Ia Mautinoa ua Faamuamua Mea e Ao Ona Faamuamua!

O le po o le sauniga ae o loo iai au galuega e fai. O le ā le mea o le a e faamuamua?

SEʻI faapea o oe o se tane ma o se tamā. A o latalata ina faaiuina se aso umi o galuega mamafa, ma ua faasolo lou mafaufau agaʻi i le faasologa o le sauniga a le faapotopotoga i lena afiafi. Pe afai e te mānava loa mai le galuega i le taimi lenei, o le a lava le taimi e te taʻele ai, fai ou ofu, ma fai vave sina meaʻai a o lei alu atu i le sauniga. Ae faafuasei lava ona sau lou pule ma talosaga atu ia te oe pe mafai ona e galue ova taimi. Ua ia folafola atu ia te oe se totogi lelei. Ma o loo e manaomia le tupe.

Ia po o oe o se avā ma o se tinā. A o e sauniunia le taumafataga mo le afiafi, ae ua tau atu lau vaai i se faaputuga o lavalava e lei auliina, o nisi o na lavalava e manaomia mo le aso a taeao. Ona e faapea ifo lea, ‘Afai ou te alu i le sauniga i le po nei, o fea la le taimi e fai ai laʻu āuliga?’ Ona o lea e lei leva ona maua sau galuega faasauatoa, ua e iloa le faigata tele ona tausia tiute fai i le aiga, a o alu atu foi e saili mai ni tupe e ola ai.

Po o oe foi o se tamaitiiti aʻoga. O loo faulalai i luga o lau kesi i lou potu au mea aʻoga e lei faia. O le tele o na galuega na manaomia ona faia i se taimi ua mavae, ae ua e faatuutuu, ma o lea ua tele nisi o galuega e tatau ona fai faavave. Ua tofotofoina oe e talosaga atu i ou mātua ina ia faataga oe e te nofo i le fale mai le sauniga e faauma au mea aʻoga.

O lē fea mea o le a e faamuamua: o le galuega faaopoopo ova taimi, le āuliga, mea aʻoga, po o le sauniga a le faapotopotoga? I le itu faaleagaga, o le ā le uiga o le tuu faamuamua o mea e tatau ona faamuamua? O le ā le silafaga a Ieova?

O le ā e Tatau Ona Faamuamua?

E lei umi lava se taimi talu ona tuuina mai i le nuu o Isaraelu ia Tulafono e Sefulu, ae na iloa ai se tagata o fai fafie i le Sapati. Sa matuā faasaina lenei mea i le Tulafono. (Numera 15:32-34; Teuteronome 5:12-15) O le ā sau faamasinoga o le a fai e tusa ai ma lea tulaga? Po o le a e faia ea se faamolemolega mo le tamaloa, i le faapea mai, ia e lē o faia e le tamaloa se galuega ina ia faatamaoaiga ai lona olaga, e na ona sina galuega ina ia saunia ai mea sa manaomia e lona aiga? Po o le a e faapea mai ea, e tele lava aso i le tausaga e faamanatu ai le Sapati, ae o lena lava aso e tasi na misia, atonu ona sa lei fuafua mamao le tamaloa, e mafai lava ona faamagaloina?

E sili atu ona matuia le silafaga a Ieova i le mataupu. Ua taʻua i le Tusi Paia e faapea: “Ona fetalai mai ai lea o Ieova ia Mose, ‘E matuā fasiotia le tagata.’” (Numera 15:35) Aisea na matuā matuia ai ia Ieova lenei mea na faia e le tamaloa?

E ono aso e tatau ai i tagata ona fai ai fafie ma saunia ai mea latou te manaomia e pei o meaʻai, lavalava, ma fale. A o le aso lona fitu sa tatau ona tuuina atu atoatoa mo o latou manaoga faaleagaga. Sa lē sese le fai fafie, ae na sese le faaaogaina o le taimi sa tatau ona faataatia ese mo le tapuaiga ia Ieova e fai fafie ai. E ui lava e lē o toe nonofo Kerisiano i lalo o le Tulafono Faa-Mose, ae pe e lē aʻoaʻo mai ai ea e lenei mea na tupu ia i tatou se lesona ina ia faatulaga saʻo mea e tatau ona tatou faamuamua i aso nei?—Filipi 1:10.

Ina ua uma ona faaaluina e le nuu o Isaraelu le 40 tausaga i le vao, na latou nofo sauni ai loa e ulu atu i le Nuu Folafolaina. Sa oo ina fiu nisi i le ʻaai pea i le manai na saunia e le Atua i le vao, ma e lē taumatea sa āloālo atu nisi i le suia o meaai. Ina ia fesoasoani ia i latou ia iai le vaaiga saʻo a o ulu atu i le nuu e “tafe ai le suāsusu ma le meli,” na faamanatu atu ai e Ieova ia i latou e faapea: “E le na o mea e ʻai e ola ai tagata, a o mea uma e tulei mai i le fofoga o Ieova e ola ai tagata.”—Esoto 3:8; Teuteronome 8:3.

Sa tatau i tagata Isaraelu ona galulue mamafa mo le latou “suasusu ma le meli.” Sa iai ʻau tau sa tatau ona faatoilaloina, fale e fausia, fanua e totō i laau. E ui lava i na mea uma, ae sa poloaiina e Ieova le nuu ina ia faataatia ese se taimi i aso taitasi e manatunatu loloto ai i mea faaleagaga. Sa tatau foi ona latou faaalu se taimi e aʻoaʻo ai a latou fanau i ala o le Atua. Na fetalai mai Ieova: “Ia outou aʻoaʻo atu ai i a outou fanau, ma tautalatala aʻi pe a e nofo i lou fale, pe a e savali foi i le ala, pe a e taoto, pe a e tulai foi.”—Teuteronome 11:19.

Sa poloaiina foi ina ia faatolu i le tausaga ona ō atu o tane uma lava o Isaraelu ma tagata liu lotu o le nuu i luma o Ieova. I le iloaina o le a maua ai e le aiga atoa aogā faaleagaga mai na faatasitasiga, na fuafuaina ai e le toatele o ulu o aiga ina ia ō faatasi ma a latou avā ma fanau. Ae o ai o le a puipuia o latou fale ma o latou fanua mai le osofaia e le fili a o toesea le aiga? Na folafola atu e Ieova: “E le manao foi se tagata i lou fanua pe a e alu ae faatolu i tausaga, ina ia iloa ai oe i luma o Ieova lou Atua.” (Esoto 34:24) Sa manaomia e tagata Isaraelu le faatuatua ina ia talitonu ai faapea, afai e latou te faamuamua manaoga faaleagaga, e leai se mea e latou te matitiva ai i le faaletino. Pe sa faamaoni Ieova i lana folafolaga? O le mea moni, sa faapena lava!

Ia Muai Saili Pea le Malo

Na aʻoaʻo e Iesu ona soo ina ia faamuamua le tāua o mea faaleagaga i lo o isi mea uma lava. I le Lauga i luga o le Mauga, na ia lapatai atu ai i lana au faalogologo: “Aua neʻi outou popole, ma faapea ane. Ni a mea tatou te aai ai, ni a foi mea tatou te inu ai, ni a foi mea tatou te oofu ai? A ia outou muai saili [pea] lona malo ma lana amiotonu; ona faaopoopoina atu lea o ia mea uma [mea faaletino] ia te outou.” (Mataio 6:31, 33) E lei pine lava talu ona mavae le maliu o Iesu, na mulimuli ai Kerisiano fou faatoʻā uma ona papatisoina i lena fautuaga. O le toatele lava o i latou, o tagata Iutaia po o tagata Iutaia liu lotu o ē na faimalaga atu i Ierusalema mo le faamanatuina o le tausamiga o le Penetekoso i le 33 T.A. A o iai iina, na tupu ai se mea e lei faatalitalia. Na latou faalogo ai ma talia le tala lelei e uiga ia Iesu Keriso. I le naunau e fia iloa atili e uiga i lo latou faatuatuaga fou, na latou nonofo ai pea i Ierusalema. Sa oo ina itiiti a latou meaʻai, ae sa lē faamuamuaina le tāua o mea faaletino. Ua latou maua le Mesia! Sa faasoa atu e o latou uso Kerisiano ia i latou mea faaletino na ia i latou ina ia mafai ai e tagata uma ona faaauau ona “tumau pea i latou i le aʻoaʻoga a le au aposetolo, ma . . . i talotaloga.”—Galuega 2:42.

Na iai le taimi mulimuli ane na lafoaia ai e nisi Kerisiano le manaoga ina ia auaufaatasi e lē aunoa ma uso i sauniga. (Eperu 10:23-25) Atonu ua oo ina mananao tele i mea faitino, ua lafoaia ai mea faaleagaga a o taumafai e faamautinoa ua maua e i latou ma o latou aiga le saogalemu tautupe. Ina ua uma ona uunaia ona uso ina ia aua le tuulafoaiina ia sauniga, na tusi ai le aposetolo o Paulo e faapea: “Ia aunoa a outou amio ma le matapeapea; ia gata ia o outou manao i mea ua ia te outou; auā ua fetalai mai o ia, ‘Ou te le tuua lava oe, ou te le tuulafoai lava ia te oe.’”—Eperu 13:5.

Na matuā fetaui lelei lava le fautuaga a Paulo. Pe tusa ma le lima tausaga talu ona tusia e Paulo lana tusi i Kerisiano Eperu, na ō mai ai ʻau tau a Roma i le taitaiga a Cestius Gallus ma siomia Ierusalema. Sa manatua e Kerisiano faamaoni le lapataiga a Iesu e faapea: “Pe a outou iloa [lenei] mea . . . , o le ua i luga o le fale, aua neʻi alu ifo ia i le fale, aua foi neʻi ulu ai e ave se mea ai lona fale; o le ua i le vao foi, aua neʻi toe foi o ia e ave lona ofu.” (Mareko 13:14-16) Na latou iloa o lo latou faasaoina sa faalagolago, e lē i le mautū o a latou galuega po o le tāua o a latou mea faitino, ae e faalagolago i lo latou usiusitai i faatonuga a Iesu. O i latou na talia le fautuaga a Paulo ma faamuamua manaoga faaleagaga, e mautinoa sa sili atu ona faigofie ia i latou ona tuua fale, galuega, lavalava, ma mea faitino sa iai ma sosola i mauga, nai lo o i latou o ē sa faigata ona lafoaia le manao tele i tupe.

Le Auala ua Faamuamua ai e Nisi i Aso Nei Mea e Tatau Ona Faamuamua

E faatāuaina e Kerisiano faamaoni i aso nei le auaufaatasi e lē aunoa ma o latou uso, ma o le toatele ua faia ni faataulagaina ina ia auai i sauniga. I nisi nofoaga, e na o le pau lava ituaiga o galuega e mafai ona maua, o galuega fai sifi. Na ofo se tasi uso e na te suia nisi o ana aumea faigaluega i po o Aso Toonai, o po na e mananao ai le toatele o tagata o lona nuu e ō ai e tafafao, pe afai e latou te mananao e suia o ia i lana sifi i po e fai ai sauniga. O isi uso o ē e galulue i galuega fai sifi, e latou te filifilia e ō i sauniga a se faapotopotoga e latalata ane pe afai e taofia i latou e a latou galuega mai le auai i sauniga a le latou lava faapotopotoga. I lenei auala, e seāseā ai lava ona latou misia se sauniga. Sa vave lava ona iloa e se tagata fiafia fou i Kanata le tāua o le Aʻoga o le Faiva Faatiokarate ma le Sauniga o le Auaunaga, ae sa faalavelavea lona auai i sauniga ona o le faasologa o lana galuega. I lea, sa ia totogia ai se isi la te faigaluega faatasi ina ia sui ia te ia i lana sifi ina ia mafai ai ona auai i nei sauniga tāua.

O le toatele o i latou o ē mafatia i maʻi faaumiumi e seāseā lava ona misia sauniga. Pe a lē mafai ona latou ō atu i le Maota o le Malo, e latou te faalogologo i le polokalame mai o latou fale e ala i le telefoni po o kaseti e pueina. E latou te faaalia le faamālō ma le talisapaia mo sauniuniga faaleagaga a Ieova e ala i lana “auauna faamaoni ma le mafaufau”! (Mataio 24:45) O Kerisiano o loo gafa ma le tausia o o latou mātua ua matutua e latou te matuā talisapaia pe afai e ofo atu se uso po o se tuafafine e nonofo ma mātua ina ia mafai ai e lē o loo tausia ona auai i se sauniga a le faapotopotoga.

Ia Fuafua Mamao!

O mātua e latou te mataalia i o latou lava manaoga faaleagaga, e fesoasoani i a latou fanau ina ia talisapaia sauniga faa-Kerisiano. E pei lava o le tulaga masani, e latou te faatalitalia a latou fanau e faia a latou mea aʻoga e tuuina mai nai lo o le tuu ai o mea aʻoga e faafaupuʻe. I po o sauniga, e faia ai e tamaiti a latou mea aʻoga i le taimi lava e foi mai ai i le fale mai le aʻoga. E lē faatagaina ia mea e fiafia i ai ma isi gaoioiga e faalavelave i taimi o sauniga a le faapotopotoga.

I le avea o se tane ma o se tamā, pe e te faamuamua le auai i sauniga? O oe le avā ma o le tinā, po o e taumafai e fuafua au tiute tauave ina ia maua ai se avanoa e auai i sauniga? I le avea o se talavou, po o e manatu i sauniga e sili atu ona tāua nai lo o au mea aʻoga, po o mea aʻoga i lo o sauniga?

O se sauniga a le faapotopotoga o se sauniuniga alofa a Ieova. E tatau ona faia taumafaiga uma ina ia auai i lena fuafuaga. O le a matuā faamanuia Ieova ia te oe pe afai e te faamuamua mea e tatau ona faamuamua!