E Toʻafia Molimau a Ieova i le Lalolagi Aoao?

E faapefea ona faitauina le aofaʻi o a outou sui auai?

E na o i latou e talaʻia pea le Malo o le Atua i masina taʻitasi, e matou te faitauina o ni Molimau a Ieova. (Mataio 24:14) E aofia ai i latou ua uma ona papatiso e avea ma Molimau, faapea ē ua agavaa e faia se sao i le galuega talaʻi e ui e leʻi papatisoina.

Pe e tatau i se tasi ona foaʻi atu ni tupe ina ia agavaa ai e avea ma sui auai?

Leai. E leai se fesootaʻiga o au foaʻi tauofo ma le avea o se sui auai, pe maua foʻi ni tofiga faapitoa i la matou faalapotopotoga. (Galuega 8:​18-​20) O le mea moni, o le tele o foaʻi tauofo e faia e aunoa ma le faailoaina atu i tagata. E ofo atu e Molimau taʻitoʻatasi o latou taimi, malosi ma meafaitino e lagolagoina ai le galuega talaʻi i le lalolagi aoao, e fua i o latou lotofuatiaifo ma tulaga.​—2 Korinito 9:7.

E faapefea ona outou iloa le toʻatele o i latou o loo talaʻi pea?

I masina taʻitasi, e lipotia e Molimau a Ieova la latou galuega talaʻi ma avatu i a latou faapotopotoga. O nei lipoti e faia ma le lotomalie.

E faamaopoopoina lipoti a le faapotopotoga, ma avatu le aofaʻiga o na lipoti i le ofisa o le lālā o loo vaavaaia lenā vaipanoa. E auina atu e le ofisa o le lālā le tuufaatasiga o lipoti a atunuu po o vaipanoa taʻitasi i la matou ofisa ulu.

I le faaiʻuga o tausaga faaleauaunaga taʻitasi,a e faamauina ai le faitau aofaʻi o Molimau i atunuu taʻitasi i se tausaga. O nei fuainumera e faaopoopo faatasi ina ia iloa ai le aofaʻi o Molimau i le lalolagi aoao. O lipoti auʻiliʻili mai i atunuu taʻitasi, o loo faamauina i le vaega “Lalolagi Aoao” i la matou tuatusi. E faalaeiauina i matou i nei lipoti, e pei lava ona faalaeiauina Kerisiano i le uluaʻi senituri i lipoti e faatatau i la latou galuega talaʻi.​—Galuega 2:​41; 4:4; 15:3.

Pe e tou te faitauina i latou o loo aufaatasi ma la outou faalapotopotoga ae e lē o talaʻi?

E ui e matou te lē faaaofia i latou nei i le faitau aofaʻi o Molimau, ae e matou te talia i latou i a matou faapotopotoga. O le toʻatele o i latou na e auai i le Faamanatuga faaletausaga o le maliu o Keriso. E mafai la ona iloa se aofaʻiga o i latou na, pe afai e toese mai i le aofaʻiga saʻo o Molimau a Ieova mai i le tuufaatasiga o ē na auai i le Faamanatuga. I le 2024, e 21,119,442 i latou na auai i le Faamanatuga.

O le toʻatele o i latou e lē auai i a matou sauniga e maua aogā mai i la matou polokalame o le faia o suʻesuʻega faale-Tusi Paia e aunoa ma se totogi. I se fua faatatau, a o faagasolo le 2024, e 7,480,146 suʻesuʻega faale-Tusi Paia na matou faia i masina taʻitasi, ma o nisi o i latou e fai faatasi a latou suʻesuʻega faale-Tusi Paia i le taimi e tasi.

Aiseā ua sili ai fuainumera faamaumauina a le malo e tusa ai o le aofaʻi o Molimau, nai lo o a outou numera faamauina?

E masani ona maua numera faamaumauina a le ofisa o numera ma faamaumauga, e ala i le fesili i tagata po o ā a latou tapuaʻiga. O se faataʻitaʻiga, ua faailoa mai e le U.S. Census Bureau e faapea, na latou suʻesuʻeina “po o ā lotu e auai ai i latou na aofia i le suʻesuʻega,” ma na iloa ai o le fuainumera na maua mai ai “e faavae i manatu o tagata lava ia nai lo o le mea moni.” I se faaeseesega, e na o i latou o loo talaʻi atu ma lipoti la latou galuega talaʻi e faitauina o ni Molimau a Ieova, ae e lē aofia ai i latou e tau ina faapea mai o i latou o ni Molimau a Ieova.