Po ua Tuupōina le Taimi e Tatou te Feoti Ai?

Tali a le Tusi Paia

Leai, e leʻi tuupōina le taimi e tatou te feoti ai. Ua aʻoaʻoina i le Tusi Paia, i nisi taimi e oo mai ai le oti ona o mea e “tutupu faafuaseʻi.”​—Failauga 9:​11.

Pe e lē o taʻua ea i le Tusi Paia e iai “le taimi e oti ai”?

Ioe, o loo taʻua i le Failauga 3:2 e faapea, “o le taimi e fanau mai ai ma le taimi e oti ai; o le taimi e totō ai ma le taimi e liaʻiina ai mea na totō.” Peitaʻi, ua faailoa mai i le siʻomaga o lenei mau, o loo faasino atu le Tusi Paia i mea e masani ona tutupu i le olaga. (Failauga 3:​1-8) E leʻi tuupōina e le Atua le taimi e tatou te feoti ai, e pei lava ona ia lē faamalosia se faifaatoʻaga e totō fatu i se taimi patino. O le manatu autū o nei mau, ia tatou ʻalofia le faalavelavea i mea e lē tāua, lea e iʻu ai ina tatou lē amanaʻia Lē na foafoaina mea.​—Failauga 3:​11; 12:​1, 13.

E mafai ona faaumiumi le ola

E ui i mea e lē mautonu ai i le olaga, ae e mafai ona faaumiumi o tatou ola pe a faia filifiliga atamai. Ua faapea mai le Tusi Paia: “O le tulafono a lē ua atamai o le puna lea o le ola, ina ia liliuese mai ai se tasi i mailei o le oti.” (Faataoto 13:14) Na faapea atu foʻi Mose i tagata Isaraelu e mafai ona faaumiumi o latou ola, pe afai e latou te usiusitaʻi i faatonuga a le Atua. (Teuteronome 6:2) I se faaeseesega, e mafai foʻi ona puupuu lo tatou ola pe a faia gaoioiga leaga ma gaoioiga valea.​—Failauga 7:​17.

E tusa pe atamai a tatou filifiliga ma faaeteete a tatou gaoioiga, ae e lē mafai ona ʻalofia ai le oo mai o le oti. (Roma 5:​12) Peitaʻi, o le a suia lenā tulaga auā ua folafola mai i le Tusi Paia e iai le taimi o le a “lē toe iai se oti.”​—Faaaliga 21:4.