O Tatalo a Ai e Talia?

“E TELE mea e galueaiina e ala i le tatalo na i lo mea o loo moemiti i ai le lalolagi.” O lea na fai mai ai le tusi solo Egelani o le 19 senituri o Alfred Tennyson. Ae o le toatele lava na tatalo mo le soifua maloloina, fiafia, filemu, ma le tulaga olaola, sa ʻai a le matagi. O le mea moni, ua lagona e nisi faapea e lē o faafofoga moni mai le Atua i tatalo. Peitai, ua taʻua o ia e le Tusi Paia o le “Faafofoga Tatalo.”—Salamo 65:2.

Ua mafai e lenei mea ona faapogaia oe e fesili: ‘O ai lenei “Faafofoga Tatalo”? Pe tatau ona tatou ausia ni manaoga faapitoa ina ia mafai ai ona faafofogaina a tatou tatalo? E ao faapefea ona tatou tatalo? Ma o tatalo a ai e talia?’

Na Faafofogaina a Latou Tatalo

O le tatalo ua tusa lona leva ma le leva o le fanau a tagata. Manatu ia Apelu, o se atalii o o tatou uluai mātua, o Atamu ma Eva. Ina ua ofoina atu se taulaga e talia e le Atua, e lē taumate sa ō faatasi ma ni upu o le olega ma le viiga.—Kenese 4:1-5.

I lona iva o senituri a o leʻi oo i o tatou aso (T.A.), o le perofeta a le Atua o Iona na ‘tatalo ia Ieova lona Atua mai le manava o le iʻa’ lena na tofia e foloina o ia. Pe sa uigā lena tatalo? Ioe, auā “ua fetalai atu Ieova i le iʻa, ona luai lea e ia o Iona i le eleele matutu.” Ona agaʻi atu lea o Iona ina ia faataunuuina lona tofiga mai le Atua ina ia alu i Nineva.—Iona 1:17; 2:1, 10; 3:1-5.

Ina ua siosiomia Tavita o Isaraelu anamua e ona fili, na ia alaga atu: “Ieova e, ia e faafofoga mai i laʻu tatalo; ia liliu mai ou fofoga i laʻu aioi atu; ia e tali mai ia te au i lou faamaoni ma lau amiotonu.” (Salamo 143:1) Sa talia tatalo a Tavita mo le faasaoina, ona sa lē mafai e ona fili ona manuia i a latou taumafaiga e aveesea o ia. O le mea lea sa mafai ai ona ia faapea atu: “E latalata mai Ieova ia i latou uma o e valaau ia te ia, o i latou uma o e valaau ia te ia ma le faamaoni.”—Salamo 145:18.

Faafetaiaia Manaoga Autū

O lea, e manino lava, sa talia tatalo a auauna a le Atua i aso anamua. O le mea moni, latou te leʻi tatalo i le na o se auala talafeagai i se Atua e leai se igoa. Sa latou tatalo i le faatuatua ia Ieova, “le Silisili ese i le lalolagi uma.” (Salamo 83:18) Mo a tatou tatalo ina ia uigā, o lea o ā manaoga sili e tatau ona tatou faafetaiaia?

Ia tatalo tau lava o Ieova. E lē aogā—o le mea moni, e lē faale-Tusi Paia—le tatalo i atua sese, o ē o o latou tupua e leai ni ola e lē tautala o o latou gutu, e tutuli o latou taliga, e lē mafai ona lagona e o latou lima, e lē savavali o latou vae, ma e leai ni leo i o latou faai. (Salamo 115:5-7; 1 Ioane 5:21) O Ieova, e lē pei o na atua e leai se aogā, ae na te gaoioi e fai ma sui o i latou o ē alolofa ma auauna ia te ia. Mo se faataʻitaʻiga, i senituri ua mavae na aioi atu ai perofeta a le atua pepelo o Paala ia te ia ina ia aumai se afi mai le lagi. Ae ui i lea, na latou tatalo mai le taeao seia oo i le po, ae leʻi mafai ona tali mai Paala. Ona aioi atu lea o Elia ia Ieova, o lē na tali mai i le auina mai o le afi lena na matuā faaumatia ai le taulaga na ofoina atu i luga o se fata faitaulaga.—1 Tupu, mataupu 18.

Ia faalatalata atu i le Atua e ala atu ia Iesu Keriso. Na auina mai e Ieova le Atua lona Alo e toatasi, o Iesu Keriso, i le lalolagi ina ia faia ai le togiola e togiolaina ai le fanau a tagata mai le agasala ma le oti. (Ioane 3:16, 36; Roma 5:12; 6:23) I lea, mo i latou ua faaavanoaina i latou lava mo lenei sauniuniga, na tatalaina ai e le Atua se auala fou e faalatalata atu ai ia te ia i le tatalo. O na auauna anamua a le Atua sa tatalo tuusaʻo atu ia Ieova e pei o le faisalamo o Tavita. (Salamo 4:1; 17:1; 55:1; 102:1) Ae o le auala fou e faalatalata atu ai sa auala ia Iesu, o lē na fetalai: “E le alu atu lava se tasi i le Tamā, pe a le ui mai ia te au. Afai tou te ole atu i se mea i loʻu igoa, ou te faia lava.” (Ioane 14:6, 14) E leai se mea o i Tusitusiga Paia o fai mai ai faapea e ao i tatalo ona fai agaʻi atu i le Atua e ala i so o se isi lava.

O lea, o le taimi lava tatou te aʻoaʻoina ai faapea e ao ona tatou tatalo atu i le Atua i le suafa o Iesu, o le a lē mafai ona talia a tatou tatalo seʻi vagana ua tatou tatalo atu tau lava o Ieova e ala i lona Alo. Ae e iai foi isi mafuaaga ua lē talia ai e Ieova le tele o tatalo.

Le Pogai e Lē Tali mai ai le Atua

O le a lē tali mai le Atua i a tatou tatalo i le na ona faapea ua tatou tausia se tulaga faapitoa a o tatalo. E lē o manaomia i Tusitusiga Paia faapea ia tatou tatalo i le na o se tulaga faapitoa e faatulaga ai o tatou tino. O le mea moni, o le tootuli e mafai ona faaalia ai le lotomaulalo i luma o le Atua. Ae e talia foi pe a tatalo a o tu, nofo i se laulau, malōlō i luga o le moega, po o le fealuai foi i le faia o galuega masani. (Tanielu 6:10, 11; Mareko 11:25) Ioe, e talia e Ieova e oo lava i tatalo e lē leoa! A o leʻi taʻuina atu i le tupu Peresia faapea sa manao o ia ina ia toe fausia pa o Ierusalema na faaleagaina, o Neemia, sa “tatalo atu i le Atua o le lagi,” ma le lē leoa ma na tali mai Ieova i lena tatalo. (Neemia 2:1-6) O lea afai o le tulaga o lou tino e lē o le mea tāua lea, aiseā ua lē talia ai e le Atua le tele o tatalo?

E lē fiafia Ieova i le tatalo a ē amio leaga. Ioe, “o lē ua liliuese ona taliga a e le faalogologo i le tulafono, e inosia lava lana tatalo.” (Faataoto 28:9) E ala i le perofeta o Isaia, na taʻu atu ai e le Atua i Ona tagata liliuese: “A outou faaloaloa mai o outou lima, e ʻalo ese oʻu mata ia te outou; e ui lava ina outou faateleina tatalo, ou te le faalogo ai lava; ua tutumu o outou lima i le toto.” (Isaia 1:15) E masani lava, o tatalo a ē amio leaga e lē talia e tusa lava pe fai agaʻi atu i le Atua e auala ia Keriso.

E lē talia e le Atua tatalo ma le faafiaamiotonu. “A outou tatalo,” na fetalai ai Iesu Keriso, “aua neʻi e pei o tagata faafiaamiotonu; auā ua latou fia tutu ma tatalo i sunako ma fetaulaigaala, ina ia iloa i latou e tagata. E moni, ou te fai atu ia te outou, ua maua e i latou lo latou taui.” Ua faaopoopo atu Iesu: “A o oe, pe a e tatalo, ina ulu atu ia i lou afeafe, ma pupuni i lona puipui, i le e tatalo ai i lou Tamā o i le mea lilo; O lou Tamā foi o lē silasila i le mea lilo, na te avatua faaaliali se taui ia te oe.” (Mataio 6:5, 6, NW) E ala i lona fetalai atu o lenei mea, sa leʻi faasaina ai foi e Iesu tatalo uma e faia i le tulaga lautele, auā o ia lava foi sa tatalo ma le leotele i luma o isi. (Mataio 14:19) Ae sa faaalia ai e Keriso i lenei mea faapea o se mea sese le tatalo i na o luma o le lautele ina ia vaaia ma faalogoina mai e isi ma maua ai lo latou viiga.

E lē talia e Ieova tatalo lē faamaoni, e tautū i upu. Na fetalai Iesu: “A outou tatalo, aua neʻi tāutu i a outou upu, e pei o nuu ese; auā fa te i latou, o le tele o a latou upu e talia ai i latou. O lenei, aua neʻi outou faapei o i latou; auā ua silafia e lo outou Tamā mea ua outou matitiva ai, a o lei ole atu outou ia te ia.” (Mataio 6:7, 8) O le toatele o tagata i atunuu i Sasae ua manatu faapea o taimi taitasi latou te faataavili ai le uili o tatalo (o se paelo ua tuu i ai i totonu tatalo ua uma ona tusia), o le a toe fai ai le olega. E faitau miliona isi o faaaogāina losalio po o le sii mai o tatalo mai tusi tatalo. Peitai o i latou e mananao ina ia faafofogaina e le Atua, o le a alo ese mai le tautū i upu o a latou tatalo ma o le a uaʻi atu atili i faatonuga a Iesu.

ʻIa Faapenei ona Tatalo’

Na sosoo ai ma le tuuina mai e Iesu o le mea ua taʻua nei e le toatele o le tatalo faaaʻoaʻo. (Mataio 6:9-13, NW) Na fetalai o ia: “O lenei, ia faapea outou ona tatalo: ‘Lo matou Tamā e, o i le lagi, ia paia lou suafa.’” O le taʻua o le Atua o “lo matou Tamā” ua faaalia ai faapea o isi foi e iai se faiā valalata ma ia e avea o se vaega o lona aiga o tagata tapuai. O le faapaiaina o le suafa o le Atua, o Ieova, o se mea aupito sili ona tāua, ae o le a faapefea ona ia faapaiaina? E ala i le aveesea o ē amio leaga, o le a ia faamamāina lena suafa mai faifaiga uma lava ua faafaupuʻe atu i ai.—Esekielu 38:23.

“Ia oo mai lou malo. Ia faia lou finagalo i le lalolagi, e pei ona faia i le lagi,” na faaopoopo ai Iesu. O le pulega a le Atua e pei ona faamamafaina i le Malo faa-Mesia faalelagi o lona Alo ua lē o pine ae oo mai faasaga i ē uma lava o tetee i le pulega i le silisili ese tauatua, i le aveesea o i latou mai le fogaeleele. (Tanielu 2:44) Ae o le ā le uiga pe a tatou faapea atu ia faia le finagalo o le Atua i luga o le lalolagi e pei ona faia i le lagi? O lenei mea o le olega lea o manao faapea ia faia e Ieova lana fuafuaga agaʻi i le lalolagi, e aofia ai ma le aveesea o ē tetee ia te ia.—Faaaliga 16:14-16; 19:11-21.

I le tuuina faamuamua o le Atua, le faapaiaina o Ia, ma ana fuafuaga i le tatalo faaaʻoaʻo, ua faaauau ai Iesu: “Ia e foai mai ia te i matou i le aso nei a matou meaʻai e tatau ma le aso.” I le fesili atu ia Ieova ina ia saunia mea manaomia “e tatau ma le aso” ua siitia ai le faatuatua i lona tomai e tausia ai mo manaoga e lē aunoa o ona tagata tapuai. E lē o se molimanao manatu faapito lenei mo ni sauniuniga se tele.

Na faaopoopo atu Iesu: “Ia e faamagalo mai ia te i matou i mea ua matou leaga ai, e pei ona matou faamagalo atu i e ua agaleaga mai ia te i matou.” (Luka 11:4 ua faaalia ai faapea o nei ‘mea leaga’ o “agasala.”) E mafai ona tatou maua le faamagaloga mai le Atua i le na o la tatou faamagaloina atu o i latou ua agasala mai faasaga ia i tatou. (Mataio 6:14, 15) O lea ua fetaui ai lava le faapea mai o le aposetolo o Paulo: “E faapei ona faamagalo mai Ieova ia te outou, ia faapea foi outou.”—Kolose 3:13, NW.

I le faaiʻuga o le tatalo faaaʻoaʻo, na fetalai ai Iesu: “Aua foi e te taʻitaʻiina i matou i le tofotofoga; a ia e laveai ia i matou ai le leaga.” E lē tofotofoina e Ieova tagata “i mea leaga.” (Iakopo 1:13) O le tofotofoga e sau mai lē o leaga, o Satani le Tiapolo, ae ua faapea mai le Tusi Paia i nisi taimi o le faatagaina e le Atua o na mea e iʻu ai i lona faia o ia mea. (Ruta 1:20, 21; Failauga 7:13) I le tali atu i le talosaga, “Aua foi e te taʻitaʻiina i matou i le tofotofoga,” e lē tuulafoaia e Ieova ana auauna faatuatua, o lea ua ia faatagaina ai i latou ina ia tofotofoina. O le mea moni, “ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.”—1 Korinito 10:13.

Pe a tatou talosaga atu mo le faasaoina mai lē o loo leaga, ua tatou fesili atu ai faapea ia lē faatagaina le Tiapolo e manumalo ia i tatou i le avea o tagata tapuai faatuatua a Ieova. Afai o i tatou o ni auauna faamaoni a le Atua, e mafai ona tatou mautinoa faapea o le a tali mai o ia i na olega, talu ai na tusi le aposetolo o Peteru: “Ua silafia e Ieova se mea e laveai mai ai ē tuutoina i le Atua ai le faaosoosoga.” (2 Peteru 2:9, NW) Ma maeu le tāua o lenei vaega o le tatalo faaaʻoaʻo, auā o Satani le Tiapolo “o loo fealualuai o ia e pei o se leona tagi, ua saili se tasi e ʻaina e ia”!—1 Peteru 5:8.

Le Pogai ua Talia ai a Latou Tatalo

E talia e le Atua tatalo a ona tagata tapuai faatuatua. Aiseā? I se vaega, ua faia faapea e Ieova auā ua na o ia lava o loo latou tatalo atu i ai, ua latou faalatalata atu ai e ala i a Iesu Keriso. Ua latou teena le amio leaga ma ʻaloese mai le faafiaamiotonu ma le tautū i tatalo. Na i lo o le tautū i le tatalo faaaʻoaʻo e ala i le taulotoina, ua faaaogā ai e Molimau a Ieova lana taʻiala mataʻina i le faaalia o o latou faalogona mai le loto agaʻi i le Atua. Peitai e iai foi isi mafuaaga ua talia ai a latou tatalo.

O i latou ua taliina a latou tatalo sa fetaiai ma ni manaoga autū. I le taʻua o lenei mea, na tusi ai Paulo: “Auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.” (Eperu 11:6) Matau nei manatu autū e lua: O Ieova e talia tatalo (1) a i latou o ē talitonu faapea o loo soifua pea le Atua, ma (2) a i latou o ē “matuā saili ia te ia.”

O se tasi o na tagata o le uluai senituri sa o le tagata o Nuu Ese aʻiaʻi o Konelio. Sa talitonu o ia faapea o loo soifua le Atua, ma sa matuā saili o ia ia te ia. O le ā na faia e Konelio ina ua ia mauaina le poto saʻo? Ioe, sa tuuina atu ma le loto atoatoa o ia e ia lava ia Ieova le Atua ma sa papatisoina o ia e faaatagia ai lona tuuina atu. Ina ua mavae lea, sa manino mai lava le iai o se faiā vavalalata a Konelio ma le Atua, ma i lenei mea o le a oo ai ni āuga mautinoa i ana tatalo.—Galuega 10:1-44.

A o leʻi papatisoina Konelio, sa ‘o aʻe e fai ma faamanatuga i luma o le Atua,’ ana tatalo. (Galuega 10:4) Ae peitai, e ala i le faia o se tuuina atu i le Atua i se faavae o lona talitonuga i le taulaga togiola a Iesu, ma i le papatisoina, na tuuina atu ai ma le lē taofiofia e Konelio ia lava ia Ieova. Ua faataatia ai e lenei mea se faavae ofoofogia vavalalata i le va o le Atua ma lenei tagata aʻiaʻi—se faiā na tuuina atu ai ma le lē mataofiofia ia Konelio se faaeaga o le tatalo. (Iakopo 4:8) Sa mafai ona ia faalatalata atu i lona Tamā faalelagi e ala ia Keriso Iesu faatasi ai ma le faatalitalia faapea o le a faafofogaina o ia. O le mea lena ua tupu ia i latou uma lava o ē ua tuuina atu i latou i le Atua e ala ia Keriso ma papatisoina. Ua maua ai foi e i latou se faaeaga lē mataofiofia o le tatalo.

E moni, e te faanaunau ina ia taliina au tatalo. O le mea lea, afai e te lē o auauna nei ia Ieova e avea o se tasi o ona tagata tapuai tuuina atu, maeu le poto o le sailia o ia ma le naunautai! Tuliloa se auala e pei o lena na faia e Konelio, ma o le a tali mai le Atua i au tatalo.

[Ata i le itulau 6]

Na faapefea i tatalo a Konelio ona aafia ai i lona tuuina atu i le Atua ma lona papatisoga?