Ua Faasolo Ina Lē Toe Maufaatuatuaina e Tagata le ʻAufaipolotiki—O le ā le Manatu o le Tusi Paia?

E tele atu faiga palota o le a faia i le tausaga e 2024 i le lalolagi aoao, nai lo o se isi lava tausaga. Peitaʻi, o le toʻatele o tagata ua faasolo ina latou lē toe maufaatuatuaina le ʻaufaipolotiki.

• O le toʻatele o tagata Amerika na fesiligia i se suʻesuʻega na fai, na latou faapea mai “o le toʻatele o le ʻaufaipolotiki e uunaʻia e māfuaaga manatu faapito,” nai lo o le faanaunauga e faia mea lelei mo isi.a—Pew Research Center, Setema 19, 2023.

E toʻatele foʻi talavou ua latou lē toe maufaatuatuaina le ʻaufaipolotiki.

• “E naunau talavou i aso nei ina ia maua ni fofō o faafitauli. Ae na taʻua e ni talavou i se suʻesuʻega na faia, e lē o maua e le ʻaufaipolotiki ni vaifofō mo faafitauli.”—The New York Times, Ianuari 29, 2024

• “E tusa ai ma se suʻesuʻega na faia, ua sili atu ona maufaatuatuaina e talavou tagata e faia vitiō ma faasalalau i le Initaneti, nai lo o le ʻaufaipolotiki.”—The Korea Times, Ianuari 22, 2024.

Pe e tatou te maufaatuatuaina le ʻaufaipolotiki mo se lumanaʻi lelei? O ai e mafai ona tatou maufaatuatuaina?

Ia faaeteete i ē e tatou te maufaatuatuaina

E tatau ona tatou filifili ma le faaeteete po o ai e tatou te maufaatuatuaina. Ua faapea mai le Tusi Paia, “e talitonu le tagata ua leai se poto masani i upu uma, a o le tagata e iai le utaga mamao, e manatunatu i ona laasaga uma.”—Faataoto 14:15.

• Ina ia maua ni fesoasoani aogā i le auala e iloilo ai faamatalaga e tatou te mauaina, faitau i le mataupu “Ia Puipuia Oe Lava Mai i Faamatalaga Sesē.”

E lē gata i lea, e oo lava foʻi i le ʻaufaipolotiki e faamaoni ma lelei o latou faanaunauga, e gata mai mea e mafai ona latou faia. O le māfuaaga lenā ua lapataʻi mai ai le Tusi Paia:

• “Aua tou te maufaatuatuaina taʻitaʻi faaletagata; e leai se tagata e mafai ona laveaʻiina outou.”—Salamo 146:3, Good News Translation.

Se taʻitaʻi e mafai ona e maufaatuatuaina

O loo taʻua i le Tusi Paia na tofia e le Atua se taʻitaʻi e sili ona agavaa ma maufaatuatuaina, o Iesu Keriso. (Luka 1:32, 33) O Iesu o le Tupu o le Malo o le Atua, o se faigāmalo e pule mai i le lagi.—Mataio 6:10.

• Mātau pe aiseā e mafai ai ona e maufaatuatuaina Iesu, ma po o le ā o le a ia faia e foʻia ai faafitauli o loo tatou fesagaʻia. Faitau i le mataupu “O Ai le Tupu o le Malo o le Atua?” ma le “O le ā o le a Faataunuuina e le Malo o le Atua?”