“Faatumau le Autasi i le Agaga”

O le “autasi” lea ua tatou mauaina, e mai “i le agaga.” O lona uiga, e māfua ona iai lo tatou autasi ona o le agaga paia o Ieova. Peitaʻi, na taʻua e le aposetolo o Paulo, e manaʻomia ni taumafaiga ina ia faatumauina ai lenā autasi. O ai la e faatalitalia e faia faapea? O le mea moni, e tatau i Kerisiano taʻitoʻatasi uma ona fai la latou vaega ina ia “faatumau le autasi i le agaga.”

O se faataʻitaʻiga, pe a faameaalofa atu e se tasi iā te oe se taavale fou, o ai e faatalitalia e tausia pe faatumauina le lelei o le taavale? E mautinoa o oe. E lē mafai ona e tuuaʻia lē na avatuina le taavale, pe a iai se mea e faalētonu o le taavale ona e leʻi lelei ona e tausia.

I se tulaga taitutusa, e ui o se meaalofa mai iā Ieova lo tatou autasi o ni Kerisiano, ae e faatalitalia i tatou uma taʻitoʻatasi ina ia tausia pe faatumauina lenā autasi. Pe a iai se mea e lepetia ai la tatou faiā filemu ma se uso po o se tuafafine, o se mea lelei le fesili ifo: ʻPo o oʻu faia le mea sili ina ia faatumauina ai le autasi o le faapotopotoga?’

“IA MATUĀ NAUNAU E FAATUMAU LE AUTASI”

E pei ona taʻua e Paulo, e iai taimi e manaʻomia ai ni taumafaiga malolosi ina ia faatumau le autasi, aemaise lava pe a faatigā mai se uso po o se tuafafine. Po o lona uiga la, o taimi uma lava e faatigā mai ai se isi, e ao lava ona talanoa atu iā te ia ina ia tausia ai le filemu? E leai! Ia fesili ifo: ʻPo o le talanoa e faatatau i le mea na tupu, o le a tausia ai le filemu po o le a atili faateteleina ai le faafitauli?’ O nisi taimi, o le gaoioiga e sili ona atamai e fai, o le faamagalo lea o le tagata ma faagalo le mea na tupu.—Faata. 19:11; Mare. 11:25.

Na tusi le aposetolo o Paulo, e ao ona faaauau ona “faapalepale le tasi i le isi i le alofa.” (Efe. 4:2) Ua taʻua i se tasi o lomifefiloi, e mafai ona uiga atu lenā faaupuga i le “talia o le ituaiga o tagata e iai isi.” O lea la, e ao ona tatou talia, e iai masei o o tatou uso ma tuafāfine e pei foʻi o i tatou. O le mea moni, o loo tatou taumafai e oofu pea i le “tagata fou.” (Efe. 4:​23, 24) Peitaʻi, e lē o taimi uma e tatou te taulau ai i le faia faapea. (Roma 3:23) O le manatuaina la o lenā manatu, e faigofie ai ona tatou faapalepale ma faamagalo atu i isi, ma iʻu ai i le ʻfaatumauina o le autasi i le agaga.’

E mafai ona tatou autasi i le “fusi o le filemu,” pe a tatou faamagalo ma faagalo ni mea sesē e faia mai e se uso po o se tuafafine. O le upu Eperu lea ua faaliliuina i le “fusi” i le Efeso 4:​3, o loo faaliliuina i le “uaua” i le Kolose 2:19. O le malolosi o uaua, e mafai ona sosoo faatasi ai ni ponaivi. I se tulaga taitutusa, o le filemu ma le alofa mo o tatou uso, e fesoasoani e fusia pe autasia ai i tatou e ui lava i ni mea e tatou te feeseeseaʻi ai.

O lea, pe a faatigā atu pe faia e se uso po o se tuafafine se mea e te lē fiafia ai, ia taumafai e faaalia le alofa mutimutivale, nai lo o le vaavaai masei. (Kolo. 3:12) Talu ai e tatou te lē lelei atoatoa uma, atonu la na e faia foʻi se mea e faatigā ai i se isi. O le manatuaina o lenā manatu, e fesoasoani e faia ai pea la tatou vaega ina ia “faatumau le autasi i le agaga.”