IA FAAAUAU ONA MATAALA!

Ua Taatele le Tafanaina o Tagata—O le ā se Manatu o le Tusi Paia?

SE TALA LATA MAI: Aperila 27, 2023

E toʻatele ua maliliu ona o le faatupulaʻia o le tafanaina o tagata i le tele o vaipanoa o le lalolagi. Mātau nisi o mea na tutupu talu ai nei.

“I le Iunaite Setete lava ia, ua faamauina e pito i toʻatele ai lava tagata ua fasiotia i nei faiga i tausaga taʻitasi, ma a itiiti mai e faatasi i le vaiaso ona tupu lea mea.”—Aperila 21, 2023, The Guardian.
“Na tafanaina se aiga i Aferika i Saute ma e toʻasefulu na maliliu ai, e aofia ai tamaʻitaʻi e toʻafitu ma se alii talavou e 13 tausaga.”—Aperila 21, 2023, AP News.
“I Siamani, na alu atu se tamāloa i se nofoaga e fai ai tapuaʻiga a Molimau a Ieova i Hamburg, ma tafana tagata ma maliliu ai le toʻaono, ona ia pule ai lea i lona ola.”—Mati 10, 2023, Reuters.

E maua i le Tusi Paia faamāfanafanaga mo ē o mafatia ona o nei mea mataʻutia na tutupu. Mātau se mea moni na tupu o loo faamatalaina i le vitiō DeJanerio Brown: Mafatia ae e Leʻi Faavaivai Ai.

Ua faamatala foʻi i le Tusi Paia māfuaaga ua tutupu ai nei mea mataʻutia. Pe a e fia iloa nisi faamatalaga e faatatau i lenei mataupu, maimoa i le vitiō Aiseā ua Lē Taofia ai e le Atua Mafatiaga?

Iā Iulai 2022, na lipotia mai ai i le lalolagi aoao ni tala e faateʻia ai, i ni tagata na tafanaina:

“Na matuā faateʻia le atunuu o Iapani ma le lalolagi atoa, ina ua tagatavaleina sa latou tagata faipolotiki lauiloa [o Shinzo Abe, o lē sa avea ma palemia], aemaise pe a mafaufau e lē tele ni solitulafono o faiga sauā i le atunuu, ma e mamalu a latou tulafono i le faaaogāina o fana.”—Iulai 10, 2022, The Japan Times.
“Na faateʻia tagata i Tenemaka ina ua tafana e se tasi ni tagata i se faleoloa i Copenhagen, ma fasiotia ai ni tagata se toʻatolu.”—Iulai 4, 2022, Reuters.
“Aferika i Saute: E toʻa 15 na fasiotia, ina ua tafana e ni tamāloloa ni tagata i se pā pia i le taulaga o Soweto.”—Iulai 10, 2022, The Guardian.
“E silia ma le toʻa 220 i latou na lavevea ma fasiotia i Amerika, ona o ni faalavelave na faaaogāina ai ni fana, i le faaiʻuga o le vaiaso na faamanatu ai le aso mālōlō o Iulai 4.”—Iulai 5, 2022, CBS News.

Po o le a iai se taimi o le a faaiʻuina ai na ituaiga o faiga sauā? O le ā se manatu o le Tusi Paia?

Faaiʻuina Faiga Sauā

Ua taʻua i le Tusi Paia ua tatou ola i “aso e gata ai,” lea o le a gaoioi ai tagata i se auala e matuā sauā. (2 Timoteo 3:1, 3) O na gaoioiga sauā ua ola matataʻu ai tagata. (Luka 21:11) Peitaʻi, ua folafola mai i le Tusi Paia o le a iai se taimi o le a faaiʻuina ai faiga sauā, ma o le a nonofo tagata i se “nofoaga toʻafilemu ma fale e saogalemu ai, ma mea foʻi e mapu ai e lē faalavelave mai i ai se isi.” (Isaia 32:18) O le a faapefea ona faaiʻuina faiga sauā?

O le a tafiesea e le Atua tagata amioleaga ma faaumatia auupega uma.

“E faaumatia o ē e amioleaga mai i le lalolagi.”—Faataoto 2:22.
O le a faaiʻuina e le Atua “taua i tuluʻiga o le lalolagi. Ua ia gauia foʻi le ʻaufana ma vaevaeina le tao; ma ua ia susunuina i le afi o taavale toso.”—Salamo 46:9.

O le a liaʻiese e le Atua le aa o faiga sauā uma, e ala i le aʻoaʻo o tagata e nonofo faatasi ma le filemu.

“E latou te lē faia se mea e lamatia ai pe faaleagaina se mea i loʻu mauga paia uma; auā o le a tumu le lalolagi i le poto e uiga iā Ieova e pei ona ufitia o le ilititai i le suāsami.”—Isaia 11:9.
E oo lava i le taimi lenei, o loo aʻoaʻo e le Atua tagata i le lalolagi aoao ina ia tuu ese le sauā ma le faaaogā o auupega, ae ia “tuʻi a latou pelu e fai ma suōtosina, ma a latou tao e fai ma pelu e teu ai laau.”—Mika 4:3.

Ina ia iloa atili e faatatau i le folafolaga a le Tusi Paia e faatatau i se lalolagi e aunoa ma le fefe, faitau i le mataupu “Pe e Mafai Ona Saʻoloto Mai le Fefe?”

Ina ia aʻoaʻo atili e faatatau i le vaifofō moni o faiga sauā, faitau i le mataupu “Ua Filemu le Lalolagi!”