O ai Igoa o le a Tusia i “le Tusi o le Ola”?

Le Tali a le Tusi Paia

O le “tusi o le ola,” lea e taʻua foʻi o le “tusi tāʻai o le ola” po o le “tusi e faamanatu ai i ona luma,” o loo iai igoa o tagata o ē o le a maua le meaalofa o le ola e faavavau. (Faaaliga 3:5; 20:12; Malaki 3:16) E filifilia lelei e Ieova na igoa, e faavae i le faamaoni ma le usiusitaʻi o se tagata iā te ia.​—Ioane 3:16; 1 Ioane 5:3.

O loo manatua pea e Ieova ana auauna faamaoni taʻitoʻatasi e pei o loo ia tusia o latou igoa i se tusi, talu mai “le faavaeina o le lalolagi.” (Faaaliga 17:8) E foliga mai o Apelu le uluaʻi auauna faamaoni, na tusia lona igoa i le tusi o le ola. (Eperu 11:4) E lē na o le faia o se lisi o igoa, ae o le tusi o le ola e faaalia ai o Ieova o ia o le Atua alofa ʻo lē e silafia ona lava tagata.’​—2 Timoteo 2:19; 1 Ioane 4:8.

Pe mafai ona tapē ese se igoa mai i “le tusi o le ola”?

Ioe e mafai. Na fetalai le Atua e uiga i tagata lē usiusitaʻi o le nuu o Isaraelu: “O lē ua agasala mai iā te aʻu, ou te soloiesea o ia mai i laʻu tusi.”(Esoto 32:33) Ae pe a tatou tumau faamaoni, o le a tumau ona iai o tatou igoa i “le tusi tāʻai o le ola.”​—Faaaliga 20:12.