Lou Faamoemoe o le Atua po o ʻOa?

“Mo le tele o tausaga, sa nofo ai ma le mataʻu i totonu o lona fale matagofie na siomia e se pa filifili ma faamauina i ni faitotoa uamea se lua e lokaina.”

E FAAPENA ona faamatalaina e se lipoti le fafine mauʻoa ua oti lana tane na fasiotia e ni tagata faomea o e na gaoia maa taua ma le $1 miliona mai lona fale. Ina ua maua lona tino maliu, sa faaaogaina e leoleo se taavale toso e aveesea ai le $5 miliona o tupe mai lona fale. Na mau foi e leoleo le faitau afe o “mea alofa o aso fanau” ua faapipii ai pepa faatuatusi “Mo Iesu Keriso” ma “Mo le Atua.”

O lenei fafine maumea e foliga mai sa leai lava ni ana uo, ma sa ola o ia ma le mataʻu e le aunoa. Fesili ifo ia te oe, O le a tonu le tautele o ana miliona na ia matua faatauaina? A e le gata i lea, na faapefea ona ia mauʻoa i le Atua? Ua e mautinoa lava e le mafai ona faatauina le Atua i “mea alofa o aso fanau,” e le mafai foi ona maua le filemu mai le Atua e ala i le tele o le ʻoa. E mafai ona vaaia o lena mai faatonuga a le Tusi Paia faaapea e ‘aua le faatuatua i oloa e faaletumau, a o le Atua, o le foai tele mai ia i tatou mea uma lava e faafiafia ai.’—1 Timoteo 6:17.

Ai se a e faaletumau a i ʻoa? Ia, atonu ua e iloa le moni o upu a Iesu: “Aua tou te toloʻaʻi oa mo outou i le lalolagi, o i ai le mogamoga ma le ele e faaumatia ia; o i ai foi tagata gaoi e eli atu, ma gaoi ai.” (Mataio 6:19) E pei ona e iloa, o loo i ai pea le mataʻutia o le afi e faaumatia ai se fale. O nisi e teu a latou ʻoa i fale tupe, a e pe ua le gaoia ea e faomea mai i ina? E oo lava i se taavale fou e mafai ona eleā.

A e faapefea le tamaoaiga o se malo? I le tele o nuu o le siitia o le tau o mea ua pei se gaoi; na te faaitiitia le tamaoaiga o se tagata. Ina ua aafia Siamani i le siitaga maoae o le tau o le soifuaga i le tauamataga o le 1920, sa manaomia ai e tagata faatau ni ato tupe . . . e faatau ai mea ʻai . . . O le tau o mea i Siamani sa faateleina i le sili atu i le tiliona pasene mai ia Aukuso 1922 e oo mai ia Novema 1923.” (The World Book Encyclopedia) Paga se le fiafia e maua i le faalagolago i tupe!

Sa lapatai mai ma le poto Iesu: “A ia outou toloʻaʻi oa mo outou i le lagi, e le o i ai se mogamoga, po o se ele e faaumatia ai; e le o i ai foi se tagata eli atu, ma gaoi ai.” (Mataio 6:20) O a nei “oa”? Latou te faasino ia tatou faamaumauga taitoatasi o galue ga lelei, lo tatou mauʻoa i le Atua. ‘O le a,’ atonu o le a e fesili ai, ‘e manaomia mai ia te aʻu?’ I se tulaga, ua tali mai le Tusi Paia faapea o lona uiga “ina ia latou agalelei atu ia tamaoaiga i galuega lelei, ia mataalofa, ia latou avatu fua a latou mea.”—1 Timoteo 6:18.

I le lalolagi aoao o aso nei, e i ai le faitau miliona o Molimau a Ieova o e ua mafai ona latou taʻutino mai le faamaoni faapea o le fetufaʻi o mea faaletino ma mea faaleagaga ma isi—a e maise lava le fesoasoani atu i tagata ia aʻoaʻo e uiga le faamoemoe o le Malo e ala i le auai i le galuega talai, aʻoaʻo atu, ma le galuega o le faia o soo—o ni galuega lelei ia ua i ai le faamaoniga a Ieova ma e aumaia ai le loto malie moni. E oo lava i le oti na te le mafai ona faoa se tagata mai le mauaina o taui e aumaia e le tele o nei ʻoa i le lagi. Ai se a ua faapea ai? Auā na folafola mai e Iesu: “O aʻu nei o le toetu ma le ola; o lē faatuatua mai ia te au, e ui lava ina oti, a e ola lava ia.”—Ioane 11:25.

‘Oa e Le Mafaatauina E Mafai Ona Tatou Olioli ai Nei

Ina ua uma ona ia fai mai e tatau ona tuu lo tatou faamoemoe i “le Atua,” ua faaauau atili mai e Paulo e faapea ‘o le Atua o loo foai tele mai ia i tatou mea uma lava e fiafia ai.’ (1 Timoteo 6:17) E le gata i mea manaomia o le olaga i aso fai soo, a e ua aumaia foi ma le alofa lava e Le Silisili Ese ʻoa e le mafaatauina mo i latou na te faamaonia. O a nei ʻoa?

Matau le mea o fai ma ia i le Faataoto 3:13-18: “Amuia le tagata na te maua le poto, ma le tagata na te maua le mafaufau; auā e sili ona lelei o lona faatau i lo le faatau o le ario; ma mea e maua ai e sili lelei o ia i penina; ma au mea faafiafia uma lava e le tusa ma ia. O loo i lona lima taumatau le tuluʻi; a o i lona lima tauagavale le oloa ma le viiga . . . O ia o le laau o ola i le tago atu ia te ia; amuia foi i latou o e taofi atu ia te ia.” O lea, o le “poto” o le ʻoa lea e sili lona tau i lo o ʻoa uma i le lalolagi.

O le poto o le faatinoina lea o le malamalama i auala sao. O le agavaa e faaaoga ai le poto ma le malamalama i se auala manuia e foia ai faafitauli, e alofia ai, pe aloese ai mai tulaga mataʻutia, ia ausia ai ni sini totino po o le fesoasoani foi i isi ina ia faia faapea. E te le ioe ea faapea i aso nei ua tatou manaomia ai lena ituaiga o poto ina ia mafai ai ona faafeasagaia ma le manuia tofotofoga o le olaga ma ia tausia ai se tulaga lelei ma le Atua?

I le faamatalaina o le poto, ua faamatilatila e le Faataoto 3:13-18 le fiafia. E le o le fiafia ea o le ʻoa taua lea o loo tatou faanaunau uma i ai? O le poto mai le Atua o le a na aumaia ia i tatou lea fiafia, auā o le fiafia moni e mafai ona sau mai i le na o lona Puna, o Ieova le Atua. Ua faamaonia e le poto masani faapea o le fiafiaga moni e le mafai ona maua i se isi auala sei vagana ua usiusitai i Le Sili Ese ma gauai atu i le gaoioiga a lona agaga. O le fiafia o loo folafolaina mai i le Tusi Paia e faalagolago i le sao o la tatou faiā, po o se tulaga faamaonia, ma lo tatou Tamā faalelagi. (Mataio 5:3-10) O le mea lea, o le faatinoina o mea ua tatou aʻoaʻoina mai ia tatou suesuega o le Tusi Paia, o le a tatou folasia ai la le “poto mai luga” o le a na aumaia ia i tatou le fiafia e le mafai ona faatauina i ʻoa uma o lenei lalolagi.

O lea, sei manatu foi, i mea o tusia i le Faataoto 3:16: “O loo i lona lima taumatau le ola tuluʻi.” Ua malamalama i lenei mea o loo faasino atu i le lima taumatau o le puipuiga, le lima o loo nofo sauni e fesoasoani ma leoleoina se tasi i aso faigata. E toatele tagata i aso nei ua ola i se tulaga le pulea, feusuaiga le mama, faaaogaina o vailaau oona, ma isi lava mea faapena. Ua faapena foi ona e faitau ai i le AIDS (Acquired Immune Deficiency Syndrome) ua fesootai ma na faiga. Mai mea ua e matauina, po o fiafia moni ea na tagata o loo faia na uiga? Po o le mea ea ua latou aumaia le faanoanoa ma le tiga, e oo lava i le oti, e le gata ia i latou a e faapea foi ma isi?

I se faatusatusaga, o le faatatauina o fautuaga poto mai le Afioga a le Atua o le a i ai pe i o tatou “lima taumatau” e puipuia i tatou mai na mea mataʻutia. O le mea lea, e mafai e le poto ona tuluʻi lo tatou ola, leoleoina i tatou mai se ala e taʻitaʻiina atu ai i le vave ona oti. O lea, o le poto faaleatua e mautinoa ai le faia o lo tatou olaga i le taimi nei o se mea e toafimalie ai.

Savali ma le Poto Nei

Ua faaalia e mea moni o loo siomia ai i tatou, ua tatou ola nei i “aso e gata ai” o lenei faiga o mea. (2 Timoteo 3:1-5) O lea, e taua tele o le leoleoina o i tatou faasaga i le lolo atu i le agaga o le lalolagi. O lena ituagia o agaga o loo faatauaina mea faitino i le faatosina lea o faanaunauga i le manatu faapito. Na aumaia se tasi tuuaiga e faatatau ia Iopu, o se tagata faatuatua i faamaumauga a le Tusi Paia, sa faapea o lenei tagata na auauna i le Atua ona o le manatu faapito, ona o le manao i mea faitino na ia maua. (Iopu 1:9-11) E mafai ea ona tuuaʻia ma le tonu i tatou e lea moliaga?

Afai tatou te tali atu e leai, atonu la o le a manuia la tatou tetee atu i le manao tele i mea faitino i aso nei. A e o lenei mataʻutia, o le manao tele i mea faitino, o se tasi lea o luʻi e sili ona taufaasese o loo fesagai ma i tatou. Sa fetalai Iesu Keriso faapea “a o le loto popole i mea a lenei lalolagi, ma le pepelo o le oa ua fetinaiina ai le upu.” (Mataio 13:22) E manino lava, e tatau ona leoleo pea i tatou faasaga i “le pepelo o le oa,” auā e le o le ʻoa tautele e moni lea.

E manaomia foi ona faamanatu ia i tatou le aoga faatatau o mea faitino. Fai mai le Afioga a le Atua: “O le oloa o le mauoa, o lona ʻolo malosi lea; e pei o le pa maualuga foi i lona lava manatu.” (Faataoto 18:11) Ioe, o le saogalemu e aumaia e ʻoa, ua na o ni manatu, o se mea taufaasese. E le faapea e leaga mea faitino. A o le mea sese o le faaautu le i ai o o tatou olaga na i loo le mauaina o le finagalo malie o le Atua. O Iesu, o le na lauiloa o se faiaʻoga sili ona poto i le talatuufaasolo, sa ia fetalai tuusao mai lava: “Auā e le ola se tasi i le tele o ana mea ua ia te ia.”—Luka 12:15.

O le mea lea sei o tatou tulituliloa se auala e “mauoa i le Atua.” (Luka 12:21) E leai se mea e sili atu ona tautele na i lo o le tulaga faamaonia ma Le na Faia mea. O taumafaiga uma e tausia lea tulaga e saosaolaumea ai i lo tatou ‘faaoaina o i tatou i se faavae lelei mo le lumanai, ina ia mafai ai ona tatou ‘fetagofi atu i le ola atili.’—1 Timoteo 6:19.