Molimau a Ieova—O le Au Faievagelia Moni
1 Na tuu atu e Iesu Keriso i ona soo uma lava le tiute tauave ina ia avea ma faievagelia, i le faatonu patino atu ia te i latou ina ia talaʻi le tala lelei o le Malo. (Mata. 24:14; Galu. 10:42) Sa faataatia e ona uluai soo le faaaoaoga i lenei mea i lo latou lē mapu e talanoa atu e uiga i le Malo—e lē gata i nofoaga o le tapuaiga ae i so o se mea lava na latou feiloai ai ma tagata, i nofoaga faitele ma i le ō atu mai lea fale i lea fale. (Galu. 5:42; 20:20) I le avea o Molimau a Ieova i aso nei, ua tatou faamaonia ai o i tatou lava o le au faievagelia Kerisiano moni, o loo talaʻiina atu le feau o le Malo i atunuu e 232, ma papatisoina le sili atu i le tasi le miliona soo fou i le na o le tolu tausaga ua mavae! Aisea ua matuā taulau manuia ai la tatou galuega faaevagelia?
2 Ua Faafiafiaina i Tatou i le Tala Lelei: O le au faievagelia o ni tagata talaʻi, po o avefeau ia o le tala lelei. Ona o le tulaga lena o loo iai i tatou, ua tatou maua ai se faaeaga faafiafia loto o le folafolaina atu lea o le Malo o Ieova—ua na o lea le tala lelei moni ua mafai ona ofoina atu i tagata loto mafatia. Ua matuā faagaeetia ai i tatou ona o le malamalama auiluma ua tatou maua e uiga i se lagi fou lea o le a pule ma le amiotonu mai i se lalolagi fou ua faia aʻe i tagata faamaoni i le Parataiso o loo fotuai mai. (2 Pete. 3:13, 17) E na o i tatou lava tagata ua mauaina lenei faamoemoe, ma ua tatou naunau ai e tufa atu i isi.
3 O le Alofa Moni ua Uunaia ai i Tatou: O le galuega faaevagelia, o se galuega faasaoola. (Roma 1:16) O le pogai lena e tatou te matuā olioli ai i le faasalalauina atu o le feau o le Malo. I le avea ma faievagelia moni, e tatou te alolofa ai i tagata, ma o le mea lena ua uunaia ai i tatou ina ia tufa atu le tala lelei ia te i latou—i o tatou aiga, tuaoi, o ē masani, ma le toatele lava o isi ua mafai ona tatou oo atu i ai. O le faia ma le loto atoa o lenei galuega, o se tasi lea o faaaliga aupito sili ona lelei ua mafai ona tatou faailoa atu ai lo tatou alofa moni i isi.—1 Tesa. 2:8.
4 E Fesoasoani le Agaga o le Atua ia i Tatou: Ua faamautinoa mai e le Afioga a le Atua ia i tatou e faapea, afai tatou te faia la tatou galuega o le totō ma faasūsū fatu o le Malo, o Ieova na te “faatupuina.” O le mea tonu lava lena ua tatou vaaia o loo tupu i la tatou faalapotopotoga i aso nei. (1 Kori. 3:5-7) O le agaga o le Atua o loo fesoasoani ia i tatou i la tatou galuega faaevagelia ma oo ai ina matuā faataulauina.—Ioe. 2:28, 29.
5 I le manatu atu i le faalaeiauga o loo i le 2 Timoteo 4:5 ina ia “fai le galuega a lē folafola le tala lelei [faievagelia],” ma ona o lo tatou alofa mo tagata uma, seʻi uunaia ai i tatou e tufa atu le tala lelei fiafia o le Malo i avanoa uma lava, i le mautinoa faapea o le a faaauau ona faamanuia e Ieova la tatou galuega.