Fale e Faamamaluina ai lo Tatou Aʻoaʻo Sili

E fiafia Ieova e aʻoaʻo ona tagata. O le māfuaaga lea ua faatulaga ai e lana faalapotopotoga le tele o aʻoga e aʻoaʻoina ai le ʻauaʻoʻoga, i le auala e faataunuu ai o latou tofiga i le auaunaga. O se tasi o na aʻoga, o le Aʻoga mo Tagata Talaʻi o le Malo (SKE). I tausaga talu ai, e lē gata ina uaʻi atu le faalapotopotoga a le Atua i polokalame mo na aʻoga, ae e faapea foʻi fale e faia ai. O le sini autū, ia maua se siʻomaga talafeagai mo le ʻau aʻoʻoga ma faiaʻoga. E faapefea ona fesoasoani a outou foaʻi e ausia ai lenā sini?

Faaleleia Fale a o Faatoʻateleina le ʻAuaʻoʻoga

E tele tausaga o faia a tatou aʻoga faale-Tusi Paia i Maota mo Sauniga ma Maota mo Fonotaga. Aiseā la na tatou fausia ma faaleleia ai talu ai nei le tele o fale e faaaogā patino mo nei aʻoga. Mātau māfuaaga nei e tolu.

Telē le manaʻoga. Na faamatalaina e Christopher Mavor, o se fesoasoani o le Komiti o le Auaunaga a le Vaega Pule e faapea, “ua lipotia mai e ofisa o lālā le matuā manaʻomia o nisi uso ma tuafāfine e fesoasoani i a latou oganuu. O se faataʻitaʻiga, i le 2019, na faailoa mai ai e le lālā i Pasili lo latou manaʻomia o se isi 7,600, o ē na faauu mai i le SKE, ina ia fesoasoani i le oganuu o le latou lālā.” Na lipotia mai e le lālā i Amerika le matuā manaʻomia o nisi paeonia tomai, e mafai ona toleniina isi i le auala e fai ai talaʻiga faapitoa i nofoaga faitele, ma talaʻiga i uafu tetele ma falepuipui. O loo iai foʻi se manaʻoga mo uso e galulue i le Matagaluega mo Faugāfale i le Vaipanoa, ma i Komiti o Mataupu Tau Falemaʻi. O lea, e mafai e i latou ua faauu mai i le SKE ona faia nei galuega.

Toʻatele le ʻauaʻoʻoga. I le tele o lālā, e tele tusi talosaga ua latou mauaina mai i ē e fia auai i aʻoga, nai lo o avanoa e mafai ona latou taliaina. O se faataʻitaʻiga i Pasili, e tasi le tausaga ae maua e le lālā le pe ā ma le 2,500 tusi talosaga mo le SKE. Ae ona o le lē lava o fale e faia ai le aʻoga, sa talia ai na o le 950 e auai i le aʻoga.

Fale talafeagai e nonofo ai. Pe a faia le aʻoga i Maota mo Sauniga po o Maota mo Fonotaga, e masani ona nonofo le ʻauaʻoʻoga i fale o uso ma tuafafine i lenā vaipanoa. E fetaui lenā faatulagaga i atunuu e lē tele ni aʻoga e faia ai i tausaga taʻitasi. Ae i vaipanoa e tele vasega e faia ai, atonu e lē mafai e le ʻauuso i inā ona talimālō i le ʻauaʻoʻoga mo le tele o masina i le tausaga. O lea ua saunia ai ni fale e latalata i le mea e faia ai le aʻoga, ma e talafeagai lelei ma manaʻoga o ē o loo auai ai.

E fua i le nofoaga ma isi mea manaʻomia, e mafai ona oo atu i le faitau miliona tālā Amerika le tau o se fale e iai se potu aʻoga, o mea e nonofo ai faiaʻoga, ma le pe ā ma le 30 tagata aʻoga, faapea isi auaunaga manaʻomia.

Vaega Eseese o Fale mo Aʻoga

E masani ona fausia fale mo aʻoga i vaipanoa e toʻafilemu, mamao ese mai i aai pisi, ae latalata i nofoaga mo femalagaaʻiga mo le lautele. E tele ina vaavaai uso e fausia nei fale i vaipanoa e toʻatele le ʻautalaʻi o loo iai, o ē e mafai ona fesoasoani i le faagaoioia o le aʻoga, ma le tausia o nei fale ma isi mea e faaaogā i le aʻoga.

O nei fale, e iai se fale tusi ma nofoaga mo saʻiliʻiliga, ma ua faatotogaina i komepiuta, masini lomitusi, ma isi meafaigaluega. O le tele foʻi o nei fale, e iai se potu e aai faatasi ai faiaʻoga ma i latou o loo auai i nei aʻoga. E iai foʻi vaega e mafai ona faamalositino ma mālōlō ai.

Ua fuafuaina lelei foʻi le auala e fausia ai potu aʻoga. Na taʻua e Troy mai Warwick i Niu Ioka, o sē e galue i le Matagaluega mo Faugāfale i le Lalolagi Aoao: “Na matou talanoa ma le Matagaluega o Aʻoga Faale-Tusi Paia, ina ia fesoasoani iā i matou i le auala e faatulaga ai potu aʻoga, lea e faaleleia ai le auala e faia ai aʻoga. Na aumaia e uso taʻiala e tusa ai o le telē ma le auala e faatulaga ai potu aʻoga, faapea mea e manaʻomia mo molī, ma masini mo vitiō ma mea faaleoteleleo.” E tusa ai o mea faaleotele leo, na taʻua e Zoltán, o se faiaʻoga o le SKE i Hungary: “I le taimi muamua, e leʻi iai ni a matou mea faaleoteleleo. O lea, e masani ona matou faamanatu atu i le ʻauaʻoʻoga ina ia leotetele. Ae ona o lea ua iai mea faaleoteleleo i luga o kesi taʻitasi, ua lē o toe iai la lenā faafitauli.”

“Malo Faapitoa a Ieova”

O ā ni aogā o nei fale i faiaʻoga ma le ʻauaʻoʻoga? Ua faapea mai Angela, o sē na auai i le SKE i Palm Coast, i Florida i Amerika, “E ese le filemu o le siʻomaga. Sa fuafuaina lelei mea uma, e pei o le auala na faatulaga ai potu e matou te nonofo ai ma potu aʻoga, ina ia mafai ona uaʻi atu i a matou saʻiliʻiliga ma le aʻoga.” Na talisapaia foʻi e Csaba o se faiaʻoga i Hungary, le avanoa e aai faatasi ai ma le ʻauaʻoʻoga. Na ia faapea mai: “O taimi faapena e masani ona faamatala mai ai e le ʻauaʻoʻoga mea e faatatau iā i latou lava, ma mea na tutupu iā i latou. O le faia faapea, ua matou iloa lelei ai i latou, ma mafai ai ona matou fetuunaʻi le polokalame o le aʻoga ina ia fetaui ma o latou manaʻoga.”

E vaai faiaʻoga ma le ʻauaʻoʻoga i nei fale ua saunia lelei, o se faamanuiaga mai lo tatou “Aʻoaʻo Sili” o Ieova. (Isaia 30:20, 21) Ua faapea mai se tuafafine Filipino sa auai i le SKE na faia i se tasi o nei fale: “Na faamanatu mai e le siʻomaga na faia ai le aʻoga, e lē na o i matou o ni tagata aʻoga, ae o ni malo faapitoa a Ieova. E finagalo o Ia ina ia matou maua le fiafia, a o matou suʻesuʻeina ma le māeʻaeʻa lana Afioga.”

Ua mafai ona fausia, faaleleia, ma tausia lelei nei fale mo aʻoga, ona o a outou foaʻi lea e tele ina faia e auala mai i le donate.jw.org. Faafetai tele lava mo lo outou aaofoaʻi.