Tofo i Aogā o Aʻoaʻoga mai le Atua
“O aʻu o Ieova, o lou Atua, o loo aʻoaʻo ia te oe i mea e aoga.”—ISAIA 48:17.
1. O le a faapefea i tatou pe a tatou faatatauina aʻoaʻoga mai le Atua i o tatou olaga?
E SILAFIA e Ieova le Atua le mea e silisili ona lelei. E leai se tasi e sili atu ia te ia i mafaufauga, i upu, po o gaoioiga. Ona o ia o Lē na Foafoaina i tatou, ua ia silafia ai foi o tatou manaoga, ma ia foai tele mai ai. Ua ia silafia lelei lava le auala e faatonuina ai i tatou. Ma pe a tatou faatatauina aʻoaʻoga mai le Atua, ona tatou maua lea o aogā ma tofo ai i le fiafiaga moni.
2, 3. (a) O le ā le manuia semanu e maua e tagata anamua o le Atua, pe ana latou usiusitai i ana poloaiga? (e) O le ā o le a tupu pe a tatou faatatauina aʻoaʻoga mai le Atua i o tatou olaga i aso nei?
2 O aʻoaʻoga mai le Atua ua faaalia ai le faanaunauga sili o le Atua, ina ia alofia e ana auauna mala, ma fiafia ai i le olaga, e ala i le usitaia o ana tulafono ma mataupu silisili. Pe ana usiusitai ia Ieova ona tagata i aso anamua, semanu latou te tofo i le oa o faamanuiaga, auā na ia fetalai atu ia i latou e faapea: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai. E! ana uai mai ou taliga i aʻu poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami.”—Isaia 48:17, 18.
3 Semanu e maua e tagata anamua o le Atua ni aogā mo i latou lava, pe ana fai sa latou uai atu i ana poloaiga ma faatonuga. Na i lo o le mafatia i mala i pulega a Papelonia, na semanu latou te maua le filemu ma le ola tuluʻi e matuā tumu, e loloto, ma sua pea e pei o se vaitafe. E lē gata i lea, o a latou gaoioiga amiotonu na semanu e lē mafaitaulia e pei o peau o le sami. E faapena foi, pe afai tatou te faatatauina aʻoaʻoga mai le Atua i o tatou olaga, e mafai ai ona tatou tofo i le tele o ona aogā. O ā nisi o nei aogā?
E Suia ai Olaga
4. Ua faapefea ona aafia ola o le toatele o tagata ona o aʻoaʻoga mai le Atua?
4 Ua aogā aʻoaʻoga mai le Atua i le toatele o tagata, e ala i le suia ai o o latou olaga i se tulaga lelei. O i latou e faatatauina faatonuga a Ieova, ua latou lafoaia “galuega a le tino,” e pei o amioga lē taupulea, le ifo i tupua, o faiga faataulaitu, le femisai, ma le loto leaga. Na i lo o lea, ua latou faaalia mai fua o le agaga, o le alofa, le olioli, le filemu, le onosai, le agalelei, le mataalofa, le faamaoni, le agamalu, ma le lē gaoia. (Kalatia 5:19-23) Ua latou utagia foi le fautuaga i le Efeso 4:17-24, o i inā ua uunaia ai e Pauro uso talitonu ina ia aua neʻi savavali faapei ona faia e nuu ese, o loo savavali i le valea o o latou loto, ma i le pouliuli o o latou mafaufau, ua liliu ese mai le ola o i le Atua. I le lē taaina e o latou loto vālea, ua ‘tuu ese ai e tagata e pei o Keriso, le tagata tuai e tusa ma a latou amioga faaanamua, ae ua faafouina i le toe fuataiina o o latou mafaufau.’ Ua latou ‘oofu i le tagata fou na faia e tusa ma le finagalo o le Atua i le amiotonu moni ma le faamaoni.’
5. Ua faapefea ona suia ala o loo uia e tagata ona o aʻoaʻoga mai le Atua?
5 O se aogā lelei o le faatatauina o aʻoaʻoga mai le Atua, ua faailoa mai ai ia i tatou le auala e savavali ai ma le Atua. Afai tatou te savavali ma Ieova, e pei ona sa faia e Noa, ona tatou mulimuli ai lea i le auala o le olaga na faataatia e lo tatou Aʻoaʻo Sili. (Kenese 6:9; Isaia 30:20, 21) O tagata o nuu ese ua “savavali i le valea o latou loto,” e pei ona fai mai ai le aposetolo o Pauro. Ma pagā le valea o nisi o tusitusiga a na tagata! I le matauina o tusitusiga a nisi i le pa i Pomepei, na tusia ai e se tasi tagata matamata e faapea: “Auē! le pa e, o se mea e ofo ai, lou lē solo i lalo ona o le mamafa o na mau tusitusiga valea.” Ae e leai se valea i ‘aʻoaʻoga a Ieova’ ma le galuega talaʻi o le Malo ua ia faia. (Galuega 13:12) E ala i lena galuega, ua fesoasoani atu ai i tagata o ē alolofa i le upu moni ina ia gaoioi ma le atamai. Ua aʻoaʻoina i latou i le auala e taofia ai le toe savavali i o latou ala agasala, ona o le lē malamalama i fuafuaga a le Atua. Ua lē o toe pouliuligia ai o latou mafaufau, ua lē o toe uunaia foi i latou i le valea o o latou loto e saili atu i sini e lē aoga.
6. O le ā le faiā o loo iai i le va o lo tatou usiusitai i aʻoaʻoga a Ieova, ma lo tatou fiafia?
6 Ua aogā foi aʻoaʻoga mai le Atua ia i tatou, ua tatou faamasani ai ia Ieova ma ana feutagaiga. O lena poto tatou te atili vavalalata atu ai i le Atua, e faateleina ai lo tatou alofa ia te ia, ma atili ai ona tatou naunau e usiusitai ia te ia. Ua faapea mai le 1 Ioane 5:3: “O lenei lava le alofa i le Atua, ia tatou tausi i ana poloaiga; e lē mamafa foi ana poloaiga.” Tatou te gauai foi i poloaiga a Iesu auā ua tatou iloa o ana aʻoaʻoga e mai le Atua. (Ioane 7:16-18) O lena usiusitai e puipuia ai i tatou mai le faaleagaina faaleagaga ma faateleina ai lo tatou fiafia.
Se Faamoemoe Moni i le Olaga
7, 8. (a) O le ā lo tatou malamalamaga e tatau ona iai i le Salamo 90:12? (e) E mafai faapefea ona tatou maua se loto e poto?
7 Ua aogā foi ia i tatou aʻoaʻoga a Ieova, i le faasino mai ia i tatou o le auala e faaaogā ai o tatou olaga i se tulaga e iai se faamoemoe. O le mea moni, ua faailoa mai ia i tatou e aʻoaʻoga mai le Atua le auala faapitoa e faitau ai o tatou aso. Ua iai i le 70 tausaga o le olaga o se tagata, le tusa ma le 25,550 aso. O se tagata ua 50 ona tausaga, ua uma ona ia faaaluina le 18,250 aso o na tausaga, ma o le 7,300 o ona aso o totoe o loo faamoemoe i ai, e foliga mai e matuā itiiti lava. E ao ai la ona ia matuā talisapaia nei le pogai na tatalo ai le perofeta o Mose i le Atua i le Salamo 90:12: “Ia faapea ona e aʻoaʻo mai ia i matou e faitauina o matou aso, ina ia maua ai le poto i o matou loto.” Ae o le ā na uiga i ai nei upu a Mose?
8 Sa leʻi faauigaina upu a Mose e faapea o le a faaalia mai e le Atua le aofaiga tonu o aso o olaga o tagata taitoatasi o Isaraelu. E tusa ai ma le Salamo 90, fuaiupu 9 ma 10, sa iloa lelei e lena perofeta Eperu e faapea o le umi o le olaga o se tagata atonu e 70 po o le 80 tausaga—e matuā puupuu lava. Ua faaalia manino mai ai la i upu a le Salamo 90:12 le faanaunauga na tatalo ai Mose e faapea, ia faailoa mai e Ieova pe aʻoaʻo mai o ia ma Ona tagata ina ia faaalia le atamai i le faatāuaina o ‘aso o o latou tausaga’ ma faaaogā ai i se auala e talia e le Atua. Ia, ae faapefea la i tatou? Pe tatou te talisapaia ea aso tāua taitasi? Po o tatou maua ea se loto e poto e ala i le faaaluina o aso taitasi i se auala aogā mo le viiga o lo tatou Aʻoaʻo Sili, o Ieova le Atua? Ua fesoasoani ia i tatou aʻoaʻoga mai le Atua e faia ai le mea tonu lava lena.
9. O le ā e mafai ona faatalitalia pe afai tatou te iloa ona faitauina o tatou aso mo le viiga o Ieova?
9 Afai tatou te iloa faitau o tatou aso mo le viiga o Ieova, o le a mafai ai la ona tatou faaauau pea ona faitauina o tatou aso, auā ua aumaia e aʻoaʻoga mai le Atua le poto mo le ola e faavavau. Na fetalai Iesu: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) O le mea moni, afai tatou te maua le poto uma o le lalolagi, o le a lē aumaia ai ia i tatou le ola e faavavau. Ae e mafai ona tatou maua le ola e faavavau pe afai tatou te maua ma faatatauina le poto saʻo e uiga i peresona aupito sili ona tāua e toalua i le vateatea, ma ia matuā faatinoina le faatuatua.
10. O le ā le faamatalaga a se tasi lomifefiloi e uiga i aʻoaʻoga, ma ua faapefea ona faatusatusa atu lenei mea i aogā o aʻoaʻoga mai le Atua?
10 E tusa lava po o le ā le umi ua tatou ola ai, ae seʻi o tatou manatua lenei aogā mataina o aʻoaʻoga mai le Atua: E avatu ai ia i latou o ē o loo faatatauina, se faamoemoe moni i le olaga. Ua faapea mai le World Book Encyclopedia: “E ao i aʻoaʻoga ona fesoasoani i tagata e avea ai o ni sui aogā o se sosaiete. E ao foi ona fesoasoani ia i latou ia atiina aʻe ai se talisapaia mo lo latou tofi faaleaganuu ua tuuina atu ma ola ai i ni olaga e sili ona faamalie loto.” E aogā foi ia i tatou aʻoaʻoga mai le Atua e fesoasoani ai ia i tatou ina ia ola i ni olaga faamalieina. Na te faatupuina ia i tatou se naunau e talisapaia lo tatou tofi faaleagaga e pei o se nuu o le Atua. Ma e mautinoa, e avea ai i tatou o ni tagata aogā i le sosaiete, auā e mafai ai ona faia sa tatou vaega matuā tāua i le faafetaiaia o manaoga o tagata i le lalolagi aoao. Aisea ua mafai ai ona faapea atu?
Se Polokalama Tau Aʻoaʻoga i le Lalolagi Aoao
11. Na faapefea ona faamatilatila mai e Thomas Jefferson le manaoga mo aʻoaʻoga tatau?
11 Ua matuā ese aʻoaʻoga mai le Atua mai isi polokalama tau aʻoaʻoga, auā ua ia faamalieina manaoga tau aʻoaʻoga o tagata. Sa matauina e Thomas Jefferson, le peresitene lona tolu o le Iunaite Setete le manaoga mo le aʻoaʻoina o tagata. I le aso 13 o Aokuso 1786, i sana tusi na avatu ia George Wythe, o sana uo ma o lē na la sainia faatasi le Maliega o le Tutoatasi (Declaration of Independence), na tusi atu ai Jefferson e faapea: “Ou te manatu, o le tulafono aupito sili ona tāua i la tatou tulafono atoa, o le faalauteleina lea o le poto i tagata. E leai lava se isi faavae mautinoa e mafai ona faia mo le faatumauina o le saolotoga ma le fiafiaga. . . . Laʻu uo pele e, ia e lagolagoina se tauiviga malosi e tetee atu ai i le valea; ia faavaeina ma ia faaleleia le tulafono mo le aʻoaʻoina o tagata lautele. Ia faailoa atu i tagata o lo ta atunuu . . . e faapea o lafoga ia o le a totogiina mo le fuafuaga [tau i aʻoaʻoga] e lē sili aʻe i le na o le tasi vaeafe o le vaega tupe o le a totogiina atu i tupu, i ositaulaga, ma alii sili o ē o le a tutupu mai ia i tatou pe afai ta te tuua tagata ia vālea.”
12. Aisea e mafai ai ona faapea atu o aʻoaʻoga mai le Atua o se polokalama lea ua sili ona manuia ma aogā mo aʻoaʻoga i le lalolagi aoao?
12 Na i lo o le tuua o tagata amiotonu ia vālea, ua saunia ai e aʻoaʻoga a Ieova se polokalama e sili ona lelei mo aʻoaʻoga i le lalolagi aoao ina ia aogā ia te i latou. A o vevela pea le Taua Lona Lua a le Lalolagi mo le 50 tausaga ua mavae, sa iloa ai e le Komiti mo le Toefaavaeina o Aʻoaʻoga a le Iunaite Setete se manaoga faanatinati mo “aʻoaʻoga i le lalolagi aoao.” O loo iai pea lena manaoga, ae ua na o aʻoaʻoga lava mai le Atua, e na o le pau lena o le polokalama mo aʻoaʻoga i le lalolagi aoao o loo taulau manuia. Ua sili foi ona aogā auā ua ia aveesea tagata mai le loto mafatia, ua ia siitia i latou i le tulaga tau amio ma le faaleagaga, ua na laveaiina i latou mai le loto faamaualuga ma le faailoga tagata o le lalolagi, ae avatua ia i latou le poto mo le ola e faavavau. E silisili i lo o mea uma lava, ua aogā lenei polokalama mo tagata i so o se vaipanoa, i le aʻoaʻoina lea o i latou ina ia auauna ia Ieova le Atua.
13. Ua faataunuuina faapefea le Isaia 2:2-4 i aso nei?
13 O aogā o aʻoaʻoga mai le Atua ua tofo i ai le vao o tagata, o ē ua avea nei ma auauna a le Atua. Ua latou iloa o latou manaoga faaleagaga, ma ua latou matuā iloa foi le latalata mai o le aso o Ieova. (Mataio 5:3; 1 Tesalonia 5:1-6) I le taimi lava lenei, “o aso e gata ai,” ua gasolo ane ai nei tagata mai atunuu uma i le mauga o Ieova, o lana tapuaiga mamā. Ua mausali ona faavaeina ma ua faasilisiliina e sili aʻe i isi tapuaiga uma e feteenai ma le finagalo o le Atua. (Isaia 2:2-4) Afai o oe o se Molimau tuuina atu a Ieova, pe e te lē o fiafia ea e faia sou sao faatasi ma muāau ua matuā faatoateleina o loo tapuai atu ia te ia ma maua ai aogā i aʻoaʻoga mai le Atua? Maeu le ofoofogia i le iai faatasi ma i latou o ē ua alalaga atu: “Ia outou vivii atu ia Ioa.”—Salamo 150:6.
Suiga Aogā i o Tatou Loto
14. O le ā le aogā o le usitaia o le fautuaga a Pauro o loo i le 1 Korinito 14:20?
14 Mai le tele o aogā o aʻoaʻoga mai le Atua, ua iai foi ma suiga lelei e mafai ona ia faia i o tatou manatunatuga ma loto. E uunaia ai i tatou e manatunatu i mea e tonu, e mamā, e lelei, ma logoleleia. (Filipi 4:8) Ua fesoasoani aʻoaʻoga a Ieova ia i tatou ina ia tatou mulimuli atu ai i le fautuaga a Pauro e faapea: “Ia outou faatamameamea i le leaga, a ia outou tagata matutua i le mafaufau.” (1 Korinito 14:20) Afai tatou te faatatauina lenei timaiga, o le a tatou lē sailia ai le atamai i mea leaga. Na tusi mai foi Pauro e faapea: “Ia teʻa ma outou upu faafiufiu uma lava, ma le lotoa, ma le ita, ma le leo tele, ma le upu leaga, atoa ma le loto leaga uma lava.” (Efeso 4:31) O le utagiaina o lena fautuaga, o le a fesoasoani ia i tatou e alofia amioga lē mamā ma isi agasala matuia. E lē gata ina aogā lenei mea i le itu faaletino ma le faalemafaufau, ae o le a sili foi ona aumaia ai ia i tatou le olioli i le iloaina o loo tatou faafiafiaina le Atua.
15. O le ā e mafai ona fesoasoani ia i tatou ina ia tumau ai i mafaufauga lelei?
15 Afai tatou te fia tumau i mafaufauga lelei, o se tasi la o fesoasoani, o le alofia lea o ‘aumea leaga e faaleagaina ai amioga lelei.’ (1 Korinito 15:33) I le avea ma Kerisiano, o le a tatou lē faauo atu ai i ē faitaaga, o ē mulilulua, ma isi o ē faia mea sese. O lona uiga moni la, e lē tatau ona tatou auaufaatasi ma na tagata, e ala i le faitau i tala e uiga ia i latou ina ia faafiafiaina ai, po o le matamata foi ia i latou i televise po o ni ata tifaga. E taufaaʻoleʻole le loto, e faigofie lava ona oo i ai se faanaunauga mo le faia o mea leaga, ma faaosoosoina ai e faia. (Ieremia 17:9) O lea la, e tatau ai ona tatou alofia na tofotofoga e ala i le pipii mau atu i aʻoaʻoga mai le Atua. E mafai ona aafia ai mafaufauga o ē “alolofa atu ia Ieova” i se āuga aogā latou te “ʻinoʻino [ai] i mea leaga.”—Salamo 97:10.
16. E mafai faapefea e aʻoaʻoga a le Atua ona aafia ai le agaga o loo tatou faaalia atu?
16 Na faapea atu Pauro i lana aumea faigaluega o Timoteo: “Ia i ai i lou agaga le Alii o Iesu Keriso. Ia ia te outou le alofa tunoa.” (2 Timoteo 4:22) Na faanaunau le aposetolo ina ia faamaonia e le Atua, e ala i le Alii o Iesu Keriso, le uunaiga o le mafaufau lea ua uunaia ai Timoteo ma isi Kerisiano. Ua fesoasoani aʻoaʻoga a le Atua ia i tatou ina ia faaalia atu ai le agaga o le alofa, le agalelei ma le agamalu. (Kolose 3:9-14) Ma maeu le ese mai le toatele o tagata i nei aso e gata ai! Ua latou faamaualuluga, e lē loto faafetai, e aunoa ma se alofa i aiga, e tuumavaega, e lotomaaa, e naunau i mea faafiafia, ma e faatagā fia amio atua i latou. (2 Timoteo 3:1-5) Peitai, a o faaauau ona tatou faatatauina aogā o aʻoaʻoga mai le Atua i o tatou olaga, ona tatou faaalia ai lea o le agaga lea e pele ai i tatou i le Atua ma isi uso a tagata.
E Aogā i Faiā Faaletagata
17. Aisea ua tāua tele ai le felagolagomai ma le loto maulalo?
17 Ua fesoasoani aʻoaʻoga a Ieova ia i tatou e vaai atu ai i aogā o le felagolagomai ma le loto maulalo ma isi uso tapuai. (Salamo 138:6) I le lē pei o le toatele o tagata i aso nei, tatou te lē solia mataupu silisili amiotonu, ae tatou te lolo atu i se maliega. Mo se faataitaiga, ua tele iuga lelei ona o le lolo atu o ovasia tofia i se maliega pe a faia fono a toeaina. E mafai e nei tane ona tautatala atu ma le toafilemu e tusa ai ma le upu moni, ma latou te lē faatagaina foi faalogona ootia e ufitia ai le mea moni pe faapogaia ai se lē autasi. O le a aogā i tagata uma o le faapotopotoga le agaga o le autasi lea ua tatou tofo i ai, pe afai e faatatauina e i tatou uma aʻoaʻoga mai le Atua.—Salamo 133:1-3.
18. Ua fesoasoani aʻoaʻoga mai le Atua ia i tatou ina ia mauaina ai le ā le vaaiga e uiga i o tatou uso talitonu?
18 Ua aogā foi aʻoaʻoga mai le Atua, e fesoasoani ai ia i tatou e mauaina se vaaiga saʻo e uiga i isi uso talitonu. Na fetalai Iesu: “E le mafai se tasi ona sau ia te au, pe a le tosina mai e le Tamā ua auina mai aʻu.” (Ioane 6:44) Ae maise lava talu mai le 1919, na sauniunia ai e Ieova ana auauna ina ia folafola atu ana faamasinoga, ma ua luluina ma gatete le faiga o mea o le lalolagi a Satani ona o lenei lapataiga i le lalolagi aoao. I lea foi taimi, o tagata ua matatau i le Atua—“mea ua manaomia”—ua tosina i latou e le Atua, ina ia latou vavae ese mai nuu ese ae auai atu i Kerisiano faauuina i le faatumuina o le fale o Ieova o lana tapuaiga, i le mamalu. (Hakai 2:7) E mautinoa la, e tatau ona tatou manatu i na tagata manaomia o ni ē ua tosina mai e le Atua e avea o ni aumea mamae.
19. O le ā ua faaalia e aʻoaʻoga a le Atua e faatatau i le foiaina o ni faafitauli totino ma isi uso Kerisiano?
19 Talu ai o i tatou uma e lē lelei atoatoa, o le mea moni la, e lē sologa lelei pea mea i taimi uma. Ina ua latalata o le a tuuvaa ese atu Pauro i lana malaga faamisionare lona lua, sa maumauai ai Panapa ina ia ave Mareko. Sa lē malie i ai Pauro, talu ai sa “alu ese [Mareko] ia te i laua i Pafulia, ma ua le o ma i laua i le galuega.” Ona “tiga tele lea o loto.” Ona ō ai lea o Panapa ma Mareko i Kuperu, ae ua ō faatasi Pauro ma Sila i Suria ma Kilikia. (Galuega 15:36-41) Mulimuli ane, e mautinoa na toe faaleleia lenei feeseeseaiga, auā na toe iai faatasi Mareko ma Pauro i Roma, ma sa tautala lelei foi le aposetolo e uiga ia Mareko. (Kolose 4:10) O se tasi aogā o aʻoaʻoga mai le Atua, ona e faaali mai ai ia i tatou le auala e foia ai ni feeseeseaiga totino i le va o ni Kerisiano, e ala i le mulimuli atu i le fautuaga e pei o lea na taʻua e Iesu i le Mataio 5:23, 24 ma le Mataio 18:15-17.
E Tumau pea le Aogā ma le Manumalo
20, 21. O le ā ua uunaia i tatou e faia, ona o lo tatou talanoaina o aʻoaʻoga mai le Atua?
20 Mai la tatou talanoaga puupuu o nisi o aogā ma manumalo o aʻoaʻoga mai le Atua, e mautinoa ua tatou iloa uma ai le manaomia ona matuā pulunaunau pea i le faatatauina i o tatou olaga. I se agaga o le tatalo, seʻi o tatou faaauau ia ona aʻoaʻo mai i lo tatou Aʻoaʻo Sili. O le a lē pine, ona oo ai lea o aʻoaʻoga mai le Atua i se manumalo e leʻi faapea lava muamua. O le a manumalo pe a mou atu e faavavau ē popoto o lenei lalolagi. (Faatusatusa i le 1 Korinito 1:19.) E lē gata i lea, a o aʻoaʻoina ma faia e le faitau miliona o tagata le finagalo o le Atua, o le a faatumuina ai le lalolagi i le malamalama o Ieova, e pei ona ufitia o le fogatai e le suasami. (Isaia 11:9) Maeu se aogā sili o lenei mea i tagata usiusitai, ma faasilisilia ai Ieova e avea ma Pule Silisili Ese i le Vateatea!
21 O le a tumau pea le aogā ma le manumalo o aʻoaʻoga a Ieova. Pe o le a faaauau ea ona e mauaina mai ai aogā, e pei o se tagata aʻoga maelega o le Tusi Aʻoga sili a le Atua? Po o e ola ea e ogatusa ma le Tusi Paia ma tufa atu ana upu moni i isi ? Afai o lea, e mafai la ona e tulimataia le vaai atu i le manumalo atoatoa o aʻoaʻoga mai le Atua, i le mamalu o lo tatou Aʻoaʻo Sili, o le Alii Pule Silisili Ese, o Ieova.
O le ā ua E Aʻoaʻoina?
◻ O ā suiga e mafai ona faia e aʻoaʻoga mai le Atua i o tatou olaga?
◻ Ua faapefea ona faamalieina e aʻoaʻoga a Ieova manaoga tau aʻoaʻoga?
◻ O ā suiga aogā e mafai ona faia e aʻoaʻoga mai le Atua i o tatou mafaufauga ma amioga?
◻ Ua faamaonia faapefea le aogā o aʻoaʻoga a le Atua e tusa ai ma faiā faaletagata?
[Ata i le itulau 15]
Ua faaalia ia i tatou e aʻoaʻoga mai le Atua le auala tatou te savavali faatasi ai ma le Atua, e pei ona sa faia e Noa
[Ata i le itulau 17]
O loo lolofi atu tagata mai atunuu uma i le mauga o Ieova