E Faapefea Ona Tuu Loʻu Faimeatuu?

O loo faamatalaina i le Tusi Paia se iʻuga lē lelei o le faimeatuu. Ua faapea mai: “O lē e matamata i le matagi e lē lūlū fatu o ia; o lē foʻi e vaavaai i ao e lē selesele lava o ia.”​—Failauga 11:4.

Seʻi iloilo nisi o vala atonu e māfua ai le faafitauli, ma mea e mafai ona e faia ina ia tuu ai lou faimeatuu.

E foliga mai e faigatā tele le galuega.

O le mea moni, e iai isi galuega e faigatā tele ona fai ma e sili ai ona tuu i se isi taimi. O nisi nei o manatu e fesoasoani iā te oe.

•  Ia auauaʻi ona fai au galuega. Ua faapea mai se teine e igoa iā Melissa: “E tusa po ua tuai ona ou faia se galuega, ou te taumafai lava e faataunuu lenā galuega e ala i le auauaʻi ona fai.”

•  Ia vave ona fai. “O le taimi lava e avatu ai sau galuega, ia amata loa ona fai, e tusa pe na o le tusi i lalo o au galuega po o nisi foʻi o auala e faia ai le galuega, a o leʻi galo iā te oe.”​—Vera.

•  Fesili i se isi mo se fesoasoani. Atonu e taitutusa le luʻi o loo e fesagaʻia ma se luʻi na feagai ma ou mātua, tauaiga po o ni au uō e matutua atu iā te oe. E aogā tele a latou faaaʻoaʻoga. E latou te ono fesoasoani atu iā te oe ina ia e faatulaga lelei ou manatu ma ia faia gaoioiga talafeagai.

Fesoasoani “Ia fai se faasologa. E moni e manaʻomia ai le maopoopo o au galuega ma tausisi ina ia mulimuli i lau faasologa, ae e aogā auā e mafai ai ona e faia galuega i le taimi tonu e tatau ona māeʻa ai.”​—Abbey.

Leai se uunaʻiga.

E masani lava o galuega e manaʻomia ona e faia, e aofia ai galuega e te lē fiafia i ai. O le ā la e mafai ona e faia pe a e lē fiafia i le galuega ua tuu atu e fai? Ia faataʻitaʻi auala nei.

•  Ia mafaufau i se māfuaaga e vave fai ai le galuega. O se faataʻitaʻiga, seʻi mafaufau i lou fiafia pe a uma ona e faia se galuega. Ua faapea mai se teine e igoa iā Amy: “E lelei oʻu faalogona pe a māeʻa ona ou faia se galuega i le taimi tonu e tatau ona māeʻa ai, pe e leʻi taitai foʻi oo i le taimi e māeʻa ai ma mafai ai loa ona ou mālōlō.”

•  Ia mafaufau i āuga o le faimeatuu. Pe a e faimeatuu, o le a atili ai ona e popole ma atonu e lē māeʻa ai lau galuega. Ua taʻua i le Tusi Paia: “E te lūlūina le mea na e totōina.”​—Kalatia 6:7, Good News Translation.

•  Ia faaāta i lou mafaufau ua lata le taimi e tatau ona māeʻa ai le galuega. Ua faapea mai se teine e igoa iā Alicia: “E fesoasoani iā te aʻu e faaāta ai i loʻu mafaufau, e tatau ona māeʻa laʻu meaaʻoga i se aso po o ni aso e lua a o leʻi oo i le aso e tatau ona māeʻa ai. Ona mafai lea ona ou toe siakiina laʻu meaaʻoga, ma maua ai se aso e tasi pe lua e faaavanoa mo isi mea.”

Fesoasoani “Ia faaaogā lou mafaufau e uunaʻia ai oe. Ia maumauaʻi o le a e faia le mea e manaʻomia ona fai, ma e leai se mea e faalavelave iā te oe. Pe a ou faia faapea, e taunuu lava mea e manaʻomia ona faataunuuina.”​—Alexis.

Ua e pisi tele.

Ua faapea mai se tama e igoa iā Nathan: “E masani ona faapea mai tagata ou te faimeatuu, ae e lē saʻo. E latou te lē iloa e matuā ou pisi lava.” Pe afai e tutusa ou manatu ma manatu o Nathan, ia faataʻitaʻi auala nei.

•  Ia faamuamua galuega faigofie. Ua faapea mai se teine e igoa iā Amber: “Sa aʻoaʻoina aʻu e se tasi e faapea, pe afai e itiiti ma le lima minute e faaalu e fai ai se galuega, e tatau loa la ona fai. E aofia ai le teuina o le potu, faatautau le tagamea, fufulu o ipu, ma le faia o se feʻau tāua i luga o le telefoni.”

•  Ia faamuamua mea tāua. O loo taʻua i le Tusi Paia: ‘Ia faamautinoa mea e sili ona tāua.’ (Filipi 1:10) E faapefea ona faatatau lenā manatu i lou olaga? Ua faapea mai se teine e igoa iā Anna: “Ou te faamauina se lisi o galuega uma ua tuuina mai, faapea aso e manaʻomia ai ona māeʻa na galuega. Ae o le mea e sili ona tāua, ou te tusia i lalo le taimi e faia ai lenā galuega ma le taimi e faamāeʻa ai.”

Pe e foliga mai ai e lē maua se taimi e faia ai isi mea? Ia toe mafaufau. O le mea moni, pe a fai sau faasologa, e te pulea lou taimi nai lo o le pulea o oe e le taimi. O le a faaitiitia ai foʻi lou popole. Ua faapea mai se teine e igoa iā Kelly: “O le iai o se faasologa e faatoʻafilemu ai loʻu mafaufau ma maua ai se vaaiga saʻo.”

•  Ia aua neʻi iai se mea e faalavelave iā te oe. Ua faapea mai Jennifer: “Ou te faailoa atu i tagata uma o lo matou aiga le taimi e amata ai saʻu galuega. Pe afai e iai se mea e latou te mananaʻo ou te faia, ou te talosaga i ai e vave taʻu mai faamolemole a o leʻi amata laʻu galuega. E tapē foʻi laʻu telefoni faapea faailoilo e iloa ai ua iai se imeli.”

Fesoasoani “O so o se galuega e tatau ona e faia, e lē mafai ona mou ese atu seʻiloga ua e faia. Nai lo o le mafaufau pea i ai, ae ia fai loa lenā galuega. O le faia faapea, o le a mafai ai ona e mālōlō i taimi o loo totoe o le aso.”​—Jordan.