E Tatau i Kerisiano Moni Uma Ona Avea ma Faievagelia
“Ia fai le galuega a le faievagelia [po o le misionare].”—2 TIMOTEO 4:5, NW, faamatalaga i lalo.
1. O le ā le tala lelei na talaʻiina e le au faievagelia i le uluai senituri?
O LE Ā le uiga i aso nei o le avea ma faievagelia? Po o oe o se tasi o i latou? O le upu “faievagelia” e sau mai le upu Eleni o le eu·ag·ge·li·stesʹ, o lona uiga “o se tagata talaʻi o le tala lelei.” Mai i le faavaeina o le faapotopotoga Kerisiano i le 33 T.A., na faamatilatila ai e le tala lelei faa-Kerisiano auala o le faaolataga a le Atua ma folafola mai ai faapea o le a toe afio mai Iesu Keriso i se taimi mulimuli ane e amataina lana pulega o le Malo i luga o tagata.—Mataio 25:31, 32; 2 Timoteo 4:1; Eperu 10:12, 13.
2. (a) Ua faapefea ona faateleina mea e aofia ai i le tala lelei i o tatou aso? (e) O le ā le avega tauave ua faaee atu i Kerisiano moni uma i aso nei?
2 Mai i le 1914 ma agaʻi mai ai, na amata ai ona aliaʻi mai faamaoniga faapea o le faailoga na tuuina mai e Iesu e faatatau i lona toe afio mai ma lona faatasi mai lē vaaia ua amata ona faataunuuina. (Mataio 24:3-13, 33) O lea la, e mafai foi ona aofia ai i le tala lelei le faaupuga “ua latalata le malo o le Atua.” (Luka 21:7, 31; Mareko 1:14, 15) E moni, ua oo mai le taimi e faia ai se faataunuuga aupito sili o le valoaga a Iesu o loo faamauina i le Mataio 24:14 e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” O lea, o le galuega faaevagelia, ua aofia ai nei ma le folafolaina atu ma le maelega o le Malo o le Atua ua faavaeina, faapea ma faamanuiaga ua lē o toe mamao ona ia aumaia lea i tagata usiusitai. Ua poloaiina Kerisiano uma lava ina ia faia lenei galuega ma ia ‘faia soʻo.’—Mataio 28:19, 20; Faaaliga 22:17.
3. (a) O le ā le uiga faaopoopo o le upu “faievagelia”? (Tagai i le Insight on the Scriptures, Tusi 1, itulau 770, vaega 2, palakalafa 2.) (e) O ā fesili ua lagā e lenei mea?
3 E faaopoopo i le talaʻiina o le tala lelei i le lautele, ua faaaogā e le Tusi Paia le faaupuga “faievagelia” i se uiga faapitoa e faatatau ia i latou o ē ua tuua aiga ma nuu, ae ō e talaʻi le tala lelei i vaega o oganuu e leʻi talaʻia muamua i ai le tala lelei. I le uluai senituri, sa toatele lava misionare faievagelia e pei o Filipo, Paulo, Panapa, Sila, ma Timoteo. (Galuega 21:8; Efeso 4:11) Ae faapefea o tatou taimi faapitoa talu mai le 1914? Po ua faaavanoa ea e tagata o Ieova i aso nei i latou lava o ni tagatanuu faapea ma misionare e avea ma faievagelia?
Agaʻigaʻi i Luma Talu mai le 1919
4, 5. O ā faamoemoega mo le galuega faaevagelia ina ua faatoʻā mavae le 1914?
4 Ina ua lamalama faaiʻu le Taua Muamua a le Lalolagi i le 1918, na tofo ai auauna a le Atua i le faateleina o teteega mai aposetate ma taʻitaʻi lotu o Kerisinetoma ma a latou au faipolotiki. O le mea moni, na toetoe lava a taofia le galuega faaevagelia a Kerisiano moni ia Iuni 1918 ina ua faafalepuipuiina mo le taʻi 20 tausaga ē na taʻimua o le Sosaiete o le Olo Matamata i le Iunaite Setete ona o tuuaʻiga sese. Pe sa manuia ea fili o le Atua i le taofia o le talaʻiina o le tala lelei?
5 Ma le leʻi faatalitalia, ia Mati 1919 na toe tatalaina ai alii ofisa o le Sosaiete ma mulimuli ane, sa aveesea ma taʻumamāina ai i latou mai i tuuaʻiga sese na ala ai ona tuu i latou i le falepuipui. Faatasi ma lo latou saolotoga fou ua maua, na iloa ai e nei Kerisiano faauuina faapea o loo tele pea le galuega e tatau ona faia, a o leʻi aoaoina faatasi i latou i lo latou taui faalelagi o le avea ma suli faatasi i le Malo o le Atua.—Roma 8:17; 2 Timoteo 2:12; 4:18.
6. Na faapefea ona agaʻigaʻi i luma le galuega faaevagelia i le va o le 1919 ma le 1939?
6 I tuā i le 1919 sa itiiti ifo i le 4,000 ē na lipotia mai faapea sa latou auai i le faasalalauina atu o le tala lelei. I le isi luasefulu tausaga na sosoo ai, sa ofoina mai ai e ni nai tagata i latou lava e fai ma misionare faievagelia, ma na aauina atu ai nisi i atunuu o Aferika, Asia, ma Europa. I le 1939, ina ua mavae le 20 tausaga o le talaʻiina o le Malo, na faateleina ai Molimau a Ieova i le sili atu i le 73,000. O lenei faatelega mataʻina, na faataunuuina e ui lava i le tele o sauāga, sa tutusa lava ma le mea na tupu i uluai tausaga o le faapotopotoga Kerisiano.—Galuega 6:7; 8:4, 14-17; 11:19-21.
7. I le tausaga e 47 T.A. ma le 1939, o ā tulaga tutusa na iai e faatatau i le galuega Kerisiano faaevagelia?
7 Ae peitai, o le toatele o Molimau a Ieova i lena taimi sa uaʻi atu lava i na o atunuu o tagata Porotesano e tautala i le faa-Peretania. O le mea moni, e sili atu i le 75 pasene o le 73,000 o ē folafola o le Malo na ō mai mai Ausetalia, Peretania, Kanata, Niu Sila, ma le Iunaite Setete. E pei o le mea na tupu i le tusa ma le 47 T.A., sa manaomia se mea e faalaeiauina ai le au faievagelia ina ia sili ona uaʻi totoʻa atu i atunuu o le lalolagi na e tau lē galueaiina.
8. E oo mai i le 1992, o le ā se mea na faataunuuina e le Aʻoga i Kiliata?
8 O faasāsāaga i taimi o taua ma sauāga sa leʻi taofia ai le agaga paia mamana o Ieova mai le faagaoioia o ana auauna e sauniuni mo se faatelega e sili ona telē. I le 1943, a o vevela le Taua Lona Lua a le Lalolagi, na faavaeina ai e le faalapotopotoga a le Atua le Aʻoga Faale-Tusi Paia a le Olomatamata i Kiliata (Watchtower Bible School of Gilead) ma le faanaunauga e faasalalauina atu ai i se tulaga e sili ona lautele le tala lelei. E oo mai ia Mati 1992, ua uma ona aauina atu e lenei aʻoga le 6,517 misionare i atunuu eseese e 171. E faaopoopo atu i ai, sa aʻoaʻoina tane mo le vaaia o lālā o le Sosaiete o le Olo Matamata i atunuu ese. I le 1992 lava ia, mai i sui sooupu o Komiti o Lālā e 97, e toʻa 75 na aʻoaʻoina i Kiliata.
9. O ā polokalama tau aʻoaʻoga na fesoasoani i le faaauilumaina o le galuega faaevagelia ma le faia o soʻo?
9 E ese mai ai i le Aʻoga i Kiliata, ua iai foi isi polokalama tau aʻoaʻoga ua faaauupegaina ai tagata o Ieova ina ia faalauteleina ma faaleleia ai la latou galuega faaevagelia. Mo se faaaʻoaʻoga, o loo faia le Aʻoga o le Faiva Faatiokarate i faapotopotoga a Molimau a Ieova i le lalolagi aoao. O lenei faatulagaga, faatasi ma le Sauniga o le Auaunaga i vaiaso taitasi, ua aʻoaʻoina ai le faitau miliona o le au talaʻi o le Malo ina ia uigā i le faiva i le lautele. Ua iai foi le Aʻoga o le Faiva o le Malo, ua saunia ai aʻoaʻoga tāua mo toeaina ma auauna o le faiva ina ia mafai e i latou nei ona tausia lelei le tuputupu aʻe o faapotopotoga. Ua fesoasoani le Aʻoga o le Auaunaga faa-Paeonia i le toatele o le au faievagelia faataimi atoa ina ia sili ona uigā i la latou galuega talaʻi. Talu ai nei lava, na faavaeina ai le Ministerial Training School (le Aʻoga e Aʻoaʻoina ai Faifeau) i atunuu eseese e fesoasoani ai i toeaina ma auauna o le faiva o ē e leʻi faaipoipo i aso nei ina ia avea o ni Timoteo faaonapo nei.
10. O le ā le iʻuga o le aʻoaʻoga e sili ona lelei na saunia e ala i le faalapotopotoga a le Atua? (Ia faaaofia ai ma faamatalaga i le pusa.)
10 O le ā ua iʻu i ai nei toleniga uma lava? I le 1991, na ausia ai e Molimau a Ieova se tumutumuga e sili mamao atu i le fa miliona tagata o loo folafolaina ma le mataalia le Malo i atunuu e 212. Ae peitai, e lē pei o le tulaga na iai i le 1939, e sili atu i le 70 pasene o i latou nei e mai le Katoliko, le Lotu Orthodox, o ē lē ni Kerisiano, po o isi atunuu, e tau lē iloa tautatala i le faa-Peretania.—Tagai i le pusa, “Faatelega Talu Mai le 1939.”
Le Pogai ua Taulau Ai
11. Ia te ai na tuu atu i ai e le aposetolo o Paulo le viiga ina ua taulau i le avea o ia o se faifeau?
11 E lē o viia ai Molimau a Ieova i lenei faatelega. Na i lo o lea, latou te manatu i la latou galuega e pei ona manatu i ai le aposetolo o Paulo, e pei ona ia faamatala mai i lana tusi i tagata Korinito. “O ai foi Paulo? O ai ea Apolo? E le o auauna lava ea na outou faatuatua ai, pei ona foai e le Alii taitasi ia te i maua? Na ou totōina, na faasūsūina e Apolo; a e peitai o le Atua ua faatupuina. O lenei, e le o lē totō, e le o lē faasusū; ae peitai o le Atua o le na te faatupuina. Auā o le au faigaluega i matou faatasi ma le Atua; o outou o le faatoaga a le Atua o outou o le fale o fai o le Atua.”—1 Korinito 3:5-7, 9.
12. (a) O le ā le vaega a le Afioga a le Atua i le faataulauina o le galuega faievagelia a Kerisiano? (e) O ai ua tofia e avea ma Ulu o le faapotopotoga Kerisiano, ma o le ā le auala tāua e tasi e faatino ai lo tatou gauai atu i lona tulaga ulu?
12 E lē taumatea, o le faatelega mataʻina na tofo i ai Molimau a Ieova ua mafua ona o le faamanuiaga mai le Atua. O le galuega lea a le Atua. I le iloaina e uiga i lenei mea moni, ua faaauau ai ona latou faasaga e suesueina e lē aunoa le Afioga a le Atua. O mea uma na latou aʻoaʻoina i la latou galuega faaevagelia, sa faavae mai i le Tusi Paia. (1 Korinito 4:6; 2 Timoteo 3:16) O le isi pogai autū na taulau ai la latou galuega faaevagelia, ona o lo latou amanaia atoatoa o Lē na tofia e le Atua e avea ma Ulu o le faapotopotoga, o le Alii lea o Iesu Keriso. (Efeso 5:23) Na faaalia lenei mea e Kerisiano o le uluai senituri e ala i lo latou felagolagomai ma i latou na tofia e Iesu e avea ma aposetolo. O nei tane, faatasi ma isi toeaina o le faapotopotoga i Ierusalema, na faia aʻe ai le vaega pule o Kerisiano i le uluai senituri. Mai le lagi, na faaaogā ai e le Alii o Iesu Keriso lenei vasega o Kerisiano taʻumatuaina ina ia faaleleia finauga ma tuuina atu taʻiala i le galuega faaevagelia. O le lagolagosua maelega a Paulo faatasi ma lenei faatulagaga mai le Atua na iʻu ai i ni faatelega i faapotopotoga na ia asiasi atu i ai. (Galuega 16:4, 5; Kalatia 2:9) E faapena foi i aso nei, o le taofimau i le Afioga a le Atua ma felagolagomai ma le maelega ma taʻiala ua aumaia e le Vaega Pule, ua faamautinoa atu ai i faievagelia Kerisiano le taulau i la latou faiva.—Tito 1:9; Eperu 13:17.
Ia Manatu e Sili Isi
13, 14. (a) O le ā le fautuaga na avatu e le aposetolo o Paulo e pei ona faamauina i le Filipi 2:1-4? (e) Aiseā e tāua ai le manatua o lenei fautuaga a o auai i le galuega faaevagelia?
13 Sa faaalia e le aposetolo o Paulo le alofa moni mo ē saili i le upu moni, ma na te leʻi faaalia foi se uiga fiasili po o le faailoga lanu. I lea, na mafai ai ona ia fautuaina uso talitonu ina ia ‘manatu e sili isi ia te i latou.’—Filipi 2:1-4.
14 E faapena foi ona lē iai i le au faievagelia o Kerisiano moni i aso nei se uiga fiasili, pe a feutagai ma tagata o isi lanu ma talaaga eseese. Na faapea mai se tasi o Molimau a Ieova mai le Iunaite Setete sa tofia e avea ma misionare i Aferika e faapea: “Faatoʻā ou iloa lea e lē sili i matou. Atonu e tele a matou tupe, ma faapea foi e lelei a matou aʻoaʻoga, ae e iai o latou uiga e sili ai i latou [tagata o le atunuu] ia i matou.”
15. E mafai faapefea e i latou ua tofia i le galuega i atunuu ese ona faaalia le faaaloalo moni mo isi soʻo i le lumanai?
15 E moni lava, e ala i le faaalia o le faaaloalo moni mo i latou o tatou tufa atu i ai le upu moni, o le a faigofie ai ia i latou ona talia le feau a le Tusi Paia. E aogā foi pe a faaalia e se misionare faievagelia lona fiafia e nofo faatasi ma tagata o ē ua tofia o ia e fesoasoani atu i ai. Fai mai se misionare ua faamanuiaina o lē na ia faaaluina le 38 tausaga ua mavae i Aferika e faapea: “Sa oo ia te aʻu le lagona faapea o loʻu aiga moni lava lenei, ma o i latou o i le faapotopotoga na tofia i ai aʻu, o oʻu uso ma tuafāfine. Ina ua ou toe foi i Kanata mo se malōlōga, sa ou lagona e pei e lē o soʻu aiga moni lea sa ou iai. Ina ua oo mai le vaiaso mulimuli o loʻu iai i Kanata, sa lē mafai ona tatali loʻu toe fia foi atu i loʻu tofiga. E oo pea lava ia te aʻu lena lagona. Ou te taʻu atu pea i aʻu tagata aʻoga o le Tusi Paia ma uso ma tuafāfine le tele o loʻu fiafia ina ua ou toe foi mai, ma latou te talisapaia loʻu manao e faatasi ma i latou.”—1 Tesalonia 2:8.
16, 17. (a) O le ā le luʻi na talia e le toatele o misionare ma le au faievagelia a le atunuu ina ia sili atu ai ona uigā i la latou faiva? (e) O le ā se mea na tupu i se tasi o misionare ona o le tautala i le gagana a le atunuu?
16 Pe a latou iloa o iai i a latou oganuu masani ni tagata se toatele e ese a latou gagana, ona faia lea e nisi se taumafaiga ina ia aʻoaʻoina lena gagana, e faaalia ai lo latou manatu faapea e iai isi e sili atu ia i latou. Ua mātauina foi e se tasi misionare faapea: “I Aferika i saute, e iai se lagona i nisi taimi o le lē maufaatuatuaina i le va o tagata Aferika ma tagata Europa. Ae o lo matou tautatala i le gagana a le atunuu ua vave ai ona aveesea lena faalogona.” O le tautala i le gagana a i latou o matou tufa atu i ai le tala lelei, o se fesoasoani tele lava lea i le pāʻia o o latou loto. E manaomia ai se galuega mamafa ma le tausisi pea i le loto maulalo. Fai mai se misionare i se atunuu i Asia e faapea: “O le faia pea o mea sese ma foliga mai e toē ai ia te oe ona o au mea sese, e mafai ona avea o se tofotofoga mo oe. Atonu e foliga mai e faigofie ona faamaamulu ai.” Ae peitai o le alofa i le Atua ma tuaoi, na fesoasoani i lenei misionare e finafinau ai.—Mareko 12:30, 31.
17 I se tulaga malamalama, e masani ona faagaeetia tagata pe afai e taumafai se tagata ese e tufa atu le tala lelei ia i latou i la latou gagana. I nisi taimi, e iʻu ai i ni faamanuiaga e leʻi faatalitalia. Na talanoa se misionare o le nuu o Aferika o Lesotho i se tasi fafine i le gagana Sesotho, o le fafine lea e galue i se fale e suʻi ai teuteu lanu eseese. O se minisita o le malo mai se isi atunuu o Aferika sa malaga maimoa i ai i lenei nofoaga, ma sa ia faalogo atu ai o faia lenei talanoaga. Sa alu atu le minisita ma faamālō atu ma le mafana i le tuafafine, ae sa amata ona ia talanoa mai i le alii minisita o le malo i le gagana a le minisita. Ona faapea atu lea o le minisita: “Aiseā e te lē alu atu ai i [loʻu atunuu] ma galue i o matou tagata, ona o lena foi e te iloa tautala i le gagana Swahili?” Sa tali atu ma le poto le misionare faapea: “O se mea matuā lelei tele lena. Ae o aʻu o se tasi o Molimau a Ieova, ma i le taimi nei o loo faasā ai la matou galuega i lo outou atunuu.” Na tali mai le minisita: “Faamolemole aua neʻi oo ia te oe le lagona faapea o i matou uma e tetee i la outou galuega. E toatele lava i matou e fiafia i Molimau a Ieova. Atonu i se aso o le a mafai ai ona e aʻoaʻo e aunoa ma le faalavelaveina e o matou tagata.” I se taimi mulimuli ane, sa matuā faafiafiaina le misionare e iloa faapea ua tuuina atu i Molimau a Ieova se saolotoga mo tapuaiga i lena lava atunuu.
Lotomalie e Faamatuu atu Aiā
18, 19. (a) I le ā le auala tāua na tauivi ai Paulo e faataʻitaʻi i lona Matai, o Iesu Keriso? (e) Faamatala se mea na tupu (o loo i le parakalafa po o se mea na tupu ia te oe lava ia po o se mea foi na e iloa) ina ia faaalia ai le tāua o le aloese mai so o se pogai e faatausuai ai i latou o ē o tatou tufa atu i ai le tala lelei.
18 Ina ua tusi mai le aposetolo o Paulo e faapea: “Ia outou faaaʻoaʻo mai ia te au, pei o aʻu ia Keriso,” na seʻi faatoʻā uma lava ona ia talanoaina le manaomia ona aloese mai le faatausuaiina o isi, i le faapea mai: “Pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua. Aua le avea outou ma mea e tautevateva ai Iutaia, po o Eleni, po o le ekalesia a le Atua; faapei o aʻu nei foi, ou te faafiafia atu i tagata uma i mea uma lava, o loo le sailia e aʻu soʻu lava lelei, a o lo le toatele, ina ia faaolaina ai i latou.”—1 Korinito 10:31-33; 11:1.
19 O tagata faievagelia e pei o Paulo, o ē ua loto malilie e faia ni faataulagaina mo le lelei o ē o latou talaʻi atu i ai, ua latou seleseleina faamanuiaga. Mo se faaaʻoaʻoga, i se tasi atunuu i Aferika, na ō atu ai se ulugalii misionare i se tasi o fale talimalō mo se taumafataga e faamanatu ai le aso o la laua faaipoipoga. Muamua na la faanaunau e ota se uaina faatasi ma le meaʻai, ona e lē o taʻusalaina i le Tusi Paia le faaaogāina tatau o le ʻava malosi. (Salamo 104:15) Ae na la toe manatu e aua neʻi faia faapea ina neʻi tupu ai ni manatu tetee i tagata o le atunuu. “I se taimi mulimuli ane,” na manatua ai e le tane faapea, “sa ma feiloai atu i se tamaloa o lē o se tagata kuka i le fale talimalo, ma sa amata ai se suesuega faale-Tusi Paia ma ia. Mulimuli ane lava na ia taʻu mai ia i maʻua faapea: ‘E te lua manatua le taimi ina ua lua ō mai i le fale talimalō mo se taumafataga? Sa matou iai uma lava i tua o le faitotoa o le umukuka ma vaavaai atu ia te oulua. E te lua iloa, na taʻu mai e misionare a lotu ia i matou faapea o se mea sese mo i matou le inu o le ʻava malosi. Ae pe a latou ō mai i le fale talimalō, e saoloto lava i latou e ota uaina. O lea la na matou filifili ai faapea, afai e ota sa oulua uaina, o le a matou lē faalogo loa ia te oulua pe a oulua ō mai e talaʻi mai ia i matou.’” I aso nei, ua avea ai lena tagata kuka ma isi sa faigaluega i lena fale talimalō o ni Molimau papatisoina.
O loo Tele Pea Mea e Fai
20. Aiseā e matuā tāua ai lo tatou onosai i le avea o ni faievagelia maelega, ma o le ā le faaeaga olioli ua maua e le toatele?
20 A o vave ona oo mai le faaiʻuga o lenei faiga o mea, o loo iai pea le toatele o loo moomoo e fia faalogo i le tala lelei, ma ua sili atu nei ona faanatinati na i lo muamua mo Kerisiano uma ina ia onosai ma tumau e avea o ni faievagelia faamaoni. (Mataio 24:13) Pe e mafai ona faatelē lou sao i lenei galuega e ala i le avea ma faievagelia i se uiga faapitoa e pei o Filipo, Paulo, Panapa, Sila, ma Timoteo? E toatele lava o loo faia se mea faapena e ala i le auai i le faapaeonia ma ua faaavanoaina i latou e auauna i nofoaga o loo sili ona tele ai le manaoga.
21. I le ā le auala ua ‘tatalaina ai nei se faitotoa vatele mo le galuega’ i tagata o Ieova?
21 Talu ai nei, na tatalaina ai ni laufanua tetele mo le galuega faaevagelia i atunuu o Aferika, Asia, ma Europa i Sasae, i mea na uluai faasāsā ai le galuega a Molimau a Ieova. E pei ona sa iai i le aposetolo o Paulo, ‘ua tatalaina se faitotoa lautele mo le galuega’ i tagata o Ieova. (1 Korinito 16:9) Mo se faaaʻoaʻoga, o misionare faievagelia o ē na seʻi faatoʻā taunuu atu talu ai nei i le atunuu o Aferika o Mozambique, ua lē lava lo latou taimi e faia ai suesuega faale-Tusi Paia ma tagata uma. Maeu le fiafia ona sa mafai ona aloaia faaletulafono le galuega a Molimau a Ieova i lena atunuu ia Fepuari 11, 1991!
22. Po o lelei ona galueaiina la tatou oganuu pe leai foi, o le ā e tatau ia i tatou uma lava ona naunau e faia?
22 I atunuu e maua ai pea lo tatou saolotoga o le tapuaiga, o loo olioli ai foi o tatou uso i faatelega faifai pea. Ioe, so o se mea tatou te mau ai, o loo “tele pea mea e fai i le galuega a le Alii.” (1 Korinito 15:58, NW) Afai o le tulaga lena, seʻi o tatou faaauau ia e lē aunoa i le faaaogāina ma le atamai o aso o totoe, a o tatou taitoatasi ona ‘faia le galuega a le faievagelia, i le faataunuuina atoatoa o la tatou faiva.’—2 Timoteo 4:5; Efeso 5:15, 16.
Pe Mafai ona E Faamatala?
◻ O le ā le mea e taʻu o le faievagelia?
◻ Na faapefea ona faateleina mea e aofia ai i le tala lelei ina ua mavae le 1914?
◻ Na faapefea ona agaʻigaʻi i luma le galuega faaevagelia talu mai le 1919?
◻ O ā vala autū na saosaolaumea i le faataulauina o le galuega faaevagelia?
[Pusa i le itulau 23]
FAATELEGA TALU MAI LE 1939
Seʻi manatu i faaaʻoaʻoga mai konitineta e tolu na aauina atu i ai misionare sa aʻoaʻoina i Kiliata. I tuā i le 1939 sa na o le 636 ē folafola o le Malo na lipotia mai i Aferika i Sisifo. I le 1991 na faateleina ai lenei fuainumera e sili atu i le 200,000 i atunuu e 12 o Aferika i Sisifo. Sa saosaolaumea foi misionare i faatelega uigaese i atunuu o Amerika i Saute. O le tasi o Pasili, sa faateleina mai le 114 ē folafola o le Malo i le 1939 e oo i le 335,039 ia Aperila 1992. Sa iai foi se faatelega faapena na mulimuli mai ina ua taunuu atu misionare i atunuu o Asia. I le vaitaimi o le Taua Lona Lua a le Lalolagi, na oo ai sauāga ogoogo i se vaega toaitiiti o Molimau a Ieova i Iapani, ma na taofia ai la latou galuega. Ma i le 1949, na taunuu atu ai misionare e toʻa 13 e fesoasoani ina ia toe faamaopoopoina le galuega. I lena tausaga faaleauaunaga, e itiiti ifo i le toasefulu le au talaʻi o le atunuu lava ia na lipotia mai a latou auaunaga i le fanua mo le atunuu atoa o Iapani, ae ia Aperila 1992 sa ausia ai se aofaiga atoa o le au talaʻi e 167,370.
[Pusa i le itulau 25]
KERISINETOMA MA LE FAAFITAULI I LE GAGANA
O nisi o misionare a Kerisinetoma sa latou faia se taumafaiga filigā ina ia aʻoaʻoina se gagana ese, ae o le toatele lava sa latou faatalitalia tagata o le atunuu ina ia tautala i la latou gagana faa-Europa. E pei ona faamatalaina e Geoffrey Moorhouse i lana tusi The Missionaries:
“O le faalavelave, ona o le aʻoaʻoina o se gagana ese sa masani ona manatu i ai, e na o le pau lava lona aogā, e mo le faaliliuina o le Tusi Paia. Sa itiiti foi la se taumafaiga na faia i ai, a lē o tagata taitoatasi ia po o faalapotopotoga o loo faafaigaluegaina i latou, e ao ona faamautinoa ua mafai e se misionare ona tautala ma le sologa lelei i se tagatanuu moni o le atunuu i lana lava gagana auā ua na o lea le auala e mafai ai ona malamalama lelei le tasi tagata i le isi. O misionare uma lava latou te puʻea mai na o nai faaupuga lē atoatoa o le gagana a le atunuu . . . Ma, i lo na mea uma, sa masani ona faia talanoaga i se gagana maulalo po o ni faaupuga lē aogā sa taʻua o le nanu panupanu (pidgin English), ma lona faanaunauga e tatau i se tagata Aferika ona lolo atu o ia lava e tautala i le gagana a se papalagi. O le mea e sili ai ona leaga, ona o le isi lea o mea e faaalia ai le fiasili o lea lanu.”
I le 1922 na faasalalauina ai e le Aʻoga i Asia ma Suesuega Faa-Aferika i Lonetona (School of Oriental and African Studies) se lipoti e uiga i le faafitauli o gagana. Na faapea mai le lipoti: “Ua ia i matou le manatu faapea, o le tulaga faatatau i le tomai ua maua e misionare e uiga i le tautala i le gagana a le atunuu . . . o se mea e matuā faanoanoa ai ma e matuā mataʻutia le maulalo o le tulaga o lea gagana.”
E manatu mamafa pea misionare a le Sosaiete o le Olo Matamata e faapea, o le aʻoaʻoina o le gagana a se atunuu, o se mea ua tatau, auā o le auala lena e mafai ai ona latou maua se fesoasoani ina ia faamatalaina ai lo latou taulau i le galuega faamisionare.