Auauna i a Ieova ma le Olioli o le Loto

“O le a maua mai lava oe e nei malaia uma . . . auā sa e lē auauna i a Ieova lou Atua ma le olioli tele, ma le olioli o le loto.”—TEUTERONOME 28:45-47, NW.

1. O le ā e faamaonia ai e faapea o i latou o auauna atu i a Ieova o loo olioli, e tusa lava po o fea o latou auauna atu ai i a te ia?

O AUAUNA a Ieova e olioli, e tusa lava pe o latou faia le finagalo o le Atua i le lagi po o le lalolagi. Na alalaga ma le olioli agelu, o “fetu o le taeao,” ina o faavaeina le lalolagi, ma e aunoa ma se masalomia le auai ma le olioli le mano o mano o agelu faalelagi i le ‘faataunuuina o le afioga a le Atua.’ (Iopu 38:4-7; Salamo 103:20) O le Alo pele e toatasi o Ieova sa avea o se “tufuga” olioli i le lagi, ma na fiafia o ia i le faia o le finagalo tau Atua, a o soifua Iesu Keriso o se tagata i le lalolagi. E faaopoopo atu i lea, “na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua.”—Faataoto 8:30, 31; Eperu 10:5-10; 12:2.

2. O le ā na iloa ai pe o le a oo atu i a Isaraelu ni faamanuiaga po o ni malaia?

² Na oo i tagata Isaraelu le olioli ina ua latou faafiafia le finagalo o le Atua. Ae faapefea pe a latou lē usiusitai i a te ia? Na lapataia i latou e faapea: “E i a te oe pea ma au fanau ia [malaia], e fai ma faailoga ma vavega e faavavau, auā sa e lē auauna i a Ieova lou Atua ma le olioli tele, ma le olioli o le loto, ona o le tele o mea uma. Ma o le a e auauna ma le fia ai, ma le fia inu, ma le lē lavalavā, ma le mativa i mea uma lava, i ē ita i a te oe e aauina mai e Ieova i a te oe; na te faaee foi le amo uamea i lou ua, seia faaumatia oe e ia.” (Teuteronome 28:45-48, NW) O faamanuiaga ma malaia na faamanino mai ai po o ai auauna a Ieova, ma o ai foi e lē o ni ana auauna. O ia foi malaia e faamautinoa mai ai, e lē faatagaina se lē faaaloalo i mataupu silisili a Ieova, e faapena foi ona lē tatau ona manatu faatauvaa i ai. Ona sa lē taulau i tagata Isaraelu ona amanaia lapataiga o le faatafunaina ma le faaaunuua, na avea foi Ierusalema “ma faafanoga i atu nuu uma o le lalolagi.” (Ieremia 26:6) Seʻi ō tatou usiusitai ia i le Atua ma olioli i lona finagalo lelei. Ua avea le olioli ma se tasi o faamanuiaga mai le Atua ua tofo i ai ē e amio Atua.

Auala e Auauna ai ma le “Olioli o le Loto”

3. O le ā le fatu faafaatusa?

³ Sa tatau i a Isaraelu ona auauna i a Ieova “ma le olioli tele, ma le olioli o le loto.” E tatau foi ona faia faapea e auauna a Ieova i aso nei. Ia olioli, o lona uiga “ia fiafia; ia faatumulia i le olioli.” E ui o loo taʻua e le Tusi Paia le upu fatu (heart) faaletino, ae e lē mafai e le fatu ona mafaufau pe fetuutuunai. (Esoto 28:30) O lana ia lava vaega autū o le pamuina o le toto e faapea ona fafaga ai sela o le tino. E ui i lea, ua tele ina faaaogā e le Tusi Paia le fatu faafaatusa (loto), e iai sona uiga e sili atu na i lo faalogona, uunaiga, ma le atamai.a E mafai foi ona faapea atu, “o le vaega pito i totonu i sona tulaga a lautele, ma o lea ua suitulaga i le tagata i totonu e pei ona faailoa mai i ana gaoioiga uma lava, i ōna faanaunauga alofa, o faalogona, o lagona, o fuafuaga, o ōna mafaufauga, o le iloa, o taumatematega, o lona atamai, o le poto, o tomai, o ōna talitonuga ma manatunatuga, o lona toe manatua o mea faatasi ai ma lona loto fuatiaifo.” (Journal of the Society of Biblical Literature and Exegesis, 1882, itulau 67) O ō tatou loto e aofia ai lagona ma faalogona, e aofia ai foi ma le olioli.—Ioane 16:22.

4. O le ā e mafai ona fesoasoani i a i tatou e auauna ai i a Ieova le Atua ma le olioli o le loto?

⁴ O le ā e mafai ona fesoasoani i a i tatou e auauna ai i a Ieova ma le olioli o le loto? O se vaaiga mautinoa ma le talisapaia o ō tatou faamanuiaga ua aumaia e le Atua, e mafai ona fesoasoani. Mo se faataitaiga, e mafai ona tatou manatunatu ma le olioli i lo tatou faaeaga o le tuuina atu o le ‘auaunaga paia’ i le Atua moni. (Luka 1:74) E fesootai lea ma le faaeaga o le tauaveina o le suafa o Ieova o ni ana Molimau. (Isaia 43:10-12) E mafai ona tatou faaopoopo atu i lea mea le olioli i le iloa e faapea, o le usitaia o le Afioga a le Atua, e faafiafiaina ai o ia. Ma maeu se faaeaga o le iloaina o le malamalama faaleagaga ma fesoasoani ai i le toatele e ō ese mai i le pogisa!—Mataio 5:14-16; faatusatusa i le 1 Peteru 2:9.

5. O le ā le puna o le olioli mai le Atua?

⁵ E ui lava i lea, o le auauna atu i a Ieova ma le fiafia o le loto, ua lē na o se mataupu lea e faatatau i le mauaina o se vaaiga mautinoa. O le mea lelei le mauaina o se vaaiga mautinoa. Peitai, o le olioli mai le Atua, e lē o se mea e maua mai ona o le faatupuina aʻe o uiga. O se fua lea o le agaga o Ieova. (Kalatia 5:22, 23) Afai e lē o i a i tatou lea olioli, atonu e manaomia ona faia ni fetuunaiga ina ia taofia ai ni manatu po o ni gaoioiga e lē tusa ma le Tusi Paia e ono faatiga ai i le agaga o le Atua. (Efeso 4:30) E ui i lea, ona o ē e tuutoina atu i a Ieova, aua neʻi i a i tatou le popolega e faapea, o le lē iai o le olioli mai le loto i nisi o taimi, o se faamaoniga lea o le lē fiafia mai i ai o le Atua. O i tatou e lē lelei atoatoa, ma e oo mai ai tiga, o faanoanoaga, ma e iai foi taimi e mafatia ai i faalogona ootia, ae ua malamalama lelei Ieova i a i tatou. (Salamo 103:10-14) Seʻi ō tatou tatalo atu ia i lona agaga paia, ma ia manatua o le fua o le agaga o le olioli e foaiina mai lea e le Atua. O le a tali mai lo tatou Tama faalelagi i nei tatalo ma o le a mafai ai ona tatou auauna i a te ia ma le olioli o le loto.—Luka 11:13.

Pe a Lē o Iai le Olioli

6. Afai e lē o iai le olioli i la tatou auaunaga i le Atua, o le ā e ao ona tatou faia?

⁶ Afai e lē o iai le olioli i la tatou auaunaga, atonu o le a iu ina tatou faavaivai i la tatou auaunaga i a Ieova po o le oo atu foi ina lē faamaoni i a te ia. O lea la, o se mea poto ona iloiloina i le tatalo ma le loto maulalo la tatou vaaiga, ma faia fetuunaiga e manaomia. Ina ia maua le olioli e foaiina mai e le Atua, e ao ona tatou auauna i a Ieova e faagaeetia mai i le alofa, ma ia faia ma ō tatou loto atoa, agaga atoa, ma le mafaufau atoa. (Mataio 22:37) E lē tatau ona tatou auauna ma se uiga faatavā, auā na tusi Paulo e faapea: “Afai ua tatou ola i le agaga, ia tatou savavali foi i le agaga. Aua neʻi avea i tatou ma ē mitamita vale, aua neʻi feluiai, aua neʻi felosiai.” (Kalatia 5:25, 26) O le a tatou lē maua le olioli moni pe afai tatou te auauna ona tatou te mananao e fiasili atu i lo isi po o le fia viia foi.

7. E faapefea ona toe faatupuina le olioli i ō tatou loto?

⁷ O loo iai le olioli i le faataunuuina o lo tatou tuuina atu i a Ieova. Ina ua faatoʻā uma lava ona tatou tuuina atu i le Atua, sa tatou uai atu ai ma le maelega i le auala o le olaga faa-Kerisiano. Na tatou suesueina le Tusi Paia ma faia se vaega e lē aunoa i sauniga. (Eperu 10:24, 25) Na faaooina mai ai i a i tatou le olioli e auai i le faiva. Peitai, e faapefea pe afai ua faaitiitia lo tatou olioli? O suesuega i le Tusi Paia, auai i sauniga, auai i le faiva—e mautinoa o le aafia atoatoa i vala uma o le faa-Kerisiano—e tatau ona faamautuina ai faaleagaga ō tatou olaga ma toe faaolaola ai le alofa lea na iai muamua i ō tatou loto. (Faaaliga 2:4) Ona tatou lē pei ai lea o isi e lē o iai se olioli ma e masani ona latou manaomia le fesoasoani faaleagaga. E fiafia toeaina e fesoasoani, ae e tatau lava i a i tatou taitoatasi ona faataunuu lo tatou tuuina atu i le Atua. E lē faia e se isi tagata lea mea mo i tatou. O lea, seʻi faia ia ma ō tatou sini le mulimuli atu i le faasologa ua masani ai le Kerisiano ina ia faataunuuina ai lo tatou tuuina atu i a Ieova ma maua ai le olioli moni.

8. Aisea e tāua ai le iai o se loto fuatiaifo e lelei pe afai tatou te mananao e maua le olioli?

⁸ Ina ia tatou maua le olioli o le fua lea o le agaga paia o le Atua, e manaomia ona i a i tatou se loto fuatiaifo e lelei. Na puapuagatia le tupu o Tavita i le vaitaimi atoa na taumafai ai o ia e faalilo lana agasala. O le mea moni, o le suavai na faasūsūina ai lona tino na foliga mai na mago, ma atonu na maʻi ai o ia faaletino. Maeu se mapusaga na oo i a te ia ina ua ia salamō ma taʻutino lana mea sese! (Salamo 32:1-5) E lē mafai ona tatou faaalia le olioli pe afai o tatou natia ni agasala matuiā. Atonu e faapogaia ai e lena mea ona tatou ola i se olaga e pagatia. E mautinoa lava e lē o le auala lena e maua ai le olioli. Ae o le faailoa atu ma salamō, e maua ai le mapusaga ma toe faafoisia ai se agaga olioli.—Faataoto 28:13.

Faatalitali ma le Olioli

9, 10. (a) O le ā le folafolaga na maua e Aperaamo, ae na faapefea ona tofotofoina lona faatuatua ma lona olioli? (e) E faapefea ona aogā i a i tatou faaaoaoga a Aperaamo, o Isaako, ma Iakopo?

⁹ Tatou te maua le olioli pe a faatoʻā aʻoaʻoina e faatatau i le fuafuaga a le Atua ae i le isi itu, e manaomia ona tatou faatumauina le olioli a o mavae atu le tele o tausaga. E mafai ona faataitaia lenei tulaga i le mea na tupu i le tagata faamaoni o Aperaamo. Ina ua uma ona ia taumafai e osi faataulaga lona atalii o Isaako i le faatonuga a le Atua, ona faaooina atu ai loa lea e le agelu i a te ia le feau lenei: “O loo faapea a Ieova, Ua ou tauto aʻu ia te au; ua e faia lava lenei mea, ua e le taofia lou atalii, o lou atalii e toatasi; o le mea lea ou te matuā faamanuia ai ia te oe, ma ou matuā faatoateleina lava lau fanau e pei o fetu o le lagi, e pei o le oneone foi o le matafaga; e maua foi e lau fanau faitotoa o e ita ia i latou; o lau fanau foi e manuia ai atu nuu uma lava o le lalolagi; auā ua e usiusitai i laʻu upu.” (Kenese 22:15-18) E mautinoa lava sa tumu Aperaamo i le olioli i lenei folafolaga.

¹⁰ Atonu sa faatalitalia e Aperaamo o Isaako o le a avea o le “fanau,” o lē o le a ala mai ai faamanuiaga ua folafolaina mai. Peitai, a o mavae atu le tele o tausaga e lē o faataunuuina lava se mea mataina e ala mai i a Isaako, atonu na tofotofoina ai le olioli o Aperaamo ma lona aiga. O le faamautinoaga a le Atua i le folafolaga i a Isaako ma mulimuli ane i lona atalii o Iakopo, na faamautinoa atu ai i a i latou e faapea, o le oo mai o le Fanau, o loo faasino pea i le lumanai, ma na fesoasoani lenei mea i a i latou e faatumauina ai lo latou faatuatua ma le olioli. E ui i lea, na maliliu ia Aperaamo, o Isaako, ma Iakopo a o leʻi vaai i le faataunuuina o le folafolaga a le Atua i a i latou, ae sa leʻi avea i latou ma ni auauna a Ieova sa leai so latou olioli. (Eperu 11:13) E mafai foi ona tatou auauna pea i a Ieova i le faatuatua ma le olioli a o faatalitali atu i le faataunuuina o ana folafolaga.

Olioli e Ui Lava i Sauaga

11. Aisea e mafai ai ona tatou olioli e ui i sauaga?

¹¹ Ona o ni auauna a Ieova, e mafai ona tatou auauna i a Ieova ma le olioli o le loto, e ui lava ina puapuagatia i tatou i sauaga. Na folafola mai e Iesu e faapea, ia fiafia i latou e sauaina ona o lona igoa, ma na faapea mai le aposetolo o Peteru: “E faapei ona tofusia o outou faatasi i tiga o Keriso, ia outou olioli ai, ina ia fiafia outou ma le olioli tele pe a faaalia mai lona mamalu. Afai e upuleagaina outou ona o le suafa o Keriso, amuia outou; auā o loo tumau ia te outou le agaga o le mamalu, o le agaga o le Atua.” (1 Peteru 4:13, 14; Mataio 5:11, 12) Afai o loo e onosaia sauaga ma puapuaga ona o le tausisia o le amiotonu, ua i a te oe la le agaga o Ieova ma ua fiafia mai lona finagalo i a te oe, ma e mautinoa lava le faatupuina ai i lea o le olioli.

12. (a) Aisea e mafai ai ona tatou feagai ma tofotofoga o le faatuatua ma le olioli? (e) O le ā se lesona autū e mafai ona tatou aʻoaʻoina mai le mea na tupu i se tasi tagata sa Levī na faaaunuua?

¹² E mafai ona tatou feagai ma tofotofoga o le faatuatua faatasi ai ma le olioli, ona o le Atua lo tatou Sulufaiga. Ua faamautinoa mai lenei mea i le Salamo 42 ma le 43. Na faaaunuua se tasi o sa Levī ona o nisi o mafuaaga. Na matuā misia e ia le tapuaiga i le Atua i le malumalu, na lagona ai e ia le fia inu e pei o le naunau o le ʻaila i le fia maua o le vai i le laueleele naumati. Na ia “naunau” mo Ieova, ma le faaeaga o le auauna atu i le Atua i Lona malumalu. (Salamo 42:1, 2) O lena faaaunuuaina e ao ona uunaia ai i tatou e faaalia le agaga talisapaia o le aufaatasiga o tatou aeae ai ma tagata o Ieova. Pe afai e tulai mai se tulaga ua faaesea ai i tatou mo se taimi lē tumau ona o sauaga, seʻi ō tatou toe manatunatu i le olioli sa i a i tatou i le auauna faatasi i le auaunaga paia, ma tatalo ia maua le onosai a o tatou “faamoemoe i le Atua” na te toe faafoisia i tatou i a tatou galuega e pei ona masani ai ma ona tagata tapuai.—Salamo 42:4, 5, 11; 43:3-5.

“Auauna atu i a Ieova ma le Olioli”

13. Ua faapefea ona faaalia i le Salamo 100:1, 2 e ao ona avea le olioli ma vaega o la tatou auaunaga i le Atua?

¹³ E ao ona avea le olioli ma vaega o la tatou auaunaga i le Atua. Na faaalia mai lenei mea i pese faafetai na usuina e le fai salamo e faapea: “Ia alalaga i le manumalo i a Ieova le lalolagi uma. Ia outou auauna atu i a Ieova ma le olioli. Ō mai ia outou i ōna luma ma le alaga fiafia.” (Salamo 100:1, 2, NW) O Ieova o le ‘Atua fiafia,’ ma e finagalo o ia ina ia maua e ana auauna le olioli i le faatinoina o lo latou tuuina atu i a te ia. (1 Timoteo 1:11) E tatau i tagata o atunuu uma lava ona alalaga atu i a Ieova, ma o la tatou alaga atu mo le viiga e tatau ona matuā malosi atu, e pei o se ‘alaga manumalo’ a se autau. Talu ai ona o le auaunaga i le Atua e maua mai ai le faafouina, e ao foi la ona iai faatasi ma le olioli. O lea, na faalaeiau atu ai le faisalamo i tagata ina ia ō atu i luma o le Atua ma le “alaga fiafia.”

14, 15. Ua faatatauina faapefea le Salamo 100:3-5 i tagata olioli o Ieova i aso nei?

¹⁴ Na faaopoopo mai faapea le faisalamo: “Ia outou iloa o Ieova o ia lava le Atua; o ia na faia i tatou, ua fai i tatou mona; o lona nuu i tatou, o le lafu mamoe ua ia fagaina.” (Salamo 100:3) Talu ai o Ieova o Lē na Foafoaina i tatou, o ia e ana i tatou, e pei o le leoleo mamoe ma ana mamoe. Ua lasi le tausiga a le Atua i a i tatou ua tatou vivii atu ai i a te ia ma le faafetai tele. (Salamo 23) Na pese foi le faisalamo e uiga i a Ieova e faapea: “Ia outou ulu atu i ona faitotoa ma le viiga, ma ona lotoā ma le pese; ia outou vivii atu ia te ia, ia outou faamanu atu i lona suafa. Auā e lelei Ieova; e faavavau lava lona alofa; e oo atu lava lona faamaoni i lea tupulaga ma lea tupulaga.”—Salamo 100:4, 5.

¹⁵ I aso nei, o tagata olioli mai nuu uma lava o loo ulufale atu i lotoā o le malumalu o Ieova e tuuina atu le faafetai ma le viiga. Tatou te faamanū ma le olioli i le suafa o le Atua e ala i lo tatou taʻua o ni mea lelei e uiga i a Ieova, ma o ōna uiga silisili e uunaia ai i tatou e vivii atu i a te ia. E lelei pea o ia, ma o lona agalelei po o lona alofa naunau i ana auauna e mafai ona faatuatua i ai i taimi uma lava, auā e faatumauina e faavavau. E faamaoni Ieova i le faaalia o le alofa mai lea “tupulaga ma lea tupulaga” i a i latou o faia lona finagalo. (Roma 8:38, 39) E mautinoa lava la, ua iai i a i tatou mafuaaga lelei e “auauna atu [ai] i a Ieova ma le olioli.”

Olioli i Lou Faamoemoe

16. O ā faamoemoega ma le lumanai e mafai ona olioli ai Kerisiano?

¹⁶ Na tusi Paulo e faapea: “Ia olioli i le faamoemoe.” (Roma 12:12) Ua olioli soo faauuina o Iesu Keriso i le faamoemoe pupula i le ola faalelagi e lē toe oo lava i ai le oti ua faaavanoaina e le Atua mo i latou e ala mai i lona Alo. (Roma 8:16, 17; Filipi 3:20, 21) O Kerisiano e iai le faamoemoe e ola e faavavau i le Parataiso i le lalolagi, ua iai foi se faavae e olioli ai. (Luka 23:43) Ua iai i auauna faamaoni uma a Ieova mafuaaga e olioli ai i le faamoemoe i le Malo, auā a lē o le avea o i latou ma vaega o lena malo faalelagi, ia po o le ola i lalo o lana pulega faalelalolagi. Maeu se faamanuiaga e olioli ai!—Mataio 6:9, 10; Roma 8:18-21.

17, 18. (a) O le ā na valoiaina mai i le Isaia 25:6-8? (e) Ua faapefea ona faataunuu lenei valoaga a Isaia i le taimi nei, ma e faapefea lona faataunuuga i le lumanai?

¹⁷ Na valoia foi e Isaia se lumanai olioli mo tagata usiusitai. Na tusi mai o ia e faapea: “E faia e Ieova o ʻau i lenei mauga mo nuu uma le faigaai o mea lelei, o le tausamiga o uaina ua tuu ai ʻalu; o mea e silisili ona lelei, o uaina ua faamaninoina sa tuu ai ʻalu. E faaumatia foi e ia i lenei mauga le ie ufiufi, o loo ufitia aʻi nuu uma, ma le ufiufi ua ufitia aʻi nuu ese uma lava. E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.”—Isaia 25:6-8.

¹⁸ O le tausamaaga faaleagaga o tatou aai ai i aso nei o ni ē tapuai i a Ieova, o se tausamaaga moni lava e olioli ai. O le mea moni e fau ma soloi lo tatou olioli a o tatou auauna atu ma le maelega i le Atua a o faatalitalia le faigaʻai o mea lelei moni ua ia folafolaina mai mo le lalolagi fou. (2 Peteru 3:13) E faavae i le taulaga togiola a Iesu, o le a aveesea ai e Ieova le “ie ufiufi” o ufitia ai tagata ona o le agasala a Atamu. Maeu le olioli o le vaai atu ua aveesea le agasala ma le oti! Maeu le fiafia e iai i le faafeiloaia o ē pele ua toe faatutuina mai, le matauina ua lē toe iai ni loimata maligi, ma ola i le parataiso i le lalolagi, i le mea o le a lē toe faalumaina ai tagata o le Atua ae o le a avatu i le Atua se tali i le faifai sili, o Satani le Tiapolo!—Faataoto 27:11.

19. E ao faapefea ona tatou tali atu i mea lelei ua faatutu mai e Ieova mo i tatou o ana Molimau?

¹⁹ Pe ua lē faatumulia ea oe i le olioli ma le agaga faafetai i le iloaina o mea o le a faia e Ieova mo ana auauna? E mautinoa lava, o faamoemoega sili faapena e fesoasoani atu i lo tatou olioli! E faaopoopo atu i ai, o lo tatou faamoemoe faamanuiaina ua tatou vaavaai atu ai i lo tatou Atua fiafia, e alofa, ma e agalelei, ma o le a tatou lagona ai faapenei: “Faauta, o lo tatou Atua lenei; sa tatou faatalitali ia te ia, ua ia faaolaina foi i tatou; o Ieova lava lenei, sa tatou faatalitali ia te ia; tatou te fiafia ma olioli i lana faaolataga.” (Isaia 25:9) A o faamausaliina lo tatou faamoemoe matagofie i ō tatou mafaufau, seʻi ō tatou tuuina atu ma le atoatoa ā tatou taumafaiga e auauna atu ai i a Ieova ma le olioli o le loto.

[Faaopoopoga i lalo]

O le a Faapefea ona E Tali?

◻ E mafai faapefea ona tatou auauna i a Ieova ma le “olioli o le loto”?

◻ O le ā e mafai ona tatou faia pe afai ua lē o iai le olioli i la tatou auaunaga i le Atua?

◻ Aisea ua mafai ai ona iai i tagata o Ieova le olioli e ui i sauaga?

◻ O ā mafuaaga ua i a i tatou e mafai ai ona olioli i lo tatou faamoemoe?

[Ata i le itulau 17]

O le auai i vala uma o le olaga faa-Kerisiano o le a faateleina ai lo tatou olioli