua maua ai e le toʻatele le avanoa e aʻoaʻo ai e faatatau iā te ia ma le auala o le a ia tafiesea ai mafatiaga. (2 Pete. 3:​9, 15) O nei upu moni ua faamāfanafanaina ai i tatou, ma atili vavalalata ai iā Ieova.

9. O ā taimi atonu e manaʻomia ai ona tatou manatunatu i māfuaaga ua faataga ai e Ieova mafatiaga?

⁹ E tatou te iloa le tāua o le faaalia o le onosaʻi, a o tatou faatalitali i le taimi a Ieova e aveesea ai mafatiaga. Peitaʻi, pe a maliu sē e pele iā i tatou pe feagai foʻi ma faiga lē tonu, e ono faigofie ona tatou fesiligia le māfuaaga ua lē vave gaoioi ai Ieova e faamuta mafatiaga. (Sapa. 1:​2, 3) I taimi faapena, o se mea lelei le manatunatu i māfuaaga ua faataga ai e Ieova puapuaga e oo i le tagata amiotonu.a (Sala. 34:19) E lē gata i lea, ia mafaufau foʻi i le taimi o le a faataunuu ai le finagalo o Ieova ina ia tafiesea e faavavau mafatiaga.

10. O le ā na fesoasoani iā Anne e onosaia ai le maliu o lona tinā?

¹⁰ O le iloaina e lē o le Atua le māfuaaga o mafatiaga, e fesoasoani e tatou te tumau ai. Seʻi mātau le faamatalaga a Anne mai i le motu o Mayotte: “Na matuā ou faanoanoa ina ua maliu si oʻu tinā. Peitaʻi, na ou taumafai e manatua pea e lē o Ieova na māfua ai ona maliu o ia. O loo naunau Ieova e tafiesea atoatoa mafatiaga uma, ma toe faatutū mai ē e pele iā i tatou ua maliliu. O loʻu manatunatu loloto i na upu moni, na ou maua ai le filemu o le mafaufau.”

11. O ā nisi o māfuaaga ua lē taofia ai e le Atua mafatiaga, ma e faapefea ona uunaʻia ai i tatou ina ia talaʻi pea?

¹¹ O le iloaina o māfuaaga e lē o taofia ai e le Atua mafatiaga, e uunaʻia ai i tatou ina ia talaʻi atu pea. Na faamatala e le aposetolo o Peteru, o le onosaʻi o Ieova ua mafai ona faaolaina ai i latou ua salamō moni. Ina ua uma, ona ia tusi mai lea e faapea: “Ia outou manatunatu pe e faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua.” (2 Pete. 3:11) O se tasi o vala o “galuega o le faamaoni i le Atua,” o la tatou galuega talaʻi. I le pei o Ieova, e tatou te alolofa i tagata ma e tatou te mananaʻo ia latou ola e faavavau i se lalolagi amiotonu. O le onosaʻi o Ieova ua ia tuu mai ai i tagata o lou vaipanoa, le avanoa e tapuaʻi atu ai iā te ia. Maʻeu la se faaeaga o lo tatou galulue faatasi ma Ieova, ina ia fesoasoani i le toʻatele e mafai ai ina ia iloa o ia, a o leʻi oo mai le iʻuga!—1 Kori. 3:9.

“ASO E GATA AI”

12. O ā aogā o lo tatou iloaina o loo tatou ola i “aso e gata ai”?

¹² Ua faamatalaina ma le saʻo e le Tusi Paia uiga o tagata o le a iai i “aso e gata ai.” (2 Timo. 3:​1-5) Pe a tatou vaai i le auala o loo amioaʻi ai tagata i aso nei, e tatou te iloa ai ua faataunuuina lenei valoaga, ma atili ai ona tatou mautinoa i le maufaatuatuaina o le Afioga a le Atua.—2 Timo. 3:​13-15.

13. O le ā se iloiloga e mafai ona faia e le tagata lava ia pe a fua i le talafaatusa i le Luka 12:​15-21?

¹³ Talu ai ua tatou ola i aso e gata ai, e tāua tele ai ona tatou faaalia le uiga o le faanatinati. I le talafaatusa a Iesu i le Luka 12:​15-21 (Faitau.) o loo faamatilatila mai ai le tāua o le faanatinati. Aiseā na taʻua ai le tamāloa o sē e “lē faautauta”? E lē faapea ona e mauʻoa, ae ona e sesē mea na ia faamuamua. Na ia “faaputu ʻoa mo ia lava, ae e lē mauʻoa i le silafaga a le Atua.” Aiseā na tatau ai i le tamāloa ona faaalia se uiga faanatinati? Talu ai na fetalai le Atua: “O le pō nei e latou te mananaʻo ai i lou ola.” O le ā se lesona mo i tatou i nei aso e gata ai? Ua utiuti le taimi o totoe! O se mea lelei la le faia o se iloiloga o i tatou lava e ala i le fesili ifo: ʻPo o atagia atu i oʻu sini o loo iā te aʻu se uiga faanatinati? Ae e faapefea sini o loo oʻu faalaeiau laʻu fanau e tuliloa? Po o faaaogā loʻu taimi, malosi, ma meafaitino e faamuamua ai mea faaleagaga nai lo o oʻu lava manaʻoga?’

14. E faapefea i le faaaʻoaʻoga a Miki ona iloa ai le tāua o le manatua ua tatou ola i aso e gata ai?

¹⁴ O le manatuaina pea ua tatou ola i aso e gata ai, e fesoasoani e tatou te faia ai filifiliga lelei i le auala e faaaogā tatau ai o tatou olaga. O le mea lenā na tupu i le tuafafine o Miki. Na ia faapea mai: “Ina ua ou faauu mai i le aʻoga, na ou manaʻo ou te alu i le iunivesite ina ia suʻesuʻe ai i meaola. I le taimi e tasi, na ou manaʻo foʻi e paeonia sauatoa ma auauna i le mea o loo tele ai le manaʻoga. Peitaʻi, na faalaeiau aʻu e nisi o uso ma tuafāfine taʻumatuaina, e mafaufau lelei pe e mafai ona ou tuliloa uma na mea i le taimi e tasi. Na latou faamanatu mai e lē o toe umi ona oo mai lea o le iʻuga. Ae i le lalolagi fou, o le a mafai ona ou suʻesuʻeina le tele o meaola eseese e oo i le faavavau. O lea na ou filifili ai loa e ave ni nai mataupu e lē alu uma ai loʻu taimi, ae maua ai ni tomai aogā e suʻe ai saʻu galuega e lagolago ai laʻu paeonia. Mulimuli ane, na ou siitia atu i Ekutoa i le mea o loo tele ai le manaʻoga.” I le taimi lenei, o loo auauna Miki ma lana tane o se ovasia matagaluega i Ekutoa.

15. O le ā e ono tupu i nisi e lē o talilelei mai i la tatou feʻau? (Tagaʻi foʻi i ata.)

¹⁵ E lē tatau foʻi ona tatou lotovaivai pe a lē talilelei mai tagata i la tatou talaʻiga. Aiseā? Auā e iai lava le avanoa e mafai ona suia ai se tagata. O se faaaʻoaʻoga, o Iakopo le ʻafa uso o Iesu. Na vaaitino Iakopo o tuputupu aʻe Iesu, avea ma Mesia ma o le faiaʻoga sili. Peitaʻi, e tele tausaga e leʻi avea o ia ma soo o Iesu. Na faatoʻā avea o ia ma soo ina ua toetū mai Iesu. O le mea moni, na avea Iakopo o se soo na matuā maelega.b (Ioa. 7:5; Kala. 2:9) O lea, e lē tatau ona tatou fiu e talaʻi atu i o tatou tauaiga lē talitonu, ma i latou e leʻi talia muamua le feʻau o le Malo. Talu ai ua tatou ola i aso e gata ai, ua matuā faanatinati la le tatou galuega talaʻi. O le feʻau e tatou te faailoa atu iā i latou i le taimi lenei, atonu e suia ai o latou olaga i se taimi mulimuli ane, pe i le taimi foʻi e gāpā ai le puapuaga tele.c

IA FAATĀUA PEA LESONA MAI I AʻOAʻOGA FAAVAE O LE TUSI PAIA

16. O ā aogā e tatou te maua mai i aʻoaʻoga faavae o le Tusi Paia? (Tagaʻi foʻi i le pusa “Faaaogā Aʻoaʻoga Faavae e Fesoasoani ai i Isi.”)

¹⁶ O nisi o meaʻai faaleagaga o loo saunia mai e la tatou faalapotopotoga, e mo i latou e leʻi faalogo muamua i aʻoaʻoga faavae o le Tusi Paia. O se faataʻitaʻiga, o lauga i le lautele, o nisi o mataupu ma vitiō i le jw.org, faapea lomiga mo le lautele. E ui o na sauniuniga e mo i latou e lē o ni Molimau a Ieova, ae e mafai foʻi ona tatou maua aogā mai i aʻoaʻoga faavae o loo iai. E faalolotoina ai lo tatou alofa mo Ieova, faamalosia ai lo tatou faatuatua i lana Afioga, ma faaleleia ai o tatou tomai i le aʻoaʻoina o isi i aʻoaʻoga faavae o le Tusi Paia.—Sala. 19:7.

17. O ā taimi e ono aogā ai ona tatou manatunatu i aʻoaʻoga faavae o le Tusi Paia?

¹⁷ O se fiafiaga iā i tatou pe a maua ni suiga fou i lo tatou malamalamaga i nisi o aʻoaʻoga o le Tusi Paia. Peitaʻi, e tatou te lotofaafetai pea ona o aʻoaʻoga faavae o le Tusi Paia na tosina mai ai i tatou i le upu moni. E pei ona tatou aʻoaʻoina, e mafai lava ona tatou maua aogā mai i nei aʻoaʻoga faavae. O se faataʻitaʻiga, pe a feteenaʻi o tatou manatu ma se taʻiala mai i le faalapotopotoga, ia faaalia le lotomaulalo e ala i le manatua o Lē na foafoaina mea uma. O ia lea o loo taʻitaʻia le faalapotopotoga, ma e tele atu lona mana ma lona atamai. Pe a tatou feagai ma mafatiaga po o sē foʻi e pele iā i tatou, ia onosaʻi ma manatua māfuaaga e lē o taofia ai e Ieova mafatiaga. Pe a filifili foʻi po o le ā le auala e faaaogā ai lo tatou taimi ma meafaitino, ia manatua ua utiuti le taimi o loo totoe ma e ao ai ona faaalia le uiga faanatinati. Tau ina ia fesoasoani pea nei aʻoaʻoga faavae iā i tatou e maua ai le atamai, ma auauna pea ma le faamaoni iā Ieova.