Faateteleina le Vevela i le Lalolagi Aoao—O le ā se Manatu o le Tusi Paia?

Iā Iulai 2022, na lipotia mai ai le matuā faateteleina o le vevela i le lalolagi aoao:

• “Ua faalua ona lapataʻia tagata i Saina i lenei masina i le matuā mataʻutia o le vevela i le toetoe 70 aai.”—Iulai 25, 2022, CNN Wire Service.

• “O le matuā faateteleina o le vevela i Europa, ua mū ai le tele o vaomatua i le tele o atunuu.”—Iulai 17, 2022, The Guardian.

• “I le Aso Sa, na oo atu ai le vevela o le tele o aai i Amerika i se maualuga e leʻi iai muamua, a o faateteleina le vevela i le talafatai i sasaʻe ma nisi o vaega o le itu i saute ma Sisifo Tutotonu.”—Iulai 24, 2022, The New York Times.

Pe a fua i nei mea o loo tutupu, po o lona uiga la o le a oo atu le lalolagi i se tulaga o le a lē mafai ona toe nonofo ai ni tagata? O le ā se manatu o le Tusi Paia?

Pe na valoia i le Tusi Paia le vevela o le tau?

Ioe. E aofia ai le vevela o le tau i nisi o mea na valoia i le Tusi Paia o le a tutupu i o tatou aso. O se faataʻitaʻiga, na valoia e Iesu o le a tatou vāai i “vaaiga e matataʻu ai,” po o “mea mataʻutia e lē masani ai.” (Luka 21:11; Good News Translation) O le matuā faateteleina o le vevela i le lalolagi, ua faapopoleina ai le toʻatele ina neʻi avea gaoioiga a tagata, ma mea e faaleagaina ai le lalolagi ma lē mafai ai ona toe nonofo ai nisi.

Po o le a oo le lalolagi i se tulaga e lē mafai ona toe nonofo ai nisi?

Leai. Na foafoaina e le Atua le lalolagi e avea ma nofoaga e nonofo ai tagata e faavavau. (Salamo 115:16; Failauga 1:4) O le a ia lē faatagaina tagata e faaleagaina atoatoa le lalolagi. Nai lo o lea, na ia folafola mai o le a ia ʻfaafanoina i latou o loo faaleagaina le laueleele.’—Faaaliga 11:18.

Mātau nisi o valoaga se lua o loo folafola mai ai isi mea o le a faia e le Atua i le lalolagi:

• “O le a olioli le toafa ma le laueleele ua leai se vai, o le a fiafia foʻi le fanua laugatasi o le toafa ma e fua mai e pei o le lili.” (Isaia 35:1) O le a lē tuuina e le Atua le lalolagi e avea ma toafa e lē mafai ona ola ai se mea. Nai lo o lea, o le a ia toe faaleleia vaega o le lalolagi ua faaleagaina.

• “Ua e liuliualo mai i le laueleele, ina ia e foaʻiina mai i ai mea e tele lava.” (Salamo 65:9) O le a faia e le Atua le lalolagi e avea ma parataiso.

Ina ia aʻoaʻo atili pe e faapefea i suiga o le tau ona faataunuuina ai valoaga o le Tusi Paia, ia faitau i le mataupu “Le Manatu o le Tusi Paia e Faatatau i le Suiga o le Tau ma lo Tatou Lumanaʻi.”

Ina ia aʻoaʻo atili e faatatau i le folafolaga a le Tusi Paia i le toe faaleleia o le lalolagi, ia tagaʻi i le mataupu “O Ai o le a Faasaoina le Lalolagi?”