Le Faaliliuina o Lauga o le Tauaofiaga Itumalo 2020 “Ia Olioli e Lē Aunoa”!

Iā Iulai ma Aokuso o le 2020, o le taimi muamua lea o le a matamata ai e le ʻauuso i le lalolagi aoao le polokalame o le tauaofiaga itumalo e tasi i le taimi foʻi e tasi. Ina ia mafai ona faataunuuina lenei mea, e tatau ona faaliliuina vaega ua puʻeina o le polokalame i le silia ma le 500 gagana. O se galuega faapena e masani lava e alu ai le tausaga atoa pe sili atu foʻi e fuafua ma faamāeʻa ai. Peitaʻi ane ona o le tulaga ua aliaʻe mai ona o le faamaʻi o le koviti, ua manaʻomia ai e le ʻaufaaliliu ona faaliliu le Tauaofiaga Itumalo 2020 “Ia Olioli e Lē Aunoa”! i lalo mai o le fa masina.

O le vaega mo Auaunaga Faaliliu faapea le vaega mo le Faatauina o Oloa mo le Lalolagi Aoao o loo i le Ofisa Ulu a Molimau a Ieova na fesoasoani i lenei galuega telē. Na mātauina e le vaega mo Auaunaga Faaliliu, o le toʻatele o le ʻaufaaliliu sa manaʻomia nisi meafaigaluega aemaise o ni mea faaleotele leo lelei ma anagatā ina ia faatino ai le galuega. Na faatulaga e le vaega mo le Faatauina o Oloa mo le Lalolagi Aoao le faatauina o masini faaleotele leo e 1,000 ma faaoo atu i le toeitiiti 200 nofoaga.

Mo le faasaoina o tupe, e tele ni mea faaleotele leo na faatauina ma faaoo atu i se nofoaga se tasi mo le vaevaeina ma tufa atu ai loa mo le faaaogāina e le ʻaufaaliliu i soo se vaipanoa o le lalolagi. O le faatauina mai o nei mea faaleotele leo e tele i le taimi e tasi lea e tusa ma le $170 U.S. le tau o le masini e tasi e aofia ai ma le felaʻuaʻiga, sa sili atu ona taugofie nai lo o le faatau taʻitasi mai o na mea faaleotele leo.

Sa faatino e le vaega mo le Faatauina o Oloa mo le Lalolagi Aoao le faatauina o nei oloa ma faatulaga le lafoina atu iā Aperila ma Me 2020, o se taimi na faaitiitia ai galuega a pisinisi ona o le faamaʻi. Ae ui i lea e oo ane i le faaiʻuga o Me ua maua e le tele o ofisa faaliliu, ofisa o lālā ma isi nofoaga faaliliu meafaigaluega sa manaʻomia.

Na taʻua e Jay Swinney o le ovasia mo le vaega e Faatauina Oloa mo le Lalolagi Aoao, “Sa lelei le auala na galulue faatasi ai matagaluega a le Peteli ma pisinisi eseese na aofia ai i lenei galuega. E na o le agaga o Ieova e mafai ona autasi ai a tatou taumafaiga i se auala vave ma taugofie e lagolago ai manaʻoga faatiokarate.”

Na faapea mai Nicholas Ahladis, o sē e galue i le vaega mo Auaunaga Faaliliu: “O le ʻaufaaliliu na aafia ina ua tapunia mea ona o le faamaʻi, sa matuā faalaeiauina ina ua latou maua nei meafaigaluega. E ui i le faaesea o i latou mai i isi sui o le latou ʻaufaaliliu, ae sa mafai lava ona latou galulue faatasi e faaliliu ma puʻeina lauga, ata tifaga ma pese i le silia ma le 500 gagana.”

O se tasi nei o galuega mai i le tele o galuega na māeʻa ona faatinoina, ina ia saunia ai le Tauaofiaga Itumalo 2020 “Ia Olioli e Lē Aunoa”! mo lo tatou ʻauuso faavaomalo. O ā outou foaʻi tauofo na faia ma le agalelei i le donate.jw.org ma isi auala, na mafai ai ona faatau nei meafaigaluega manaʻomia.