O Lāmala e Sili Ona Leaga—O le ā se Manatu o le Tusi Paia?

“Ua lipotia mai i Saina le matuā vevela o le tau, ma o le tolu ai lea o tausaga sosoo o lāmala i le taimi o le tau vevela.”—The Guardian, Setema 7, 2022.
“O le a aafia i le lāmala le vaega o Aferika e taʻua o le Greater Horn, mo le tausaga lona lima.”—UN News, Aokuso 26, 2022.
“O loo iai le lamatiaga e ono aafia le afa o le atu Europa i le lāmala, ma atonu o le lāmala pito sili lea ona leaga talu mai le 500 tausaga talu ai.”—BBC News, Aokuso 23, 2022.

E toʻatele tagata atamamai e latou te manatu, o le a faateteleina lāmala ma oo atu i se tulaga e sili ona leaga. Pe e iai se faamoemoe e sili atu mo le lumanaʻi? O le ā se manatu o le Tusi Paia?

Lāmala ma Valoaga o le Tusi Paia

Na valoia e le Tusi Paia e faatatau i o tatou aso:

“O le a iai . . . oge i lea mea ma lea mea.”—Luka 21:11.

O le lāmala, e masani lava ona faapogaia le utiuti o mea taumafa. O mafatiaga ma le oti ona o le utiuti o mea taumafa, ua faataunuuina ai valoaga o le Tusi Paia.—Faaaliga 6:6, 8.

Aiseā ua faateteleina ai le leaga o lāmala?

Ua faailoa mai i le Tusi Paia le māfuaaga ua faateteleina ai le leaga o lāmala. Ua faapea mai:

“E lē o i le tagata foʻi e savali, ona faatonuina le mea e ui ai o ia.”—Ieremia 10:23.

O lona uiga, e lē mafai e tagata ona faatonutonuina o latou ala pe pulea i latou lava. E masani lava o a latou filifiliga lē lelei, ua māfua ai lāmala ma le utiuti o le suāvai.

E ioe le toʻatele o saienitisi, o suiga o le tau e māfua ona o mea e faia e tagata ma iʻu ai i le faatupulaʻia o le lāmala i le lalolagi atoa.
O gaoioiga a tagata manaʻo tele ma lē faautauta, ua latou faia ai tulafono lea e iʻu ai i le soona tātuu o laau, faapolusioneina o le ʻea, ma le faaaogāsesēina o punaʻoa faalenatura. O le iʻuga, ua faaleagaina ai punāvai.

Peitaʻi, ua faailoa mai i le Tusi Paia se faamoemoe.

Pe e iai se faamoemoe mo le lumanaʻi?

Ua folafola mai i le Tusi Paia, o le a foʻia e le Atua le faafitauli o le utiuti o le suāvai. E faapefea?

1. O le Atua e na te ʻfaafanoina i latou o loo faaleagaina le laueleele.’ (Faaaliga 11:18) O le a ia aveesea se tasi o māfuaaga o le utiuti o le suāvai, o tagata amioleaga ma manaʻo tele o ē ua faaleagaina le siʻosiʻomaga ona o a latou gaoioiga.—2 Timoteo 3:1, 2.
2. “O le a avea le laueleele ua mago i le vevela o le lā ma vailepa ua tutupu ai ū.” (Isaia 35:1, 6, 7) O le a toe faaleleia e le Atua mea na faaleagaina ona o lāmala, ma avea le lalolagi paneta o se parataiso e tele ai le suāvai.
3. “Ua e liuliualo mai i le laueleele, ina ia e foaʻiina mai i ai mea e tele lava; ua e matuā faaʻoaina foʻi.” (Salamo 65:9) O le faamanuia a le Atua, o le a fau ma soloi ai meaʻai lelei ma vai taumafa mamā i le lalolagi aoao.