O ā “Ki o le Malo”?

Le tali a le Tusi Paia

O “ki o le malo,” lea e taʻua i nisi taimi o “ki i le malo,” e faasino atu i le pule e tatala ai le avanoa mo tagata ina ia “sao atu i le malo o le Atua.” (Mataio 16:19; The New American Bible; Galuega 14:22)a Na tuuina atu e Iesu iā Peteru “ki o le malo o le lagi.” O lona uiga, na mauaina e Peteru le pule e faailoa atu ai faamatalaga i le auala e mafai ai e tagata faamaoni ona sao atu i le Malo i le lagi, e ala i le mauaina o le agaga paia o le Atua.

Na faapefea ona faaaogā nei ki?

Na faaaogā e Peteru le pule na tuuina mai e le Atua e tatala ai le avanoa mo vaega nei e tolu, e sao atu ai i le Malo:

1. Tagata Iutaia ma tagata Iutaia liulotu. Ina ua faatoʻā mavae le maliu o Iesu, na faalaeiauina e Peteru se motu o tagata talitonu Iutaia, ina ia talia Iesu o lē ua filifilia e le Atua e pule i le Malo. Na faailoa atu e Peteru iā i latou le mea e tatau ona latou faia ina faaolaina ai. O le faia faapea, na ia tatalaina ai le avanoa mo i latou e sao atu ai i le Malo, ma e faitau afe ʻna talia lana upu.’​—Galuega 2:​38-​41.

2. Tagata Samaria. Mulimuli ane, na auina atu Peteru i tagata Samaria.b Na ia faaaogā i inā le isi ki, ina ua la ō atu ma le aposetolo o Ioane ma “tatalo ina ia maua e i latou le agaga paia.” (Galuega 8:​14-​17) Na tatala ai le avanoa mo tagata Samaria e sao atu ai i le Malo.

3. Tagata o Nuu Ese. I le tolu ma le ʻafa tausaga talu ona mavae le maliu o Iesu, na faailoa atu ai e le Atua iā Peteru, o le a maua foʻi e tagata o Nuu Ese (tagata e lē o ni Iutaia) le avanoa e sao atu ai i le Malo. Na faaaogā loa e Peteru le isi ki e ala i le talaʻi atu i tagata o Nuu Ese, ma tatala ai le avanoa e latou te maua ai le agaga paia, avea ai ma Kerisiano, ma mafai ai ona avea ma sui o le Malo.​—Galuega 10:30-​35, 44, 45.

O le ā e uiga i ai le “sao atu i le malo”?

O i latou e “sao atu i le malo” e avea ma ē e pule faatasi ma Iesu i le lagi. Na valoia i le Tusi Paia o le a latou “nonofo i nofoālii” ma “pule mai foʻi o ni tupu i le lalolagi.”​—Luka 22:29, 30; Faaaliga 5:​9, 10.

Manatu sesē e faatatau i ki o le Malo

Manatu sesē: Na filifili e Peteru le taimi e faaaogā ai ki o le Malo.

Mea moni: Ina ua tuuina atu e Iesu ki o le Malo, na ia fetalai atu iā Peteru: “O mea e te fusifusia i le lalolagi, e fusifusia foʻi lea i le lagi; o mea foʻi e te tatalaina i le lalolagi, e tatalaina foʻi lea i le lagi.” (Mataio 16:19, The New American Bible) E ui e faauiga e nisi lenei manatu e faapea o Peteru e faia filifiliga mo le lagi, ae e iloa mai i veape i le uluaʻi gagana Eleni, na mulimuli Peteru i filifiliga na faia i le lagi, ae e lē o ia na muamua faia le filifiliga.

Ua faailoa mai i isi vaega o le Tusi Paia, na mulimuli Peteru i faatonuga mai i le lagi i le auala e faaaogā ai ki o le Malo. O se faataʻitaʻiga, na faalogo o ia i faatonuga mai i le Atua ina ua ia faaaogāina le ki lona tolu.​—Galuega 10:19, 20.