O le ā Ou te Faia pe a Faia e Isi Tala e Faatatau iā te Aʻu?

Mafuaaga e lē lelei ai

O nisi tala o tala taufaaleaga e faia ma le iloa, ina ia faaleaga ai le talaaga o se tasi. E tusa pe e lē matuiā tele, ae e mafai ona tigā ai faalogona o se tasi, aemaise lava pe afai o sau uō vavalalata na faia le tala!​—Salamo 55:12-​14.

“Na ou iloa mulimuli ane na faia e saʻu uō oʻu tala, fai mai ou te lē manatu mamafa i isi. Ou te lē malamalama pe aiseā na ia faia ai lenā tala. Na matuā tigā ai a loʻu loto.”​—Ashley.

Mea moni: E tusa pe e te vavalalata i le tagata na faia ou tala pe e leai, ae e te lē fiafia pe a e iloa ane o loo faia e tagata tala leaga e faatatau iā te oe.

E lē o taimi uma e mafai ai ona ʻalofia tala a isi e faatatau iā te oe

O nisi nei o māfuaaga e faia ai e tagata tala e faatatau i isi:

Faaalia o le naunau i isi. O le natura o le tagata o le faifaimea faatasi. O se mea masani la le talanoa ma isi, pe talanoa foʻi e faatatau i isi. O le mea moni, ua faalaeiauina i tatou i le Tusi Paia, ina ia vaavaai ma le naunau i ʻmea e lelei ai isi.’​—Filipi 2:4.

“O se mea fiafia le talanoa e faatatau i tagata!”​—Bianca.

“Ou te lē iloa pe aiseā ou te fiafia ai e iloa mea o loo tutupu i isi tagata, ma talanoa atu ai i isi e faatatau i na mea.”​—Katie.

Leai o ni mea e fai. I taimi o le Tusi Paia, e iai tagata e masani ona ‘faaalu lo latou taimi e faamatala ai se mea pe faalogologo foʻi i se mea fou.’ (Galuega 17:21) O loo tupu foʻi lenā mea i aso nei!

“O nisi taimi, e tusa pe e leai se mea e tupu, ae e taumafai lava tagata e faamaʻite se mea e talanoa i ai.”​—Joanna.

Lagona e leai se aogā. Ua lapataʻi mai le Tusi Paia ina ia aua neʻi faatusatusa i tatou i isi tagata. (Kalatia 6:4) Peitaʻi, ona o lagona o le leai o se aogā, e faasalalau ai e nisi tala taufaaleaga e faatatau i isi tagata.

“O le faasalalauina e se tagata o tala taufaaleaga, e faailoa mai ai lona lotoleaga i lē o loo ia faia i ai faamatalaga. E na te faasalalauina faamatalaga lē saʻo ina ia taʻuleleia ai o ia lava, ma manatu ai ua sili atu o ia i lo lenā tagata.”​—Phil.

Mea moni: O le a talanoa tagata e faatatau i isi, e aofia ai ma oe.

Mea e mafai ona fai pe a talanoa tagata e faatatau iā te oe

Atonu e lē mafai ona e taofia tala e faia e tagata e faatatau iā te oe, ae e mafai ona e pulea le auala e te tali atu ai. O ni auala nei se lua e mafai ona fesoasoani iā te oe.

AUALA 1: Aua le amanaʻiaina. O le auala e sili ona lelei, o le aua le amanaʻiaina, pe afai e lē matuiā na faamatalaga. Ae ia faatatau le fautuaga lenei a le Tusi Paia: “Aua neʻi vave ona tigā lou loto.”​—Failauga 7:9.

“Na faasalalau e se tagata se tala o loo ma feoaʻi ma se tama. E na o loʻu ata lava, e leai ma soʻu popole i ai.”​—Elise.

“O le iai o sou talaaga lelei, o le a faaitiitia ai tala taufaaleaga e faia e tagata e faatatau iā te oe. Ma e tusa po o ā tala e fai iā te oe, e lē toʻatele nisi e talitonu i ai, ona o loo latou iloa lelei le ituaiga tagata e iai oe.”​—Allison.

Fesoasoani: Tusi i lalo faamatalaga na faia e faatatau iā te oe, ma ou faalogona e faatatau i na faamatalaga. Pe a uma ona e ‘manatunatu lelei i ai,’ atonu o le a e iloa ai, e sili atu le aua le amanaʻiaina o na faamatalaga.​—Salamo 4:4.

AUALA 2: Talanoa i le tagata na faasalalauina le tala. Afai o se tala e matuiā, ia talanoa i le tagata na amataina lenā tala.

“Pe a e talanoa i le tagata na faasalalauina tala e faatatau iā te oe, o le a ia iloa ai ua e iloa lelei faamatalaga uma na ia faia. E lē gata i lea, o le a faasaʻo ai faamatalaga sesē ma atonu o le a fesoasoani e foʻia ai le faafitauli.”​—Elise.

A o leʻi talanoa atu i le tagata na faia tala e faatatau iā te oe, mafaufau i mataupu silisili o le Tusi Paia nei, ma iloilo fesili o loo mulimuli mai.

• “Pe a tali atu se tasi i se mataupu ae e leʻi faalogo i le mea moni, o le valea lea.” (Faataoto 18:13) ʻPo ua ou maua uma faamatalaga moni? Pe faamata na faauiga sesē e le tagata na taʻu maia iā te aʻu le tala, faamatalaga na ia faalogo i ai?’

• “Ia faalogologo lelei . . . ae aua le vave ona tautala, ma aua foʻi le vave ona ita.” (Iakopo 1:​19) ʻPo o le taimi lelei lenei e tatau ona ou talanoa atu ai i le tagata na faia le tala? Po o saʻo le auala o loo oʻu taulimaina ai le mataupu? Pe e tatau ona ou faatali seʻia uma loʻu ita?’

• “O mea uma tou te mananaʻo e faia mai e tagata iā te outou, ia faapea lava ona outou faia iā i latou.” (Mataio 7:​12) ʻPe afai o aʻu lea na faia tala e faatatau i le isi tagata, o le ā le auala ou te manaʻo e talanoa mai ai lenā tagata iā te aʻu? O fea se nofoaga lelei e ma te talanoa ai? O ā ni upu e faaaogā ma ni uiga ou te faaalia, ina ia maua ai se iʻuga lelei?’

Fesoasoani: A o leʻi talanoa ma le tagata, tusi i lalo po o ā au tala e te manaʻo e fai. Ia faatali mo se vaiaso po o ni nai vaiaso, ona toe faitau lea ma vaai pe iai ni mea e te manaʻo e sui. Ia talanoa i se matua po o se uō maufaatuatuaina, ma fesili atu i ai mo ni fautuaga.

Mea Moni: E lē mafai ona tatou taofia tala e faia e tagata e faatatau iā i tatou, ae e lē faapea o le a pulea ai i tatou!