Ia Nofosauni mo le Aso o Ieova

1. O le ā e tatau ona tatou faia ina ia sao mai ai i le aso o Ieova?

PE A taʻua i le Tusi Paia le faaupuga “le aso o Ieova,” e faasino atu i le taimi e faamasinoina ai e Ieova ona fili ma aumaia le faaolataga mo ona tagata. I aso ua mavae, e iai taimi na faaoo mai ai e Ieova sala faafaamasinoga. (Isa. 13:1, 6; Eseki. 13:5; Sefa. 1:8) O le a amata “le aso o Ieova” i le osofaʻia o Papelonia le Aai Tele ae taualuga i le taua o Amaketo. Ina ia sao mai i lenā “aso,” e manaʻomia ona tatou nofosauni i le taimi lenei. Na aʻoaʻoina i tatou e Iesu e lē gata ia nofosauni mo le “puapuaga tele,” ae ia faaauau ona “nofosauni” mo lenā taimi.​—Mata. 24:21; Luka 12:40.

2. E faapefea ona tatou maua aogā mai i le 1 Tesalonia?

² I le tusi muamua a le aposetolo o Paulo i le faapotopotoga i Tesalonia, na ia faaaogā ai le tele o talafaatusa ina ia fesoasoani i Kerisiano e nofosauni mo le aso tele o le faamasinoga a Ieova. Na iloa e Paulo e lē o le taimi lenā e oo mai ai le aso o Ieova. (2 Tesa. 2:1-3) Peitaʻi na ia fautuaina ona uso ina ia nofosauni mo lenā aso, e peiseaʻī o le a oo mai i le aso e sosoo ai, ma e mafai foʻi ona tatou faatatauina lenā fautuaga. Seʻi o tatou talanoaina le auala ua ia faamatalaina ai manatu nei: (1) pe faapefea ona oo mai le aso o Ieova, (2) o ai i latou e lē faasaoina i lenā aso, ma le (3) pe faapefea ona tatou nofosauni ina ia faasaoina.

E FAAPEFEA ONA OO MAI LE ASO O IEOVA?

3. E faapefea ona oo mai le aso o Ieova e pei o se gaoi i le pō? (Tagaʻi foʻi i le ata.)

³ “E pei o se gaoi i le pō.” (1 Tesa. 5:2) O le talafaatusa muamua lenei mai i talafaatusa e tolu na faaaogā e Paulo, e faamatala ai le oo mai o le aso o Ieova. E masani ona faafuaseʻi osofaʻiga a se tagata gaoi, ma e na te faia i le pō i le taimi e lē faatalitalia e tagata. E faapena foʻi le aso o Ieova, e faafuaseʻi ona oo mai i se taimi e lē faatalitalia e tagata. Atonu e faateʻia foʻi Kerisiano moni i le suia faafuaseʻi o le tulaga o mea. Ae e lē pei i tatou o tagata amioleaga ia o le a faaumatia.

4. E faapefea ona pei le aso o Ieova o le tigā o le fafine tō o le a fanau?

⁴ “E pei o le tigā o le fafine tō o le a fanau.” (1 Tesa. 5:3) E lē iloa e se tinā maʻitaga le taimi e faatigā ai o le a fanau. Ae e na te mautinoa o le a fanau mai lana pepe. Pe a oo i le taimi e faatigā ai, o le a faafuaseʻi ma e lē mafai ona taofia tigā. I se tulaga talitutusa, e tatou te lē iloa foʻi le aso ma le itula e amata ai le aso o Ieova. Peitaʻi, e tatou te mautinoa e oo mai lava ma o le a faafuaseʻi ona oo mai le faasalaga a le Atua i tagata amioleaga, ma e leai se tasi o i latou e sao mai ai.

5. E faapefea ona pei le puapuaga tele o le tafa mai o ata?

⁵ E pei o le tafa mai o ata. Na toe taʻua e Paulo i lana talafaatusa lona tolu, ē e gāoi i le pō. Ae o lea ua ia faatusaina le aso o Ieova i le tafa mai o ata. (1 Tesa. 5:4) O tagata gāoi i le pō atonu ona o le tele o mea e mananaʻo e ave, ua lē ano ai i le taimi. Ae pe a tafa mai ata o le a maua ai i latou. I se tulaga talitutusa, o le a faaalialia i le puapuaga tele i latou o ē e pei o ni gāoi, e tumau pea ona latou iai i le pōuliuli e ala i lo latou faia pea o galuega e lē fiafia i ai le Atua. I le lē pei o i latou, e tatou te nofosauni e ala i le teena o amioga e lē fiafia i ai Ieova, ma faia “mea lelei uma lava, ma le amiotonu ma le upu moni.” (Efe. 5:8-12) Ona sosoo ai lea ma le faaaogāina e Paulo o ni talafaatusa se lua e faamatala ai i latou o le a lē faasaoina.

O AI E LĒ FAASAOINA I LE ASO O IEOVA?

6. I le ā le itu o loo momoe faaleagaga ai le toʻatele o tagata? (1 Tesalonia 5:6, 7)

⁶ “O i latou e momoe.” (Faitau le 1 Tesalonia 5:6, 7.) Na faatusa e Paulo ē e lē faasaoina i le aso o Ieova i ē o loo momoe. E latou te lē iloa mea o loo tutupu. O lea, e latou te lē malamalama pe a iai ni mea tāua e tutupu ma le auala e tali atu ai. O le toʻatele o tagata i aso nei o loo momoe faaleagaga. (Roma 11:8) E latou te lē ano i faamaoniga o loo tatou ola i “aso e gata ai,” ma e lē o toe umi ona oo mai lea o le puapuaga tele. O mea iloga o loo tutupu i le lalolagi, atonu e toe fafagu mai ai nisi mai i le momoe faaleagaga ma uunaʻia i latou e faaalia sina fiafia i le feʻau o le Malo. Peitaʻi, o le toʻatele e toe momoe faaleagaga. E oo lava iā i latou e talitonu i le aso faamasino, e latou te manatu e leʻi taitai oo mai. (2 Pete. 3:3, 4) Ae a o faagasolo taimi, ua tatou iloa ai le matuā tāua o le fautuaga ina ia mataala pea.

7. E faapefea ona pei i latou o le a oo iai le toʻasā o le Atua o ni ē e onanā?

⁷ “O i latou e onanā.” Na faatusa e le aposetolo o Paulo i latou o le a oo i ai le toʻasā o le Atua i ē onanā. O tagata onanā e latou te lē malamalama lelei i mea o loo tutupu, ma e latou te faia ni filifiliga lē lelei. I se tulaga talitutusa, e lē amanaʻia foʻi e tagata amioleaga lapataʻiga a le Atua. E latou te filifilia se olaga e iʻu atu i le faaumatiaga. Ae ua faatonuina Kerisiano ina ia faaauau ona mafaufau lelei. (1 Tesa. 5:6) Ua faamatalaina e se faitofā o le Tusi Paia le mafaufau lelei, o “le toʻafilemu lea o le mafaufau e iloilo ma fuafua le tulaga tonu o mea, lea e mafai ai ona fai ni a tatou filifiliga saʻo.” Aiseā e tatau ai ona tatou toʻafilemu pea? Ina ia aua neʻi o tatou aafia i faiga faapolotiki po o mataupufai a tagata. O le a matuā luʻia i tatou e faia sa tatou vaega i na vala a o latalata mai le aso o Ieova. Peitaʻi, e lē tatau ona tatou atuatuvale i le auala e tali atu ai. E fesoasoani mai le agaga o le Atua, ina ia toʻafilemu pea o tatou mafaufau ma faia filifiliga atamai.​—Luka 12:11, 12.

E FAAPEFEA ONA TATOU NOFOSAUNI MO LE ASO O IEOVA?

8. Ua faapefea ona faataʻitaʻia mai i le 1 Tesalonia 5:8 uiga e fesoasoani iā i tatou e mataala ai pea ma faaauau ona mafaufau lelei? (Tagaʻi foʻi i le ata.)

⁸ “[Ia] oofu i le ufifatafata . . . ma le . . . puloutau.” Ua faatusaina e Paulo i tatou i fitafita e mataalia ma faaauupegaina mo se taua. (Faitau le 1 Tesalonia 5:8.) E nofosauni i taimi uma se fitafita e tau i se taua. E faapena foʻi i tatou. E tatou te nofosauni mo le aso o Ieova, e ala i le oofu i le ufifatafata o le faatuatua ma le alofa ma le puloutau o le faamoemoe. E aogā tele nei uiga iā i tatou.

9. E faapefea i le faatuatua ona puipuia ai i tatou?

⁹ E puipuia e le ufifatafata le fatu o se fitafita. E faapena foʻi ona puipuia e le faatuatua ma le alofa o tatou loto. E fesoasoani nei uiga iā i tatou e auauna ai pea i le Atua ma mulimuli iā Iesu. O le faatuatua ua tatou mautinoa ai o le a tauia e Ieova i tatou, ona o loo tatou saʻili iā te ia ma o tatou lotoatoa. (Epe. 11:6) O le a uunaʻia ai i tatou e faamaoni pea i lo tatou Taʻitaʻi o Iesu e ui i faigatā. E faamalosia lo tatou faatuatua e feagai ma luʻi o le olaga, e ala i le mātauina o faaaʻoaʻoga faaonapōnei o i latou na tumau ma le faamaoni, e ui i sauāga po o faafitauli tau tamaoaiga. E tatou te ʻalofia foʻi le mailei o le manaʻo tele i meafaitino, e ala i le faaaʻoaʻo iā i latou na faafaigofie o latou olaga ina ia faamuamua ai manaʻoga o le Malo.b

10. E faapefea i le alofa i le Atua ma tuaoi ona fesoasoani iā i tatou e tumau ai?

¹⁰ E tāua foʻi le alofa ina ia mataala ai pea ma faaauau ona mafaufau lelei. (Mata. 22:37-39) O le alofa i le Atua, e fesoasoani iā i tatou e talaʻi ai pea e ui i luʻi e tatou te ono fesagaʻia. (2 Timo. 1:7, 8) Talu ai e tatou te alolofa foʻi i ē e lē auauna iā Ieova, e faaauau pea ona tatou talaʻi e lē gata i oganuu ae faapea foʻi ma talaʻiga i le telefoni ma tusi. E tatou te faamoemoe e iai le taimi o le a faia ai e o tatou tuaoi ni suiga manaʻomia ma faia le mea tonu.​—Eseki. 18:27, 28.

11. E faapefea i le alofa mo o tatou uso ona fesoasoani iā i tatou? (1 Tesalonia 5:11)

¹¹ O le alofa i tuaoi e aofia ai le alofa i o tatou uso ma tuafāfine. E tatou te faaalia lenā alofa, e ala i le ʻfefaalaeiauaʻi ma atiaʻe e le tasi le isi.’ (Faitau le 1 Tesalonia 5:11.) E pei ona tutū faatasi o ni fitafita e tau se taua, e faapena foʻi ona tatou fefaalaeiauaʻi o le tasi i le isi. A o vevesi le taua, e ono faia ma le lē iloa e se fitafita se gaoioiga e faamanuʻalia ai le isi ona uso a fitafita. E mautinoa e na te leʻi faia ma le loto i ai lenā gaoioiga. E tatou te lē faia foʻi ma le loto i ai se gaoioiga e faatigā ai i o tatou uso ma tuafāfine, pe taui atu le leaga i le leaga. (1 Tesa. 5:13, 15) E tatou te faaalia foʻi le alofa e ala i le faaaloalo i uso o loo taʻimua i faapotopotoga. (1 Tesa. 5:12) Ina ua tusia e Paulo lenei tusi, e leʻi atoa se tausaga talu ona faavaeina le faapotopotoga i Tesalonia. Atonu e leʻi lava le poto masani o toeaina o le faapotopotoga, ma atonu na iai ni o latou sesē. Peitaʻi, na manaʻomia ona faaalia pea le faaaloalo iā i latou. A o lata mai le puapuaga tele, o le taimi lenā e sili atu ona manaʻomia ona tatou faalagolago ai i toeaina mo taʻiala. Atonu e tatou te lē toe maua se fesootaʻiga ma le ofisa ulu ma ofisa o lālā. O lea, e tāua ai ona faaalia le alofa ma le faaaloalo i toeaina i le taimi lenei. Po o le ā lava e tupu, ia faaauau ona tatou mafaufau lelei ma aua le uaʻi atu i o latou vaivaiga, ae ia uaʻi atu i le mea moni, o loo taʻitaʻia e Ieova nei tane faamaoni e ala iā Keriso.

12. E faapefea i le faamoemoe ona puipuia ai o tatou mafaufau?

¹² E pei lava ona puipuia e se puloutau le ulu o se fitafita, e faapena foʻi ona puipuia e le faamoemoe o le faaolataga o tatou mafaufau. O le iai o se faamoemoe malosi, ua tatou iloa ai o so o se mea e ofoina mai e lenei lalolagi e leai se aogā. (Fili. 3:8) E fesoasoani foʻi lo tatou faamoemoe e maua ai pea le toʻafilemu. O le mea lenā na tupu iā Wallace ma Laurinda o loo auauna i le Peteli i Aferika. I totonu o le tolu vaiaso, na maliu ai le tinā o Laurinda ma le tamā o Wallace. Ae ona o le KOVITI-19, e leʻi mafai ai ona la toe foʻi i o la aiga. Na tusi Wallace: “Ua fesoasoani le faamoemoe o le toetū iā te aʻu e faaata ai i laʻua i le lalolagi fou, nai lo o le mafaufau i le taimi na tigāina ai a o leʻi maliliu. O lenā faamoemoe e faatoʻafilemu ai aʻu pe a ou feagai ma faalogona faavauvau.”

13. E faapefea ona tatou maua le agaga paia?

¹³ “Aua neʻi outou tineia le mumū o le agaga.” (1 Tesa. 5:19) Na faatusa e Paulo le agaga paia i se afi e mumū i totonu o i tatou. Pe a tatou maua le agaga o le Atua, e tatou te maelega ma aasa e faia le mea saʻo ma maua ai le malosi e galulue mo Ieova. (Roma 12:11) E faapefea ona tatou maua le agaga paia? E ala i le tatalo, suʻesuʻe le Afioga faagaeeina a le Atua, ma auaufaatasi ma lana faalapotopotoga ua taʻitaʻia e lona agaga. O le faia faapea, e fesoasoani iā i tatou e atiaʻe ai “le fua o le agaga.”​—Kala. 5:22, 23.

14. Ina ia maua pea le agaga paia o le Atua, o le ā e lē tatau ona tatou faia? (Tagaʻi foʻi i le ata.)

¹⁴ Pe a tatou maua le agaga paia o le Atua, e tatau ona tatou faaeteete ina “neʻi [o tatou] tineia le mumū o le agaga.” E na o i latou e mamā o latou mafaufauga ma amioga e foaʻi i ai e le Atua lona agaga paia. Ae e na te lē foaʻi mai lona agaga paia, pe afai e faaauau ona tatou mafaufau ma faia mea e lē mamā. (1 Tesa. 4:7, 8) Ina ia tatou maua pea le agaga paia, e lē tatau foʻi ona tatou “manatu faatauvaa i valoaga.” (1 Tesa. 5:20) E tusa ai ma lenei fuaiupu, e faasino atu “valoaga” i feʻau e tuuina mai e Ieova e ala i lona agaga paia, e aofia ai le aso o Ieova ma le faanatinati o le taimi o loo tatou ola ai. E tatou te lē manatu e lē oo mai Amaketo i o tatou vaitaimi. Nai lo o lea, ia tāmau i o tatou mafaufau lenā aso e ala i le faia pea o le mea saʻo, ma pisi pea i “galuega o le faamaoni i le Atua.”​—2 Pete. 3:11, 12.

“IA FAAMAUTINOA I MEA UMA”

15. E faapefea ona tatou ʻalofia le faasesēina i faamatalaga taufaasesē mai i temoni? (1 Tesalonia 5:21)

¹⁵ E lē o toe umi ona alagaina lea e fili o le Atua: “Ua filemu ma saogalemu!” (1 Tesa. 5:3) O le a salalau atu faamatalaga taufaasesē mai i temoni, ma o le a taʻitaʻisesēina ai le toʻatele. (Faaa. 16:13, 14) Ae e faapefea i tatou? E lē faasesēina i tatou pe a tatou “faamautinoa i mea uma.” (Faitau le 1 Tesalonia 5:21.) O le upu Eleni ua faaliliuina “ia faamautinoa,” e fesootaʻi atu i le auala na iloiloina ai uʻamea anagatā. O lea, e manaʻomia ona tatou iloilo mea e tatou te faalogo pe faitau i ai ina ia faamautinoa pe moni. Sa tāua i le faapotopotoga i Tesalonia le faia faapea, ma o le a sili atu ona tāua lo tatou faia faapea a o latalata mai le puapuaga tele. Nai lo o le talitonu i mea uma e faalogo i ai, ae e tatou te faaaogā le mafaufau lelei e faatusatusa ai mea e tatou te faitau pe faalogo i ai, i mea e fai mai ai le Tusi Paia ma le faalapotopotoga a Ieova. O le faia faapea, o le a lē faasesēina ai i tatou i so o se faamatalaga taufaasesē mai i temoni.​—Faata. 14:15; 1 Timo. 4:1.

16. O le ā le faamoemoe ua tatou maua, ma o le ā ua tatou maumauaʻi e fai?

¹⁶ O le a faasaoina tagata o le Atua i le puapuaga tele. Ae mo i tatou taʻitoʻatasi, e tatou te lē iloa le mea o le a tupu a taeao. (Iako. 4:14) E tusa pe e tatou te sao atu i le puapuaga tele pe maliliu foʻi a o leʻi oo i lenā taimi, o le a tauia i tatou i le ola e faavavau pe afai e tatou te tumau ma le faamaoni. O le a faatasi le ʻaufaauuina ma Keriso i le lagi. Ae o le a iai pea i le lalolagi parataiso isi mamoe. Tau ina ia tatou taulaʻi uma i lo tatou faamoemoe matagofie, ma nofosauni mo le aso o Ieova!