E Faapefea ona Faatupe le Galuega a Molimau a Ieova?

E faatupeina le matou galuega i le lalolagi aoao e ala i foaʻi tauofo mai Molimau a Ieova.a Ua saunia pusa mo meaalofa i nofoaga o a matou tapuaʻiga, ma isi auala e mafai ona faia ai foaʻi e pei ona faailoa atu i le itulau mo Foaʻi. I lenā itulau, o loo iai auala eseese e filifili ai se tagata i le auala e mafai ona ia faia ai se foaʻi mo le matou galuega i le lalolagi aoao, totogiina o tupe faaalu, po o le faatupeina foʻi o na vaega uma.

E lē faia e Molimau a Ieova ni sefuluaʻi, pe foaʻi foʻi se aofaʻiga patino pe faatalitalia e foaʻi na o se vaega o a latou tupe maua. (2 Korinito 9:7) E lē aoina ni peleti pe totogiina foʻi se tupe ina ia auai i a matou sauniga, pe totogi foʻi a matou faifeʻau mo le faia o papatisoga, maliu, faaipoipoga po o nisi sauniga faalelotu. E lē faia ni a matou suʻegātupe e ala i le faatauina atu o meaʻai, o pasā, bingo, faafiafiaga suʻe tupe, taumafataga, lūlū, po o nisi lava auala, pe matou te aoina foʻi ni tupe mai tagata. E lē mafai ona faailoaina i le lautele faamatalaga o i latou na faia nei foaʻi. (Mataio 6:2-4) E leai ni faasalalauga e saʻili ai ni tupe o loo faaaogāina i le matou upega tafaʻilagi ma a matou lomiga.

E saunia e faapotopotoga uma tala o le tupe mo masina taʻitasi i a latou sauniga, lea e mafai ona auai ai so o se tasi. E faaauau foʻi ona suʻeina faamaumauga o tupe a faapotopotoga taʻitasi ina ia faamautinoa o loo faaaogā tatau nei foaʻi tauofo.—2 Korinito 8:20, 21.

Auala e Faia ai Foaʻi

• Pusa mo Meaalofa: E mafai ona tuu lau foaʻi tupe po o se siaki i pusa o meaalofa i Maota mo Sauniga, Maota mo Fonotaga, po o isi nofoaga o loo faia ai a matou sauniga.

• Foaʻi e faia i le Initaneti: O le tele o atunuu, e mafai ona faaaogā le itulau o “Foaʻi i Molimau a Ieova” mo le faia ai o foaʻi tauofo e faaaogā ai credit cards, debit cards, bank transfers, ma isi auala e faaaogā ai le initaneti.b E filifili nisi Molimau e “tuu ese se mea” i masina taʻitasi e ala i le filifili o le ituaiga foaʻi o le a faaauau ona latou faia, e faaaogā ai se tasi o nei auala.​—1 Korinito 16:2.

  

• Foaʻi ua Fuafuaina: O le auala e faia ai nisi foaʻi e manaʻomia ai le fuafua mamao ma/po o ni fautuaga faaletulafono. O le faia faapea o le a mafai ai ona e faaaogāina lelei faamanuiaga mai lafoga totogi a lou atunuu. E toʻatele ua maua aogā mai le malamalama lelei i faamanuiaga na latou fuafuaina a o soifua, ma pe a maliliu, o le a maua e i latou ua filifilia na faamanuiaga. Faamolemole faafesootaʻi le ofisa o le lālā a Molimau a Ieova i lou atunuu mo nisi faamatalaga atili, pe afai e te finagalo e faia se foaʻi tauofo e aofia ai:

  • teugātupe i le faletupe

  • inisiua ma tupe maua pe a litaea

  • fanua ma fale

  • tupe faafaigaluega (stocks) ma pepa faamaonia mo tupe (bonds)

  • uili ma mavaega

Mo nisi faamatalaga i le auala e faia ai foaʻi i lou vaipanoa, tagaʻi i le itulau “Foaʻi i Molimau a Ieova.”