Lologa Mataʻutia—O le ā le Manatu o le Tusi Paia?

I le lalolagi aoao, ua aafia le toʻatele o tagata i lologa mataʻutia. Mātau nisi o lipoti nei:

“I ni nai aso ua mavae, na faamauina ai timuga aupito i mamafa i le laumua o Saina, talu mai le 140 tausaga ua teʻa. E mai i le Aso Toonaʻi i le Aso Lulu, e oo atu i le 744.8 milimita (29.3 inisi) le mamafa o timuga.”—AP News, Aokuso 2, 2023.
“O le Aso Tofi le aso lona lua na mamafa ai timuga ma malosi le matagi ona o le afā malosi o Khanun o loo agi i le itu i saute o Iapani, ma a itiiti mai e toʻalua tagata ua maliliu ai. . . . E ono oo atu le mamafa o timuga i le 0.6 mita (2 futu) i vaega maugā o Taiwan tutotonu.”—Deutsche Welle, Aokuso 3, 2023.
“O le umi ona iai o timuga mamafa [i Nova Scotia] na faapogaia ai lologa i le faaiʻuga o le vaiaso. O timuga sili ona mamafa nei ua aafia ai le vaipanoa o Atlantic Canada, talu mai le 50 tausaga.”—BBC News, Iulai 24, 2023.

O le ā le manatu o le Tusi Paia e faatatau i lenei tulaga?

Se faailoga o “aso e gata ai”

Ua faailoa mai i le Tusi Paia ua tatou ola i le vaitaimi e taʻua o “aso e gata ai.” (2 Timoteo 3:1) Na valoia e Iesu o le a vaaia i o tatou aso “vaaiga e matataʻu ai,” po o mea mataʻutia. (Luka 21:11) O suiga o le tau le pogai autū o le tele o mala faalenatura mataʻutia o loo tutupu faafuaseʻi mai.

O loo iai pea se faamoemoe

Ua faailoa mai i le Tusi Paia, o le tele o mea mataʻutia o loo tutupu i aso nei e tatau ona aumaia ai se faamoemoe. Aiseā? Na fetalai Iesu: “Pe a outou vāai ua tutupu nei mea, ia outou iloa ua latalata mai le Malo o le Atua.”—Luka 21:31; Mataio 24:3.

O mea o loo tutupu ua faaalia ai, ua lē o toe umi ona pulea lea e le Malo o le Atua o mea uma o le natura, e aofia ai le faataamilosaga o le vai.—Iopu 36:27, 28; Salamo 107:29.

Ina ia aʻoaʻo atili e faatatau i le auala o le a toe faaleleia ai e le Malo o le Atua le siʻosiʻomaga, ia faitau i le mataupu “O Ai o le a Faasaoina le Lalolagi?”