Auala e Faaleleia Atili ai a Tatou Tatalo

1-2. (a) Aiseā e ono faigatā ai ona sasaa atu o tatou faalogona iā Ieova? (e) E faapefea ona tatou mautinoa e faafofoga mai Ieova i a tatou tatalo?

PE E iai ni taimi e te manatu ai e pei ua aʻo faatauloto, tautū i upu masani, pe tau foʻi ina fai au tatalo? E mafai ona tupu iā i tatou uma lenā mea. O le pisi o a tatou faasologa, e ono faatopelau ai le faiga o a tatou tatalo. Atonu foʻi e faigatā ona sasaa atu o tatou faalogona iā Ieova, ona e tatou te lagona le faatauvaa.

² Ua faamautinoa mai i le Tusi Paia, e lē taulia iā Ieova le mauupu po o le faaaogā o ni upu maotua i a tatou tatalo, ae e tāua iā te ia le tatalo atu mai i o tatou loto. Ua taʻua i le Salamo 10:​17, e faafofoga o ia i “talosaga a ē e agamalu.” E faafofogaina foʻi e Ieova a tatou tatalo ona e naunau moni mai iā i tatou.—Sala. 139:​1-3.

3. O ā fesili o le a tatou talanoaina?

³ I lenei mataupu, o le a tatou iloiloina ai fesili o loo mulimuli mai: Aiseā e lē tatau ai ona tatou faatalatū e tatalo atu iā Ieova? E faapefea ona faamautinoa, e tatou te tatalo atu i se auala e atili ai ona tatou vavalalata iā Ieova? E faapefea i le manatunatu i tatalo a auauna a le Atua o loo faamauina i le Tusi Paia, ona faaleleia atili ai a tatou tatalo? O ā mea e mafai ona tatou faia, pe afai e faigatā ona faaleo atu o tatou faalogona? Seʻi o tatou talanoaina tali o nei fesili.

AUA LE FAATALATŪ E TATALO IĀ IEOVA

4. O le ā e fesoasoani iā i tatou e aua ai le faatalatū e tatalo iā Ieova? (Salamo 119:145)

⁴ E tatou te lē faatalatū e sasaa atu o tatou faalogona iā Ieova i le tatalo, pe afai e tatou te vaai iā te ia o se uō faamaoni e naunau mo lo tatou lelei. O le auala lenā na vaai ai lē na tusia le Salamo 119 iā Ieova. Na feagai le faisalamo ma faafitauli, e pei o le faileagaina e tagata amioleaga, faapea le tauivi ma ona lava vaivaiga. (Sala. 119:​5, 23, 69, 78) Peitaʻi, e leʻi faatalatū o ia e sasaa atu lona lotoatoa iā Ieova.—Faitau le Salamo 119:145.

5. Aiseā e lē tatau ai ona tatou faataga faalogona lē lelei, e taofia ai i tatou mai i le tatalo iā Ieova? Ia faataʻitaʻi.

⁵ Ia manatua, e oo lava i ē o loo faia agasala matuiā, ua valaaulia e Ieova ina ia tatalo atu iā te ia. (Isa. 55:​6, 7) E lē tatau la ona tatou faataga o tatou manatu po o faalogona lē lelei, e taofia ai i tatou mai i le tatalo atu iā Ieova. Seʻi fai se faataʻitaʻiga. E iloa lelei e se pailate o se vaalele, e mafai ona ia fesootaʻi iā i latou e faatonutonuina faigāmalaga pe a ia manaʻomia le fesoasoani. O lea, pe afai e sē ese le vaalele mai i le alāvaa, po ua faia foʻi e le pailate se mea sesē, pe e faatalatū o ia e talosaga atu iā i latou na mo se fesoasoani? E mautinoa e leai. Pe a tatou lē mautonu foʻi i le mea e fai po ua tatou faia se agasala, e lē tatau ona tatou faatalatū e tatalo atu iā Ieova mo lana fesoasoani.—Sala. 119:​25, 176.

AUALA E TATALO AI INA IA VAVALALATA ATU AI IĀ IEOVA

6-7. O le ā se mea e mafai ona tatou faia, ina ia atili ai ona tatou vavalalata iā Ieova i a tatou tatalo? Aumai se faaaʻoaʻoga. (Tagaʻi foʻi i le faamatalaga pito i lalo.)

⁶ Pe a tatou saʻoloto e sasaa atu o tatou faalogona moni iā Ieova, o le a atili ai ona tatou vavalalata atu iā te ia. O ā la ni mea e mafai ona tatou faia ina ia faaleleia atili ai a tatou tatalo?

⁷ Manatunatu i uiga o Ieova.a O le tele lava e tatou te manatunatu loloto ai i uiga o Ieova, o le faigofie foʻi lenā ona faailoa atu iā te ia o o tatou faalogona moni. (Sala. 145:​8, 9, 18) Seʻi mātau le faaaʻoaʻoga a se tuafafine e igoa iā Kristine. O uiga sauā o lona tamā, na ia faapea mai ai: “Na faigatā ona ou vaai iā Ieova o se Tamā e alofa, ma na ou mafaufau foʻi o le a lē fiafia o ia pe a ou faia se mea sesē.” O le ā se uiga o Ieova na fesoasoani iā Kristine? Na toe faapea mai o ia: “O loʻu manatunatu i le alofa faamaoni o Ieova, na ou mautinoa ai e alofa o ia iā te aʻu. E lē taitai foʻi tuulafoaʻia aʻu e Ieova pe a ou faia se mea sesē. O lenā mea na faigofie ai ona ou faailoa atu iā te ia so o se mea, e aofia ai taimi fiafia faapea taimi faanoanoa.”

8-9. O ā aogā o le mafaufau muamua i ni mataupu e faaaofia i a tatou tatalo? Aumai se faaaʻoaʻoga.

⁸ Mafaufau i mataupu e faaaofia i a tatou tatalo. A o e leʻi tatalo, atonu e mafai ona e fesili ifo: ʻO ā ni faafitauli patino o oʻu fesagaʻia i le taimi lenei? Po o iai se tasi e manaʻomia ona ou faamagaloina? O le ā se luʻi o loo oʻu fesagaʻia, lea ou te manaʻomia ai le fesoasoani a Ieova?’ (2 Tu. 19:​15-19) E mafai foʻi ona tatou mulimuli i le faaaʻoaʻoga a Iesu, e ala i le mafaufau i mataupu e tatou te tatalo atu ai iā Ieova e faatatau i Lona suafa, o Lona Malo, faapea le faia o Lona finagalo.—Mata. 6:​9, 10.

⁹ Seʻi mātau le mea na tupu i se tuafafine e igoa iā Aliska, ina ua ia iloa ua maua lana tane i le kanesa o le faiʻai. Na ia faapea mai: “O loʻu matuā mafatia na faigatā ai ona ou iloa po o ā mea tonu ou te tatalo atu ai. Peitaʻi, na fesoasoani iā te aʻu le faaalu o sina taimi e mafaufau muamua ai, i mataupu e faaaofia i aʻu tatalo. O le faia faapea, e lē uma ane ai o loo uaʻi atu aʻu tatalo na o oʻu mafatiaga ma le maʻi o laʻu tane. Na fesoasoani ou te lagona ai le toʻafilemu, ma mafai ai ona ou iloa mea tonu ou te tatalo ai iā Ieova.”

10. Aiseā e tāua ai le faaalu o le taimi e talatalanoa ai iā Ieova i le tatalo? (Tagaʻi foʻi i ata.)

¹⁰ Aua le faatopelauina au tatalo. E mafai ona tatou vavalalata atu iā Ieova e tusa pe e pupuu a tatou tatalo. E ui i lea, e tele atu mea e mafai ona faailoa atu iā Ieova ma faigofie ona sasaa atu o tatou faalogona moni, pe afai e faaalu se taimi e talatalanoa atu ai iā te ia.b Ua faapea mai Elijah, le tane a Aliska: “E tele taimi ou te tatalo ai a o faagasolo le aso. Peitaʻi, ua ou iloa e sili atu ona ou vavalalata iā Ieova, pe a ou faaalu se taimi e talatalanoa atu ai iā te ia. E tusa lava po o le ā le umi ou te tatalo atu ai, ou te mautinoa e lē taitai fiu Ieova e faafofoga mai.” O lea, o se faalaeiauga lea mo i tatou: Ia saʻili se taimi ma se nofoaga filemu e mafai ona tatou tatalo atu ai, lea atonu e mafai ona faaleo atu ai o tatou faalogona iā Ieova. Ia fai foʻi ma masaniga le faaalu o le taimi e talatalanoa ai iā Ieova i le tatalo.

MANATUNATU I TATALO A AUAUNA A IEOVA O LOO I LE TUSI PAIA

11. O ā aogā o le manatunatu i tatalo a auauna faamaoni a Ieova o loo i le Tusi Paia? (Tagaʻi foʻi i le pusa “Pe e Taitutusa Lou Tulaga ma i Latou Nei?”)

¹¹ E iai aogā o le manatunatu i tatalo a auauna faamaoni a Ieova, ma viiga po o salamo o loo i le Tusi Paia. A o iloiloina auala na sasaa atu ai e na auauna o latou faalogona moni iā Ieova, o le a fesoasoani iā i tatou e faia ai foʻi faapea. Atonu e tatou te mauaina ai ni faaupuga fou mai i a latou tatalo, lea e mafai ona faaaofia i a tatou tatalo. E tatou te ono faitau ai foʻi i ni tatalo e fetaui lelei ma se tulaga o loo tatou fesagaʻia.

12. O ā ni fesili e mafai ona e fesili ifo ai a o e faitau i se tatalo?

¹² A o e faitau i se tatalo mai i le Tusi Paia, ia fesili ifo: ʻO ai e ana nei faaupuga, ma aiseā na ia tatalo ai faapea? Pe e iai se manatu o lana tatalo e fetaui lelei ma loʻu tulaga? O ā ni lesona e mafai ona ou aʻoaʻoina mai ai?’ Atonu e manaʻomia ona e faia ni saʻiliʻiliga atili ina ia taliina ai na fesili, ae e mautinoa o le a tele ni aogā e te maua mai ai. Seʻi mātau nisi o tatalo o loo mulimuli mai.

13. O le ā se tasi o lesona e tatou te aʻoaʻoina mai i le tatalo a Hana? (1 Samuelu 1:​10, 11) (Tagaʻi foʻi i le ata.)

¹³ Faitau le 1 Samuelu 1:​10, 11. Na feagai Hana ma ni faafitauli tetele se lua ina ua ia tatalo i upu o loo taʻua i le mau. E lē gata e leʻi mafai ona maua sana fanau, ae na fai foʻi ma masani a le isi avā a lana tane le faatigā iā te ia. (1 Samu. 1:​4-7) Pe afai o loo faaauau ona e tauivi ma se tulaga faigatā, o le ā e mafai ona e aʻoaʻoina mai i le tatalo a Hana? Na faaalu e Hana le taimi e talatalanoa ma sasaa atu ai ona faalogona moni iā Ieova e ala i le tatalo, ma ia maua ai le toʻafilemu. (1 Samu. 1:​12, 18) E mafai foʻi ona tatou mauaina le toʻafilemu, pe a “lafo atu [o tatou] popolega uma iā Ieova,” e ala i le faailoa atu o o tatou faalogona moni i se faafitauli patino o loo tatou fesagaʻia.—Sala. 55:22.

14. (a) O le ā se isi lesona e tatou te aʻoaʻoina mai iā Hana? (e) E faapefea i le faitau ma manatunatu i le Tusi Paia ona fesoasoani e faaleleia ai a tatou tatalo? (Tagaʻi i le faamatalaga pito i lalo.)

¹⁴ I nai tausaga talu ona fanaua e Hana lana tama o Samuelu, na ia avatu ai lana tama i le Ositaulaga Sili o Eli. (1 Samu. 1:​24-28) Na tatalo Hana iā Ieova ma faailoa atu i ai lona lotofaafetai, ona o lana puipuiga ma lana tausiga i ana auauna faamaoni.c (1 Samu. 2:​1, 8, 9) E ui na feagai pea Hana ma faafitauli, ae e leʻi uaʻi atu o ia i na tulaga faigatā. Nai lo o lea, sa ia taulaʻi atu i auala o loo faamanuia ai o ia e Ieova. O le ā le lesona? Pe a tatou uaʻi atu i auala o loo lagolagoina ai pea i tatou e Ieova, o le a fesoasoani lenā e tatou te onosaia ai tulaga faigatā.

15. O le ā e tatou te aʻoaʻoina mai i le tatalo a Ieremia, pe a tatou feagai ma ni faiga lē tonu? (Ieremia 12:1)

¹⁵ Faitau le Ieremia 12:1. E iai se taimi na lotovaivai ai Ieremia, ona sa foliga mai o loo taulau manuia tagata amioleaga. Na tauemua foʻi o ia e isi tagata Isaraelu. (Iere. 20:​7, 8) E ui na faailoa atu e Ieremia ona faalogona tigā iā Ieova, ae e na te leʻi fesiligia le faamasinogatonu a Ieova. Ina ua ia vaaia le auala na aʻoaʻia ai e Ieova ona tagata fouvale, na atili ai ona ia mautinoa e faia lava e Ieova le faamasinogatonu. (Iere. 32:19) E tatou te ono lagona foʻi le lotovaivai e pei o Ieremia pe a vaaia le taulau manuia o tagata lē faamaoni, pe tauemua foʻi i tatou e isi. I le pei o Ieremia, e mafai ona faailoa atu iā Ieova o tatou faalogona tigā e ala i le tatalo, ma maufaatuatuaina o le a faasaʻo e Ieova so o se faiga lē tonu o loo tatou fesagaʻia.

16. O le ā e tatou te aʻoaʻoina mai i le tatalo a le sā Levī sa faaaunuua, pe afai ua faatapulaa mea e mafai ona tatou faia? (Salamo 42:​1-4) (Tagaʻi foʻi i ata.)

¹⁶ Faitau le Salamo 42:​1-4. Na tusia lenei salamo e se sā Levī na faaaunuua, ma o loo faamatala mai ai ona faalogona ona ua lē mafai ona tapuaʻi faatasi ma isi tagata Isaraelu i le malumalu. E ono tutusa o tatou faalogona ma lenei sā Levī, pe afai o loo faafalepuipui i tatou ona o o tatou talitonuga, po ua lē mafai foʻi ona ō ese mai i o tatou fale ona atonu ua faataotolia i se maʻi. O na tulaga e mafai ona fesuisuiaʻi ai o tatou faalogona. Peitaʻi, e mafai ona faailoa atu na faalogona iā Ieova e ala i le tatalo. O le faia faapea, o le a fesoasoani e tatou te malamalama lelei ai i o tatou faalogona, ma sui ai la tatou vaai i le tulaga o mea. O se faataʻitaʻiga, na iloa mulimuli ane e le sā Levī, o lona iai i le nofoaga na faaaunuua ai, ua ia maua ai isi avanoa fou e vivii ai iā Ieova. (Sala. 42:5) Na ia manatunatu loloto foʻi i auala na tausia ai o ia e Ieova. (Sala. 42:8) Pe a tatou tatalo faatauanau iā Ieova, o le a fesoasoani e faasagatonu ai o tatou manatu, maua ai le toʻafilemu, faapea le malosi e tumau ai.

17. (a) O le ā e tatou te aʻoaʻoina mai i le tatalo a le perofeta o Iona? (Iona 2:​1, 2) (e) E faapefea ona fesoasoani iā i tatou nisi o faaupuga mai i le Salamo, pe a tatou feagai ma faigatā? (Tagaʻi i le faamatalaga pito i lalo.)

¹⁷ Faitau le Iona 2:​1, 2. I lenei mau, o loo taʻua ai le tatalo a le perofeta o Iona a o iai i le manava o le iʻa. E ui e leʻi usiusitaʻi Iona iā Ieova, peitaʻi na ia mautinoa o le a faafofoga mai o ia i lana tatalo. Na taʻua e Iona i lana tatalo le tele o faaupuga mai i le Salamo.d O lona uiga, na masani lelei o ia i na salamo, ma o lona manatunatu loloto i ai na ia mautinoa ai o le a fesoasoani Ieova iā te ia. Pe a tatou taumafai foʻi e tauloto nisi o mau o le Tusi Paia, o le a fesoasoani e tatou te manatuaina ai pea ma maua ai faamāfanafanaga, a o tatalo atu iā Ieova i taimi faigatā.

IA FAALATALATA ATU PEA IĀ IEOVA I LE TATALO

18-19. Pe a faigatā ona faaupu pe faamatala atu o tatou faalogona i le tatalo, o le ā le faamautinoaga e tatou te maua mai i le Roma 8:​26, 27? Aumai se faaaʻoaʻoga.

¹⁸ Faitau le Roma 8:​26, 27. E iai taimi e lofitūina ai i tatou i faalogona popole, ma lē mafai ai ona faamatala atu o tatou faalogona iā Ieova i le tatalo. E lē faapea ai la ua leai so tatou fesoasoani, auā o taimi faapena, e “ʻaiʻoi” atu ai le agaga paia mo i tatou. E faapefea? Ia manatua, na faaaogā e Ieova lona agaga paia e faagaeeina ai i latou na tusia le Tusi Paia, ina ia faamauina le tele o tatalo a i latou na feagai foʻi ma tulaga faigatā e pei o i tatou. Pe a tatou lē iloa la le auala e faaupu pe faamatala atu ai o tatou faalogona iā Ieova, e silasila o ia i tatalo a i latou na o loo i le Tusi Paia, e tai pei o ni a tatou tatalo.

¹⁹ Na fesoasoani lenā manatu i se tuafafine Rusia e igoa iā Yelena, sa molia ona o le tatalo ma le faitauina o le Tusi Paia. O lona matuā mafatia i le mea na tupu, na faigatā ai ona ia tatalo iā Ieova. Peitaʻi, na ia faapea mai: “I taimi na lofitūina ai aʻu i faalogona lē mautonu, na ou lē iloa le auala e faaupu ai aʻu tatalo. Ae na ou manatua, e silasila Ieova i tatalo faagaeeina a ana auauna i aso ua mavae . . . e tai pei lava o ni aʻu tatalo. . . . O lenā manatu na matuā faamāfanafanaina ai aʻu a o ou feagai ma se taimi e sili ona faigatā.”

20. Pe a lofitūina i popolega, e faapefea ona sauniunia o tatou mafaufau a o leʻi tatalo?

²⁰ Pe a lofitūina i faalogona popole, e faigatā ona tatou uaʻi i mea e tatalo atu ai ona o loo faalavelavea o tatou mafaufau i le tele o mea. Ina ia sauniunia la o tatou mafaufau, e mafai ona tatou faitau i Salamo, pe tusi foʻi i lalo o tatou faalogona e pei ona faia e le tupu o Tavita. (Sala. 18, 34, 142; ma ulutala.) O le mea moni, e leai ni tulafono maʻoti i le auala e sauniunia ai o tatou mafaufau a o leʻi tatalo. (Sala. 141:2) Ae o le mea tāua, ia fai le mea e te iloa e mafai ona fesoasoani iā te oe e uaʻi lelei ai i au tatalo.

21. Aiseā e mafai ai ona tatou tatalo atu ma le lotoatoa iā Ieova?

²¹ E matuā faalaeiauina i tatou i le iloa, e malamalama lelei Ieova i o tatou faalogona a o tatou leʻi tatalo atu. (Sala. 139:4) E ui i lea, e fiafia lona finagalo pe a faaleo atu o tatou faalogona e ala i le tatalo, auā e atagia atu ai lo tatou maufaatuatuaina o ia. O lea, ia aua le faatalatū e tatalo atu iā Ieova. Ia faaaogā faaupuga mai i tatalo faagaeeina o loo i le Tusi Paia. Ia tatalo atu foʻi ma le lotoatoa, ma ia faailoa atu so o se mea, e aofia ai taimi e tatou te fiafia ai ma taimi faanoanoa. I le avea ai o Ieova o sa tatou Uō moni, e mautinoa o le a fesoasoani mai o ia iā i tatou.