Aua Neʻi Galo le Tatalo mo Isi

1. E faapefea ona iloa e tāua iā Ieova a tatou tatalo?

O LE tatalo o se meaalofa mataʻina! Aiseā? Ia mātau, na tuuina atu e Ieova le tele o matafaioi eseese i isi agelu. (Sala. 91:11) Ua ia tuuina atu foʻi i lona Alo nisi o matafaioi tāua. (Mata. 28:18) Peitaʻi, e na te leʻi tuuina atu i se tasi o i latou le faaeaga tautele o le faafofogaina o a tatou tatalo. E na o Ieova lava le “Faafofoga tatalo.”—Sala. 65:2.

2. Aiseā e faapea atu ai o le aposetolo o Paulo o se faaaʻoaʻoga lelei o le tatalo mo isi?

² E ui lava e tatou te tatalo atu iā Ieova e faatatau i o tatou popolega, ae e tāua foʻi ona tatou tatalo mo isi. O le mea tonu lenā na faia e le aposetolo o Paulo. E ui lava e tele mea na popole ai o ia, ae na ia faamautinoa e tatalo foʻi e faatatau i popolega o isi. (2 Kori. 11:23; 12:​7, 8) O se faataʻitaʻiga, na ia faapea atu i le faapotopotoga i Efeso: “E faaauau foʻi ona ou taʻua outou i aʻu tatalo.” (Efe. 1:16) Na tatalo foʻi o ia mo tagata taʻitoʻatasi. O se faataʻitaʻiga, na ia faapea atu iā Timoteo: “Ou te faafetai i le Atua . . . ina ia ou manatuaina pea oe i aʻu talosaga i pō ma ao.”—2 Timo. 1:3.

3. Aiseā e ono galo ai iā i tatou ona tatalo mo isi?

³ Peitaʻi, e iai taimi e galo ai iā i tatou ona tatalo mo isi. Aiseā? O se tasi o māfuaaga, ua taʻua e le tuafafine o Sabrina:a “O le matuā pisi o o tatou olaga ma le tele o mea e alu i ai le mafaufau, e uma ane ai ua tatou tatalo mo na o mea e tatou te manaʻomia.” Pe e iai ni taimi e tupu ai lenā mea iā te oe? Pe afai o lea, o le a fesoasoani la lenei mataupu iā i tatou ina ia (1) iloa māfuaaga e tāua ai le tatalo mo isi, ma le (2) o fautuaga i le auala e mafai ona tatou faia ai faapea.

MĀFUAAGA E TĀUA AI LE TATALO MO ISI

4-5. E faapefea ona iloa e “matuā malosi le aafiaga” o a tatou tatalo mo isi? (Iakopo 5:16)

⁴ E “matuā malosi le aafiaga” o a tatou tatalo mo isi. (Faitau le Iakopo 5:16.) Pe e iai moni se aogā o a tatou tatalo mo isi? Ioe, e aogā! O se faataʻitaʻiga, na silafia lelei e Iesu o le a faafitia o ia e le aposetolo o Peteru. O lea, na fetalai atu ai o ia e faapea: “Ua ou faatoga atu mo oe, ina ia aua neʻi mou atu lou faatuatua.” (Luka 22:32) Na iloa lelei foʻi e Paulo le malosi o le aafiaga o tatalo a isi. Ina ua faafalepuipuiina o ia i Roma, na ia tusi atu iā Filemoni e faapea: “Ua ou faamoemoe o a outou tatalo o le a faasaʻoloto atu ai aʻu iā te outou.” (File. 22) E leʻi umi ae faasaʻolotoina Paulo ma mafai ona toe faaauau lana galuega talaʻi.

⁵ Peitaʻi, e lē faapea a tatou tatalo atu iā Ieova, ona faamalosia ai lea o ia e gaoioi e tusa ma a tatou tatalo. O le mea moni, o loo silafia lelei e Ieova popolega o ana auauna, ma e iai taimi e filifili ai o ia e tali mai e tusa ai ma a latou talosaga. O le iloaina o lenā mea, e fesoasoani iā i tatou ina ia tatalo faatauanau atu ai iā Ieova i se tulaga faigatā, ma maufaatuatuaina o le a tali mai o ia i le auala e sili ona lelei.—Sala. 37:5; 2 Kori. 1:11.

6. E faapefea i le tatalo mo isi ona iai se aafiaga lelei iā i tatou? (1 Peteru 3:8)

⁶ O le tatalo mo isi e fesoasoani iā i tatou e faaalia ai le “tigā alofa.” (Faitau le 1 Peteru 3:8.) O le tigā alofa, e uiga atu i lo tatou iloaina o se tulaga faigatā o loo feagai ma se tasi, ma uunaʻia ai i tatou e fesoasoani atu. (Mare. 1:​40, 41) Na taʻua e se uso toeaina e igoa iā Michael: “Pe a ou tatalo mo isi, ou te manatua ai tulaga faigatā o loo latou fesagaʻia, ma atili ai ona ou alofa iā i latou. O le faia faapea, ou te māfana atu ai foʻi iā i latou, e tusa lava pe e latou te lē o iloa mai.” Ua faapea mai foʻi se isi toeaina e igoa iā Richard: “Pe a tatou tatalo mo se tasi, o le a uunaʻia ai i tatou e gaoioi e fesoasoani atu iā te ia. Pe a tatou fesoasoani atu la i lenā tagata, e tai pei ua faia so tatou sao i le taliina o la tatou tatalo.”

7. E faapefea i le tatalo mo isi ona fesoasoani iā i tatou e aua ai le soona uaʻi i o tatou lava faafitauli? (Filipi 2:​3, 4) (Tagaʻi foʻi i ata.)

⁷ O le tatalo mo isi e fesoasoani iā i tatou e lē soona uaʻi ai i o tatou faafitauli. (Faitau le Filipi 2:​3, 4.) I lenei lalolagi o loo pulea e le Tiapolo, o loo feagai ai i tatou taʻitoʻatasi ma le tele o faafitauli. (1 Ioa. 5:19; Faaa. 12:12) Pe afai la ma a tatou masani le tatalo mo isi, e tatou te manatua ai “o mafatiaga lava ia o loo puapuagatia ai foʻi lo [tatou] ʻauuso atoa.” (1 Pete. 5:9) Ua taʻua e se tuafafine paeonia e igoa iā Katherine: “O le tatalo mo isi e fesoasoani ou te manatua ai o loo feagai foʻi isi ma faafitauli. O le faia faapea, ou te lē soona uaʻi ai i oʻu lava faafitauli.”

TATALO MO LE ʻAUUSO ATOA

8. O ai nisi e mafai ona faaaofia i a tatou tatalo?

⁸ O ai e mafai ona faaaofia i a tatou tatalo? E toʻatele i latou e mafai ona taʻua i a tatou tatalo, e pei o ē o loo maua i maʻi o le tino, o talavou o loo feagai ma omiga i le aʻoga, faapea i latou o loo aafia i le soifua matua. E toʻatele foʻi nai o tatou uso ma tuafāfine o loo sauāina e o latou tauaiga, po o faigāmalo o loo pulea atunuu o loo nonofo ai. (Mata. 10:​18, 36; Galu. 12:5) O isi ua tuua o latou fale ona o vevesi e māfua mai i faiga faapolotiki, po ua faaleagaina foʻi o latou fale i mala faalenatura. E tusa lava pe e tatou te lē masani lelei i nei uso ma tuafāfine, ae o le tatalo mo i latou e faaalia ai lo tatou usitaʻi i le faatonuga a Iesu ina ia ʻalofa le tasi i le isi.’—Ioa. 13:34.

9. Aiseā e tāua ai ona tatou tatalo mo i latou o loo taʻimua i le faalapotopotoga a Ieova, faapea a latou avā?

⁹ E mafai foʻi ona tatou tatalo mo ē o loo taʻimua i le faalapotopotoga a Ieova, e pei o sui o le Vaega Pule ma a latou fesoasoani, Komiti o Lālā, o uso o loo vaavaaia matagaluega eseese i se lālā, ovasia o matagaluega, toeaina o faapotopotoga, ma auauna o le faiva. O le toʻatele o nei uso o loo feagai foʻi ma o latou lava popolega, ae o loo latou faia faataulaga ina ia fesoasoani iā i tatou. (2 Kori. 12:15) O se faataʻitaʻiga, ua faapea mai se ovasia matagaluega e igoa iā Mark: “O se tasi o luʻi e sili ona faigatā iā te aʻu, o le nofo mamao mai i oʻu mātua ua matutua, ma ua mamaʻi foʻi. E ui lava o loo tausia i laʻua e loʻu tuafafine ma lana tane, ae ou te faanoanoa ona e lē o tele ni mea e mafai ona ou fesoasoani ai i le tausiga o i laʻua.” E tusa lava pe e tatou te lē iloa popolega o loo feagai ma nei uso galulue mamafa, ae o se mea lelei le manatua o i latou i a tatou tatalo. (1 Tesa. 5:​12, 13) E mafai foʻi ona tatou tatalo mo a latou avā, ona o la latou lagolagosua faamaoni ua mafai ai e a latou tane ona faataunuu o latou faaeaga.

10-11. Pe e talia e Ieova tatalo e faalauaʻitele mo o tatou uso ma tuafāfine? Ia faamatala.

¹⁰ E pei ona tatou talanoaina, e masani ona faalauaʻitele a tatou tatalo ina ia faaaofia uma ai se vaega o uso ma tuafāfine. O se faataʻitaʻiga, atonu e tatou te lē taʻua patino se tasi, ae e tatou te tatalo faalauaʻitele iā Ieova ina ia fesoasoani iā i latou uma o loo faafalepuipuiina, po o ē foʻi ua maliu sē e pele iā i latou. Ua faapea mai se toeaina e igoa iā Donald: “Talu ai e toʻatele o tatou uso ma tuafāfine o loo feagai ma faigatā, o nisi la taimi e tatou te faia ai se tatalo faalauaʻitele e faaaofia uma ai i latou o loo feagai ma mafatiaga.”

¹¹ Pe e talia e Ieova na ituaiga o tatalo? Ioe! O le mea moni, e lē mafai ona tatou iloa uma tulaga o loo feagai ma o tatou uso ma tuafāfine. O lea, e mafai lava ona tatou tatalo faalauaʻitele, ina ia faaaofia uma ai i latou. (Ioa. 17:20; Efe. 6:18) O le faia faapea, e iloa ai lo tatou “alolofa i le ʻauuso atoa.”—1 Pete. 2:17.

PE A TATALO MO TAGATA TAʻITOʻATASI

12. E faapefea i le iai o le uiga mataalia, ona fesoasoani e faapatino ai a tatou tatalo?

¹² Ia mataalia. E lē gata e tatou te tatalo mo se vaega o uso ma tuafāfine, ae e lelei foʻi ona taʻua patino le igoa o se tasi i a tatou tatalo. O se faataʻitaʻiga, po o iai se tasi o lau faapotopotoga ua maua i se maʻi tugā? Pe e iai se talavou ua faavaivai ona o omiga i le aʻoga? Pe e iai se matua nofo toʻatasi, o loo taumafai malosi e tausia sana tama “i aʻoaʻiga ma apoapoaʻiga a Ieova”? (Efe. 6:4) Pe afai e tatou te mataalia i tulaga o loo feagai ma tagata taʻitoʻatasi, o le a atili ai ona māfana lo tatou alofa mo i latou, ma uunaʻia ai i tatou e tatalo mo i latou.b—Roma 12:15.

13. O le ā e fesoasoani iā i tatou ina ia tatalo patino ai mo se tasi e tatou te leʻi feiloaʻi muamua i ai?

¹³ Ia taʻua igoa o isi i a tatou tatalo. E mafai ona tatou faia faapea, e tusa lava pe e tatou te leʻi feiloaʻi muamua. O se faataʻitaʻiga, o nai o tatou uso ma tuafāfine o loo faafalepuipui i atunuu e pei o Crimea, Eritrea, Rusia, ma Sigapoa. E mafai ona maua o latou igoa pe a tagaʻi i le jw.org.c Ua faapea mai se ovasia matagaluega e igoa iā Brian: “Ou te tusiina i lalo le igoa o se uso po o se tuafafine o loo faafalepuipui, ma faamasani e taʻu lona igoa. O le faia faapea, e faigofie ai ona manatua lona igoa ma taʻua i aʻu tatalo.”

14-15. O le ā e fesoasoani iā i tatou ina ia tatalo ai mo ni mea patino?

¹⁴ Ia tatalo mo ni mea patino. Ua faapea mai Michael lea na taʻua muamua: “Pe a ou faitau i le jw.org e faatatau i uso o loo faafalepuipui, ou te taumafai e tuu aʻu i o latou tulaga. O se faataʻitaʻiga, pe afai e faafalepuipui aʻu, e mautinoa ou te popole i laʻu avā ma ou te manaʻo ia tausia lelei o ia. O le manatunatu i na tulaga, e faigofie ai ona maua se mea patino ou te tatalo ai, aemaise mo nai uso faaipoipo.”—Epe. 13:​3, fpl.

¹⁵ E aogā foʻi le mafaufau pe e faapeʻī le olaga i aso faisoo mo nai o tatou uso o loo faafalepuipui, ina ia tatou iloa ai ni mea patino e tatalo ai. O se faataʻitaʻiga, ia tatalo ina ia faaalia e leoleo o le falepuipui le agalelei, ma ia faataga e i latou o loo i le tulaga pule nai o tatou uso e saʻoloto e tapuaʻi. (1 Timo. 2:​1, 2) E tatou te tatalo foʻi ina ia faalaeiauina a latou faapotopotoga i lo latou tumau faamaoni, ma ia mātauina e tagata lē talitonu a latou amioga lelei ma uaʻi mai ai i la tatou feʻau. (1 Pete. 2:12) Peitaʻi, e mafai foʻi ona tatou faia faapea pe a tatou tatalo mo uso ma tuafāfine o loo onosaia isi tulaga faigatā. Pe a tatou mataalia i tulaga eseese o loo feagai ma isi, taʻua o latou igoa i a tatou tatalo, ma patino mea e tatou te tatalo ai, e faaalia ai le ʻtele o lo tatou alofa o le tasi i le isi.’—1 Tesa. 3:12.

O LE Ā E AO ONA MANATUA PE A TATALO?

16. O le ā e ao ona manatua pe a tatou tatalo? (Mataio 6:8)

¹⁶ E pei ona tatou talanoaina, e matuā malosi le aafiaga o a tatou tatalo i isi. Peitaʻi, e iai se isi mea e manaʻomia ona tatou manatua. Pe a tatou tatalo, e lē faapea o loo tatou taʻuina atu iā Ieova se mea e na te lē o silafia. E lē tatau foʻi ona tatou fautua atu iā te ia i le auala sili e mafai ona fesoasoani mai ai. O le mea moni, e silafia lelei e Ieova mea e manaʻomia e ana auauna uma a o leʻi talosaga atu. (Faitau le Mataio 6:8.) Aiseā la e manaʻomia ai fua ona tatou tatalo mo isi? E lē gata i manatu na tatou talanoaina i lenei suʻesuʻega, ae o le tatalo foʻi mo isi e faaalia ai lo tatou manatu mamafa iā i latou. O le alofa e uunaʻia ai i tatou e tatalo mo isi, ma e fiafia le finagalo o Ieova pe a silasila mai o loo faaalia e ana auauna le alofa e pei o ia.

17-18. Aiseā e tatou te tatalo ai pea mo o tatou uso ma tuafāfine? Ia faataʻitaʻi.

¹⁷ E tusa pe e foliga mai e lē o suia e a tatou tatalo le tulaga o mea, ae o loo faaalia ai lo tatou alolofa i uso ma tuafāfine, ma e talisapaia e Ieova lenā mea. Ina ia faataʻitaʻi lenā manatu, seʻi faapea e iai se tamā e iai sana fanau e toʻalua, o le tama ma le teine. Ina ua maʻi le tamaitiiti, na ʻaiʻoi atu le teineitiiti i lona tamā ina ia fesoasoani i si ona tuagane ua matuā tigāina lava. O le mea moni, o loo iloa lelei e le tamā le auala e fesoasoani ai i lona atalii. E alofa faapelepele foʻi i lona atalii, ma o loo ia tausia lelei o ia. Peitaʻi, e matuā fiafia le tamā i le iloaina o loo manatu mamafa lona afafine i si ona tuagane, ma o loo manaʻo e fesoasoani i ai lona tamā.

¹⁸ O le mea tonu lenā o loo faalaeiauina i tatou e Ieova e fai. Ia manatu mamafa ma tatalo le tasi mo le isi. O le faia faapea e iloa ai lo tatou matuā manatu mamafa mo le lelei o isi. (2 Tesa. 1:3; Epe. 6:10) E pei foʻi ona tatou talanoaina i lenei suʻesuʻega, e iai taimi e mafai ona suia ai le tulaga o mea ona o aafiaga o a tatou tatalo. O lea, ia maumauaʻi e faaauau ona tatalo le tasi mo le isi.