E Mafai Ona E Agaigai i Luma Faaleagaga

O LE aogā moni o se mea, e faigata lava ona iloa. E faapena le tulaga e tusa ai ma taimane. E ui lava ina feilafi mai se taimane ua uma ona faaiilaina, ae o se taimane e lei faaiilaina, e na ona feemoemoai laitiiti mai. Ae peitai, i totonu o le taimane lea e lei faaiilaina, o loo taatia mai ai se faamoemoe moni i le iai o se maatāua matuā matagofie.

O Kerisiano, ua pei o ni taimane e lei faaiilaina i le tele o auala. E ui ina ua tatou matuā mamao ese mai i le lelei atoatoa, ae o loo tau aliali mai lava ia i tatou se aogā e tāua ia Ieova. I le pei o taimane, e tofu lava i tatou uma ma uiga e ese ai le tasi mai le isi. Ma e mafai e i tatou taitoatasi uma ona agaigai atili i luma faaleagaga pe afai o le mea lena o faanaunau i ai o tatou loto. E mafai ona faaleleia o tatou uiga, ina ia faasusuluina atili atu ai le mamalu o Ieova.—1 Korinito 10:31.

Pe a uma ona tipiina ma faaiila se taimane, ona tuu loa lea i se mea e faataatia lelei ai ina ia mafai ai ona feilafi mai. I se auala faapena, ua mafai ai ona faaaogaina i tatou e Ieova i tulaga eseese, po o tofiga, pe afai e tatou te “oofu . . . i le tagata fou ua faia [“e tusa i le finagalo o le Atua,” NW] i le amiotonu ma le amio lelei e faamaoni.”—Efeso 4:20-24.

O lena agaigai i luma faaleagaga atonu e lē o se mea e faigofie ona fai, e pei lava o se taimane a o lei faia i ai ni galuega, e seāseā lava ona feilafi mai e pei o se maatāua. Atonu o iai pea ni vaivaiga ia i tatou e manaomia ona faatea ese, suia o tatou manatu e uiga i le faatinoina o tiute tauave, po o lo tatou faamalolosi foi e agaʻi i luma nai lo o lo tatou nofoai faaleagaga. Ae e mafai lava ona tatou agaigai i luma pe afai tatou te mananao moni i ai, talu ai e mafai e Ieova le Atua ona aumai ia i tatou ‘le malosi e sili atu nai lo o le malosi masani.’—2 Korinito 4:7; Filipi 4:13.

E Faamalosia e Ieova Ana Auauna

O le tipiina o taimane, e manaomia ai le mautinoa ona ua maua le malamalama saʻo, talu ai e uma loa ona tipi ese se vaega o le taimane lea e lei faalamolemoleina, e masani lava ona lē toe aogā. O mea taugata—i nisi taimi e oo atu lava i le 50 pasene o le maatāua e lei tipiina—e tatau ona tipieseina ina ia maua ai le foliga lea e manaomia o le taimane. O i tatou foi, e manaomia le mautinoa lea e maua mai i le malamalama saʻo ina ia mafai ai ona faaleleia o tatou uiga ma agaigai ai i luma faaleagaga. Ae maise lava e tatau ona tatou mautinoa, o le a faamalosia i tatou e Ieova.

Ae peitai, atonu o le a oo ia i tatou se lagona faapea e lei agavaa i tatou, pe manatu foi ua lē mafai ona tatou faia ni mea e sili atu. I aso ua mavae, sa faapena ai foi lagona o auauna faamaoni a le Atua i nisi taimi. (Esoto 3:11, 12; 1 Tupu 19:1-4) Ina ua tofia e le Atua Ieremia e “fai ma perofeta i nuu,” na alaga o ia e faapea: “Faauta, ou te le iloa ona tautala, auā o aʻu o le tama itiiti.” (Ieremia 1:5, 6) Ae e ui lava i lona lē tautalatala, ae sa avea lava Ieremia ma perofeta lototele o lē na faaooina atu feau tuusaʻo i se nuu faalogogatā. Na mafai faapefea lenei mea? Sa ia aʻoaʻoina le faalagolago atu ia Ieova. Na tusia mulimuli ane ai e Ieremia e faapea: “Amuia le tagata o lē faatuatua ia Ieova, o le ua fai Ieova mona faatuatuaga.”—Ieremia 17:7; 20:11.

I aso nei, ua faapena foi ona faamalosia e Ieova i latou o ē tuu atu lo latou faatuatua ia te ia. O Eteuati,a o se tamā e toʻafā lana fanau, o lē sa faatuatuai ona agaigai i luma faaleagaga, sa ia iloa le moni o lenei mea. Ua ia faamatala mai e faapea: “Sa avea aʻu ma Molimau a Ieova mo le iva tausaga, ae e foliga mai ou te lē o agaigai i luma faaleagaga. O le faafitauli, ona sa faaletele se uunaiga sa ia te au, ma sa leai soʻu mautinoa. Ae ina ua ou siitia atu i Sepania, sa ou auai atu i se faapotopotoga toʻa gaogao sa na o le toatasi le toeaina ma le auauna o le faiva e toatasi. Talu ai le manaomia tele o se fesoasoani, na talosaga mai ai le toeaina ia te au ina ia ou taulimaina le tele o tofiga. Sa ou tete a o faia laʻu uluai lauga ma ni vaega i le sauniga. Peitai, sa ou aʻoaʻoina le faalagolago atu ia Ieova. Sa masani lava ona faamālō mai le toeaina ia te au ma aumai fautuaga aogā ina ia mafai ai ona faaleleia loʻu tulaga.

“I le taimi lava e tasi, sa faateleina ai aʻu gaoioiga i le auaunaga i le fanua ma avea o se taimua lelei faaleagaga i loʻu aiga. O le iuga, na matuā uigā ai le upu moni i tagata uma o le aiga, ma sa oo ia te au se lagona o le matuā faamalieina. Ua avea nei aʻu o se auauna o le faiva, ma o loo oʻu galue malosi ina ia ati ae uiga o se ovasia Kerisiano.”

“Ia Toese le Tagata Tuai”

E pei ona iloa e Eteuati, o le agaigai i luma faaleagaga e manaomia ai le faalagolago atu ia Ieova. O se mea tatau foi le atiina ae o le “tagata fou” e pei o Keriso. E mafai faapefea ona faia o lenei mea? O le laasaga muamua, o le “toese” lea o uiga o le tagata tuai. (Kolose 3:9, 10) E pei lava o uiga lē lelei atoatoa, e faapei ona manaomia ona aveesea mai se taimane e lei faamolemoleina ia minerale lē lelei ina ia mafai ai ona avea o se maatāua e feilafi mai, e faapena foi ona tatau ona lafoaia uiga ‘o le lalolagi’ ina ia mafai ai ona susulu atu lo tatou tagata fou.—Kalatia 4:3.

O se tasi o uiga faapena, o le lē manao e talia tiute tauave ona o le fefe ina neʻi tele naua ni mea e manaomia mai ia i tatou. E moni, o le tiute tauave, e manaomia ai ona galue, ae peitai, o se galuega faamalieloto. (Faatusatusa i le Galuega 20:35.) Na ioeina e Paulo e faapea, o le tuutoina atu i le Atua, e manaomia ai lo tatou ‘galulue mamafa ma ia tatou faamalolosi.’ E tatou te faia faapea ma le fiafia, i lona faapea mai, “auā tatou te faamoemoe i le Atua soifua,” o lē na te lē faagalogaloina le galuega ua tatou faia ona o o tatou uso Kerisiano ma isi.—1 Timoteo 4:9, 10; Eperu 6:10.

O nisi o taimane, e iai mea e “maʻaleʻale” ai e māfua mai i le taimi na gaosia ai, ma e manaomia ona taulimaina ma le faaeteete. Ae peitai, ona o le fesoasoani mai se meafaigaluega e taʻua o le polariscope, ua mafai ai e lē o loo faaiilaina le taimane ona iloa atu le pona lea ma mafai ai ona galue ma le taulau manuia i le maatāua. Pe atonu e tatou te pagatia i se mafatiaga i totonu o o tatou tino, po o se faaletonu i o tatou uiga, ona o o tatou talaaga po o se mea matuiā na oo ia i tatou. O le ā se mea e mafai ona tatou faia? Muamua, e manaomia ona tatou ioe o loo ia i tatou lena faafitauli ma taumafai e foia i se auala e sili atu e mafai ai. E tatau ona tatou lafo atu a tatou avega ia Ieova i le tatalo, ma e mafai foi ona sailia le fesoasoani faaleagaga mai se toeaina Kerisiano.—Salamo 55:22; Iakopo 5:14, 15.

O se mafatiaga faapena na aafia ai Nikolao. Ua ia faamatala mai e faapea: “O loʻu tamā na matuā pulea e le ʻava malosi, ma e tele ni mafatiaga na ia faapogaia mo i maʻua ma loʻu tuafafine. Ina ua ou tuua le aʻoga, sa ou auai i le vaegaau, ae o oʻu uiga fouvale sa lei pine ae ou oo ai i ni faalavelave. Na tuuina aʻu i le falepuipui e ofisa pule i le vaegaau ona o loʻu aafia i le faatauina atu o vailaau faasaina, ma i se tasi taimi, na ou tuua ai loʻu tofiga e aunoa ma se faatagaga. Na iu lava ina ou tuua le vaegaau, ae sa iai pea faalavelave ia te au. E ui lava sa faaleagaina loʻu olaga ona o le faaaogaseseina o vailaau faasaina ma le onā, ae sa iai lava loʻu naunau fiafia i le Tusi Paia ma moomoo ina ia iai se fuafuaga aogā i loʻu olaga. Mulimuli ane, na matou feiloai ai ma ni Molimau a Ieova, na suia ai loʻu olaga ma talia le upu moni.

“Ae peitai, sa tele ni tausaga na mavae faatoʻā ou iloa ma faia loa se taumafaiga e faaleleia ai se faaletonu i oʻu uiga. Sa ia te au se lagona o le matuā lē fiafia i le pule ma matuā fulufululele pe a fai mai so o se fautuaga ia te au. E ui lava sa ou manao ina ia faaaogā atoatoa aʻu e Ieova, ae o le vaivaiga lenei na taofiofia ai aʻu. Ae ona o le fesoasoani mai ni toeaina malamalama se toalua, na iu ai ina ou faailoa atu loʻu faafitauli ma amata ona faatatauina a laʻua fautuaga alofa faale-Tusi Paia. E ui lava ina mapuna aʻe sina ita laitiiti i nisi taimi, ae ua mafai nei ona ou pulea loʻu uiga masani o le fouvale. Ou te matuā loto faafetai i le onosai o Ieova i le auala e feutagai ai ma aʻu faapea ma le fesoasoani alofa a toeaina. Ona o loʻu agaigai i luma faaleagaga, na tofia ai aʻu talu ai nei e avea o se auauna o le faiva.”

E pei ona iloa e Nikolao, o le suia o ni uiga ua mauaa e lē faigofie. E tatou te ono fesagai foi ma se luʻi faapena. Atonu pe tatou te soona ilitata. Atonu o loo iai pea ia i tatou se lagona ita i isi, pe atonu ua soona faamamafa nauā foi lo tatou fia tutoatasi. I lea, e ono taofia ai lo tatou agaigai i luma faa-Kerisiano. O tagata e faaiilaina taimane, ua latou iloa se tulaga faapena i maatāua e taʻua o naats. O nei maatāua, o le mea moni o ni maa se lua ua faapipii faatasi ma avea ai ma maa e tasi i le taimi e gaosia ai le taimane. O le iuga la, ua iai i naats ni uiga feteenai se lua ua matuā faafaigata ai ona tipiina le taimane e tusa ma mea o faia aʻe ai. I lo tatou tulaga, ua tatou iloa ai o loo feteenai le “uiga” o le agaga loto naunau ma le “uiga” o le tino lē lelei atoatoa. (Mataio 26:41; Kalatia 5:17) I nisi taimi, atonu e oo ai ia i tatou se lagona o le faavaivai mai le tauiviga, i le manatu e faapea, o le lē lelei atoatoa o lo tatou lava lea uiga masani ma e faaletāua. ‘Ae e ui lava i nei mea uma,’ atonu o le a tatou faapea ane, ‘o loo alolofa mai pea loʻu aiga ma aʻu uo ia te au.’

Ae peitai, afai e tatou te fia auauna i o tatou uso ma faamamaluina lo tatou Tamā faalelagi, e manaomia ‘ona faafouina i tatou i le malosi o loo faagaoioia ai o tatou mafaufau’ e ala lea i le ofuina o le tagata fou. E aogā taumafaiga, e pei ona molimau mai ai Nikolao ma le toatele o isi tagata. Ua iloa e le tagata e faaiilaina le taimane e faapea, o se ila se tasi e mafai ona faaleagaina ai le taimane atoa. E faapena foi pe a faaleamanaia se vaivaiga i o tatou tagata, e mafai ona faaleagaina ai o tatou foliga faaleagaga. O le mea e sili atu ona leaga, o se sese matuiā e ono iu ai i lo tatou paʻū faaleagaga.—Faataoto 8:33.

E Pei o se “Afi” e Mu i Totonu o i Tatou

E saili le tagata faaiila taimane ina ia faatumauina le malamalama i totonu o le taimane. E faia lenei mea e ala i le faatulagaina o itu eseese o le taimane ina ia maua ai se vaaiga felanulanuai pei o se nuanua. I totonu o le taimane, e feemoemoai mai ai le malamalama felanulanuai lea e maua ai le afi lea e mafai ona feilafi ai taimane. E faapena foi ona pei le agaga o le Atua o se “afi” i totonu o i tatou.—1 Tesalonia 5:19; Galuega 18:25; Roma 12:11.

Ae faapefea pe a tatou lagona le manaoga ina ia uunaia faaleagaga? E mafai faapefea ona faia o lena mea? E manaomia ona ‘iloiloina o tatou ala.’ (Salamo 119:59, 60) O le a aofia ai i lenei mea le faailoaina o mea na o loo faagesegese ai i tatou i le faaleagaga, ma iloa ai po o fea gaoioiga faatiokarate e manaomia ona tuliloa ma le matuā filigā. E mafai ona tatou matuā faateleina lo tatou talisapaia faaleagaga e ala i suesuega totino ma le tatalo faatauanau. (Salamo 119:18, 32; 143:1, 5, 8, 10) E lē gata i lea, o le auaufaatasi ma i latou o ē o loo galulue mamafa i le faatuatua, o le a faamalosia atili ai la tatou faaiuga e auauna ma le maelega ia Ieova.—Tito 2:14.

O Luisa, o se tamaitai talavou Kerisiano o lē na faapea mai: “Sa ou mafaufauina le paeonia sauatoa mo le lua tausaga a o lei tusia loʻu igoa e avea o se paeonia, po o sē folafola faataimi atoa o le Malo. Sa leai se mea na taofia ai aʻu, ae talu ai sa ou fiafia lava i loʻu olaga sa iai, ou te lei faia ai foi se taumafaiga ina ia ou alu ese mai ai. Ona faafuasei lea ona maliu o loʻu tamā. Na ou iloa ai, pagā le maʻaleʻale o le olaga ma ou te lē o faaaogaina loʻu olaga i se auala e sili atu ona lelei. O lea na suia ai laʻu vaaiga faaleagaga, sa faateleina laʻu auaunaga, ma avea loa o se paeonia sauatoa. O ē sa fesoasoani faapitoa lava i lenei itu, o uso ma tuafāfine faaleagaga o ē e latou te lagolagoina pea ia fuafuaga mo le auaunaga i le fanua ma i latou o ē e matou te ō faatasi e lē aunoa i le faiva. Sa ou iloa ai e faapea, po o taimi lelei po o taimi faalelelei, e matou te tofu sao uma lava i mea tāua ma sini aogā o la matou aufaatasiga.”

Faamaaiina e Pei Ona Faia e se Uamea

O taimane, o ni mea e masani ona aupito sili ona malō i le lalolagi. I lea, e mafai e le tasi taimane ona tipiina ai le isi taimane. O lenei mea ua faamanatu atu ai i tagata suesue o le Tusi Paia le faataoto lea e faapea mai: “E faamaai e le uamea le uamea. E faapea foi ona faamaai e le tasi tagata i le isi.” (Faataoto 27:17, NW) E mafai faapefea ona “faamaai” se tagata? Atonu e mafai ona taulau manuia se tagata i le faamaaiina o le mafaufau ma le tulaga faaleagaga o le isi, e pei lava ona faaaogaina se fasi uamea e faamaai ai se matānaifi lea na faia mai i le uamea lava lea e tasi. Mo se faataitaiga, pe afai ua oo ina mafatia o tatou mafaufau ona o se mea ua lē fiafia ai, o faalaeiauga mai se tasi tagata e mafai ona matuā faagaeetia ai. O faanoanoaga tatou te fesagai e mafai i lea ona suia ai i se tulaga e sili ona lelei, ma e mafai ona toe faamalosia ai i tatou ma toe faafouina ai le maelega i le galuega. (Faataoto 13:12) Ae maise lava i toeaina o le faapotopotoga, e mafai ona fesoasoani e faamaai i tatou e ala i le saunia o faalaeiauga faale-Tusi Paia ma fautuaga mo le faaleleia. E latou te mulimuli i le mataupu silisili o loo taʻua e Solomona e faapea: “Aʻoaʻo atu i le ua poto e atili poto ai o ia; aʻoaʻo atu i le ua amiotonu e tupu ai pea lona poto.”—Faataoto 9:9.

O le mea moni, o toleniga faaleagaga e alu ai se taimi. Mo le sili atu i le sefulu tausaga, na tufa atu ai e le aposetolo o Paulo lona poto masani ma ana aʻoaʻoga ia Timoteo. (1 Korinito 4:17; 1 Timoteo 4:6, 16) O le taimi umi na toleniina ai e Mose ia Iosua mo le sili atu i le 40 tausaga, na aogā i le nuu o Isaraelu mo se taimi umi. (Iosua 1:1, 2; 24:29, 31) Na feoai faatasi Elisaia ma le perofeta o Elia mo se vaitaimi pe a ma le 6 tausaga, ma maua ai se faavae lelei mo lana lava faiva lea na faia mo le 60 tausaga. (1 Tupu 19:21; 2 Tupu 3:11) I le saunia ma le onosai o toleniga faifai pea, ua mulimuli ai toeaina i le faaaoaoga a Paulo, Mose ma Elia.

O le tuuina atu o se faamālō, o se tasi lea vala tāua o le toleniga. O faaupuga o le talisapaia e faia ma le faamaoni mo le taulimaina lelei o tofiga, po o ni gaoioiga e tatau i ai se faamālō, e mafai ona uunaia ai isi e fia auauna atoatoa i le Atua. O le avatua o se faamālō, e mafai ona atiina ae ai le mautinoa faapea, i se tali mai, o le a uunaia ai se tasi e taumafai e foia ona vaivaiga. (Faatusatusa i le 1 Korinito 11:2.) O le faalaeiauina ina ia agaigai i luma i le upu moni, e mafai foi ona maua mai i le matuā faaaafia o i tatou i le galuega o le talaʻia o le Malo ma isi gaoioiga a le faapotopotoga. (Galuega 18:5) Pe a tofia e toeaina tiute tauave i uso e tusa ai ma lo latou agaigai i luma faaleagaga, ua avatu ai i nei tane se poto masani tāua ma ua faapena ona faamalosia ai lo latou naunau ina ia faaauau pea ona agaigai i luma faaleagaga.—Filipi 1:8, 9.

Mafuaaga Lelei mo le Agaigai i Luma Faaleagaga

O taimane ua manatu i ai tagata o ni mea e matuā tautele. Ua faapena foi ona manatu ia i latou o ē ua auaufaatasi atu nei ma le aiga o tagata tapuai o Ieova i le lalolagi aoao. O le mea moni, ua taʻua e Ieova lava ia i latou na o “mea e manaomia,” pe e “tautele,” mai nuu uma lava. (Hakai 2:7, faamatalaga i le pito i lalo o le mau i le NW) I le tausaga ua mavae, e 375,923 na avea o ni Molimau a Ieova ua papatisoina. Ina ia ogatusa ma lenei faatelega, ua manaomia ai ona ‘matuā faalautele le faleie.’ E ala i le agaigai i luma faaleagaga—ma e ala i le aapa atu mo faaeaga o le auaunaga faa-Kerisiano—e mafai ona faia ai se sao mo le tausia o lenei faatelega.—Isaia 54:2; 60:22.

E lē pei o le tele o isi taimane tautele e teu i totonu o pusa uamea i faletupe ma e seāseā lava ona vaaia, peitai o lo tatou aogā po o le tautele faaleagaga e mafai ona susulu manino atu. Ma a o tatou faaiilaina e lē aunoa ma faaalia uiga faa-Kerisiano, ua tatou faamamaluina ai Ieova le Atua. Na apoapoai atu Iesu i ona soo e faapea: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mataio 5:16) E mautinoa lava, e aumaia ai e lena mea ia i tatou se mafuaaga aogā e agaigai ai i luma faaleagaga.

[Faaopoopoga i lalo]