Saunia o Vitiō mo le Polokalame o le Tauaofiaga Itumalo 2020 “Ia Olioli e Lē Aunoa”!

O vitiō i a tatou tauaofiaga itumalo e pāʻia ai o tatou loto ma fesoasoani ia tatou malamalama lelei ai i aʻoaʻoga a le Tusi Paia. O le Tauaofiaga Itumalo o le 2020 “Ia Olioli e Lē Aunoa”! na faaalia ai vitiō e 114, lea e aofia ai ma lauga e 43 na tauaaoina e sui o le Vaega Pule ma a latou fesoasoani. Pe na iai se taimi na e taumānatu ai, po o le ā le tele o le galuega na fai ma le tele o le tupe na faaalu mo le saunia o nei vitiō?

E toetoe 900 o tatou uso ma tuafāfine mai so o se vaipanoa o le lalolagi na ofo mai lo latou taimi ma le tomai e fesoasoani ai i le saunia o lenei polokalame. Pe a tuufaatasi, e toeitiiti 100,000 itula na latou faaaluina mo lenei galuega i le umi e lua tausaga. E aofia ai le 70,000 itula na manaʻomia e faamāeʻa ai le ata tifaga e 76 minute le umi, Neemia: “O le Olioli Mai iā Ieova, o lo Outou Malosi Lea.”

O le mea moni, e matuā tele le tupe e aofia ai i le tausia o i latou na tauofo mai ma faataulaga o latou taimi mo lenei galuega, aemaise o le saunia o le lagolagosua i le faatinoina o le galuega, o meafaigaluega ma fale po o ofisa e manaʻomia mo le faamāeʻaina o le galuega.

Na taʻua e Jared Gossman, o sē e galue i Auaunaga o Puʻegāleo ma Vitiō, “Sa matuā naunau lava le Komiti Tauaʻoaʻoga a le Vaega Pule ina ia faaaofia aganuu ma nofoaga eseese i a tatou vitiō. E fesoasoani lenei auala e faaatagia atu ai ma le saʻo le tulaga moni o lo tatou ʻauuso faavaomalo. Ina ia faataunuu lenei sini, e 24 ni vaega mai atunuu eseese e 11 na galulue faatasi i lenei galuega. O lenei taumafaiga ina ia galulue faatasi tagata mai so o se vaega o le lalolagi e manaʻomia ai le tele o le tupe, le faatulagaina o le tele o fuafuaga, ma lona faamaopoopoina.”

O le tele o a tatou vitiō e manaʻomia ona faaaogā ai ni masini faapitoa ma ni nofoaga e puʻe ai. Mo se faataʻitaʻiga, o nofoaga na puʻeina ai le ata Neemia: “O le Olioli Mai iā Ieova, o lo Outou Malosi Lea,” sa fausia i totonu o le nofoaga faasalalau i Mt. Ebo, e latalata i Patterson, i Niu Ioka, Amerika. Ina ia faaaogā lelei foaʻi tauofo, ma i le taimi e tasi o loo faaalia atu i le ata vaaiga saʻo ma moni e tusa ai ma talafaasolopito, na faia ai e uso ni fausaga o na nofoaga e lāiti ma māmā, ina ia foliga atu e pei lava o pā o Ierusalema anamua. O nei fausaga taʻitasi e faia aʻe i se faavaa laupapa e ono mita le maualuga (20 futu) o loo ufiufi i momi ma vali ina ia pei ai lava o ni maa. O nei “pā” e mafai ona fesiitaʻi mo ni vaaiga eseese, e faaitiitia ai le fausia o nisi nofoaga e manaʻomia. Ae e ui i lea, e toetoe lava $100,000 (tālā Amerika) na manaʻomia ina ia fausia ai nei nofoaga mo na o le ata tifaga lava ia.a

O le iloaina o nei faamatalaga ua atili ai ona tatou talisapaia le polokalame o le tauaofiaga itumalo mo lenei tausaga. E tatou te mautinoa o taumafaiga uma na faia mo le saunia o lenei polokalame, o le a iʻu i le alagaina ai o viiga o Ieova i le lalolagi aoao. Faafetai tele mo ā outou foaʻi tauofo na faia e ala i le donate.jw.org ma isi auala, mo le galuega i le lalolagi aoao.