Ia Outou Feapoapoaʻi
1 Na faia e le aposetolo o Paulo le mea sili na te mafaia e faamalosiau ai i ona uso talitonu. (Galu. 14:19-22) E faapena foʻi ona tatou manatu mamafa pe a feagai o tatou uso ma tulaga faigatā, e tatou te mananaʻo e fesoasoani atu iā i latou. Ua faaalia i le Tusi Paia faapea, e lē na o toeaina ae o tagata uma e tatau ona faaalia le naunau i isi. (Roma 15:1, 2) Seʻi manatu i ni auala se lua e tatou te utagia ai le lapataʻiga: “Ia outou feapoapoaʻi . . . ma ia fefaamāfanafanaʻi.”—1 Tesa. 5:11.
2 Ia Iloa Manaʻoga o Isi: O loo lipotia mai i le Afioga a le Atua faapea o Toreka “ua tele ana galuega lelei ma mea alofa na ia faia.” (Galu. 9:36, 39) Na ia mātauina i latou sa manaʻomia se fesoasoani ma sa ia faia le mea na ia mafai e fesoasoani ai iā i latou. Maʻeu se faataʻitaʻiga lelei tele ua ia faataatia mo i tatou! E te ono iloa o loo manaʻomia e se tagata matua se auala e alu ai i le sauniga. Pe atonu foʻi o loo iai se paeonia e leai se tasi e la te galulue i le auaunaga i se aoauli o aso aunoa. Afai e te iloa se manaʻoga faapena ma ofo atu se fesoasoani talafeagai, seʻi manatu i le faalaeiauina o le a iai i lenā tagata.
3 Talanoaga Faaleagaga: E mafai foʻi ona tatou ati aʻe isi e ala i la tatou tautala. (Efe. 4:29) Na mātauina e se toeaina e iai le poto masani e faapea: “Afai e te manaʻo e avea oe ma se tasi e avatua ni faalaeiauga, ia talanoa atu i mea faaleagaga. Ina ia amata se talanoaga e ati aʻe ai, e te ono faaaogā se fesili faigofie e pei o lenei, ‘Na faapefea ona e aʻoaʻoina le upu moni?’” Ia faaali se naunau moni i tagata talavou i le faapotopotoga. Ia faailoa atu lou manatu mamafa iā i latou ua lotovaivai ma i latou atonu e matamumuli. (Faata. 12:25) Aua neʻi faataga talanoaga e faatatau i mea o loo fiafia i ai le lalolagi e aveesea ai taimi mo talanoaga faaleagaga ma uso talitonu.—Roma 1:11, 12.
4 O le ā sau tala e fai atu e ati aʻe ai isi? I lau lava faitauina o le Tusi Paia ma au suʻesuʻega, pe na e maua se mataupu silisili na faalolotoina ai lou alofa ma le lotofaafetai iā Ieova? Pe na faalaeiauina oe i se mea na e aʻoaʻoina i se lauga i le lautele po o se Suʻesuʻega o se Olomatamata? Pe na pāʻia lou loto i se mea na tupu e faamalosia ai le faatuatua? Afai e te faatāuaina na ʻoa faaleagaga, o le a iai pea iā te oe se mea e faalaeiauina ai e taʻu atu i isi.—Faata. 2:1; Luka 6:45.
5 E ala i le ofoina atu o se fesoasoani talafeagai ma faaaogā tatau o tatou laulaufaiva, seʻi tau ina ia avea ai i tatou ma ē e iai lenei uiga o le feapoapoaʻi.—Faata. 12:18.