O Ieova o lo Tatou “Fiafiaga Sili”

1-2. (a) O ā faalogona o loo feagai ma le toʻatele i aso nei? (e) O le ā o le a tatou talanoaina i lenei suʻesuʻega?

I ASO nei, ua faia e tagata taumafaiga uma ina ia maua ai le fiafia. E ui i lea, e latou te lē o taulau i le mauaina o le fiafia moni. O le iʻuga, ua lagona ai e le toʻatele le faanoanoa ma le lotovaivai. E oo lava foʻi i tagata o Ieova, e latou te aafia i na faalogona. Talu ai o loo tatou ola i “aso e gata ai,” e faatalitalia la e tatou te feagai ma tulaga e “sili ona faigatā,” lea e faapogaia ai faalogona faanoanoa.—2 Timo. 3:1.

² I lenei suʻesuʻega, o le a tatou talanoaina ai mea e mafai ona aveesea ai lo tatou fiafia, faapea auala e mafai ai ona tatou toe maua le fiafia. Peitaʻi, seʻi o tatou iloiloina muamua le Puna o le fiafia moni.

LE PUNA O LE OLIOLI PO O LE FIAFIA MONI

3. O le ā e tatou te aʻoaʻoina mai i le foafoaga e faatatau iā Ieova? (Tagaʻi foʻi i ata.)

³ O Ieova lava ia o le Atua fiafia, ma o lona finagalo foʻi lenā mo i tatou. O le māfuaaga lea ua ia foafoaina ai le tele o mea ina ia tatou maua ai le fiafia. O se faaaʻoaʻoga, e tatou te fiafia pe a mātauina le matagofie o lenei lalolagi paneta, o le tele o lanu eseese mananaia, o le taaalo fiafia o meaola, faapea le tofo o meaʻai e sili ona tatou fiafia i ai. Ioe, e naunau Ieova ina ia tatou maua ni olaga fiafia, ona e alofa moni o ia iā i tatou.

Tamaʻi elefane: Image © Romi Gamit/Shutterstock; tamaʻi penguin: Vladimir Seliverstov/500px via Getty Images; tamaʻi ʻoti: Rita Kochmarjova/stock.adobe.com; mumua e lua: georgeclerk/E+ via Getty Images

4. (a) Aiseā e faaauau ai pea ona fiafia Ieova, e ui i le tulaga pagatia o tagata? (e) O le ā le meaalofa ua foaʻi mai e Ieova iā i tatou? (Salamo 16:11)

⁴ E silafia lelei e Ieova le tulaga pagatia o tagata, ma e matuā tigā ai lona finagalo. E ui i lea, o loo taʻua i le Tusi Paia o Ieova o “le Atua fiafia.” (1 Timo. 1:11) Aiseā e faaauau ai pea ona fiafia Ieova? Talu ai ua uma ona ia faatulaga le aso e faamuta ai mafatiaga uma. Ae a o leʻi oo atu i lenā taimi, e naunau o ia e fesoasoani mai pea iā i tatou e fesagaʻia tulaga faigatā. E faapefea ona ia faia faapea? O se tasi o auala, o lona foaʻi mai lea o le meaalofa o le olioli po o le fiafia. (Faitau le Salamo 16:11.) Ia mātau le auala na maua ai e Iesu lenā meaalofa.

5-6. Aiseā e olioli ai Iesu?

⁵ E mai i foafoaga uma lava a Ieova, o Iesu lana foafoaga e sili ona fiafia. Aiseā? Ia mātau nisi o māfuaaga nei. (1) “O ia ua foliga i le Atua e lē vaaia.” O lona uiga e faaatagia atoatoa atu e Iesu uiga uma o lona tamā. (Kolo. 1:15; 1 Timo. 6:15) (2) E leai se isi e sili atu ona umi le taimi na faatasi ai ma Ieova o le Puna o le fiafia, nai lo o Iesu lava ia.

⁶ E lē gata i lea, na faaauau ona maua e Iesu le olioli po o le fiafia, ona sa ia faia mea uma na finagalo lona Tamā e na te faia. (Faata. 8:​30, 31; Ioa. 8:29) O lona tumau faamaoni, na ia mauaina ai le finagalo malie o Ieova.—Mata. 3:17.

7. E faapefea ona tatou maua le fiafia moni?

⁷ E mafai foʻi ona tatou maua le olioli po o le fiafia moni, e ala i le faalatalata atu iā Ieova, o le Puna o le fiafia. O le tele o le taimi e tatou te faaalu e aʻoaʻo ai mea e faatatau iā Ieova ma faaaʻoaʻo iā te ia, o le faateleina foʻi lenā o lo tatou fiafia. E tatou te maua foʻi le fiafia mai i le faia o lona finagalo, ma le iloaina o loo tatou faafiafiaina o ia.a (Sala. 33:12) Ae e faapefea pe afai e iai taimi e tau mou atu ai lo tatou fiafia? Po o lona uiga ua tatou lē mauaina le finagalo malie o Ieova? E leai. E silafia lelei e Ieova, e iai taimi e tatou te feagai ai ma tigā, le faanoanoa, ma le lotomafatia, ona o lo tatou tulaga lē lelei atoatoa. (Sala. 103:14) O le a tatou iloiloina mea e mafai ona aveesea ai lo tatou fiafia, ma auala e tatou te toe maua ai le fiafia.

IA FAAETEETE I MEA E AVEESEA AI LO TATOU OLIOLI

8. O le ā e mafai ona tupu pe a tatou aafia i faafitauli o le olaga?

⁸ Luʻi muamua: Faafitauli o le olaga. Po o e feagai ma sauāga, mala faalenatura, tulaga mativa, maʻi o le tino, po o le soifua matua? E faigofie lava ona mou atu lo tatou fiafia pe a feagai ma faafitauli faapena, aemaise lava pe afai e lē mafai ona tatou suia le tulaga o mea. Ua faapea mai le Tusi Paia, o le “lototigā e nutimomoia ai le agaga.” (Faata. 15:13) Na feagai se toeaina e igoa iā Babis ma faalogona faapena. Na maliliu lona uso ma ona mātua i totonu o le fā tausaga, ma na ia faapea mai: “E peiseaʻī na tuua na o aʻu, ma ua leai se isi e fesoasoani mai. Na ou matuā mafatia lava, ona e leʻi lava se taimi e matou te faifaimea faatasi ai ma loʻu uso ma oʻu mātua a o leʻi maliliu.” Ioe, o faafitauli o le olaga, e mafai ona lofitūina ai i tatou i le lotovaivai, ma lagona ai le vaivai o le tino.

9. O le ā e fesoasoani iā i tatou ina ia toe maua ai le fiafia? (Ieremia 29:​4-7, 10)

⁹ E faapefea ona toe maua lo tatou fiafia? Aua le popole i mea e lē mafai ona tatou suia, ma ia lotofaafetai i mea ua maua. Ua faaauilumaina e le lalolagi le manatu e faapea, e faatoʻā tatou maua le fiafia pe afai e sologa lelei mea uma i o tatou olaga. Ae e sesē lenā manatu. O se faaaʻoaʻoga, na faatonuina e Ieova tagata Iutaia o ē na ave faapagota i Papelonia, ina ia talia lo latou tulaga ua iai o ni pologa i se nuu ese, ma faia le mea sili e mafai e ui i faigatā na latou fesagaʻia. (Faitau le Ieremia 29:​4-7, 10.) O le lesona, ia taumafai e talia le tulaga o mea ua iai, ma ia lotofaafetai mo mea lelei ua e maua. Ia manatua foʻi, o le a faaauau ona fesoasoani Ieova iā te oe. (Sala. 63:7; 146:5) Na aafia Effie i se faalavelave faafuaseʻi, lea na iʻu ai ina lē mafai ona toe savali. Na ia faapea mai: “E tele le fesoasoani ma le lagolagosua ua saunia mai e Ieova, o loʻu aiga, ma le faapotopotoga. Ou te manaʻo la e faaalia atu loʻu lotofaafetai mo la latou fesoasoani, e ala i le taumafai e faia le mea sili ina ia ou maua ai pea le fiafia.”

10. Aiseā e mafai ai pea ona tatou maua le fiafia, e ui i faafitauli?

¹⁰ E tusa lava pe e tatou te feagai ma faafitauli, pe e tutupu ni mea leaga iā i tatou ma o tatou aiga, ae e mafai lava ona tatou maua le fiafia.b (Sala. 126:5) Aiseā? Auā e lē faalagolago le fiafia moni i le tulaga o mea po o lo tatou siʻomaga. Ua faapea mai se paeonia e igoa iā Maria: “Pe a feagai ma faafitauli, e mafai lava ona tatou maua le fiafia. E lē faapea ai e tatou te lē o aafia i faalogona tigā ma faanoanoa. Ae e tatou te fiafia, ona e tatou te mautinoa i le folafolaga a Ieova e fesoasoani mai pea iā i tatou.” Ia manatua, e lē tumau so o se tulaga faigatā o loo e fesagaʻia. E pei lava ona tafiesea e le sami tulaga vae o se tasi i le matafaga ma lē toe iloa atu, ua toeitiiti foʻi ona tafiesea lea o faafitauli uma o loo tatou fesagaʻia.

11. E faapefea ona faalaeiauina oe i le faaaʻoaʻoga a le aposetolo o Paulo?

¹¹ Atonu e iai taimi e tatou te taumānatu ai, e māfua ona tatou aafia i faafitauli ona e tatou te lē o maua le finagalo malie o Ieova. Peitaʻi, seʻi mafaufau i nisi o auauna faamaoni a Ieova o ē na feagai foʻi ma tulaga faigatā. O se faaaʻoaʻoga, o le aposetolo o Paulo. Na filifilia patino o ia e Iesu e talaʻi atu le tala lelei “i nuu ese faapea foʻi ma tupu, ma le fanauga a Isaraelu.” (Galu. 9:15) Maʻeu se faaeaga mataʻina! E ui i lea, na feagai pea Paulo ma le tele o faafitauli. (2 Kori. 11:​23-27) Po o lona uiga la e leʻi maua e Paulo le finagalo malie o Ieova? E mautinoa e lē saʻo lenā manatu. O le tutumau o Paulo, o se faamaoniga lenā o le faamanuia ma le fesoasoani a Ieova iā te ia. (Roma 5:​3-5) Pe afai foʻi o loo e tumau faamaoni e ui i tulaga faigatā, o lona uiga la o loo faamanuia pea ma fesoasoani Ieova iā te oe.

12. E faapefea i faamoemoega lē taulau ona aveesea ai lo tatou olioli?

¹² Luʻi lona lua: Faamoemoega lē taulau. (Faata. 13:12) O le alofa ma le agaga talisapaia mo Ieova, e uunaʻia ai i tatou e faatutū ni sini faaleagaga. Peitaʻi, pe afai e lē ausia na sini ona e lē talafeagai ma o tatou tulaga, e faigofie lava ona lagona ai le lotovaivai. (Faata. 17:22) Ua taʻua e se paeonia e igoa iā Holly: “Na ou fia auai i le Aʻoga mo Tagata Talaʻi o le Malo, auauna i se isi atunuu, pe faia se sao i le galuega faufale i Ramapo. Ae ona ua suia loʻu tulaga, ua lē mafai ai ona ou ausia na sini. Na ou lagona le lē fiafia ona e iai mea na ou manaʻo e fai, ae ua lē mafai ona faataunuu.” E toʻatele foʻi isi uso ma tuafāfine e faapena o latou faalogona.

13. O ā ni mea e mafai ona e uaʻi atu i ai, pe afai ua faatapulaa mea e mafai ona e faia?

¹³ E faapefea ona toe maua lo tatou fiafia? E lē tagisā Ieova, pe faatalitalia i tatou e faia se mea e sili atu i lo o le mea e tatou te mafaia. E lē faalagolago lo tatou tāua iā Ieova i mea e tatou te faia i le auaunaga iā te ia. Nai lo o lea, e finagalo o ia ina ia tatou faamaoni ma faamaulalo, pe ia iloa le mea e gata ai lo tatou mafai. (Mika 6:8; 1 Kori. 4:2) E faafiafiaina foʻi Ieova i uunaʻiga lelei o o tatou loto, e tusa lava pe e lē mafai ona tatou faataunuuina. O lea la, e lē tatau ona tatou taumafai e fai mea e lē oo i ai lo tatou malosi.c Pe afai ua faatapulaa mea e mafai ona e faia i le auaunaga, ia uaʻi atu i ni mea e mafai ona e faia. Pe e mafai ona e fesoasoani i talavou o le faapotopotoga pe faamalosiau i ē ua matutua? Pe e mafai ona faatū sou sini e faalaeiau se tasi e ala i le talanoa atu iā te ia, vili pe lafo atu i ai se text? E mautinoa e faamanuia oe e Ieova, a o e galue ma le fiafia e ausia sini e talafeagai ma lou tulaga. Ia manatua, e lē o toe umi ona tatou olioli lea i le tele o auala eseese e mafai ona tatou auauna ai iā Ieova. Ua faapea mai Holly lea na taʻua muamua: “Pe a lagona le lotovaivai, ou te mafaufau i le tele o mea e mafai ona ou faia mo Ieova pe a oo i le taimi ou te ola ai e faavavau.”

14. O le ā se isi mea e mafai ona aveesea ai lo tatou fiafia?

¹⁴ Luʻi lona tolu: Faafiafiaina o i tatou lava. Ua faaaogā e nisi tagata fesootaʻiga i le Initaneti po o le social media e faaauiluma ai le manatu, e maua le fiafia moni e ala i le faamalieina o le tagata lava ia. O le māfuaaga lea ua faatāua ai e tagata mea e fiafia e fai, o le fai o faatau, ma le femalagaaʻi i atunuu eseese. O le mea moni e lē leaga na mea, ona na foafoaina e Ieova i tatou ina ia maua le fiafia mai i mea matagofie na ia faia. Peitaʻi ua iloa e le toʻatele o tagata, e latou te lē o maua le faamalieina mai i mea na latou mafaufau e maua ai le fiafia. Ua faapea mai se paeonia e igoa iā Eva: “Pe afai e taulaʻi atu le olaga o se tasi i le faafiafiaina o ia lava, e lē taitai faamalieina o ia.” O le faafiafiaina o le tagata lava ia, e tai pei o le eleele e lē taitai malie i vai.

15. O le ā e tatou te aʻoaʻoina mai i le tupu o Solomona?

¹⁵ E tatou te aʻoaʻoina se lesona mai i le tupu o Solomona, e faatatau i iʻuga faanoanoa o le faafiafia o le tagata lava ia. Na ia taumafai e faafiafia o ia lava, e ala i le maua o mea uma na ia faanaunau i ai, e pei o meaʻai tofo lelei, o musika logomālie, ma so o se mea anagatā i ona aso. Peitaʻi, e na te leʻi maua ai le fiafia ma le faamalieina. Na ia faapea mai: “Ua lē faamalieina mata e vaai; e lē faamalieina foʻi taliga i le faalogo.” (Fai. 1:8; 2:​1-11) E manatu nisi tagata e latou te maua le fiafia, pe a maua le tele o tupe ma mea uma o loo mananaʻo ai. Peitaʻi, e lē mafai e na mea ona maua ai le fiafia moni ma le faamalieina.

16. E faapefea i le fesoasoani i isi ona tatou maua ai le fiafia? (Tagaʻi foʻi i ata.)

¹⁶ E faapefea ona toe maua lo tatou fiafia? Ua aʻoaʻoina e Iesu i tatou, “e sili le fiafia e maua i le foaʻi atu i lo o le talia mai.” (Galu. 20:35) Ua faapea mai se toeaina e igoa iā Alekos: “Ou te taumafai e faia ni nai mea lāiti mo isi. O le tele ou te faia ai faapea, o loʻu lē uaʻi foʻi lenā iā te aʻu lava ma faateleina ai loʻu fiafia.” O ā ni mea e mafai ona e faia mo isi? Pe afai e te mātauina se tasi o loo feagai ma faafitauli, ia taumafai e faalaeiauina o ia. Atonu e lē mafai ona e foʻia lona faafitauli, ae e mafai ona e faamāfanafana atu e ala i le faalogologo lelei ma le tigā alofa, ma faamanatu i ai e lafo atu ona popolega iā Ieova. (Sala. 55:22; 68:19) Ia faamautinoa atu foʻi iā te ia, e lē taitai tuulafoaʻia o ia e Ieova. (Sala. 37:28; Isa. 59:1) E mafai foʻi ona e fesoasoani atu i nisi auala, e pei o le faiʻaiga pe tafafao faatasi ma ia. Ia valaaulia o ia e lua te galulue i le talaʻiga, ma e mautinoa o le a ia lagona ai le faafouina. O lea la, nai lo o le uaʻi iā te oe lava, ia avea oe o sē e mafai ona faaaogā e Ieova e fesoasoani i isi. O le faia faapea, e tatou te maua ai le fiafia moni.—Faata. 11:25.

17. O le ā e ao ona tatou faia ina ia maua ai pea le fiafia moni? (Salamo 43:4)

¹⁷ E tatou te mauaina le fiafia moni, pe afai e faaauau pea ona tatou faalatalata atu i lo tatou Tamā i le lagi. Ua faamautinoa mai i le Tusi Paia, o Ieova o lo tatou “fiafiaga sili lea.” (Faitau le Salamo 43:4.) Po o ā lava tulaga faigatā e tatou te fesagaʻia, ae e mafai ona tatou maua pea le toʻafilemu. O lea, tau ina ia tatou taulaʻi atu pea iā Ieova, o le Puna o lo tatou olioli!—Sala. 144:15.