O Lesona e Aʻoaʻoina e Toeaina Mai iā Kitiona

1. I le 1 Peteru 5:2, o le ā le faaeaga ua maua e toeaina?

UA MAUFAATUATUAINA toeaina Kerisiano e tausia mamoe pele a Ieova. E faatāua e nei tane faamaoni le faaeaga o le auauna mo o latou uso ma tuafāfine, ma e latou te galulue mamafa o ni ʻleoleo mamoe e malie i ai le loto o le Atua.’ (Iere. 3:15; faitau le 1 Peteru 5:2.) Maʻeu lo tatou lotofaafetai i le iai o ni tane faapena i a tatou faapotopotoga!

2. O ā luʻi atonu e feagai ma nisi toeaina?

² E feagai toeaina ma le tele o luʻi a o faatinoina o latou tiute tauave. O se faataʻitaʻiga, e manaʻomia ona latou galulue mamafa e tausia le faapotopotoga. Na iloa e Tony o se toeaina i le Iunaite Setete, e manaʻomia ona ia faamaulalo pe a tele galuega e tuuina atu iā te ia. Na ia faapea mai: “Ina ua amata le KOVITI-19, na ou taumafai e faia le tele o galuega ina ia faamaopoopo ai sauniga ma le talaʻiga. Ae po o le ā lava le tele o mea ou te faia, e lē uma ai galuega e manaʻomia ona fai. Na iʻu ai ina leai se taimi e fai ai laʻu faitauga Tusi Paia, aʻu lava suʻesuʻega, ma tatalo.” E ese foʻi le luʻi na feagai ma Ilir, o se toeaina i Kosovo. A o iai o ia i se vaipanoa na fetauaʻi, na faigatā ona ia usitaʻia faatonuga mai i le faalapotopotoga. Na ia faapea mai: “Na tofotofoina loʻu lototele ina ua tofia aʻu e le ofisa o le lālā, e fesoasoani i uso ma tuafāfine na iai i se vaipanoa e lē saogalemu. Na ou fefe ma manatu e lē talafeagai lea faatonuga.” Na iloa e Tim o se misionare i Asia, le faigatā ona faia o mea uma e manaʻo e fai i totonu o le aso e tasi. Na ia faapea mai: “E iai taimi na ou lagona ai le vaivai i le itu tau faalogona ma le mafaufau.” O le ā e mafai ona fesoasoani i toeaina o loo feagai ma luʻi faapena?

3. E faapefea ona tatou maua aogā mai i le iloiloina o le faaaʻoaʻoga a le faamasino o Kitiona?

³ E mafai e toeaina ona aʻoaʻoina se lesona mai i le faaaʻoaʻoga a le faamasino o Kitiona. (Epe. 6:12; 11:32) Na ia puipuia ma leoleoina tagata o le Atua. (Faama. 2:16; 1 No. 17:6) I le pei o Kitiona, ua tofia foʻi toeaina e tausia tagata o le Atua i nei taimi e sili ona faigatā. (Galu. 20:28; 2 Timo. 3:1) E tatou te aʻoaʻoina lesona mai i le faamaulalo, lotomaulalo, ma le usiusitaʻi o Kitiona. Na tofotofoina lona tumau a o faatino ona tofiga. E tusa pe e tatou te auauna o ni toeaina pe leai, e mafai ona faateleina lo tatou lototalisapaia mo i latou. E tatou te lagolagosua i nei tane faaleagaga o loo galulue mamafa.​—Epe. 13:17.

PE A TOFOTOFOINA LO OUTOU FAAMAULALO MA LE LOTOMAULALO

4. Na faapefea ona faaalia e Kitiona le faamaulalo ma le lotomaulalo?

⁴ O Kitiona o se tagata faamaulalo ma lotomaulalo.b Ina ua faapea mai le agelu a Ieova iā Kitiona ua tofia o ia e laveaʻiina Isaraelu mai i tagata malolosi o Mitiana, na tali atu lenei tane lotomaulalo: “O loʻu aiga e aupito i faatauvaa i Manase, ma o aʻu foʻi e aupito i faatauvaa i le aiga o loʻu tamā.” (Faama. 6:15) Na ia manatu e lē agavaa o ia mo lenā tofiga, ae e lē o le silasila lenā a Ieova. O le fesoasoani a Ieova na faataunuuina ai ma le manuia e Kitiona lona tofiga.

5. E ono tofotofoina faapefea le faamaulalo ma le lotomaulalo o se toeaina?

⁵ E taumafai malosi toeaina e faaalia le faamaulalo ma le lotomaulalo i so o se mea e latou te faia. (Mika 6:8; Galu. 20:18, 19) E latou te lē gugutu i o latou tomai po o mea ua latou faataunuuina, pe manatu foʻi e leai so latou aogā ona o ni o latou sesē. E ui i lea, e latou te feagai lava ma luʻi. O se faataʻitaʻiga, e mafai e se toeaina ona talia le tele o tofiga ae mulimuli ane e faigatā ona ia faataunuuina. Pe atonu foʻi e faitioina o ia e isi ae viiviia e isi ona o le auala na ia taulima ai se tofiga. I tulaga faapena, o le ā e aʻoaʻoina e toeaina mai iā Kitiona e fesoasoani ai iā i latou?

6. O le ā e aʻoaʻoina e toeaina mai i le faamaulalo o Kitiona? (Tagaʻi foʻi i le ata.)

⁶ Ia talosaga mo se fesoasoani. O le tagata faamaulalo e na te iloa le mea e gata ai lona mafai. Na faaalia e Kitiona le faamaulalo ina ua ia lotomalie e talosaga atu i isi mo se fesoasoani. (Faama. 6:27, 35; 7:24) E faia foʻi faapena e toeaina e iai le utaga loloto. Ua faapea mai Tony lea na taʻua i le amataga: “Ona o le auala na tausia aʻe ai aʻu, e masani ona ou talia le tele o galuega nai lo o galuega e mafai ona ou faia. O lea na ou filifili ai e talanoaina le mataupu o le faamaulalo i la matou tapuaʻiga a le aiga, ma fesili i laʻu avā po o faapeʻī le auala o loo oʻu faaalia ai le faamaulalo. Na ou matamata foʻi i se vitiō i le jw.org ua taʻua Ia Aʻoaʻo, Faatuatuaina, ma Faasafua Atu le Pule i Isi, e Pei o Iesu.” O lea, na amata ona tāpā e Tony le fesoasoani a isi i le faatinoina o ona tiute tauave. O le ā le iʻuga? Na faapea mai Tony: “Ua faatinoina tiute tauave i totonu o le faapotopotoga i se auala maopoopo, ma ua tele ai le taimi e faamalosia ai loʻu itu faaleagaga.”

7. E faapefea ona faaaʻoaʻo toeaina iā Kitiona pe a faitioina i latou? (Iakopo 3:13)

⁷ Ia tali atu ma le agamalu pe a faitioina. O se isi luʻi e feagai ma toeaina, pe afai e faitioina i latou. E aogā foʻi le faaaʻoaʻoga a Kitiona. Na ia iloa e iai ona vaivaiga, o lea na ia tali atu ai ma le agamalu ina ua faitioina o ia e tagata o Efaraima. (Faama. 8:1-3) E leʻi tali atu Kitiona ma le ita. Ae na ia faaalia le lotomaulalo e ala i le faalogologo lelei atu a o faailoa mai o latou popolega, ma talanoa atu iā i latou i se auala agalelei. O le iʻuga, na latou maua le toʻafilemu. E faaaʻoaʻo toeaina e iai le utaga loloto iā Kitiona, e ala i le faalogologo lelei ma tali atu ma le agamalu pe a faitioina i latou. (Faitau le Iakopo 3:13.) O le faia faapea, ua latou saosaolaumea ai i le tausisia o le filemu i le faapotopotoga.

8. O le ā le auala e tatau ona tali atu ai toeaina pe a viiviia i latou? Aumai se faaaʻoaʻoga.

⁸ Ia avatu le viiga uma iā Ieova. Ina ua viiviia Kitiona ona o le manumalo iā Mitiana, na ia avatu le viiga iā Ieova. (Faama. 8:22, 23) E faapefea ona faaaʻoaʻo tane tofia iā Kitiona? E tatau ona latou avatu le viiga iā Ieova ona o mea ua latou faataunuuina. (1 Kori. 4:6, 7) O se faataʻitaʻiga, pe a viiviia se toeaina i lona tomai e aʻoaʻo atu ai, e mafai ona ia faapea atu o na tomai e mai i le Afioga a le Atua, po o toleniga mai i le faalapotopotoga a Ieova. Atonu e lelei le fai ma manatunatu toeaina po ua latou soona faauaʻi atu tagata iā i latou. Seʻi mātau le mea na tupu i se toeaina e igoa iā Timothy. Ina ua faatoʻā tofia o ia o se toeaina, e ese lona fiafia e faia lauga i le lautele. Na ia faapea mai: “Ou te faia ni faatomuaga ma faataʻitaʻiga e faaofo ai le aofia, ma e masani ona latou viiviia ai aʻu. Ae e faanoanoa, ua faauaʻi mai ai le aofia iā te aʻu nai lo o le Tusi Paia po o Ieova.” A o faagasolo taimi, na iloa e Timothy e manaʻomia ona fetuunaʻi le auala e aʻoaʻo atu ai, ina ia ʻalofia ai le soona faauaʻi atu o le aofia iā te ia. (Faata. 27:21) O le ā le iʻuga? Na ia faapea mai: “Na faamatala mai e uso ma tuafāfine le auala na fesoasoani ai aʻu lauga iā i latou e feagai ai ma se faafitauli, onosaia se tofotofoga, pe atili mafuta vavalalata atu ai iā Ieova. Ua sili atu le fiafia ua ou maua mai i na faamatalaga, nai lo o viiga na ou maua i tausaga ua teʻa.”

PE A TOFOTOFOINA LO OUTOU USIUSITAʻI PO O LE LOTOTELE

9. Na faapefea ona tofotofoina le usiusitaʻi ma le lototele o Kitiona? (Tagaʻi i le ata i le faavaa.)

⁹ Ina ua tofia Kitiona e avea o se faamasino, na tofotofoina lona usiusitaʻi ma lona lototele. Na faatonuina o ia ina ia talepe le fata faitaulaga a lona tamā iā Paala, o se tofiga e lamatia ai lona ola. (Faama. 6:25, 26) Mulimuli ane, ina ua faapotopotoina e Kitiona se ʻautau, e lua taimi na faatonuina ai o ia e faaitiitia lana ʻautau. (Faama. 7:2-7) Na faatonuina foʻi o ia e osofaʻia le nofoaga o loo tolauapi ai le fili i le vaeluapō.​—Faama. 7:9-11.

10. E ono tofotofoina faapefea le usiusitaʻi o toeaina?

¹⁰ E tatau i toeaina ona “gauaʻigofie.” (Iako. 3:17) O se toeaina e usiusitaʻi, e gauaʻigofie i faatonuga mai i le Tusi Paia ma taʻiala mai i le faalapotopotoga a le Atua. O le faia faapea, ua ia faataatia ai se faaaʻoaʻoga lelei mo isi. Ae e ono tofotofoina lava lona usiusitaʻi. O se faataʻitaʻiga, atonu e faigatā ona ia faatatauina le tele o taʻiala fou ma suiga e aofia ai. Atonu e iai taimi e taumānatu ai pe e aogā pe atamai na taʻiala. Pe atonu foʻi e talosagaina o ia e faataunuu se tofiga e ono lamatia ai lona ola. I tulaga faapena, e faapefea ona faaaʻoaʻo toeaina i le usiusitaʻi o Kitiona?

11. O le ā e fesoasoani i toeaina ina ia faaalia le usiusitaʻi?

¹¹ Ia faalogologo lelei i taʻiala ma faatatauina. Na faailoa atu e le Atua iā Kitiona le auala e talepe ai le fata faitaulaga a lona tamā, le nofoaga e fausia ai le fata faitaulaga fou iā Ieova, ma le manu e faaaogā mo le taulaga. E leʻi fesiligia e Kitiona na faatonuga, ae na ia faia e pei ona faatonuina ai o ia e Ieova. I aso nei, e maua e toeaina faatonuga mai i le faalapotopotoga a Ieova e ala i tusi, faasilasilaga, ma taʻiala e fesoasoani i lo tatou itu faaleagaga ma le faaletino. E tatou te alolofa i toeaina ona e latou te mulimuli ma le faamaoni i taʻiala mai i le faalapotopotoga. O le iʻuga, o le a maua ai e le faapotopotoga atoa aogā.​—Sala. 119:112.

12. E faapefea ona faatatauina e toeaina le Eperu 13:17 pe a aumaia ni suiga mai i le faalapotopotoga?

¹² Ia lotomalie e fetuutuunaʻi. Ia manatua na faatonu e Ieova Kitiona, ina ia toe faafoʻi le toetoe o tane uma o le ʻautau i o latou aiga. (Faama. 7:8) Atonu na taumānatu Kitiona: ʻPe e manaʻomia moni lenei suiga? Po o le a taulau lenei auala?’ E ui i lea, na usiusitaʻi pea o ia. E faaaʻoaʻo toeaina i aso nei iā Kitiona, e ala i le usitaʻia o so o se suiga e aumaia e le faalapotopotoga a Ieova. (Faitau le Eperu 13:17.) O se faataʻitaʻiga, i le 2014 na suia ai e le Vaega Pule le auala e faatupeina ai galuega faufale mo Maota mo Sauniga ma Maota mo Fonotaga. (2 Kori. 8:12-14) E lē toe manaʻomia ona totogi e faapotopotoga se nonogatupe. Nai lo o lea, e tuufaatasi foaʻi tauofo a faapotopotoga i le lalolagi aoao ina ia fausia ai maota mo tapuaʻiga i vaipanoa na manaʻomia ai, e tusa pe itiiti se mea e mafai ona foaʻi e faapotopotoga i na vaipanoa. Ina ua iloa e José lenā suiga, na ia manatu ailoga e mafai ona tupu lenā mea. Na ia faapea ifo: ʻE oo lava i se Maota mo Sauniga se tasi, ailoga e mafai ona fausia. E lē o le auala lea e faia ai mea i la matou vaipanoa.’ O le ā na fesoasoani iā José e lagolagoina lenā suiga? Na ia faapea mai: “Na faamanatu mai i le Faataoto 3:5, 6, ina ia ou faatuatua iā Ieova, ma e mataʻina iʻuga ua oo i ai. Ua tele Maota mo Sauniga ua mafai ona fausia, ma o le auala fou e faaaogā ai foaʻi tauofo ua fesoasoani ina ia tutusa ai avega a tagata uma.”

13. (a) O le ā na mautinoa i ai Kitiona? (e) E faapefea ona faaaʻoaʻo toeaina iā Kitiona? (Tagaʻi foʻi i le ata.)

¹³ Ia lototele e faia le finagalo o Ieova. Na usiusitaʻi Kitiona iā Ieova e ui i lona fefe ma mea na lamatia ai lona ola. (Faama. 9:17) Ina ua maua e Kitiona le faamautinoaga mai iā Ieova, na ia mautinoa atoatoa ai o le a lagolagoina o ia e le Atua a o ia puipuia Ona tagata. E faaaʻoaʻo foʻi iā Kitiona toeaina o loo iai i vaipanoa o loo faasā ai le galuega. E latou te lototetele e taʻimua i sauniga ma le talaʻiga, e ui i faamataʻuga e puʻea i latou, tuʻifesili, lē toe iai ni galuega, po o sauāga.c A o faagasolo le puapuaga tele, o le a manaʻomia ai e toeaina le lototele e usitaʻia ai faatonuga o le a latou maua, e ui e lamatia ai o latou ola. E aofia ai i na faatonuga le faailoa atu o le feʻau e pei o se uatoʻa, ma le auala e sao mai ai i le osofaʻiga a Koku mai i Makoku.​—Eseki. 38:18; Faaa. 16:21.

PE A TOFOTOFOINA LO OUTOU TUMAU

14. Na faapefea ona tofotofoina le tumau o Kitiona?

¹⁴ Na manaʻomia ona lava le malosi o Kitiona e faatino ai lona tofiga o se faamasino. Ina ua sosola tagata Mitiana a o faia le taua i le pō, na tuliloa ai i latou e Kitiona mai i le vanu o Isereelu seʻia oo i le vaitafe o Ioritana, lea atonu na siʻomia i vao putuputu. (Faama. 7:22) Pe na gata ai i inā le tuliloaga a Kitiona? E leai. E ui lava ina lē lavavā Kitiona ma lana ʻautau e toʻa 300, ae na latou sopoʻia le vaitafe ma faaauau ona tuliloa tagata Mitiana, seʻia oo ina maua i latou ma faatoʻilaloina ai.​—Faama. 8:4-12.

15. O ā taimi e ono tofotofoina ai le tumau o toeaina?

¹⁵ Atonu e lagona e toeaina i nisi taimi le vaivai i le tino, le mafaufau, po o faalogona, i le tausia o le faapotopotoga ma o latou aiga. I na tulaga, e faapefea ona latou faaaʻoaʻo iā Kitiona?

16-17. O le ā na fesoasoani iā Kitiona e tumau ai, ma o le ā ua mautinoa i ai toeaina? (Isaia 40:28-31) (Tagaʻi foʻi i le ata.)

¹⁶ Ia maufaatuatuaina Ieova e na te faamalosia oe. Na maufaatuatuaina e Kitiona Ieova o le a ia foaʻi mai iā te ia le malosi, ma na faia faapea e Ieova. (Faama. 6:14, 34) O se faaaʻoaʻoga, na tamomoʻe Kitiona ma ona tagata e tuliloa tupu e toʻalua o Mitiana na tiʻetiʻe i kamela. (Faama. 8:12, 21) Ae ona o le fesoasoani a le Atua, na manumalo ai le nuu o Isaraelu. E mafai foʻi e toeaina ona faalagolago iā Ieova, o lē “e lē vaivai pe lē lavā foʻi.” E na te foaʻi mai le malosi pe a latou manaʻomia.​—Faitau le Isaia 40:28-31.

¹⁷ Mātau le mea na tupu iā Matthew, o se sui o le Komiti mo Mataupu Tau Falemaʻi. O le ā na fesoasoani iā te ia e tumau ai? Na ia faapea mai: “Na ou tofo i le moni o le Filipi 4:13. O le tele o taimi pe a ou lagona le matuā lē lavā, ou te tatalo faatauanau i le Atua ma talosaga iā te ia mo le malosi i le tino ma le mafaufau ina ia lagolagoina ai oʻu uso. I na taimi, ou te lagona ai le faamalosia o aʻu e le agaga o Ieova ma fesoasoani iā te aʻu ina ia ou tumau.” I le pei o Kitiona, atonu e feagai toeaina galulue mamafa ma luʻi, a o latou leoleoina mamoe a Ieova. O le mea moni, e ao ona latou faamaulalo ma iloa le mea e gata ai lo latou mafai. Peitaʻi, e latou te faatuatuaina Ieova o le a ia faafofoga mai i a latou talosaga mo se fesoasoani, ma faamalosia i latou ina ia tumau.​—Sala. 116:1; Fili. 2:13.

18. E faapefea ona faaaʻoaʻo toeaina iā Kitiona?

¹⁸ E tele lesona aogā ua mafai ona aʻoaʻoina e toeaina mai iā Kitiona. E ao ona latou faaalia le faamaulalo ma le lotomaulalo i le tele o galuega e latou te taliaina, ma le auala e tali atu ai pe a faitioina pe viiviia i latou. E tatau ona latou faaalia le usiusitaʻi ma le lototele, aemaise lava ua lata mai le iʻuga o lenei faiga o mea. E manaʻomia foʻi ona latou maufaatuatuaina le Atua o le a ia faamalosia i latou, e tusa lava po o ā luʻi e latou te fesagaʻia. E mautinoa e tatou te matuā talisapaia nei leoleo mamoe galulue mamafa, ma “faaauau ona faapelepele i tane faapena.”​—Fili. 2:29.