O Iesu o lo Tatou Ositaulaga Sili e Tigā Alofa

1-2. (a) Aiseā na auina mai ai e Ieova lona Alo i le lalolagi? (e) O le ā o le a talanoaina i lenei suʻesuʻega? (Eperu 5:​7-9)

I LE pe ā ma le 2,000 tausaga ua mavae, na auina mai ai e Ieova lona Alo pele i le lalolagi. O se tasi o māfuaaga na auina mai ai o ia, ina ia faasaʻoloto le fanau a tagata mai i le agasala ma le oti ma faalēaogāina galuega a le Tiapolo. (Ioa. 3:16; 1 Ioa. 3:8) Na silafia foʻi e Ieova, o le soifua o Iesu o se tagata i le lalolagi, o le a sauniunia atili ai o ia e avea ma Ositaulaga Sili e tigā alofa ma alofa mutimutivale iā i tatou. Na amata le faiva faaositaulaga a Iesu i le 29 T.A., ina ua mavae lona papatisoga.a

² O le a talanoaina i lenei suʻesuʻega pe na faapefea i le soifuaga o Iesu i le lalolagi, ona sauniunia ai o ia mo lana matafaioi o se Ositaulaga Sili e tigā alofa. O le tele e tatou te malamalama ai i le auala na “faaatoatoaina” ai Iesu mo lenā matafaioi, o le atili foʻi lenā ona tatou vavalalata iā Ieova, e tusa pe e tatou te lotovaivai ona o ni agasala po o ni vaivaiga.—Faitau le Eperu 5:​7-9.

UA AFIO MAI I LE LALOLAGI LE ALO PELE O LE ATUA

3-4. O ā suiga tetele na tofo ai Iesu?

³ O le toʻatele o i tatou ua tofo i suiga o le olaga, e pei o le siitia atu i se isi vaipanoa po o se isi atunuu, ae tuua aiga ma uō. E mautinoa e lē faigofie na suiga. Peitaʻi, e leai lava se tagata ua tofo i suiga tetele e pei o Iesu. O se faataʻitaʻiga, a o iai Iesu i le lagi sa maualuga lona tulaga auā sa lona lua o ia mai i lona Tamā. Na ia lagona foʻi le tele o le alofa o Ieova ma olioli i le galulue faatasi ma lona Tamā. (Sala. 16:11; Faata. 8:30) E ui i lenā, ua taʻua i le Filipi 2:7 na lotomalie o ia e ʻtuua mea uma lava’ e aofia ai lona tulaga maualuga i le lagi, ae afio mai e ola faatasi ma tagata lē lelei atoatoa i le lalolagi.

⁴ Seʻi mafaufau i le taimi na fanau ai Iesu i le lalolagi. Na ola aʻe o ia i se aiga mativa. E tatou te iloa lenā mea, pe a fua i mea na gafatia e ona mātua e fai ai le taulaga ina ua fanau mai Iesu. (Levi. 12:8; Luka 2:24) Na taumafai foʻi le tupu amioleaga o Herota e fasiotia Iesu ina ua logotala i Lona fanau mai. O lea, na sosola atu ai le aiga o Iesu ma avea o ni ē e sulufaʻi i Aikupito. (Mata. 2:​13, 15) Ioe, ua matuā telē le suiga o le olaga o Iesu na iai i le lagi, ma lona olaga o se tagata i le lalolagi.

5. O ā mea na tofo ma vaai i ai Iesu a o iai i le lalolagi, ma na faapefea i na mea ona sauniunia ai o ia mo lana matafaioi o le Ositaulaga Sili? (Tagaʻi foʻi i le ata.)

⁵ A o soifua Iesu i le lalolagi, na ia vaai i le mafatia o tagata. Na ia tofo foʻi i le tigā o le maliu o sē e pele, e pei o lona tamāfai o Iosefa. I le faiva a Iesu, na ia feiloaʻi ai i tagata lepela, tauaso, pipili, faapea mātua faavauvau, ma na ia faaalia le tigā alofa iā i latou. (Mata. 9:​2, 6; 15:30; 20:34; Mare. 1:​40, 41; Luka 7:13) E ui na ia silafia le tulaga mafatia o tagata a o silasila mai i le lagi, peitaʻi na sili atu ona malamalama o ia i na mafatiaga ina ua afio mai i le lalolagi o se tagata. (Isa. 53:4) O mea na tofo ma vaai i ai Iesu, na fesoasoani iā te ia e malamalama lelei ai i faalogona, o popolega, ma mafatiaga o tagata. E pei lava o isi tagata, na oo foʻi iā Iesu faalogona faanoanoa, lē lavā, ma le popole.

NA FAAALIA E IESU LE TIGĀ ALOFA I TAGATA

6. O ā mea ua tatou aʻoaʻoina mai i talafaatusa a Isaia e faatatau i le tigā alofa o Iesu? (Isaia 42:3)

⁶ I le faiva a Iesu, na ia faaalia le tigā alofa i ē na faileagaina ma vaai maulalo i ai isi. O lenā mea na ia faataunuuina ai se valoaga a le perofeta o Isaia. I Tusitusiga Paia Eperu, e masani ona faatusaina tagata malolosi i se togālaau lauolaola, po o ni laau tupu tetele matagofie. (Sala. 92:12; Isa. 61:3; Iere. 31:12) Peitaʻi, o tagata matitiva ma lotomomomo, e faatusaina i se ū ua nutililiia ma i se vavae ua mū itiiti, lea e itiiti le aogā. (Faitau le Isaia 42:3; Mata. 12:20) Na faagaeeina le perofeta o Isaia e faaaogā na talafaatusa, e valoia ai le tigā alofa o le a faaalia e Iesu i tagata lautele o ē e vaai maulalo i ai isi.

7-8. Na faapefea ona faataunuuina e Iesu le valoaga a Isaia?

⁷ Na faatatau atu e le faievagelia o Mataio upu nei a Isaia iā Iesu: “O le a ia lē gausia le ū ua nutililiia, o le a ia lē tineia foʻi le vavae ua mū itiiti.” O isi vavega a Iesu, na aogā i ē na mafatia lea na pei o ni ū ua nutililiia, po o ni vavae ua mū itiiti ua toetoe lava a pepē. O se faataʻitaʻiga, o se tamāloa na lilofia lona tino i le lepela. Atonu na mafaufau o ia e lē mafai ona faamālōlōina lona maʻi, ma olioli i le faatasitasi ma lona aiga ma uō. (Luka 5:​12, 13) Na iai foʻi se tamāloa tutuli ma e tau lē mafai ona tautala. Faamata o ā ni ona faalogona i le vaai atu o talanoa fiafia tagata?—Mare. 7:​32, 33.

⁸ I aso foʻi o Iesu, e toʻatele tagata Iutaia na talitonu e māfua ona aafia se tasi i maʻi, ona o se faasalaga mo ana agasala po o agasala a ona mātua. (Ioa. 9:2) O lenā talitonuga sesē, na lagona ai e nisi le mafatia ma le leai o se aogā. Ae na faataunuuina e Iesu le valoaga a Isaia, ina ua ia faamālōlōina ē na mafatia, ma faamautinoa atu ai e manatu mamafa le Atua iā i latou. O le ā ua tatou aʻoaʻoina mai i lenei mea e faatatau iā Iesu?

9. E faapefea ona faamatilatila mai i le Eperu 4:​15, 16, e faaalia moni e lo tatou Ositaulaga Sili o Iesu le tigā alofa i tagata lē lelei atoatoa?

⁹ Faitau le Eperu 4:​15, 16. E tatou te mautinoa o le a faaalia pea e Iesu le tigā alofa iā i tatou. O le ā le uiga o lenā manatu? O le faaupuga Eleni ua faaliliuina i le “tigā alofa,” e uiga atu i le lagonaina e se tasi o mafatiaga ma tigā o loo feagai ma isi. Na faaaogā e Paulo le faaupuga lava lea e tasi i le Eperu 10:​34, e faatatau i le faaalia o le tigā alofa mo ē o loo faafalepuipui. O vavega na faia e Iesu, e faaalia ai na matuā aafia ona faalogona i mafatiaga o isi. E leʻi faamālōlōina e Iesu tagata ona e faapea o lana galuega lenā e tatau ona fai, ae na ia faia ona o lona naunau moni e fesoasoani i tagata. O se faataʻitaʻiga, ina ua ia faamālōlōina le tamāloa lepela, na ono mafai lava ona ia faia faapea e aunoa ma le paʻi i ai. Ae o le tigā alofa o Iesu, na paʻi atu ai i le tamāloa. Atonu o le taimi muamua lea mai i le tele o tausaga, ua lagona ai e le lepela le paʻi atu o se tasi iā te ia. Na faaalia foʻi e Iesu le agalelei ina ua ia faamālōlōina le tamāloa tutuli. Na ia aveese o ia mai i le motu o tagata, ma ave i se nofoaga e na o i laʻua ma faamālōlō ai. Seʻi mafaufau foʻi i le mea na tupu ina ua faaalia e se fafine le salamō, ma ia fufuluina vae o Iesu i ona loimata ma solo i lona lauulu. E ui lava na vaai maulalo se Faresaio i le fafine ma fai atu i ai ni tala lē agalelei, ae na puipuia o ia e Iesu. (Mata. 8:3; Mare. 7:33; Luka 7:44) E leʻi teena e Iesu ē na mafatia ona o maʻi, po o i latou na faia agasala matuiā. Nai lo o lea, na ia faamautinoa atu iā i latou lona alofa. E tatou te mautinoa, o le a faaalia foʻi e Iesu le tigā alofa iā i tatou.

FAAAʻOAʻO I LO TATOU OSITAULAGA SILI I ASO NEI

10. O ā sauniuniga faaleagaga ua tatou faaaogāina i aso nei, e fesoasoani ai i ē tutuli ma pō le vaai? (Tagaʻi foʻi i ata.)

¹⁰ I le avea ai o i tatou ma soo faamaoni o Iesu, e tatou te taumafai e faaaʻoaʻo iā te ia i le faaalia o le tigā alofa ma le alofa faaleuso. (1 Pete. 2:21; 3:8) E ui e lē mafai ona tatou faamālōlōina ē e tutuli ma tauaso, ae e mafai ona tatou saunia le fesoasoani faaleagaga mo i latou. O se faataʻitaʻiga, ua maua nei a tatou lomiga faale-Tusi Paia i le silia ma le 100 gagana faataga. Ua maua foʻi lomiga mo ē e pō le vaai i le silia ma le 60 gagana patupatu. E silia i le 100 gagana ua mafai ona maua ai audio descriptions po o le faamatalaina o mea o loo tutupu i se vitiō, lea e aogā mo i latou e lē lelei le vaai. O nei sauniuniga, ua fesoasoani i ē e tutuli ma ē pō le vaai, ina ia maua sa latou faiā māfana ma Ieova ma lona Alo.

11. Ua faapefea ona mulimuli le faalapotopotoga a Ieova i le manatu mamafa o Iesu i so o se tagata? (Galuega 2:​5-7, 33) (Tagaʻi foʻi i ata.)

¹¹ Ina ua māeʻa le toetū o Iesu, na ia liligi ifo le agaga paia i ona soo, ina ia mafai ai e ē na faatasitasi i le tausamiga o le Penetekoso, ona faalogo i le tala lelei “i lana lava gagana.” (Faitau le Galuega 2:​5-7, 33.) I aso nei, o loo mulimuli le faalapotopotoga a Ieova i le faaaʻoaʻoga a Iesu, e ala i le faia o le tele o taumafaiga ina ia fesoasoani ai i so o se tagata. Ua saunia e le faalapotopotoga lomiga faale-Tusi Paia i le silia ma le 1,000 gagana. O nisi o na gagana, e toʻalāiti tagata e tautatala ai. O se faataʻitaʻiga, o gagana Amerindian lea e tautatala ai tagata e nonofo i Amerika i Mātū ma Amerika i Saute. E ui e toʻalāiti tagata e tautatala ai, ae ina ia faamautinoa e oo atu le tala lelei i le toʻatele e mafai ai, e silia ma le 160 o na gagana ua faaliliuina ai lomiga. O loo maua foʻi a tatou lomiga i le silia ma le 20 gagana Romany. E faitau afe i latou e tautatala i na gagana, ua aʻoaʻoina le upu moni.

12. O ā nisi fesoasoani aogā ua saunia e le faalapotopotoga a Ieova?

¹² E faaopoopo atu i taumafaiga e faaoo atu le tala lelei i so o se vaipanoa, ua saunia foʻi e le faalapotopotoga a Ieova fesoasoani laveaʻi, mo i latou ua aafia i mala faalenatura. Ua tauofo le faitau afe o uso ma tuafāfine e fesoasoani iā i latou na. Ua saunia foʻi e le faalapotopotoga ni maota e faigofie o latou fausaga, e faatasitasi ai tagata ina ia mafai ona aʻoaʻoina e faatatau iā Ieova ma lona alofa mo i latou.

AUALA E FESOASOANI MAI AI LO TATOU OSITAULAGA SILI

13. O ā nisi auala e fesoasoani mai ai Iesu iā i tatou?

¹³ I le avea o Iesu ma leoleo mamoe lelei, e uaʻi mai o ia i o tatou manaʻoga faaleagaga. (Ioa. 10:14; Efe. 4:7) O nisi taimi, o faafitauli o le olaga e mafai ai ona pei i tatou o se ū ua nutililiia, po o se vavae ua mū itiiti. Atonu e tatou te lagona le lotovaivai ona o se maʻi tigāina, o se mea ua lē taulau ai, po ua leaga foʻi la tatou faiā ma se tasi i le faapotopotoga. O na faalogona tigā, e ono faigatā ai ona tatou taulaʻi atu i le faamoemoe mo le lumanaʻi. Ae ia manatua, e malamalama lelei Iesu i lou tulaga faapea ou faalogona. O le tigā alofa e uunaʻia ai o ia e fesoasoani iā te oe. O se faataʻitaʻiga, e mafai ona ia faaaogāina le agaga paia e faamalosia ai oe i taimi e te vaivai ai. (Ioa. 16:7; Tito 3:6) E mafai foʻi ona ia faaaogāina “meaalofa i tagata” faapea isi uso ma tuafāfine, e faalaeiau ma fesoasoani iā te oe.—Efe. 4:8.

14. O le ā e ao ona tatou manatua pe a aafia i le lotonutimomoia po o le lotovaivai?

¹⁴ Pe afai ua e aafia i le lotonutimomoia, ia manatunatu loloto i le matafaioi a Iesu o le Ositaulaga Sili. Ia manatua, na auina mai o ia e Ieova i le lalolagi, e lē gata ina ia ofo atu lona ola e fai ma togiola, ae ina ia malamalama lelei ai foʻi i faafitauli o loo pagatia ai tagata lē lelei atoatoa. O lea, pe a tatou lotovaivai ona o ni agasala po o ni vaivaiga, ia mautinoa o loo nofosauni Iesu e fesoasoani mai iā i tatou “i le taimi e tatau ai.”—Epe. 4:​15, 16.

15. O le ā na fesoasoani i se uso ina ia toe foʻi mai i le faapotopotoga?

¹⁵ O loo taʻitaʻia foʻi e Iesu taumafaiga a ona tagata, ina ia saʻili ma fesoasoani i ē ua tuua le lafu mamoe a Ieova. (Mata. 18:​12, 13) Seʻi mātau le mea na tupu iā Stefanob o lē na amata ona toe auai i sauniga, ina ua mavae le 12 tausaga talu ona aveesea mai i le faapotopotoga. Na ia faapea mai: “E ui e leʻi faigofie, ae na ou naunau lava e toe avea aʻu ma vaega o le aiga o Ieova. Na faafeiloaʻi ma le māfana aʻu e toeaina o le faapotopotoga. E iai taimi na ou lagona ai le lotovaivai, ae na faamanatu mai e uso e finagalo Ieova ma Iesu ia faia pea aʻu taumafaiga e toe foʻi mai. I le taimi na toe faaaʻe ai aʻu, na faafeiloaʻi ma le fiafia aʻu ma loʻu aiga e le faapotopotoga atoa. Mulimuli ane na amata le suʻesuʻega faale-Tusi Paia a laʻu avā, ma o loo matou auauna ma le fiafia iā Ieova o se aiga.” E mautinoa le matuā olioli o lo tatou Ositaulaga Sili, a o silasila mai i a tatou taumafaiga ina ia fesoasoani i ē ua salamō moni e toe foʻi mai i le faapotopotoga!

16. Aiseā e tatou te lotofaafetai ai i le avea o Iesu ma o tatou Ositaulaga Sili e tigā alofa?

¹⁶ A o soifua Iesu i le lalolagi, na ia fesoasoani i le toʻatele o tagata i le taimi talafeagai. I aso nei, e tatou te mautinoa o le a saunia foʻi e Iesu le fesoasoani i le taimi tonu e tatou te manaʻomia ai. I le lalolagi fou, o le a ia fesoasoani i tagata usiusitaʻi ina ia saʻoloto mai i aafiaga o le agasala ma le tino lē lelei atoatoa. Maʻeu lo tatou lotofaafetai i le alofa ma le agalelei o lo tatou Tamā o Ieova, ua ia tofia ai lona Alo e avea ma o tatou Ositaulaga Sili e tigā alofa!