Ua taʻua i le Tusi Paia, o le olaga o le tagata ʻua puupuu ma ua tumu i faafitauli.’ (Iopu 14:1) Po o le ituaiga olaga lenā e finagalo le Atua e tatou te maua? Afai e leai, o le ā la lona finagalo mo i tatou? Pe o le a taunuu moni lava lona finagalo? Seʻi iloilo tali faalaeiau mai le Tusi Paia.

1. O le ā le ituaiga olaga e finagalo Ieova e tatou te maua?

E finagalo Ieova e tatou te maua se olaga e sili ona lelei. Ina ua uma ona ia foafoaina uluaʻi tagata o Atamu ma Eva, ona ia tuu lea o i laʻua i le parataiso matagofie i le faatoʻaga o Etena. “Ona faamanuia lea o le Atua iā i laʻua ma ua fetalai atu le Atua iā i laʻua: ʻIa fanafanau ma ia faatoʻateleina, ia tumu ai le lalolagi ma ia galueaʻiina.’” (Kenese 1:​28) Na finagalo Ieova ina ia la maua ni fanau, avea le lalolagi atoa ma parataiso, ma tausia manu. Na finagalo foʻi o ia ina ia olioli tagata uma i le mauaina o le soifua mālōlōina lelei, ma ola e faavavau.

E ui e tatou te lē o maua lenā ituaiga olaga i le taimi lenei,a ae e lē o suia ai le finagalo o le Atua. (Isaia 46:​10, 11) E finagalo o ia e maua pea e tagata usiusitaʻi le ola e faavavau i se tulaga lelei atoatoa.​—Faitau le Faaaliga 21:​3, 4.

2. E faapefea ona tatou maua se olaga fiafia i le taimi lenei?

Na foafoaina i tatou e Ieova ma o tatou “manaʻoga faaleagaga,” po o le faanaunauga ina ia iloa o ia ma tapuaʻi atu iā te ia. (Faitau le Mataio 5:​3-6.) E finagalo ia tatou vavalalata atu, ʻsavavali i ona ala uma ma alolofa iā te ia,’ ma auauna atu ‘ma le lotoatoa.’ (Teuteronome 10:12; Salamo 25:14) O le faia faapea, o le a tatou maua ai le fiafia moni e tusa po o ā faafitauli tatou te fesagaʻia. O le tapuaʻi iā Ieova o le a tatou maua ai se olaga fiafia, e pei ona ia finagalo i ai.

3. E finagalo Ieova e maua e tagata se olaga e sili ona lelei

Faaali le VITIŌ, ona talanoa lea i le fesili lenei:

VITIŌ: Aiseā na Foafoaina ai e le Atua le Lalolagi?​—Vaaiga Puupuu (1:​41)

• Aiseā na foafoaina ai e le Atua lo tatou lalolagi matagofie?

Faitau le Failauga 3:​11, ona talanoa lea i le fesili lenei:

• O le ā ua taʻu mai i le mau e faatatau iā Ieova?

4. E leʻi suia le finagalo o Ieova

Faitau le Salamo 37:​11, 29 ma le Isaia 55:​11, ona talanoa lea i le fesili lenei:

• E faapefea ona tatou iloa e leʻi suia le finagalo o Ieova?

5. O le tapuaʻi iā Ieova e tatou te maua ai se olaga fiafia

VITIŌ: Ua Ou Iloa le Fuafuaga o le Olaga (5:​03)

• Na faapefea ona maua e Terumi aogā i le iloa e iai le fuafuaga o le olaga?

Faitau le Failauga 12:​13, ona talanoa lea i le fesili lenei:

• O le ā le matafaioi e tatau ona tatou faia, e faaalia ai lo tatou talisapaia o mea e tele ua faia e Ieova mo i tatou?

AOTELEGA

E finagalo Ieova ia tatou maua se olaga fiafia e faavavau i le lalolagi, i se tulaga lelei atoatoa. Pe a tatou tapuaʻi iā te ia ma le lotoatoa, o le a maua ai se olaga fiafia e amata atu lava i le taimi lenei.

Fesili Autalu

• O le ā le finagalo o Ieova na iai mo Atamu ma Eva?

• E faapefea ona tatou iloa e leʻi suia le finagalo o le Atua mo tagata?

• E faapefea ona e maua se olaga fiafia?

MANATU FAAOPOOPO

Iloilo le faamaoniga e iloa ai na iai moni lava le faatoʻaga i Etena.

“O le Faatoʻaga i Etena​—Talafatu po o se Tala Moni?” (Le Olomatamata, Ianuari 1, 2011)

Iloilo le māfuaaga tatou te mautinoa ai o le a tumau e faavavau le lalolagi.

“Po o le a Faaumatia le Lalolagi?” (Mataupu i le jw.org)

Iloilo po o le ā o loo taʻua i le Tusi Paia e faatatau i le iloaina o le fuafuaga o le olaga.

“O le ā le Fuafuaga o le Olaga?” (Mataupu i le jw.org)

Na manatu se tamāloa ua iā te ia mea uma. Ae mātau pe na faapefea ona ia maua se mea na ia misia i lona olaga.

Ua Ou Maua se Olaga e Iai Sona Fuafuaga (3:​55)

2. O ai e pule faatasi ma Iesu?

E lē na o Iesu o le a avea ma pule. E iai tagata “mai i ituaiga uma, ma gagana uma, ma nuu uma, ma atunuu uma . . . e latou te pule mai foʻi o ni tupu i le lalolagi.” (Faaaliga 5:​9, 10) E toʻafia i latou o le a pule faatasi ma Keriso? E faitau miliona Kerisiano ua avea ma soo o Iesu, talu mai le taimi na afio mai ai o ia i le lalolagi. Ae e na o le 144,000 i latou e ō atu i le lagi e pule faatasi ma Iesu. (Faitau le Faaaliga 14:​1-4.) O isi Kerisiano uma i le lalolagi, o le a avea ma tagatānuu o le Malo.​—Salamo 37:29.

Ua pule nei le Malo o le Atua, ma ua toeitiiti ona ia suia atoatoa lea o le lalolagi. Seʻi tatou iloiloina nisi o mea mananaia e mafai ona e tulimataʻia i le pulega a le Malo.

1. O le a faapefea ona aumaia e le Malo o le Atua le filemu ma le faamasinotonu i le lalolagi?

O le a faaumatia e le Tupu o le Malo o le Atua, o Iesu, tagata leaga ma faigāmalo i le taua o Amaketo. (Faaaliga 16:​14, 16) I lenā taimi, o le a faataunuuina atoatoa ai le folafolaga lenei a le Tusi Paia: “Ua toeitiiti lava ona lē toe iai lea o le tagata amioleaga.” (Salamo 37:10) E ala i le Malo, o le a faamautinoa e Iesu o le a iai le filemu ma le faamasinotonu i le lalolagi atoa.​—Faitau le Isaia 11:4.

2. O le a faapeʻī le olaga pe a faataunuuina le finagalo o le Atua i le lalolagi?

Pe a pule le Malo o le Atua, ona fai loa lea o “le lalolagi mo ē e amiotonu, e nonofo ai pea i latou e oo i le faavavau.” (Salamo 37:29) Seʻi faaata le ola i se lalolagi e tumu i tagata amiotonu ma alolofa iā Ieova ma isi. O le a lē toe iai se tagata e maʻi ma o le a ola e faavavau tagata uma.

3. O le ā o le a faataunuuina e le Malo o le Atua pe a uma ona faaumatia ē amioleaga?

Pe a uma ona faaumatia ē amioleaga, ona pule loa lea o Iesu o se Tupu mo le 1,000 tausaga. A o faagasolo lenā taimi, o le a ia fesoasoani mai ma le 144,000 lea latou te pule faatasi, ina ia lelei atoatoa tagata i le lalolagi ma saʻoloto mai le agasala. E oo atu i le iʻuga o le 1,000 tausaga, ua avea le lalolagi ma parataiso matagofie, ma maua e tagata le fiafia ona o le usitaʻia o tulafono a Ieova. O le a toe tuuina atu i lenā taimi e Iesu le pule i lona Tamā, ma “faapaiaina [le] suafa” o Ieova e sili atu i lo se isi lava taimi. (Mataio 6:​9, 10) O le a faamaonia ai o Ieova o se Pule lelei ma manatu mamafa i ona tagatānuu. Pe a māeʻa lenā, ona ia faaumatia loa lea o Satani ma ana temoni, ma so o se tasi e fouvale i lana pule. (Faaaliga 20:​7-​10) O le a tumau e faavavau le tulaga lelei atoatoa lea o le a aumaia e le Malo o le Atua.

SAʻILIʻILI ATILI

4. O le a faaumatia e le Malo o le Atua faigāmalo a tagata

ʻUa pule le tagata i le isi tagata ma ua matuā afāina ai o ia.’ (Failauga 8:9) O le a faaiʻuina e Ieova na faiga lē tonu e ala i lona Malo.

Faitau le Tanielu 2:​44 ma le 2 Tesalonia 1:​6-8, ona talanoa lea i fesili nei:

• O le ā o le a faia e Ieova ma lona Alo o Iesu i faigāmalo a tagata, ma i latou o loo lagolagoina?

• E faapefea i mea ua e aʻoaʻoina e faatatau iā Ieova ma Iesu, ona e mautinoa ai o le a la faaalia le amiotonu ma le faamasinotonu?

5. O Iesu o se Tupu e sili ona lelei

I le avea ai o Iesu ma Tupu o le Malo o le Atua, o le a ia faia le tele o mea lelei ina ia maua ai e tagata uma aogā. Faaali le VITIŌ ma mātau pe na faapefea ona faailoa mai e Iesu, o loo iā te ia le faanaunauga ma le mana ua tuuina atu e le Atua, ina ia fesoasoani ai i tagata.

VITIŌ: Faailoa Mai e Iesu Mea o le a Faataunuuina e le Malo (1:​13)

O mea na faia e Iesu a o iai i le lalolagi, ua faaata mai ai mea o le a faataunuuina e le Malo. O lē fea faamanuiaga e sili ona e tulimataʻia i le lumanaʻi? Faitau mau o loo faamatala atili mai ai nei faamanuiaga.

6. O le a aumaia e le Malo o le Atua se faamoemoe matagofie

VITIŌ: Se Faaataga o se Lumanaʻi Matagofie (4:​38)

Faitau le Salamo 145:​16, ona talanoa lea i le fesili lenei:

• O ā ou lagona i le iloaina, o le a “faamalie [e Ieova] le manaʻo o meafaiola uma lava”?

AOTELEGA

O le a faataunuu e le Malo o le Atua lona finagalo. O le a suia le lalolagi e avea ma parataiso, e tumu i tagata lelei e auauna iā Ieova e faavavau.

Fesili Autalu

• O le a faapefea ona faapaiaina e le Malo o le Atua le suafa o Ieova?

• Aiseā e tatou te talitonu ai o le a faataunuu e le Malo o le Atua folafolaga a le Tusi Paia?

• O le ā se mea o le a faataunuuina e le Malo e sili ona e tulimataʻia?

MANATU FAAOPOOPO

Iloilo po o le ā e uiga i ai Amaketo.

“O le ā le Taua o Amaketo?” (Mataupu i le jw.org)

Iloilo mea o le a tutupu a o faagasolo le vaitaimi lea na taʻua e Iesu o “le puapuaga tele.”—Mataio 24:21.

“O le ā le Puapuaga Tele?” (Mataupu i le jw.org)

Mātau le auala e mafai ai e aiga ona manatunatu i faamanuiaga o le Malo i le lumanaʻi.

Vaai iā Oe i le Parataiso (1:​50)

Faitau i le tala “E Tele Fesili na Oo Mai i Loʻu Mafaufau,” ma mātau pe na faapefea ona maua e se tagata na fouvale i le faigāmalo, tali o fesili na ia saʻilia.

“E Mafai e le Tusi Paia Ona Suia Olaga” (Le Olomatamata, Ianuari 1, 2012)