Ua Latalata le Saolotoga Mamalu mo le Fanau a le Atua

“Na faatoilaloina mea uma na faia i le iu vale, . . . e faavae i le faamoemoe o le a faapea ona tuusaunoa ia lava mea na faia mai le faapologaina e le iu vale, ma oo ai i le saolotoga mamalu o le fanau a le Atua.”—ROMA 8:20, 21, NW.

1. Na faapefea ona faaatagia mai le taulaga a Iesu i le Aso o le Togisala?

NA FOAIINA mai e Ieova lona Atalii pele e toatasi e avea ma taulaga togiola lea na tatalaina ai le ala i le ola faalelagi mo tagata e 144,000 ma le faamoemoega e faavavau i le lalolagi mo le isi vaega uma o tagata. (1 Ioane 2:1, 2) E pei ona taʻua i le mataupu na muamua atu, o le taulaga a Iesu mo Kerisiano faauuagagaina sa faaatagia mai ina ua osi e le ositaulaga sili a Isaraelu le taulaga i se povi poʻa e fai ma taulaga o agasala mo ia lava, lona auaiga, ma le ituaiga o sā Levī i le Aso o le Togisala faaletausaga. I lena lava aso, na te osia ai le taulaga i se ʻoti e fai ma taulaga o agasala mo isi uma o le fanauga a Isaraelu, e pei foi o le taulaga a Keriso o le a maua ai aogā e tagata lautele. O le ʻoti ola sa faafaatusa ai le aveesea o agasala tuufaatasi a tagata mai le tausaga na tuanai atu, e ala i le faasola ese atu i le vaomatua.a—Levitiko 16:7-15, 20-22, 26.

2, 3. O le ā le uiga o le faamatalaga a Paulo lea o loo faamauina i le Roma 8:20, 21?

² Ina ua uma ona otooto mai le faamoemoe mo tagata o ē o le a avea ma ‘atalii faalelagi o le Atua,’ ona faapea mai lea o le aposetolo o Paulo: “O loo faatalitali mea uma na faia ma le naunau i le faaalia mai o atalii o le Atua. Auā na faatoilaloina mea uma na faia i le iu vale, e lē o lona loto lea, a e peitai e ala i lē na ia faatoilaloina ai, e faavae i le faamoemoe o le a faapea ona tuusaunoa ia lava mea na faia mai le faapologaina e le iu vale, ma oo ai i le saolotoga mamalu o le fanau a le Atua.” (Roma 8:14, 17, 19-21, NW) O le ā le uiga o lenei faamatalaga?

³ Ina ua foafoaina lo tatou augātamā o Atamu o se tagata lelei atoatoa, sa avea o ia ma “atalii [po o se, tamaitiiti a] o le Atua.” (Luka 3:38) Ona ua agasala, na iu ai ina “faapologaina [o ia] e le iu vale” ma tuufaasolo mai ai lenei tulaga i le fanau a tagata. (Roma 5:12) Na faataga e le Atua tagata ina ia fananau mai ma fesagaia tulaga ‘malaia’ ona o lo latou lē lelei atoatoa ua tuufaasolo mai, peitai na ia aumaia se faamoemoe e ala i le “fanau,” o Iesu Keriso. (Kenese 3:15; 22:18; Kalatia 3:16) Ua faasino atu le Faaaliga 21:1-4 i le taimi o le a lē toe iai ‘le oti, le faanoanoa, le auē, ma puapuaga.’ Talu ai o se folafolaga lenei sa faia i “tagata,” ua faamautinoa mai ai ia i tatou faapea, o se sosaiete fou o tagata i le lalolagi o loo nonofo i lalo o le pulega a le Malo, o le a latou tofo i le toe faafoisia mai o le mafaufau ma le tino i le soifua maloloina atoatoa ma le ola e faavavau i le avea ma “fanau a le Atua” i le lalolagi. I le taimi o le Pulega a Keriso i le Afe Tausaga, o le a ‘tuusaunoa ai tagata usiusitai mai le faapologaina e le iu vale.’ Pe a uma ona faamao-nia lo latou faamaoni atu ia Ieova i le taimi o le tofotofoga faaiu, ona tuusaoloto ai lea o i latou e faavavau mai le agasala tuufaasolo ma le oti. (Faaaliga 20:7-10) Ona maua ai lea e i latou o loo i le lalolagi “le saolotoga mamalu o le fanau a le Atua.”

O Loo Latou Fai Mai “Ina Sau Ia”

4. O le ā le uiga o le “ave fua ia le vai o le ola”?

⁴ Maeu se faamoemoe ofoofogia ua faataatia mai mo le fanau a tagata! E letioa lava maelega Kerisiano faauuagagaina o loo iai pea i le lalolagi, e taimua i le taʻuina atu i isi o lea faamoemoe! Ona o i latou o le a fai ma vaega o le “faatoanofotane” a le Tamai Mamoe ua faamamaluina, o Iesu Keriso, ua auai ai le vaega totoe faauuina i le faataunuuina o nei upu faavaloaga: “Ua fetalai mai le Agaga ma le faatoanofotane, ‘Ina sau ia’; ina fai atu foi ia o lē faalogo, ‘Ina sau ia’; o lē fia inu, ina sau ia, atoa ma lē manao i ai, ina ave fua ia le vai o le ola.” (Faaaliga 21:2, 9; 22:1, 2, 17) E leai, e lē faamuta maia i ē faauuina e 144,000 aogā o le taulaga togiola a Iesu. O loo galue pea le agaga o le Atua i ē totoe o le vasega a le faatoanofotane i luga o le lalolagi i le faapea atu “Ina sau ia.” So o se tasi o lagonaina ma o loo galala mo le amiotonu ua valaaulia ina ia fai atu “Ina sau ia,” ma faaavanoa atu o ia mo le anoanoai o sauniuniga a Ieova mo le faaolataga.

5. O ai o loo fiafia Molimau a Ieova ina ia iai i lo latou lotolotoi?

⁵ E faatuatua Molimau a Ieova i sauniuniga a le Atua mo le ola e ala mai ia Iesu Keriso. (Galuega 4:12) Latou te fiafia ina ia iai i lo latou lotolotoi ia ē loto faamaoni o loo faanaunau ia aʻoaʻoina mea e uiga i fuafuaga a le Atua ma faia lona finagalo. E talia fiafia i o latou Maota o le Malo i latou uma o ē mananao e ‘ō mai ma ave fua le vai o le ola’ i nei “ona po o le iuga.”—Tanielu 12:4.

Suiga a o Faagasolo Taimi

6. Ua faapefea ona galue le agaga o le Atua i auauna a Ieova i vaitaimi eseese?

⁶ E iai le taimi a le Atua e faataunuu ai ana fuafuaga, ma e aafia ai i lenei mea ana feutagaiga ma tagata. (Failauga 3:1; Galuega 1:7) E ui sa iai le agaga o le Atua i ana auauna i taimi a o lei oo mai i uluai Kerisiano, peitai sa lei faauuina ai i latou e avea o ni ona atalii faaleagaga. Peitai, i le amata mai ia Iesu, o le taimi lena a Ieova e faaaogā ai le agaga paia ina ia foaiina i tane ma fafine tuuina atu, le tofi faalelagi. Ae faapefea o tatou aso? O le agaga lava foi lena o loo galue i “isi mamoe” a Iesu, ae lē o uunaia ai i latou i se faamoemoe ma se faanaunauga mo se ola faalelagi. (Ioane 10:16) I le avea o le ola e faavavau i luga o le lalolagi parataiso ma o latou faamoemoe ua foaiina i ai e le Atua, ua latou lagolagoina ai ma le olioli le vaega totoe faauuina e ala i le tuuina atu o se molimau i lenei vaitaimi o le liliuina mai le lalolagi tuai i le lalolagi fou amiotonu a le Atua.—2 Peteru 3:5-13.

7. O le ā le galuega o le seleselega lea sa manatu mamafa i ai Tagata Aʻoga o le Tusi Paia, ae o le ā na latou iloa e faatatau i le parataiso?

⁷ Na amata e le Atua ‘ona aumaia le tele o atalii i le mamalu’ e ala i le liligiina ifo o le agaga paia i le Penetekoso o le 33 T.A., ma e foliga mai sa ia faatulagaina ai se taimi mo le faaatoaina o le “Isaraelu [faaleagaga] a le Atua” lea e 144,000 lona aofai. (Eperu 2:10; Kalatia 6:16; Faaaliga 7:1-8) I le amata mai le 1879, sa masani pea ona taʻua i lenei mekasini le galuega o le seleselega lea o loo aofia ai Kerisiano faauuina. Peitai sa iloa foi e Tagata Aʻoga o le Tusi Paia (lea ua taʻua nei o Molimau a Ieova) o loo taʻu mai e le Tusi Paia le faamoemoe o le ola e faavavau i luga o le lalolagi parataiso. Mo se faaaoaoga, na faapea mai le lomiga o le Watch Tower o Iulai 1883: “Pe a faavaeina e Iesu lona malo, faatamaia mea leaga, ma isi mea, ona avea ai lea o lenei lalolagi o le parataiso, . . . ma o i latou uma o loo i o latou tuugamau o le a faatutuina aʻe ina ia iai i le parataiso. Ma e ala i le usiusitai i ana tulafono o le a mafai ai ona latou ola e faavavau.” A o faagasolo atu taimi, ua faaitiitia ai le seleselega o ē faauuina, ma ua faasolosolo ai ona seleseleina i totonu o le faalapotopotoga a Ieova i latou o ē lē o iai le faamoemoe faalelagi. I le taimi nei, ua foaiina atu e le Atua i ana auauna faauuina, o Kerisiano ua toe fanauina, se malamalamaga aogā.—Tanielu 12:3; Filipi 2:15; Faaaliga 14:15, 16.

8. Na faapefea ona tuputupu aʻe le malamalamaga o le faamoemoe faalelalolagi i uluai tausaga mai le 1930?

⁸ Ae maise lava talu mai le 1931, na auaufaatasi atu ai i latou o ē e iai le faamoemoe i le lalolagi, i le faapotopotoga Kerisiano. I lena tausaga, na faamalamalamaina ai e Ieova le vaega totoe o Kerisiano faauuagagaina ina ia latou iloa o le mataupu e 9 o le Esekielu e faasino atu i lenei vasega faalelalolagi, o ē ua faailogaina mo le faasaoina atu i le lalolagi fou a le Atua. I le 1932 na iloa ai o i latou nā pei ni mamoe i aso nei sa muai faaatagia mai e Ionatapa le aumea a Ieu. (2 Tupu 10:15-17) I le 1934 na faamanino mai ai faapea e tatau i le “au Ionatapa” ona latou “faamaoni” pe tuuina atu i latou lava i le Atua. I le 1935, o le “motu o tagata e toatele”—lea na muai manatu i ai faapea o se vasega lona lua faaleagaga o le a avea ma “aumea” a le faatoanofotane a Keriso i le lagi—sa mataulia o isi mamoe ia ua iai le faamoemoe faalelalolagi. (Faaaliga 7:4-15; 21:2, 9; Salamo 45:14, 15) Ae maise lava talu mai le 1935 na taulamua ai ē faauuina i le sailia o tagata loto saʻo o loo faanaunau ina ia ola e faavavau i le lalolagi parataiso.

9. Ina ua mavae le 1935, aisea na lē toe taumafaina ai e nisi Kerisiano le areto ma le uaina i le Talisuaga Afiafi a le Alii?

⁹ Ina ua mavae le 1935 sa iai nisi Kerisiano o ē na taumafaina le areto ma le uaina i le Talisuaga Afiafi a le Alii sa latou lē toe faia faapea. Aisea? Auā ua latou iloa o lo latou faamoemoe e mo le lalolagi, ae lē mo le lagi. Na faapea mai se tasi fafine na papatiso i le 1930: “E ui sa manatu o se mea saʻo le [taumafaina o le areto ma le uaina], ae maise lava mo faifeau maelega faataimi atoa, ae sa lē tāitai iai soʻu talitonuga faapea sa ia te au le faamoemoe mo le lagi. I le 1935, na faamanino mai ai ia i matou faapea, ua aoaoina se motu o tagata e toatele faatasi ai ma le faamoemoe o le ola e faavavau i le lalolagi. E toatele i matou na olioli ina ua matou malamalama o i matou o se vaega o lena motu o tagata e toatele, ona matou lē toe aai loa lea ma inu i le areto ma le uaina.” E oo foi i lomiga faa-Kerisiano sa suia manatu na lomia ai. E ui o lomiga i tausaga ua teʻa sa faaautū lava mo soo faauuagagaina o Iesu, peitai i le 1935 ma faasolo mai ai, na saunia ai e Le Olomatamata ma isi lomiga a le “auauna faamaoni” meaʻai faaleagaga ina ia talafeagai ma manaoga e lē gata i le au faauuina ae o a latou aumea foi o loo iai le faamoemoe faalelalolagi.—Mataio 24:45-47.

10. O le a faapefea ona toe suia se tasi o ē faauuina ua lē faamaoni?

¹⁰ Seʻi faapea o le a lē faamaoni se tasi o ē faauuina. Pe e iai ea se tasi e sui atu i ai? Na tele se faamalamalamaga na faia e Paulo i lona talanoaina o le laau o le olive faafaatusa. (Roma 11:11-32) Pe afai e manaomia ona toe suia se tasi o ē faauuagagaina, e mautinoa o le a tuuina mai e le Atua le valaau faalelagi i se tasi o lē ua avea o se faaaoaoga lelei lona faatuatua i le tuuina atu o le auaunaga paia ia te ia mo le tele o tausaga.—Faatusatusa i le Luka 22:28, 29; 1 Peteru 1:6, 7.

Tele Mafuaaga e Loto Faafetai Ai

11. E tusa lava po o le ā lo tatou faamoemoe, ae o le ā ua faamautinoa mai e le Iakopo 1:17 ia i tatou?

¹¹ Po o fea lava tatou te auauna ai ma le faamaoni ia Ieova, o le a ia faamalieina lava o tatou manaoga ma o tatou faanaunauga saʻo. (Salamo 145:16; Luka 1:67-74) E tusa lava pe o ia i tatou se faamoemoe moni mo le lagi po o lo tatou faamoemoe e mo le lalolagi, ae ua tele mafuaaga tatau tatou te loto faafetai ai i le Atua. Na te faia pea lava mea e sili ona aogā mo i latou o ē alolofa ia te ia. Na faapea mai le soo o Iakopo, o “mea lelei uma e foaifuaina mai, atoa ma mea alofa uma e atoatoa ona lelei, mai lugā lava ia, e alu ifo mai le Tamā o malamalama,” o Ieova le Atua. (Iakopo 1:17) Seʻi o tatou matauina nisi o nei meaalofa ma faamanuiaga.

12. Aisea e mafai ai ona tatou faapea atu ua tuuina mai e Ieova i ana auauna faamaoni taitoatasi se faamoemoe ofoofogia?

¹² Ua tuuina mai e Ieova i ana auauna faamaoni taitoatasi se faamoemoe ofoofogia. Ua ia valaauina nisi mo le ola faalelagi. Mo ana molimau sa iai a o lei oo mai i taimi o uluai Kerisiano, na tuuina atu ai e Ieova le faamoemoe pupula o le toetu aʻe i le ola e faavavau i luga o le lalolagi. Mo se faataitaiga, na faatuatua Aperaamo i le toetu ma faatalitali ai i “se aai ua faavaeina”—le Malo faalelagi lea e ana le pulega o le a ia toetu aʻe ai i se olaga i le lalolagi. (Eperu 11:10, 17-19) Ua faapena foi, i lenei taimi o le iuga, o loo foai mai e le Atua i le faitau miliona o tagata le faamoemoe o le ola e faavavau i luga o se lalolagi parataiso. (Luka 23:43; Ioane 17:3) E mautinoa lava, so o se tasi o lē ua tuuina atu i ai e Ieova lena faamoemoe sili e tatau ona ia matuā loto faafetai.

13. Ua faapefea ona galue le agaga paia o le Atua i ona tagata?

¹³ E foai mai e Ieova lona agaga paia e fai ma meaalofa i ona tagata. O Kerisiano ua tuuina atu i ai le faamoemoe faalelagi ua faauuina i latou i le agaga paia. (1 Ioane 2:20; 5:1-4, 18) Peitai, o auauna a le Atua o loo iai le faamoemoe faalelalolagi, ua latou mauaina le fesoasoani ma le taitaiga a le agaga paia. E aofia ia i latou nei Mose, o lē na iai le agaga o Ieova, e pei foi ona sa iai i tane e toʻa 70 na tofia e fesoasoani ia te ia. (Numera 11:24, 25) E ala i le taitaiga a le agaga paia, na auauna ai Pesaleli o se tufuga atamai i le fausiaina o le fale fetafai o Isaraelu. (Esoto 31:1-11) Na oo ifo le agaga o le Atua ia Kitiona, Iefata, Samasoni, Tavita, Elia, Elisaia, ma isi. E ui o le a lē maua e nei tagata o aso anamua le mamalu faalelagi, ae sa taitaia i latou ma fesoasoani i ai le agaga paia, e pei ona iai isi mamoe a Iesu i aso nei. O lea la, o le mauaina o le agaga o le Atua e lē uiga faapea e tatau ona tatou maua le valaau faalelagi. Peitai, ua saunia mai e le agaga o Ieova le taitaiga, ua fesoasoani mai ia i tatou ia talaʻi atu ma faataunuu isi tofiga mai le Atua, ua aumaia ai ia i tatou le mana e sili atu nai lo le mea e masani ai, ma faatupuina ai ia i tatou ona fua o le alofa, le olioli, le filemu, le onosai, le agalelei, le mata alofa, le faamaoni, le agamalu, ma le lē gaoia. (Ioane 16:13; Galuega 1:8; 2 Korinito 4:7-10; Kalatia 5:22, 23) Pe ua lē tatau ea ona tatou loto faafetai mo lenei meaalofa matagofie mai le Atua?

14. E faapefea ona tatou maua aogā mai meaalofa a le Atua o le poto ma le atamai?

¹⁴ O le poto ma le atamai o meaalofa ia mai le Atua e tatau ona tatou loto faafetai ai, e tusa lava pe o le lagi po o le lalolagi lo tatou faamoemoe. O le poto saʻo e uiga ia Ieova e fesoasoani lea ia i tatou ina ia ‘mautinoa ai i mea e sili ona tāua’ ma ‘savavali ai e tusa ma Ieova ina ia matuā fiafia mai o ia.’ (Filipi 1:9-11; Ko-lose 1:9, 10) Ua avea le atamai faale-Atua o se puipuiga ma o se taiala i le olaga. (Faataoto 4:5-7; Failauga 7:12) O le poto moni ma le atamai moni e faavae aʻe i le Afioga a le Atua, ma o se vaega toaitiiti o ē totoe faauuina ua sili ona latou tosina atu i mea o loo fai mai ai e faatatau i lo latou faamoemoe faalelagi. Peitai, o le alofa mo le Afioga a le Atua ma se malamalamaga lelei i ai e lē faavaeina aʻe ai le auala a le Atua mo le faaalia mai po ua valaauina i tatou mo le ola faalelagi. O tane e pei o Mose ma Tanielu e ui sa la tusia ni vaega o le Tusi Paia, peitai o le a faatutūina aʻe i laua i le ola i le lalolagi. E tusa lava po o le lagi po o le lalo-lagi lo tatou faamoemoe, ae o i tatou uma lava ua mauaina meaʻai faaleagaga e ala mai i le vasega ua faamaonia e Ieova, le “auauna faamaoni ma le mafaufau.” (Mataio 24:45-47) Maeu lo tatou loto faafetai mo le poto ua mauaina!

15. O le ā se tasi o meaalofa silisili a le Atua, ma o le ā lau vaaiga i ai?

¹⁵ O se tasi o meaalofa silisili a le Atua o le sauniuniga alofa o le taulaga togiola a Iesu, lea ua tatou maua ai aogā e tusa po o ia i tatou le faamoemoe faalelagi po o le faamoemoe faalelalolagi. Ua alofa tele mai le Atua i le lalolagi o tagata “ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” (Ioane 3:16) Ma o le alofa o Iesu na uunaia ai o ia e “foaiina atu lona ola e fai ma togiola e sui aʻi tagata e toatele.” (Mataio 20:28) E pei ona faamatala mai e le aposetolo o Ioane, o Iesu Keriso “o le togiola . . . mo a tatou agasala [i latou o ē faauuina], e le gata foi i a tatou, a e atoa foi ma agasala a le lalolagi uma lava.” (1 Ioane 2:1, 2) O lea, e tatau ia i tatou uma ona matuā loto faafetai mo lenei sauniuniga alofa mo le faaolataga i le ola e faavavau.b

Po o le a E Faatasi Atu i Ai?

16. O le ā le mea mataina na tupu o le a faamanatuina pe a mavae le goto o le la ia Aperila 11, 1998, ma o ai e tatau ona auai atu i ai?

¹⁶ O le loto faafetai mo le taulaga ua saunia e le Atua e ala i lona Alo e tatau ona uunaia ai i tatou e faatasi atu i Maota o le Malo po o isi nofoaga o le a faapotopoto i ai Molimau a Ieova pe a mavae le goto o le la ia Aperila 11, 1998, ina ia faamanatuina le maliu o Keriso. Ina ua ia faavaeina lenei faamanatuga ma ona aposetolo faamaoni i le po mulimuli o lona soifuaga i le lalolagi, na fetalai ai Iesu: “Tou te faia le mea nei e fai ma faamanatuga ia te au.” (Luka 22:19, 20; Mataio 26:26-30) O se vaega toaitiiti o loo totoe o ē faauuina o le a latou taumafaina le areto lē faafefeteina, o loo fai ma sui o le tino faaletagata lē agasala o Iesu, ma le uaina ʻaʻalu mūmū e lei suia, o loo faaatagia mai ai lona toto na faamaligiina i le taulaga. E na o Kerisiano faauuagagaina e tatau ona taumafaina auā ua na o i latou o loo iai i le feagaiga fou ma i le feagaiga o le Malo ma ua ia i latou le molimau maumaututū a le agaga paia o le Atua faapea o lo latou faamoemoe e mo le lagi. E faitau miliona isi tagata o le a auai o ni ē molimauina ma le faaaloalo, ua latou loto faafetai ona o le alofa ua faaalia mai e le Atua ma Keriso i le fesootai atu i le taulaga a Iesu lea ua mafai ai ona maua le ola e faavavau.—Roma 6:23.

17. O le ā e tatau ona tatou manatua e tusa ai o le faauuina e le agaga?

¹⁷ O talitonuga faalotu na iai muamua, o lagona ootia malolosi ona o sē pele ua maliu, o faigata o loo fesagaia i aso nei i le olaga i aso taitasi, po o le lagona faapea ua maua se faamanuiaga faapitoa mai ia Ieova, e ono taitaia ai nisi e faamautinoa ma le sese faapea o i latou e mo le olaga faalelagi. Peitai e tatau ia i tatou uma lava ona manatua, e lē o poloaiina i tatou e le Tusi Paia e taumafa le areto ma le uaina o le Faamanatuga e faaalia ai lo tatou loto faafetai mo le taulaga togiola a Keriso. E lē gata i lea, o le faauuina e le agaga “e le mai le ua manao, e le mai le ua tausinio, a e mai le Atua,” o Lē na aveina Iesu e fai mona Atalii faaleagaga ma o lē na ia aumaia na o le 144,000 isi atalii i le mamalu.—Roma 9:16; Isaia 64:8.

18. O ā faamanuiaga o loo tu mai luma mo le toatele o i latou o loo auauna atu ia Ieova i aso nei?

¹⁸ O le ola e faavavau i se lalolagi parataiso o le faamoemoe lea ua foai mai e le Atua mo se vaega toatele o le fanau a tagata o loo auauna ia Ieova i nei aso e gata ai. (2 Timoteo 3:1-5) E lē o toe mamao, ona latou olioli lea i lenei parataiso matagofie. Ona vaavaaia ai lea e alii mataupufai o le lalolagi i lalo o le pulega faalelagi. (Salamo 45:16) O le a iai tulaga filemu a o usitaia e tagata e aināina le lalolagi tulafono a le Atua ma aʻoaʻoina atili i ala o Ieova. (Isaia 9:6, 7; Faaaliga 20:12) O le a anoanoai galuega e faia, i le fausiaina o fale ma faatoʻa le eleele. (Isaia 65:17-25) Ma seʻi manatu i ni toe faatasiga fiafia o aiga a o toe faaolaina mai ē sa maliliu! (Ioane 5:28, 29) Pe a mavae le tofotofoga faaiu, ona aveesea lea o mea leaga uma lava. (Faaaliga 20:7-10) Pe a mavae lena, ona faavavau ai lea ona faatumuina le lalolagi i tagata lelei atoatoa o ē ua ‘tuu saunoa mai le faapologaina i le iu vale ma o ē ua iai le saolotoga mamalu o le fanau a le Atua.’

[Faaopoopoga i lalo]

E Faapefea Ona E Tali?

◻ O le ā le uiga o le “ave fua ia le vai o le ola”?

◻ E tusa lava po o le lagi po o le lalolagi lo tatou faamoemoe, ae o ā mafuaaga ua ia i tatou e loto faafetai ai i le Atua?

◻ O le ā le faamanatuga faaletausaga e tatau ona tatou auai uma atu i ai?

◻ O le ā le lumanai o taofia mo le toatele o tagata o Ieova?

[Ata i le itulau 18]

E faitau miliona tagata ua amata ona latou ‘ave fua le vai o le ola.’ Po o e aofia ai ia i latou na?