Pe e Manaʻomia Moni Lava Ona Fai ni Tulafono mo le Fanau?

Po o faigatā ona e usitaʻia tulafono e faia e ou mātua? O le a fesoasoani iā te oe lenei mataupu ma le fesoasoani faaopoopo (worksheet) o loo iai, e talanoa ai i ou mātua.

• Le vaaiga saʻo

• Auala saʻo e taulima ai

• Tala a isi talavou

Le vaaiga saʻo

Manatu Taatele: E te lē toe manaʻomia ni tulafono pe a e alu ese ma le aiga.

Mea moni: E tusa lava pe e te alu ese ma le aiga, e iai lava isi tulafono e manaʻomia ona e usitaʻi i ai. E manaʻomia pea ona e usiusitaʻi i tulafono a lou pule i le galuega, po o lē e ona le fale o loo e mautotogi ai, po o faipule silisili foʻi. Ua faapea mai Danielle, e 19 tausaga: “Pe afai e lē masani talavou i le usitaʻia o tulafono i le aiga, o le a faigatā foʻi la pe a nonofo na o i latou.”

Ua faapea mai le Tusi Paia: Ia “usiusitaʻi i malo ma pule.” (Tito 3:1) O le faamasani e usitaʻi i tulafono a ou mātua, o le a fesoasoani i isi vala o lou olaga a o faasolo ina avea ma tagata matua.

Mea e mafai ona e faia: Ia uaʻi atu i le itu e aogā ai tulafono. Ua faapea mai se talavou e igoa iā Jeremy: “Na fesoasoani tele tulafono a oʻu mātua iā te aʻu i le auala e filifili ai aʻu uō, ma faaaogā lelei ai le taimi. Na fesoasoani foʻi e ʻalofia ai le faaalu o le tele o le taimi e matamata ai i le TV ma taaalo i taaloga vitiō, ae faia ai nisi galuega tāua lea o loo oʻu maua ai pea aogā.”

Auala saʻo e taulima ai

Ae ā pe a foliga mai e lē fetaui se tulafono? Mo se faataʻitaʻiga, na faapea mai se talavou e igoa iā Tamara: “Na faataga e oʻu mātua ona ou malaga i se isi atunuu. Ae ina ua ou toe foʻi mai, e oo lava i le alu atu i se taulaga e na o le 20 minute le mamao mai le fale, e faasā!”

Pe afai o lou tulaga lenā, pe e sesē lou talanoa atu i ou mātua e faatatau i lenā tulafono? E leai! O le mea e sili ona tāua, o le iloa o le taimi ma le auala e talanoa atu ai iā i laʻua.

Taimi. Ua faapea mai se talavou e igoa iā Amanda: “E faatoʻa mafai ona e talanoa atu i ou mātua e toe iloilo se tulafono, pe afai ua la maufaatuatuaina oe ona o lou usiusitaʻi ma lou faamaoni.”

Na faamaonia e Daria le moni o lenā manatu. Na ia faapea mai: “Na faatoʻa mafaufau loʻu tinā e faia ni suiga i tulafono, ina ua ia mātauina o loo faaauau pea ona ou usiusitaʻi.” Ia manatua, e maufaatuatuaina oe ona o au gaoioiga, ae e lē ona o se mea e te manaʻo ai.

Ua faapea mai le Tusi Paia: ʻIa tausi i le poloaʻiga a lou tamā, ma aua neʻi tuulafoaʻiina le faatonuga a lou tinā.’ (Faataoto 6:​20) O le mulimuli i lenā faatonuga, o le a maufaatuatuaina ai oe e ou mātua, ma faigofie ai ona e talanoa atu iā i laʻua i se mataupu.

Auala. Ua faapea mai se talavou e igoa iā Steven: “E sili atu ona lelei lou talanoa i ou mātua i se auala faaaloalo ma toʻafilemu, nai lo o le faalii ma eʻē.”

Na faapea mai Daria lea na taʻua muamua: “Pe a ou finau atu i loʻu tinā, e lē suia ai se tulafono ae na o le atili ai ona faaopoopo isi faasasaga.”

Ua faapea mai le Tusi Paia: ʻO le tagata valea e na te sasaa uma mai ona faalogona, a o lē e atamai, e na te taofiofia i se auala toʻafilemu.’ (Faataoto 29:11) O le pulea lelei o faalogona o le a e maua ai le tele o aogā i le aiga, i le aʻoga, i le galuega, ma so o se mea lava.

Mea e mafai ona e faia: Ia mafaufau muamua a o leʻi tautala atu. E na o le tasi lava se gaoioiga e te faia ona o lou ita, ae atonu o le a lē toe maufaatuatuaina ai oe. Ua talafeagai lelei ma le manatu o loo taʻua i le Tusi Paia, “o lē e telegese lona ita e tele lona faautaga loloto.”​—Faataoto 14:29.

Fesoasoani: Faaaogā le fesoasoani faaopoopo (worksheet) e iloilo ai lau vaaiga i tulafono, ma talanoa atu i ou mātua pe a manaʻomia.