O ā Mea e Talitonu i ai Molimau a Ieova?

I le avea ai o ni Molimau a Ieova, e matou te taumafai malosi e mulimuli i le faa-Kerisiano lea na aʻoaʻo e Iesu, ma na faaaʻoaʻo i ai ona aposetolo. O le a aotele atu i lenei mataupu o matou talitonuga autū.

1. Atua. E matou te tapuaʻi i le Atua moni e toʻatasi o Lē e ona le malosi uma lava, ma o Lē na foafoaina mea, o lona suafa o Ieova. (Salamo 83:18; Faaaliga 4:11) O ia o le Atua o Aperaamo, Mose, ma Iesu.​—Esoto 3:6; 32:11; Ioane 20:17

2. Tusi Paia. E matou te talitonu o le Tusi Paia o le feʻau faagaeeina lea a le Atua i tagata. (Ioane 17:17; 2 Timoteo 3:16) E faavae o matou talitonuga i tusi uma e 66 lea e aofia ai le “Feagaiga Tuai” ma le “Feagaiga Fou”. Ua talafeagai ai le faamatalaga a Professor Jason D. BeDuhn ina ua ia tusi e faapea o Molimau a Ieova e faavae “o latou talitonuga uma i le Tusi Paia, ma e suʻesuʻe māeʻaeʻa i ai a o leʻi faia se faaiʻuga.”a

   E ui matou te taliaina le Tusi Paia atoa, ae e lē o i matou o ni tagata mapolotu. E matou te malamalama o nisi o vaega o le Tusi Paia o loo tusia i se gagana faafaatusa ma e lē tatau ona faauigaina i le upu i le upu.​—Faaaliga 1:1.

3. Iesu. E matou te mulimuli i aʻoaʻoga ma faaaʻoaʻoga a Iesu Keriso ma faamamaluina lona tulaga o ia o lo tatou Faaola ma o le Alo o le Atua. (Mataio 20:28; Galuega 5:31) O le māfuaaga le na e taʻua ai i matou o Kerisiano. (Galuega 11:26) Peitaʻi, ua matou aʻoaʻoina mai i le Tusi Paia o Iesu e lē o ia o le Atua e ona le malosi uma lava, ma e leai foʻi se faavae faale Tusi Paia o le aʻoaʻoga o le Tolutasi.​—Ioane 14:28.

4. Le Malo o le Atua. O se faigamalo moni i le lagi ae e lē o se mea i totonu o le loto o se Kerisiano. O le a suia e lenei faigamalo ia faigamalo uma faaletagata ma faataunuu ai le finagalo o le Atua mo le lalolagi. (Tanielu 2:44; Mataio 6:9, 10) Ua toeitiiti ona faataunuuina uma lea o nei mea, auā ua faailoa mai i valoaga o le Tusi Paia o loo tatou ola nei i “aso e gata ai.”​—2 Timoteo 3:1-5; Mataio 24:3-14.

   O Iesu le Tupu o le Malo o le Atua i le lagi. Na amata lana pulega i le 1914.​—Faaaliga 11:15.

5. Faaolataga. O le taulaga togiola a Iesu ua mafai ai ona laveaʻiina i tatou mai i le agasala ma le oti. (Mataio 20:28; Galuega 4:12) Ina ia aogā lena taulaga, e lē lava le na o le faatuatua iā Iesu, ae e tatau foʻi ona suia o latou ala ma papatiso. (Mataio 28:19, 20; Ioane 3:16; Galuega 3:19, 20) O galuega a se tagata e iloa ai o loo ola lona faatuatua. (Iakopo 2:24, 26) Peitaʻi, o le faaolataga e lē o se mea e mafai ona e faatauina mai, ae ua mafai ona maua ona o le “agalelei faifua o le Atua.”​—Kalatia 2:16, 21.

6. Lagi. O loo afio Ieova le Atua, Iesu Keriso faapea agelu faamaoni i o latou nofoaga i le lagi.b (Salamo 103:19-21; Galuega 7:55) E na o se fuainumera laʻititi o tagata​—144,000​—o le a toe faatutūina i le ola i le lagi e pule faatasi ma Iesu i le Malo.​—Tanielu 7:27; 2 Timoteo 2:12; Faaaliga 5:9, 10; 14:1, 3.

7. 

   Lalolagi. Na foafoaina e le Atua le lalolagi e avea ma nofoaga tumau o le tagata. (Salamo 104:5; 115:16; Failauga 1:4) O le a faamanuia e le Atua tagata usiusitaʻi i se olaga soifua mālōlōina lelei atoatoa ma le ola e faavavau i le lalolagi parataiso.​—Salamo 37:11, 34.

8. Mea leaga ma mafatiaga. Na amata nei mea ina ua fouvale se tasi o agelu a le Atua. (Ioane 8:44) O lenei agelu na faaigoa iā “Satani” po o le “Tiapolo” ina ua fouvale, ma na ia uunaʻia le uluaʻi ulugalii e auaufaatasi ma ia, lea ua matuā pagatia ai ē uma na tupuga mai iā i laʻua. (Kenese 3:1-6; Roma 5:12) Ina ia foʻia la le luʻi a Satani, ua faatagaina e le Atua mea leaga ma mafatiaga e tutupu, ae e na te lē faatagaina na mea e faaauau ai e faavavau.

9. Oti. O tagata ua maliliu latou te lē toe iloa se mea. (Salamo 146:4; Failauga 9:5, 10) E lē o faapuapuagatiaina i latou i se afi.

   O le a toe faatutūina e le Atua le faitau piliona o ē ua maliliu e ala le toetū. (Galuega 24:15) Peitaʻi, o i latou e teena le aʻoaʻoina o ala o le Atua ina ua toe faatutū mai o le a faaumatia e faavavau ma e lē toe iai so latou faamoemoe e toetutū mai.​—Faaaliga 20:14, 15.

10. 

    Aiga. E matou te mulimuli i le uluaʻi faatulagaga a le Atua mo faaipoipoga i le tuufaatasia lea o le tamāloa e toʻatasi ma le fafine e toʻatasi, faatasi ai ma le faavae e tasi e tatala ai se faaipoipoga pe a faia e se tasi ni amioga lē mamā. (Mataio 19:4-9) E matou te mautinoa o le atamai o loo maua i le Tusi Paia e mafai ona fesoasoani i aiga ina ia taulau manuia ai.​—Efeso 5:22–6:1.

11. La matou tapuaʻiga. E matou te lē tapuaʻi i le koluse po o se isi lava faatusa. (Teuteronome 4:15-19; 1 Ioane 5:21) O vala tāua nei o la matou tapuaʻiga:

    • Tatalo i le Atua.​—Filipi 4:6.

    • Faitau ma suʻesuʻe le Tusi Paia.​—Salamo 1:1-3.

    • Mafaufau loloto i mea ua aʻoaʻoina mai i le Tusi Paia.​—Salamo 77:12.

    • Auai faatasi i sauniga e tatalo, suʻesuʻe le Tusi Paia, pepese, faailoa atu lo matou faatuatua, ma faalaeiau o matou uso a Molimau faapea isi.​—Kolose 3:16; Eperu 10:23-25.

    • Talaʻi le “tala lelei o le malo.”​—Mataio 24:14.

    • Fesoasoani i ē e manaʻomia le fesoasoani.​—Iakopo 2:14-17.

    • Fausia ma faaleleia o Maota mo Sauniga ma isi maota o loo faaaogā e faaauiluma ai la matou galuega tauaʻoaʻoga faale-Tusi Paia i le lalolagi aoao.​—Salamo 127:1.

    • Fesoasoani i galuega laveaʻi i taimi o faalavelave.​—Galuega 11:27-30.

    

12. La matou faalapotopotoga. E faamaopoopoina i matou i faapotopotoga lea e vaavaaia e le tino o toeaina. Peitaʻi, o toeaina e lē o se vasega o ni faifeʻau ma e leai ni ō latou totogi. (Mataio 10:8; 23:8) E leai ni a matou sefuluaʻi ma e lē aoina foʻi ni peleti i a matou sauniga. (2 Korinito 9:7) O a matou galuega uma e lagolagoina e a matou foaʻi tauofo.

    O le Vaega Pule, o se vaega toʻaitiiti o Kerisiano taʻumatuaina o loo auauna i le ofisa ulu ma saunia mai taʻiala mo Molimau a Ieova i le lalolagi aoao.​—Mataio 24:45.

13. Lo matou autasi. E matou te autasi i le lalolagi atoa i o matou talitonuga. (1 Korinito 1:10) E matou te galulue mamafa foʻi e foʻia fevaevaeaʻiga ona o tulaga, aganuu, ituaiga faapea foʻi le faailogatagata. (Galuega 10:34, 35; Iakopo 2:4) E lē taofia e lo matou autasi filifiliga e fitoitonu i le tagata lava ia. E faia e Molimau taʻitoʻatasi ana lava filifiliga e tusa ma lona lotofuatiaifo ua toleniina i le Tusi Paia.​—Roma 14:1-4; Eperu 5:14.

14. Amioga. E matou te taumafai malosi e faaalia le alofa lē manatu faapito i a matou gaoioiga uma. (Ioane 13:34, 35) E matou te ʻalofia gaoioiga e lē fiafia i ai le Atua, e aofia ai le faaaogā sesē o le toto e ala i tuigātoto. (Galuega 15:28, 29; Kalatia 5:19-21) E matou te tausia le filemu ma lē auai i faigātaua. (Mataio 5:9; Isaia 2:4) E matou te faaaloalo i faigāmalo i mea o loo matou nonofo ai ma usitaʻia a latou tulafono pe afai latou te lē uunaʻia i matou e lē usiusitaʻi i tulafono a le Atua.​—Mataio 22:21; Galuega 5:29.

15. A matou faiā ma isi. Na poloaʻi Iesu: “Ia e alofa atu i lou tuaoi e pei o oe lava iā te oe.” Na ia faapea mai foʻi o Kerisiano e “lē o ni tagata o le lalolagi.” (Mataio 22:39; Ioane 17:16) O le mea lea o loo matou taumafai ai e “faia mea lelei i tagata uma” ae o le taimi e tasi o loo matou solitū i mataupu faapolotiki faapea le aafia i isi tapuaʻiga. (Kalatia 6:10; 2 Korinito 6:14) Peitai, e matou te faaaloalogia filifiliga a isi e faatatau i nei mataupu.​—Roma 14:12.

Pe a fia fesili atili e faatautau i talitonuga o Molimau a Ieova, e mafai ona e faitau atili e faatatau iā i matou i la matou upega tafaʻilagi, faafesootaʻi se tasi o a matou ofisa, auai i a matou sauniga i se Maota mo Sauniga o latalata ane pe talanoa foʻi i se Molimau i lou vaipanoa.