**Lapataʻia e se Sui Aloaʻia o le Soifua Mālōlōina Lamatiaga o le Social Media i Fanau—O le ā le Manatu o le Tusi Paia?**

Iā Me 23, 2023, na lapataʻia ai e se tagata e maualuga lona tulaga i mataupu tau soifua mālōlōina i Amerika, le telē o le aafiaga leaga o le social media po o fesootaʻiga i le Initaneti i fanau talavou.

“E ui e iai aogā o le social media i nisi o fanau ma talavou, ae e iai foʻi faamaoniga maumaututū e iloa ai le tele o aafiaga leaga o le social media, i le tulaga tau soifua mālōlōina o le tino ma le mafaufau o fanau ma talavou.”—Social Media and Youth Mental Health: The U.S. Surgeon General’s Advisory, 2023.

Na taʻua i le lipoti lea na aumaia ai le lapataʻiga, iʻuga o nisi o saʻiliʻiliga e iloa ai le matuiā o lenei tulaga.

O fanau talavou e mai i le 12 i le 15 tausaga le matutua “e faaaluina le silia i le 3 itula i le aso e faaaogā ai le social media, e telē le avanoa e latou te aafia ai i faafitauli o le mafaufau, e pei o āuga o le lotomafatia ma le matuā popole.”
O talavou e taʻi 14 tausaga “e masani ona faaaogāina le social media, e tele ina lē lelei le momoe, soonafai e isi i luga o le initaneti, soona popole i o latou foliga vaaia, ma aafia i faalogona lē aogā ma le matuā lotomafatia. O nei faafitauli e sili atu ona aafia ai teine nai lo o tama.”

E faapefea ona puipuia e mātua a latou fanau mai i nei lamatiaga? E maua fautuaga aogā mai i le Tusi Paia.

Mea e mafai ona fai e mātua

Ia mataalia. Iloilo lamatiaga ma filifili pe e tatau ona faaaogā e lau tama le social media pe e leai.

Mataupu silisili faale-Tusi Paia: “Ia aʻoaʻo le tama i le ala e tatau ona ui ai o ia.”—Faataoto 22:6.
Mo nisi faamatalaga, faitau i le mataupu “Should My Child Use Social Media?” ma le “E Faapefea i le Faatekinolosi Ona Aafia ai Lau Fanau?”

Pe afai e te faatagaina lau tama e faaaogā le social media, e tatau ona e mataala i lamatiaga e ono oo i ai, ma ia e mataalia i le auala o loo faaaogā ai e lau tama fesootaʻiga i luga o le Initaneti. E faapefea ona e faia faapea?

Puipui lau tama mai i mea e lamatia ai. Aʻoaʻo lau tama ina ia iloa ma ʻalofia faamatalaga, o ata ma vitiō e lē lelei.

Mataupu silisili faale-Tusi Paia: “O amioga lē mamā taufeusuaʻiga, ma so o se ituaiga o faiga lē mamā, po o le matapeʻapeʻa, ia aua lava neʻi taʻua iā te outou . . . po o amioga e māsiasi ai, po o le tautala i tala valea, po o tausuaga matagā.”—Efeso 5:3, 4.
Mo isi fautuaga aogā, faitau i le mataupu “Teaching Your Teenager Social Media Safety” ma le “Le Auala e Aʻoaʻo ai Fanau Talavou ia Faaeteete i le Faaaogāina o le Initaneti.”

Avatu ni faatonuga manino. O se faataʻitaʻiga, ia faamanino lelei atu i lau tama po o ā taimi ma po o le ā foʻi le umi e mafai ona ia faaaogāina ai le social media.

Mataupu silisili faale-Tusi Paia: ʻIa outou matuā faautauta ina ia outou savavali e pei o ē e atamamai, ia outou faaaogā tatau le taimi.’—Efeso 5:15, 16.
Maimoa i le vitiō o ata tusi Faaaogā ma le Atamai Tuatusi i le Initaneti, e fesoasoani ai i lau fanau ia malamalama i le māfuaaga e faatapulaa ai le faaaogāina o le social media.