Ua Manumalo Aʻoaʻoga Mai le Atua
“E vaai atu o outou mata i [“lo outou Aʻoaʻo Sili,” NW]. E faalogo foi o outou taliga i le upu i o outou tua, . . . e faapea mai, O le ala lava lenei, ia outou savavali ai.”—ISAIA 30:20, 21.
1. Aisea ua tonu ai ona taʻua faatonuga a Ieova, o aʻoaʻoga ia mai le Atua?
O IEOVA LE ATUA, o le Puna lea o aʻoaʻoga e sili ona lelei e mafai ona maua e so o se tasi. Afai tatou te faalogo pe a fetalai mai o ia, ae maise lava e ala mai i lana Afioga Paia, ona avea ai lea o Ia ma o tatou Aʻoaʻo Sili. (Isaia 30:20) Ua taʻua foi o ia e le Tusi Paia Eperu o le “Atua o atua.” (Salamo 50:1) O faatonuga la a Ieova, o aʻoaʻoga ia e mai le Atua.
2. I le ā le uiga ua moni ai e na o le Atua lava e atamai?
2 Ua mitamita le lalolagi i le tele o ana polokalama tau aʻoaʻoga, ae aunoa ma se tasi o na polokalama o aumaia ai aʻoaʻoga mai le Atua. Ioe, o atamai uma a le lalolagi i le faagasologa o tausaga, e faatauvaa lava pe a faatusatusa atu i faatonuga mai le Atua ua faavae i le atamai lē mafaatusalia o Ieova. Ua faapea mai le Roma 16:27, e na o le Atua lava e atamai, ma e moni lenei mea, ona e na o Ieova lava ua iai le atamai atoatoa.
3. Aisea ua na o Iesu Keriso ai le faiaoga sili na femaliuai i le lalolagi?
3 O Iesu Keriso, le Alo o le Atua, o se faaatoaga sili lea o le atamai, ma ua na o ia lava le faiaoga silisili sa femaliuai i le lalolagi. E lelētioa la! Mo le tele o tausaga, sa avea ai Ieova ma ona Faiaoga i le lagi. O le mea moni, na amata aʻoaʻoga mai le Atua ina ua muai aʻoaʻoina e le Atua lana uluai foafoaga, o lona Alo pele e toatasi. O le mea lea, ua mafai ai ona faapea mai Iesu: “Faapei ona aʻoaʻo mai e loʻu Tamā ia te au, o mea ia ou te tautala atu ai.” (Ioane 8:28; Faataoto 8:22, 30) O fetalaiga a Keriso lava ia o loo tusia i le Tusi Paia, ua faaopoopo atu ai i lo tatou malamalama le tele o mea e uiga i aʻoaʻoga mai le Atua. O le aʻoaʻo atu e Kerisiano faauuina o mea na aʻoaʻo atu ai Iesu, ua faaalia ai lo latou usiusitai i lo latou Aʻoaʻo Sili, o lē e finagalo ia faailoa atu e ala i le faapotopotoga “le poto uiga eseese o le Atua.”—Efeso 3:10, 11; 5:1; Luka 6:40.
Le Sailiga o le Poto
4. O le ā se faamatalaga e uiga i le tomai o le faiai?
4 O le mauaina o le poto lea e maua i aʻoaʻoga mai le Atua, e manaomia ai le faaaogāina ma le filigā o o tatou tomai e mafaufau ai, na foaiina mai e le Atua. E mafai lenei mea, auā e matuā tele le tomai o loo iai i le faiai o le tagata. Fai mai le tusi o le Incredible Machine: “E oo lava i komepiuta e aupito sili ona lavelave lona faiga lea e mafai ona tatou mafaufau i ai, o se mea noa pe a faatusatusa atu i le toetoe lava lē matāea o le lavelave ma le fetuutuunai o le faiai o le tagata—o uiga, ua mafai ona maua e ala i le galulue faatasi o feau o loo faafesootai atu i le malosi o le faiai o le tagata. . . . O le faitau miliona o faailoilo e feemoai i totonu o lou faiai, i so o se minute lava na te tauaveina ai avega aupito sili ona tele o faamatalaga. Latou te aumaia faamatalaga e uiga i lou tino i totonu ma ona siomaga i fafo: e uiga i se uaua ua migi o lou tamatamaivae, po o le manogi sasala o le kofe, po o se faamatalaga mālie a se uo. A o fafauina aʻe ma iloiloina e faailoilo faamatalaga, ona fuaina mai ai lea o lagona ootia, o manatunatuga, o mafaufauga, po o fuafuaga e taitaiina ai i le faia o se faaiuga. E vave lava ona taʻu atu e faailoilo mai lou faiai i isi vaega o lou tino le mea e ao ona fai: e faafemigoiai lou tamatamaivae, ia inu se kofe, ia ʻata, pe atonu o le fai atu o se tali ma le atamai. I le taimi lava lena, o loo pulea ai foi e lou faiai lau mānava, le fetafeai o lou toto, le vevela i lou tino, ma isi lava taualumaga aogā e te lē o iloaina. Na te aauina atu faatonuga ina ia tumau ai pea ona gasolo lelei le gaoioiga a lou tino e tusa lava pe fesuisuiai soo lou siomaga. E nofo sauni foi le faiai mo nisi manaoga o i luma.”—Itulau 326.
5. I se uiga faale-Tusi Paia, o le ā le atamai?
5 E ui ina lē mafesiligia le ofoofogia o le tele o avanoa e faaofi atu ai mea i le faiai o le tagata, ae e faapefea ona tatou faaaogā le faiai i se auala e sili ona lelei? E lē i le matuā faaaafiaina o i tatou i le suesueina ma le filigā o se gagana, le talafaasolopito, le faasaienisi, po o lotu eseese. E ao ona tatou muai faaaogāina malosi o o tatou mafaufau e taliaina ai aʻoaʻoga mai le Atua. Ua na o lena lava le auala e iu ai i le atamai moni. Ae o le ā le atamai moni? I le uiga faale-Tusi Paia, o le upu atamai, ua faamamafa ai le faia o se filifiliga saʻo e faavae i le poto saʻo ma le malamalamaga moni. O le atamai ua mafai ai ona tatou faaaogāina ma le manuia le poto ma le malamalamaga i le foiaina o faafitauli, le alofiaina o lamatiaga, le fesoasoani atu i isi, ma le ausiaina o sini. O se mea mataina ona ua faia e le Tusi Paia se faaeseesega o le atamai mai le valea ma le lē mafaufau—o uiga o loo tatou mananao moni e alofia.—Teuteronome 32:6; Faataoto 11:29; Failauga 6:8.
Le Tusi Aʻoga Sili a Ieova
6. Afai tatou te fia faaalia le atamai moni, o le ā e tatau ona faaaogā lelei?
6 E tele atamai faalelalolagi o loo tatou iloaina. (1 Korinito 3:18, 19) E anoanoai aʻoga ma faletusi i lenei lalolagi o loo iai le faitau miliona o tusi! O le tele o nei tusi o ni tusi aʻoga o loo aumaia ai faatonuga e uiga i gagana, le faamatematika, le faasaienisi, ma isi lava matata i le mauaina o le poto. Ae ua saunia e le Aʻoaʻo Sili se tusi aʻoga e sili mamao atu i lo o isi tusi uma—o lana Afioga faagaeeina, le Tusi Paia. (2 Timoteo 3:16, 17) E matuā saolele, e lē gata i le faamatalaina o mataupu e pei o le talafaasolopito, tala i le lalolagi, ma suesuega i laau, ae e faapena foi ona moni i lona valoiaina o le lumanai. E lē gata i lea, ua fesoasoani mai ia i tatou ina ia ola ai i se olaga e sili ona fiafia ma sili ona fuatele mai i le taimi nei lava. O le mea moni, e pei lava ona manaomia e tamaiti aʻoga o aʻoga a le lalolagi ona faaaogā a latou tusi aʻoga, e tatau foi ona tatou faamasani lelei ma faaaogā le Tusi Aʻoga sili a le Atua, pe afai tatou te mananao e faaalia le atamai moni e pei o ē ‘ua aʻoaʻoina e Ieova.’—Ioane 6:45.
7. Aisea e te faapea mai ai e lē lava le na ona poto i le mafaufau i mea o loo tusia i le Tusi Paia?
7 Ae o le poto i le mafaufau i le Tusi Paia, e lē tutusa lea ma le iai o le atamai moni ma gauai atu i aʻoaʻoga mai le Atua. O se faataitaiga: I lona 17 o senituri T.A., na taumafai ai se tagata Katoliko e igoa ia Konelio van der Steen ina ia avea o ia ma se tagata o le lotu Jesuit, ae na teena ona e puupuu tele o ia. Fai mai Manfred Barthel i lana tusi o le Jesuits—History & Legend of the Society of Jesus: “Sa faailoa atu e le komiti ia van der Steen e faapea, sa latou nofo sauni e lē amanaia le maualuga manaomia, ae na o lona taurotoina lava o le Tusi Paia atoa e talia ai o ia. Sa leai se aogā e taʻu atu ai lena tala ia van der Steen pe afai e leʻi gauai atu o ia i lena talosaga faasausili.” Pagā se taumafaiga fita o le taumafai e tauroto le Tusi Paia atoa! Peitai, e mautinoa le sili atu ona tāua o le malamalama i le Afioga a le Atua na i lo o le taurotoina.
8. O le ā o le a fesoasoani ia i tatou ina ia tatou maua ai aogā o aʻoaʻoga mai le Atua ma faaalia ai le atamai moni?
8 Afai tatou te fia mauaina aogā atoatoa o aʻoaʻoga mai le Atua ma faaalia le atamai moni, tatou te manaomia la le poto saʻo mai le Tusi Paia. E tatau foi ona taitaiina i tatou e le agaga paia o Ieova, po o le mana galue. Ona mafai ai lea ona tatou aʻoaʻoina upu moni ofoofogia, “o mea loloto foi a le Atua.” (1 Korinito 2:10) O lea, seʻi o tatou suesue ma le filigā le Tusi Aʻoga sili a Ieova ma tatalo mo lana taitaiga mai i le agaga paia. I le ogatusa ma le Faataoto 2:1-6, seʻi o tatou uai atu i le atamai, ia uai atu o tatou loto i le faautauta, ma ole atu mo le malamalama. E manaomia ona tatou faia o lenei mea e pei o loo tatou saili i se oloa lilo, auā e na o le pau lena o le auala o le a tatou ‘malamalama ai i le mataʻu ia Ieova ma maua ai le poto moni o le Atua.’ O le talanoaina o nisi o manumalo ma aogā o aʻoaʻoga mai le Atua, o le a faateleina ai lo tatou talisapaia o le atamai ua foai mai e le Atua.
Faasolo pea i Luma le Malamalamaga
9, 10. O le ā na fetalai i ai le Atua, e pei ona faamauina i le Kenese 3:15, ma o le ā le malamalamaga saʻo o na upu?
9 Ua manumalo aʻoaʻoga mai le Atua e ala i le tuuina atu i tagata o Ieova o se malamalamaga o loo faasolo pea i luma o le Tusi Paia. Mo se faataitaiga, ua tatou aʻoaʻoina e faapea o Satani le Tiapolo, o ia lea na tautala atu e ala i se gata i Etena ma tuuaia sese ai le Atua e faapea sa pepelo o Ia, ina ua fetalai atu faapea o le oti, o le faasalaga lea mo le ʻaina o le fua faasaina. Ae ua tatou iloa, o le lē usiusitai ia Ieova le Atua ua oo mai ai le oti i tagata. (Kenese 3:1-6; Roma 5:12) Ae, na aumaia e le Atua i tagata se faamoemoe ina ua ia taʻu atu i le gata, o Satani e faapea: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.”—Kenese 3:15.
10 O na upu o loo aofia ai se mealilo ua faaalia auauai mai e ala i aʻoaʻoga mai le Atua. Ua aʻoaʻoina e Ieova ona tagata e faapea, o le matua silisili o le Tusi Paia, o le taumamāina lea o lana pule silisiliesee e ala i le Fanau, o sē e tupuga mai ia Aperaamo ma Tavita, o lē ua iai le aiā aloaia e pule ai i le Malo. (Kenese 22:15-18; 2 Samuelu 7:12, 13; Esekielu 21:25-27) Ua aʻoaʻoina i tatou e lo tatou Aʻoaʻo Sili e faapea, o Iesu Keriso, o le Fanau autū lea a le “fafine,” le faalapotopotoga aoao a le Atua. (Kalatia 3:16) E ui lava i tofotofoga uma na faaoo atu e Satani ia te ia, ae sa tausisia pea e Iesu lona faamaoni—seia oo i le oti, o le tuimomomoina lea o le mulivae o le Fanau. Ua tatou aʻoaʻoina e faapea, e 144,000 suli lagolago o le Malo ua aoaoina mai tagata, o le a auai faatasi ma Keriso i le tuimomomoina o le ulu o Satani, “le gata tuai.” (Faaaliga 14:1-4; 20:2; Roma 16:20; Kalatia 3:29; Efeso 3:4-6) Maeu lo tatou talisapaia o lena poto mai le Afioga a le Atua!
I le Malamalama Ofoofogia a le Atua
11. Aisea e mafai ai ona faapea atu, ua manumalo aʻoaʻoga mai le Atua e ala i le aumaia o tagata i le malamalama faaleagaga?
11 Ua manumalo aʻoaʻoga mai le Atua e ala i le faamalamalamaina faaleagaga o tagata. Ua tofo Kerisiano faauuina i lena mea e faataunuuina ai le 1 Peteru 2:9: “O outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai, ina ia outou taʻutaʻu atu ona lelei na ia valaau ia te outou nai le pouliuli e oo i lona lava malamalama e matuā ofo ai.” I aso nei, ua olioli ai foi le “motu o tagata e toatele” i le malamalama mai le Atua, o i latou ia o le a ola e faavavau i le lalolagi parataiso. (Faaaliga 7:9; Luka 23:43) A o aʻoaʻoina e le Atua ona tagata, ua faamaonia ai le moni o le Faataoto 4:18 e faapea: “A o le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.” O lenei taualumaga faasolosolo i luma tau aʻoaʻoga, ua faafouina ai lo tatou malamalamaga e uiga i aʻoaʻoga mai le Atua, e pei lava ona agaʻi i luma tamaiti aʻoga ona o le fesoasoani lelei a le faiaoga pe a latou suesueina le kalama, le talafaasolopito, po o isi mataupu.
12, 13. O ā lamatiaga tau i talitonuga ua puipuia ai e aʻoaʻoga mai le Atua tagata o Ieova?
12 O le isi mea ua manumalo ai aʻoaʻoga mai le Atua, o lona puipuia lea o ona tagata loto maulalo mai “mataupu a temoni.” (1 Timoteo 4:1) I le isi itu, seʻi tagai atu ia Kerisinetoma! I tuā i le 1878, na tusi mai ai sē na Lotu Katoliko muamua o John Henry Newman e faapea: “I na taimi, o le faalagolago atu i le malosi o le Faa-Kerisiano ina ia teena ai aafiaga i mea leaga, ma suia ai mea sa faaaogā e fesootai atu i tapuaiga faatemoni ina ia faaaogā i faiga faaevagelia . . . , na nofo sauni ai taʻitaʻi o le Lotu mai aso ua mavae i le taimi e aliaʻe ai sea tulaga, ina ia talia, ia faataitaia, pe faasaʻoina ai faiga ma tu o loo iai a tagata, faapea foi ma filosofia a tagata popoto.” Na faaopoopo mai foi Newman e faapea, o mea e pei o le vaisa, o ofu tatapuvae o patele, ma faatusa, sa “faapaupau uma o latou amataga, ma sa faapaiaina e ala i le faaaogāina i le Lotu.” E matuā loto faafetai tagata o le Atua ona ua puipuia i latou e aʻoaʻoga mai le Atua mai na faiga faaaposetasi. Ua manumalo mai faiga uma faatemoni.—Galuega 19:20.
13 I so o se auala lava, ua manumalo ai aʻoaʻoga mai le Atua i mea sese faalotu. Mo se faataitaiga, ona o i tatou o tagata ua aʻoaʻoina e le Atua, tatou te lē talitonu ai i le Tolutasi, ae ua tatou iloa lelei o Ieova o Lē Silisili ona Maualuga, o Iesu o lona Alo, ma o le agaga paia, o le mana galue o le Atua. Tatou te lē fefefe i le afi i seoli, auā ua tatou iloa o seoli i le Tusi Paia, o le tuugamau taatele lea o tagata. Ma a o faapea mai tagata o lotu sese e lē mafai ona oti le solu faaletagata, ae ua tatou iloa o ē ua feoti, latou te lē toe iloa se mea. E anoanoai le tele o upu moni ua tatou maua i aʻoaʻoga mai le Atua. Maeu se faamanuiaga, o le saoloto mai noataga faaleagaga a Papelonia Tele, le emepaea o lotu sese i le lalolagi!—Ioane 8:31, 32; Faaaliga 18:2, 4, 5.
14. Aisea e mafai ai e auauna a le Atua ona savavali i le malamalama faaleagaga?
14 Ona ua manumalo aʻoaʻoga mai le Atua i mea sese faalotu, ua mafai ai e auauna a le Atua ona savavali i le malamalama faaleagaga. O le iuga, ua latou lagona ai se leo i o latou tua o faapea mai: “O le ala lava lenei, ia outou savavali ai.” (Isaia 30:21) Ua puipuia foi e aʻoaʻoga a le Atua ana auauna mai manatunatuga sese. Ina o faatupuina e “aposetolo pepelo” fevaevaeaiga i le faapotopotoga i Korinito, na tusi atu ai le aposetolo o Pauro e faapea: “O auupega a lo matou nei taua e le faaletino ia, a e faamalolosia e le Atua e lepetia ai ʻolo; o loo lepeti i lalo masalosaloga, ma mea maualuluga uma ua faasiasia i le mataupu a le Atua, o loo faatoilaloina manatu uma ia anaana ia Keriso.” (2 Korinito 10:4, 5; 11:13-15) Ua faatoilaloina manatu e tetee i aʻoaʻoga mai le Atua, pe a avatu se faatonuga ma le agamalu i le faapotopotoga, ma e ala i le talaʻia o le tala lelei ia i latou o i fafo atu o le faapotopotoga.—2 Timoteo 2:24-26.
Tapuai i le Agaga ma le Upu Moni
15, 16. O le ā le uiga o le tapuai atu ia Ieova i le agaga ma le upu moni?
15 A o agaʻi i luma le galuega talaʻi o le Malo, ua manumalo ai aʻoaʻoga mai le Atua i le faailoa atu i ē agamalu o le auala e tapuai ai i le Atua “i le agaga ma le upu moni.” I le vaieli o Iakopo e latalata i le aai o Sukara, na taʻu atu ai e Iesu i se fafine Samaria e faapea, e mafai ona ia saunia vai e maua ai le ola e faavavau. Na ia faaopoopo atu e uiga i tagata Samaria: “Tou te tapuai ma le le iloa; . . . A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni [“upu moni,” NW]; auā o loo saili le Tamā i e tapuai faapena ia te ia.” (Ioane 4:7-15, 21-23) O lea na faailoa atu ai e Iesu ia lava o le Mesia.
16 Ae faapefea ona tatou tapuai i le Atua i le agaga? E ala i le tuuina atu o le tapuaiga mamā mai o tatou loto faafetai ua tumu i le alofa i le Atua e faavae i le poto saʻo o lana Afioga. E mafai ona tatou tapuai atu ia te ia i le upu moni e ala i le teena o faiga sese faalotu ma faia le finagalo o le Atua, e pei ona faaalia mai i le Tusi Aʻoga sili a Ieova.
Manumalo i Tofotofoga ma le Lalolagi
17. E mafai faapefea ona e faamaonia atu e faapea, ua fesoasoani aʻoaʻoga mai le Atua i auauna a Ieova ina ia fesagaia ai tofotofoga?
17 Pe a fesagai tagata o le Atua ma tofotofoga, e manumalo pea lava aʻoaʻoga mai le Atua. Seʻi manatu i lenei mea: I le amataga o le Taua Lona Lua a le Lalolagi ia Setema 1939, sa manaomia ai e auauna a Ieova se malamalamaga faapitoa i lana Tusi Aʻoga sili. Sa fesoasoani tele se mataupu i le Watchtower, o Novema 1, 1939, lena sa aumaia manino ai aʻoaʻoga mai le Atua e uiga i le solitu faa-Kerisiano. (Ioane 17:16) E faapena foi i le tau amataga mai o le 1960, na avea ai mataupu mai le Watchtower e uiga i le usiusitai faatatau i “faipule silisili” faalemalo, ma fesoasoani i tagata o le Atua ina ia gauai atu i aʻoaʻoga mai le Atua pe a feagai ma le lē mautu i le vafealoai.—Roma 13:1-7; Galuega 5:29.
18. O le ā le vaaiga a le au fia Kerisiano i senituri lona lua ma le lona tolu T.A. e tusa ai o faafiafiaga lē mamā, ma o le ā le fesoasoani ua saunia e aʻoaʻoga mai le Atua e tusa ai ma lena tulaga i aso nei?
18 Ua fesoasoani ia i tatou aʻoaʻoga mai le Atua e manumalo ai i faaosoosoga, e pei o le maileia i le sailia o faafiafiaga matagā. Ia mātau faamatalaga a le au fia Kerisiano o lona lua ma lona tolu o senituri T.A. Na tusi mai faapea Tetuliano: “E leai lava sa matou mea e mafai ona fai, i le tautala, vaai po o le faalogo, le lē mafaufau o faigā faaaliga, le matagā o ata tifaga, ma le sauā o malae mataaga.” Na fesili foi se tasi tusitala o lena vaitaimi e faapea: “O le ā e faia e se Kerisiano faamaoni i nei amioga, talu ai atonu e lē o manatu o ia i le amio leaga? Aisea e fiafia ai o ia i faaaliga o nei tuinanauga leaga malolosi?” E ui lava na ola nei tusitala i ni tausaga mulimuli ane ina ua mavae Kerisiano o le uluai senituri, ae sa latou tauleagaina na faafiafiaga matagā. I aso nei, ua aumaia e aʻoaʻoga mai le Atua ia i tatou le atamai e teena ai faafiafiaga matagā, lē mamā ma le sauā.
19. Ua faapefea ona fesoasoani aʻoaʻoga mai le Atua ia i tatou ina ia manumalo mai i le lalolagi?
19 O le gauai atu i aʻoaʻoga mai le Atua ua mafai ai ona tatou manumalo i le lalolagi. Ioe, o le faatatauina o aʻoaʻoga a lo tatou Aʻoaʻo Sili, ua tatou manumalo ai i taaʻiga leaga a lenei lalolagi, lea o loo pule ai Satani. (2 Korinito 4:4; 1 Ioane 5:19) Ua faapea mai le Efeso 2:1-3, ua faaolaina i tatou e le Atua e ui ina sa tatou oti i a tatou amio leaga ma agasala a o tatou savavali e tusa ma lē o pulea le vanimonimo. Tatou te faafetai ia Ieova, ona ua fesoasoani ia i tatou aʻoaʻoga mai le Atua, ia manumalo ai i tuinanauga faalelalolagi, ma le agaga lea e tupu mai i lona fili ma o lo tatou fili foi—le taufaasese sili, o Satani le Tiapolo!
20. O ā fesili e aōga ona talanoaina atili?
20 Ua manino mai la, ua manumalo aʻoaʻoga mai le Atua i le tele o auala. O le mea moni, e faigata ona taʻu atu auala uma e manumalo ai. Ua aafia ai tagata i le lalolagi aoao. Ae o le ā ua ia faia mo oe? Ua faapefea ona aafia lou olaga i aʻoaʻoga mai le Atua?
O le ā ua E Aʻoaʻoina?
◻ E faapefea ona faamatalaina le atamai moni?
◻ O le ā ua faasolo pea i luma ona faaalia mai e le Atua e tusa ai ma le Kenese 3:15?
◻ Ua faapefea ona manumalo aʻoaʻoga mai le Atua i mataupu faaleagaga?
◻ O le ā le uiga o le tapuai atu i le Atua i le agaga ma le upu moni?
◻ Ua faapefea ona fesoasoani aʻoaʻoga mai le Atua i auauna a Ieova ina ia manumalo ai i tofotofoga ma le lalolagi?
[Ata i le itulau 10]
Na tausisia e Iesu le faamaoni seia oo i le oti—o le tuimomomoina lea o le mulivae o le Fanau