Le Aʻoga i Kiliata—Lona Aogā i le Lalolagi Aoao

I tausaga taʻitasi, e valaaulia nisi o loo i le auaunaga faapitoa faataimi atoa i le lalolagi aoao, e auai i le Aʻoga Faale-Tusi Paia a le Olomatamata o Kiliata. O lenei aʻoga e faia i le Nofoaga mo Aʻoaʻoga a le Olomatamata i Patterson, Niu Ioka.a E aʻoaʻoina i lenei aʻoga le auala e faaleleia atili ai faaeaga eseese o loo latou auauna ai i le faalapotopotoga a Ieova. E fesoasoani lenei aʻoga iā i latou, ina ia latou faamalosia ma faamausalīina ai faapotopotoga ma lālā i le lalolagi aoao.

O Kiliata, o se aʻoga faavaomalo. O se faaaʻoaʻoga, i le vasega lona 147 lea na faia i le 2019, e 56 tagata aʻoga na auai mai i atunuu e 29. O le ʻau aʻoʻoga na auai i Kiliata, na latou auauna i nisi o vala o le auaunaga faapitoa faataimi atoa e pei o le auaunaga i le Peteli, ovasia matagaluega, misionare po o ni paeonia faapito.

E tele sauniuniga e faia a o leʻi taitai amata le aʻoga. O se faataʻitaʻiga, e faatulaga e le Matagaluega o Femalagaaʻiga a le Ofisa Ulu le totogiina o pasese mo le ʻau aʻoʻoga. I se fua faatatau mo le vasega 147 o Kiliata, e pe ā ma le $1,075 (U.S.) le pasese o le tagata aʻoga e malaga ai i Patterson ma toe foʻi i lona atunuu. E fā vaalele e puʻe e tagata aʻoʻoga mai i Solomona e ō ai i Patterson, ma e tolu vaalele na latou puʻeina ina ua toe foʻi i o latou aiga. E silia ma le 35,400 kilomita (22,000 maila) na latou faimalaga ai. E $2,300 (U.S.) le pasese o le tagata aʻoga e toʻatasi. Ina ia faaitiitia tupe alu, e faaaogā e le Matagaluega o Femalagaaʻiga a le Ofisa Ulu se polokalame faakomepiuta e suʻe ai pasese taugofie. Ona taofi lea o le avanoa, ae e mo ni vaiaso po o ni masina, e faaauau pea ona suʻe e le polokalame faakomepiuta po ua paʻū le pasese. E faaaogā foʻi e le Matagaluega o Femalagaaʻiga a le Ofisa Ulu meaalofa mai i ofisa malaga ma kamupani vaalele e totogi ai pasese.

O le toʻatele o le ʻau aʻoʻoga, e manaʻomia ni visa ina ia mafai ai ona malaga i le Iunaite Setete. O lea, e talosaga ai e le Matagaluega Tau Tulafono a le Ofisa Ulu, visa mo i latou na. I se fua faatatau, e pe ā ma le $510 (U.S.) le tau atoa o le lesitala ma le visa mo le tagata aʻoga e toʻatasi.

O le ā le auala ua aogā ai iā i tatou toleniga ua maua e nei tagata aʻoga? E faapotopotoga faatasi Hendra Gunawan o se toeaina mai i le pito i Saute i Sasaʻe o Asia, ma se ulugalii na faauu mai i Kiliata. Na ia faapea mai: “E leʻi iai ni paeonia sauatoa i le matou faapotopotoga. Ae ina ua taunuu mai lenā ulugalii, na avea lo la maelega i le faiva ma o la uiga faataulaga ma aafiaga lelei i isi, ma na avea ai i latou ma paeonia. Mulimuli ane, na auai se tuafafine mai i la matou faapotopotoga i le Aʻoga mo Tagata Talaʻi o le Malo.”

I se isi atunuu i le pito i Saute i Sasaʻe o Asia, o loo galulue faatasi ai i le Peteli Sergio Panjaitan ma nisi na faauu mai i Kiliata. Na faapea mai o ia: “O toleniga na latou maua mai i le aʻoga, e lē gata o se faamanuiaga mo i latou ae o se faamanuiaga foʻi iā i matou. E anoanoaʻi mea na latou aʻoaʻoina mai i le aʻoga. Peitaʻi, nai lo o le manatu ai ua sili atu i latou i isi, ae na latou faasoa atu mea na latou aʻoaʻoina mai i le aʻoga. Na avea lenā ma aafiaga lelei i isi, ona ua latou maua ni faalaeiauga faaleagaga.”

E faapefea ona faatupeina lenei aʻoga? E ala i foaʻi tauofo mo le galuega i le lalolagi aoao. O le tele o na foaʻi tauofo, e faia e faaaogā ai se tasi o auala i le donate.jw.org. Faafetai tele mo lo outou limafoaʻi, ua lagolagoina ai lenei aʻoga i le lalolagi aoao.