Fesili Mai le ʻAufaitau

O le ā le “finagalo” o Ieova lea ua toeitiiti tuuina i loto o faigāmalo ina ia faataunuuina?

E tusa ai ma le amataga o le puapuaga tele, ua faapea mai le Faaaliga 17:​16, 17: “O seu e sefulu sa e iloa ma le manufeʻai, e latou te ʻinoʻino i le fafine talitane, ma faataugā ma faatelenoa iā te ia, e latou te ʻaina foʻi lona tino ma susunu uma o ia i le afi. Auā ua tuuina e le Atua i o latou loto ina ia faataunuu lona finagalo, ioe, ina ia faataunuu lo latou manatu e tasi e tuuina atu lo latou malo i le manufeʻai.” O le ā le “finagalo” o Ieova lea o le a tuuina i loto o malo ina ia faataunuuina? Na taʻua i a tatou lomiga i taimi ua mavae, e faasino atu i le faaumatiaina e malo o lotu sesē uma.

Peitaʻi, ua iai se fetuunaʻiga o la tatou malamalamaga. O le “finagalo” o Ieova, e faasino atu i le tuuina atu e faigāmalo o o “latou malo [pule] i le manufeʻai.” Ina ia malamalama atili i le auala o le a faataunuuina ai lenei valoaga, seʻi o tatou iloiloina tali o fesili o loo mulimuli mai.

O ai o loo faaata mai e i latou o loo taʻua i le valoaga? O le “fafine talitane” po o “Papelonia le Aai Tele,” e faaata mai ai le tuufaatasiga o lotu sesē uma. O le “manufeʻai e lanu mūmū sesega,” e faaata mai ai le faalapotopotoga o Malo Sosoo lea na faavaeina i le 1919, ae ua taʻua nei o Malo Aufaatasi. (Faaa. 17:​3-5) O “seu e sefulu,” e faasino atu i faigāmalo uma e lagolagoina le manufeʻai.

O le ā le fesootaʻiga o le fafine talitane i le manufeʻai lanu mūmū sesega? O loo “tiʻetiʻe” le fafine talitane i luga o le manufeʻai, ma o loo faaata mai ai lona lagolagoina ma lona taumafai e taaʻina pe pulea lenā manufeʻai.

O le ā le mea o le a tupu i le fafine talitane? O le a “ʻinoʻino” le manufeʻai ma seu e sefulu o loo lagolagoina o ia, i le fafine talitane. O lo latou ʻinoʻino tele, o le a latou aveesea ai le tamaoaiga o le fafine talitane, ma faaalialia i lumāmea lona amioleaga. O le a latou faaumatia aʻiaʻi o ia, ma faataunuuina ai le sala faafaamasinoga a Ieova. (Faaa. 17:1; 18:8) Peitaʻi, a o leʻi faaumatia lotu sesē uma, o le a faapogaia e Ieova faigāmalo ina ia faia se mea e leʻi tupu muamua lava i le talafaasolopito o pulega faaletagata.

O le ā o le a faapogaia e Ieova faigāmalo e fai? O le a tuuina e le Atua i loto o seu e sefulu ina ia faataunuuina “lona finagalo,” ina ia “avatu lo latou malosi ma le pule i le manufeʻai [lanu mūmū sesega]” lea e faasino atu i Malo Aufaatasi. (Faaa. 17:13) E lē o le uiga o lenei manatu, o le a tuuina atu e faigāmalo lo latou malosi ma le pule i le manufeʻai, ona o so latou lava manaʻo. Nai lo o lea, ua faailoa mai i le valoaga o le a faapogaia e Ieova lenā mea e tupu. (Faata. 21:1; faatusatusa i le Isaia 44:28.) Po o le a faasolosolo ona tupu lenei mea? E leai, o le a tupu faafuaseʻi! I lenā taimi, o le a faaumatia aʻiaʻi ai faalapotopotoga o lotu sesē e le manufeʻai, ma faataunuuina ai le faasalaga faafaamasinoga a Ieova.

O le ā la e ao ona tatou faatalitalia? E lē tatau ona tatou soona popole, pe mafaufau e tatau ona tatou matamata i tala fou mo ni faamaoniga e iloa ai, ua amata ona tuuina atu e faigāmalo la latou pule ma le malosi i Malo Aufaatasi. Nai lo o lea, e tatou te faatalitalia o le a faafuaseʻi lava ona faapogaia e Ieova faigāmalo, e tuuina atu la latou pule ma le malosi i Malo Aufaatasi. Pe a tupu lenā mea, ona tatou iloa ai lea ua toeitiiti gāpā le puapuaga tele. Peitaʻi, i le taimi lenei, e faalaeiauina i tatou ina ia “mataala ma faaauau ona mafaufau lelei,” auā ua toeitiiti ona oo mai lea o suiga faafuaseʻi!—1 Tesa. 5:6.